TITUS
Lamprecht, Alexander (Strassburger Bearbeitung)
Part No. 67
Previous part

Chapter: 166  
Porus' Brief an Alexander


Verse: 4189    zegegen si dô quam

Verse: 4190    ein bote starke gerant
Verse: 4191    und fûrte briebe in daz lant,

Verse: 4192    di sante dar in Porus.
Verse: 4193    dar ane stunt gescriben sus:

Verse: 4194       'Hie veret after lande
Verse: 4195    der roubêre Alexander

Verse: 4196    und gewinnet lutzele statelîn.
Verse: 4197    si mugen wol vertorben sîn,

Verse: 4198    di ime daz weren solden.
Verse: 4199    vil ungerne ihs ime wolde

Verse: 4200    ze langer wîle gestaten.
Verse: 4201    ih wêne, ih wil in gesaten

Verse: 4202    sturmis unde vehte.
Verse: 4203    mit manigem snellen knehte

Verse: 4204    come ih ime ingegene,
Verse: 4205    mit mînen snellen degenen.

Verse: 4206    ih wil in bringen inne,
Verse: 4207    daz ih sîne minne

Verse: 4208    niemer ne gesûche,
Verse: 4209    wandih ir nit ne rûche.

Verse: 4210    mir ne geswîchen di mîne,
Verse: 4211    ih trîbin und di sîne

Verse: 4212    wider heim ze lande.
Verse: 4213    wes wânet Alexander?

Verse: 4214    ih ahte ûffe sîne rede
Verse: 4215    lutzil und ûf sînen fride.

Verse: 4216    her fûr ouh wîlen in diz lant
Verse: 4217    Dionisius der wîgant,

Verse: 4218    ein kuninc mit grôzeme here.
Verse: 4219    manic tûsint was dere,

Verse: 4220    di mit ime quâmen
Verse: 4221    und scaden hie nâmen.

Verse: 4222    si worden alle sigelôs.
Verse: 4223    des heres, des er hie verlôs,

Verse: 4224    des was unmâzlîchen vile.
Verse: 4225    ih wil bestân mit nîtspile

Verse: 4226    disen selben roubêre.
Verse: 4227    joh mûwet mih vil sêre,

Verse: 4228    daz ih dise rede tûn sal.
Verse: 4229    iz weiz doch die werlt al,

Verse: 4230    daz di Macedonien
Verse: 4231    deme hêren von Indien,

Verse: 4232    hie vore zins sanden
Verse: 4233    von irn landen,

Verse: 4234    biz Grelus wart geborn.
Verse: 4235    daz wir den zins dâ verlorn,

Verse: 4236    daz was uns ummêre.
Verse: 4237    wir sprâchen, daz dâ ne wêre

Verse: 4238    niht sulhis, sô wir wolden,
Verse: 4239    durh daz wir setzen solden

Verse: 4240    lîb und gût an ein heil
Verse: 4241    und ouh an ein urteil.

Verse: 4242    umbe dise rede wânich
Verse: 4243    wurde wir des zinsis ânich.

Verse: 4244    Alexander ih dir doh râte
Verse: 4245    baz dan du mir tâtes,

Verse: 4246    ob mirs durft wâre.
Verse: 4247    ih râte dir zwâre,

Verse: 4248    daz du mih êres
Verse: 4249    unde wider kêres

Verse: 4250    heim zô dînen lande,
Verse: 4251    ê dir dihein scande

Verse: 4252    begagene von mir.
Verse: 4253    daz râtih trûwelîche dir.

Verse: 4254    ne kêristu niwit widere,
Verse: 4255    ih gesetze dih vil nidere

Verse: 4256    von allen dînen êren;
Verse: 4257    unde dâ du hêre

Verse: 4258    niwit an ne maht wesen,
Verse: 4259    daz lâz nâh mînen râte wesen.

Verse: 4260    ouh sagih dir wêrlîche:
Verse: 4261    daz du mir mîn rîche

Verse: 4262    wênis an gewinnen,
Verse: 4263    daz comet von unsinnen;

Verse: 4264    du mûst mirz doh lâzen.
Verse: 4265    ih mûze sîn verwâzen,

Verse: 4266    ob ihz dir niht ne were
Verse: 4267    mit mînem kreftigen here.'

Verse: 4268       Dô Alexander der kûne man
Verse: 4269    Poren botescaft vernam

Verse: 4270    unde er sînen brieb gelas,
Verse: 4271    vil harte smâhe iz ime was.

Verse: 4272    er sprah zô sînen allen:
Verse: 4273    'wî sol uns diz gevallen?

Verse: 4274    woldir tûn mînen rât,
Verse: 4275    tût ane uher sarwât.

Verse: 4276    wir suln dem stolzen Poren
Verse: 4277    mit den swerten lônen,

Verse: 4278    daz er Dionîsen
Verse: 4279    den frumigen und den wîsen

Verse: 4280    ie torste bestân:
Verse: 4281    daz sol ime an den leben gân.

Verse: 4282    ouh was des luzele nôt,
Verse: 4283    daz er uns her enbôt

Verse: 4284    sô smêlîche eine botescaft.
Verse: 4285    mir ne geswîche mîne craft,

Verse: 4286    er solis ze wandele stân.'
Verse: 4287    daz lobeten alle sîne man.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.