TITUS
Lamprecht, Alexander (Strassburger Bearbeitung)
Part No. 70
Previous part

Chapter: 170  
Alexander kämpft gegen Porus (Hydaspes/ Dyaspes)


Verse: 4444       Dô begundiz gân an di nôt,
Verse: 4445    dâ mannelîch den tôt

Verse: 4446    vor sînen ougen sach gereit.
Verse: 4447    mit vil grôzer arbeit

Verse: 4448    Alexander den sînen half
Verse: 4449    Porus in andirhalf

Verse: 4450    manete di môre,
Verse: 4451    alsir wol mugit gehôren:

Verse: 4452    'dirre tûbiles Alexander
Verse: 4453    stellet michil wunder.

Verse: 4454    er ist ein ungehûre man.
Verse: 4455    vil manige bôse list er kan.

Verse: 4456    er tût uns grôze scande:
Verse: 4457    er hât unse elefande

Verse: 4458    verbrant und verjaget.
Verse: 4459    sehet, daz ir nit ne verzaget.

Verse: 4460    denket zô den handen,
Verse: 4461    tiure wîgande,

Verse: 4462    wande er ne mac uns niht gescaden.
Verse: 4463    wir suln strîtis gesaten

Verse: 4464    in und sîne recken
Verse: 4465    mit den brûnen ecken.

Verse: 4466    vil blôde sint di Kriechen.
Verse: 4467    si ne sulens niht geniezen,

Verse: 4468    daz si lûderêre
Verse: 4469    ie durh unse unêre

Verse: 4470    in diz lant torsten comen.
Verse: 4471    si ne gewinnint is niemer fromen.

Verse: 4472    mir ne gebreche daz swert in der hant,
Verse: 4473    si mûzen rûmen mir diz lant.

Verse: 4474    si wênent tumplîche,
Verse: 4475    daz in unsem rîche

Verse: 4476    niht ne sîn sô tûre recken
Verse: 4477    zô den scarfen ecken

Verse: 4478    noh sô kûne wîgande
Verse: 4479    alse in Kriechlande.

Verse: 4480    ih verliese swaz ih hân
Verse: 4481    oder ih verleide in den wân

Verse: 4482    und bringe si der nider.
Verse: 4483    ih ne bringe niemer wider

Verse: 4484    heim gesunt mînen lîb
Verse: 4485    oder ih mache sûhtende wîb

Verse: 4486    dâ heim in irn landen.
Verse: 4487    si mûzen mit scanden

Verse: 4488    von uns hinne rûmen;
Verse: 4489    ouh gebeite ih vil kûme.'

Verse: 4490       Dô der wîse Alexander
Verse: 4491    an den elefanden

Verse: 4492    den sige mit listen gwan,
Verse: 4493    des frowete sih der stolze man.

Verse: 4494    ouh gwan is sîn here grôz
Verse: 4495    einen michelen trôst.

Verse: 4496    di Indi begunden verzagen.
Verse: 4497    si heten michelen scaden

Verse: 4498    vil nâh dâr gewunnen.
Verse: 4499    zesamene si dô sprungen

Verse: 4500    und begunden sih weren
Verse: 4501    ingegen dem kriechischen here

Verse: 4502    und spienen ire hornbogen.
Verse: 4503    uns ne habe daz bûch dan gelogen,

Verse: 4504    sô wêren di Kriechin sigelôs,
Verse: 4505    ne wêre Alexander ir trôst

Verse: 4506    mit den bileden niwit comen.
Verse: 4507    iz comet dicke ze fromen,

Verse: 4508    daz der hêre sîne man
Verse: 4509    ze nôte wol getrôsten kan

Verse: 4510    unde williget mit dem gûte.
Verse: 4511    daz machet in stolzgemûte,

Verse: 4512    und derwider si sûze
Verse: 4513    mit minlîchem grûze,

Verse: 4514    und er ze vorderist an den scaren
Verse: 4515    sîn here selbe tar bewarn.

Verse: 4516       Dô Indi solden verzagen
Verse: 4517    und man si begunde jagen,

Verse: 4518    dô gwan Porus der helt gût
Verse: 4519    einen grimmigen mût.

Verse: 4520    der tûrlîche wîgant
Verse: 4521    under sîn here er dô spranc

Verse: 4522    und manete si vaste zô der nôt.
Verse: 4523    mildiclîche er in bôt

Verse: 4524    phellil unde sîde,
Verse: 4525    golt unde gesmîde.

