TITUS
Lamprecht, Alexander (Strassburger Bearbeitung)
Part No. 66
Previous part

Chapter: 165  
Alexanders Krieger meutern: Persien ist genug


Verse: 4058       Dô di brûtloft was gelant,
Verse: 4059    dô quam ein bote alzehant,

Verse: 4060    der sagete Alexandro sus:
Verse: 4061    'hî comet der kuninc Porus

Verse: 4062    mit micheleme gelfe
Verse: 4063    Dario ze helfe.'

Verse: 4064    daz was Alexandro ungemach.
Verse: 4065    dô der bote diz gesprach,

Verse: 4066    dô sameneter sîne heriscraft
Verse: 4067    und vôr mit micheler craft

Verse: 4068    ingagen im in Indiam
Verse: 4069    uber eine heide freisam.

Verse: 4070    dâ liden si michil ungemach
Verse: 4071    von der sunnen den tach

Verse: 4072    und des nahtis von den wormen.
Verse: 4073    ze râte si dô worden,

Verse: 4074    si ne mohten dise leit
Verse: 4075    unde sulich arbeit

Verse: 4076    langer niht verlîden:
Verse: 4077    ze kinden und ze wîben

Verse: 4078    wolden si heim kêren.
Verse: 4079    si sprâchen, ir hêre

Verse: 4080    wâre ein wunderlîch man,
Verse: 4081    waz er sûhte in Indiam.

Verse: 4082    si sprâchen almeistich,
Verse: 4083    si hêten geleistit,

Verse: 4084    daz si ime swôren,
Verse: 4085    dô si von lande fûren:

Verse: 4086    si hulfin ime bedwingen
Verse: 4087    mit ir jungelingen

Verse: 4088    Darium den rîchen
Verse: 4089    vil ernistlîchen,

Verse: 4090    beide vân oder slân.
Verse: 4091    'nû habe wir diz getân',

Verse: 4092    sprâchen si algemeine
Verse: 4093    grôz unde cleine,

Verse: 4094    'nû gebrichit uns des lîbes,
Verse: 4095    ouh verdrûzit uns des wîges.

Verse: 4096    unse lant stêt umbewart.
Verse: 4097    waz ob manz brinnit unde heret,

Verse: 4098    sô nist dâ nieman, der iz were.'
Verse: 4099    dô wolde daz here

Verse: 4100    almeistic wider kêren
Verse: 4101    unde geswîchen ir hêren.

Verse: 4102       Ouh sprâchen si gelîche,
Verse: 4103    wolder dihein rîche

Verse: 4104    vorder mêr bedwingen,
Verse: 4105    sô môster gewinnen

Verse: 4106    nûwe urlouges man.
Verse: 4107    si hêtens sô vil getân,

Verse: 4108    daz manz wol mohte scowen.
Verse: 4109    si sprâchen: 'wir sîn sô verhowen,

Verse: 4110    daz uns verdrûzit daz wir leben.
Verse: 4111    er mach uns wol urlob geben

Verse: 4112    und lâze uns wider kêren.'
Verse: 4113    Alexander der hêre

Verse: 4114    der vernam ir gebêre.
Verse: 4115    des wart sîn herze swêre

Verse: 4116    und gienc ûf einen berc stân
Verse: 4117    und bat dar zô ime gân,

Verse: 4118    di mit ime wâren comen;
Verse: 4119    wander hête vernomen

Verse: 4120    rehte ir aller willen.
Verse: 4121    er sprah: 'vil liebe gesellen,

Verse: 4122    saget mir durh uher gûte
Verse: 4123    rehte uher gemûte.

Verse: 4124    wollet ir von mir scheiden
Verse: 4125    an dirre wûsten heiden,

Verse: 4126    daz ist mir herzelîchen leit,
Verse: 4127    wande ir lâzt mih hie in arbeit.

Verse: 4128    uns sint die Perses sô gram;
Verse: 4129    wir hân in leidis vil getân,

Verse: 4130    des ne hânt si niht vergezzen.
Verse: 4131    helede vermezzen,

Verse: 4132    nû itz sol sprechen'
Verse: 4133    mugen si sih gerechen,

Verse: 4134    dar zô sint si vil gereit.
Verse: 4135    ih sagiz û mit der wârheit,

Verse: 4136    vernement si disen unmût,
Verse: 4137    den ir âne nôt tût,

Verse: 4138    sô sîn wir alle verlorn,
Verse: 4139    iz sî uns lieb oder zorn.

Verse: 4140    ih ne spreche diz darumbe niet,
Verse: 4141    ist û heim ze lande lieb,

Verse: 4142    ih mûz û varen lâzen:
Verse: 4143    ih ne were û niht di strâzen.

Verse: 4144    doh gedenkit dar ane,
Verse: 4145    wes ih û nû hie mane:

Verse: 4146    ob ir dâ heime ûwit sagit,
Verse: 4147    des ir hie getân habit,

Verse: 4148    daz ist alliz ein wiht,
Verse: 4149    ir ne habit hie getân niht.

Verse: 4150    ih was jener, der dâ vaht.
Verse: 4151    sît ir rehte bedâht,

Verse: 4152    ir mûzt der wârheite jehen;
Verse: 4153    wandir hât iz alliz wol gesên,

Verse: 4154    daz iz alliz was mîn rât,
Verse: 4155    swaz ir hie getân hât.

Verse: 4156    mir ne sah nie nehein man
Verse: 4157    in dem sturme ubir hôer gân,

Verse: 4158    noh ubir rucke zîhen
Verse: 4159    noh zagelîchen dannen flîhen.

Verse: 4160    ih vaht imer zevorn.
Verse: 4161    âne scult hân ih verlorn

Verse: 4162    uher aller frûntscaft.
Verse: 4163    er was ubile bedâht,

Verse: 4164    der ûh dar ane brâht hât.
Verse: 4165    nû sol is werden der rât,

Verse: 4166    der is nû werden mac:
Verse: 4167    ih gelebe lîhte noh den tac,

Verse: 4168    mûz ih dar under genesen
Verse: 4169    und mûz ih dan mit gnâden wesen,

Verse: 4170    sô gwinnih noh di man,
Verse: 4171    di mir suln bî stân.'

Verse: 4172       Dô Alexander diz gesprach,
Verse: 4173    al sîn here, daz dâ lach,

Verse: 4174    scamete sih durh nôt.
Verse: 4175    iz wart bleich unde rôt,

Verse: 4176    wande si wolden kêren
Verse: 4177    von irem lieben hêren.

Verse: 4178    si bejâhen ir sculde
Verse: 4179    und er gab in sîne hulde.

Verse: 4180    zehant si ûf sprungen,
Verse: 4181    frôlîchen si sungen.

Verse: 4182    ane bunden si ir vanen
Verse: 4183    unde sprâchen alle samen,

Verse: 4184    si ne wolden von der stunt,
Verse: 4185    di wîle si wâren gesunt,

Verse: 4186    ime niemer mê geswîchen.
Verse: 4187    si hûbin sih frôlîchen

Verse: 4188    und fûren hin in Indiam.



Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.