Verse: 4526    er sprah: 'untrôst nist niet gût.
Verse: 4527    habet manlîchen mût

Verse: 4528    unde weret alse helide
Verse: 4529    uher lant und uher selide,

Verse: 4530    beide gût unde lîb
Verse: 4531    unde kint unde wîb,

Verse: 4532    unde irwirbet êre unde rûm.
Verse: 4533    ne wollint ir des niwit tûn,

Verse: 4534    sô solt ir des gelouben,
Verse: 4535    si sulin vor uheren ougen

Verse: 4536    uhere liebe kint schenden
Verse: 4537    und uns in ellende

Verse: 4538    trîben ûzer dem lande
Verse: 4539    in zêren unde uns ze scanden.

Verse: 4540    durh waz solde wir diz dolen?
Verse: 4541    wir mugin vil wole

Verse: 4542    in wîgis gestaten.
Verse: 4543    weiz got, wir sulin si gesaten

Verse: 4544    strîtis unde vehte.
Verse: 4545    wir habin sô gûte knehte

Verse: 4546    und sô manigen dietdegen,
Verse: 4547    wir suln mit starken swertslegen

Verse: 4548    uns an in rechen
Verse: 4549    und ir scare durhbrechen.

Verse: 4550    si mugin sih uns nit irweren
Verse: 4551    noh den lîb vor uns generen.

Verse: 4552    wir suln in ûf ir laster
Verse: 4553    widerstân michil vaster,

Verse: 4554    dan Darius habe getân,
Verse: 4555    den Alexander hîz slân

Verse: 4556    mortlîchen in sîn palas.
Verse: 4557    hei wî grôz untrûwe daz was.

Verse: 4558    weret ûh, helede gût,
Verse: 4559    und haldet manlîchen mût.

Verse: 4560    ir sult in wîsen
Verse: 4561    daz scarfe brûn îsin.

Verse: 4562    tûre wîgande,
Verse: 4563    gedenket wol zô den handen

Verse: 4564    und lâzet û rûwen
Verse: 4565    Darium mit trûwen

Verse: 4566    unde rechet sînen tôt.
Verse: 4567    warumbe solde wir dise nôt

Verse: 4568    von in langer lîden?
Verse: 4569    joh willent si uns vertrîben

Verse: 4570    ûz von unsem rîche,
Verse: 4571    weret ûh sô frumichlîche,

Verse: 4572    daz man von den môren
Verse: 4573    hernâh sagen hôre,

Verse: 4574    wî si ir lant werten,
Verse: 4575    dô si di Kriechen hereten.

Verse: 4576    ir sult slân unde stechen
Verse: 4577    unde ir schare durhbrechen.

Verse: 4578    swer daz heil gewinnet,
Verse: 4579    daz er hin entrinnet,

Verse: 4580    daz er dâ heime muge sagen,
Verse: 4581    waz er hie gesehen habe,

Verse: 4582    wî si worden entfangen
Verse: 4583    in indischen landen.'

Verse: 4584       Dô Porus dise rede
Verse: 4585    zô sînen heliden getete,

Verse: 4586    dô gewunnen si einen stâten mût.
Verse: 4587    dô was dâ manich helt gût,

Verse: 4588    den niht sô liebis ne was,
Verse: 4589    sô daz si di scarfen sas

Verse: 4590    teilten mit den gesten.
Verse: 4591    ze wîge si sih dô rusten,

Verse: 4592    wande aller manne gelîch
Verse: 4593    gehugete an daz volcwîch.

Verse: 4594    manic irwarb dâ den tôt.
Verse: 4595    dâ mohte man scowen daz blût

Verse: 4596    von den Kriechin fliezen.
Verse: 4597    di môre ouh dâ liezen

Verse: 4598    manigen urlouges man.
Verse: 4599    swer mit dem lîbe dannen quam

Verse: 4600    der mohtis imer frô sîn.
Verse: 4601    di kuninge fâhten under in

Verse: 4602    unz ane den dritten tac,
Verse: 4603    sô nieman dâ ne gesach

Verse: 4604    blôdis mannis gebêre.
Verse: 4605    wî vil der wêre,

Verse: 4606    di dâ lâgen irslagen,
Verse: 4607    daz ne hôrtih noh nie gesagen.

Verse: 4608    der den grôzern scaden dâ gwan,
Verse: 4609    daz was Alexander und sîne man.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.