TITUS
Lamprecht, Alexander (Strassburger Bearbeitung)
Part No. 52
Previous part

Chapter: 118  
Alexander besiegt Darius (Gaugamela/ Erbela)


Verse: 3202       Alexandris gesellen
Verse: 3203    worden von disen bîspellen

Verse: 3204    vil wunderlîchen frô.
Verse: 3205    vil kûme irbeiten si dô,

Verse: 3206    biz man begunde sturmen.
Verse: 3207    Darius von sînen burgen

Verse: 3208    reit zô dem wâge,
Verse: 3209    der dâ heizet Strâge.

Verse: 3210    des nahtes fûren si dar ubir.
Verse: 3211    der quam aber lutzil wider,

Verse: 3212    wande si wurden irslagen.
Verse: 3213    ih wil û zwâren sagen.

Verse: 3214    sân des morgenis frû
Verse: 3215    ze wîge gareten si sih dô,

Verse: 3216    beidenthalben di here,
Verse: 3217    und brummen alse daz mere

Verse: 3218    di alden mit den jungen,
Verse: 3219    dâ si ze samene drungen.

Verse: 3220       Alexander der hêrre
Verse: 3221    der was der êrre,

Verse: 3222    der dâ zô der zît
Verse: 3223    irhûb den freislîchen strît.

Verse: 3224    ûf Bucifale er reit.
Verse: 3225    nie man ne bescreit

Verse: 3226    dichein ros alsô gût.
Verse: 3227    dar zô stunt ime der mût,

Verse: 3228    daz er den sige irwurbe
Verse: 3229    oder degintlîchen sturbe.

Verse: 3230    vil wole half ime daz,
Verse: 3231    daz er sô wol gare was

Verse: 3232    nâch deme kriechischeme site.
Verse: 3233    di ingegen im quâmen geriten,

Verse: 3234    di sprâchen, er wêre ein got.
Verse: 3235    von beidenthalben flouch daz scoz

Verse: 3236    alsô dicke sô der snê.
Verse: 3237    den recken wart dâ vil wê.

Verse: 3238       Dâ wart ein michil schal.
Verse: 3239    man blies di herehorn ubir al

Verse: 3240    und di trummen zô dem wîge.
Verse: 3241    Darius mit den sînen

Verse: 3242    mûste durh nôt vehten.
Verse: 3243    er brâhte manigen Persen

Verse: 3244    zô deme strîte.
Verse: 3245    di wâren gesamenet wîte

Verse: 3246    und heten manlîchen mût.
Verse: 3247    und alse der helt gût

Verse: 3248    Alexander diz vernam,
Verse: 3249    dô maneter sîne getrûwe man,

Verse: 3250    di ime wâren einmûte
Verse: 3251    zaller sîner nôte,

Verse: 3252    daz si sih wol bedêhten
Verse: 3253    und wâren gûte knehte,

Verse: 3254    wande si mit rehte
Verse: 3255    umbe den zins solden vehten,

Verse: 3256    dâ si Darius zô dwanc.
Verse: 3257    dô hûb sih ze hant

Verse: 3258    di kriechische manige
Verse: 3259    den Persen ingegene.

Verse: 3260    mit micheler frevele
Verse: 3261    quâmen si ze samene

Verse: 3262    bî dem Strâge an der ouwen.
Verse: 3263    wer mohte ie bescowen

Verse: 3264    zwei sô hêrlîchen scaren.
Verse: 3265    dâ was maniger mûter barn.

Verse: 3266    dâ si ze samene quâmen
Verse: 3267    und grôzen scaden nâmen,

Verse: 3268    dâ was daz felt vil breit
Verse: 3269    mit den tôten ubirspreit.

Verse: 3270    si slûgen unde stâchen,
Verse: 3271    sô daz di schefte brâchen.

Verse: 3272    dô griffen di recken
Verse: 3273    zô den scarfin ecken

Verse: 3274    und vohten mit nîde.
Verse: 3275    alle di volcwîge,

Verse: 3276    sturme unde strîte,
Verse: 3277    di von Darien gezîte

Verse: 3278    al biz her sint geschît,
Verse: 3279    di ne glîchen dar zô niet,

Verse: 3280    dâ Alexander der helt balt
Verse: 3281    Dario den zins galt.

Verse: 3282    daz der zins ie gedâht wart,
Verse: 3283    daz gerou manigen in der vart,

Verse: 3284    wande si in dem blûte swebeten,
Verse: 3285    di dannoh gerne lebeten.

Verse: 3286       Der sturm was grimme unde hart.
Verse: 3287    dâ wart manich helm scart

Verse: 3288    und manige brunje durhstochen,
Verse: 3289    daz dâ durh quam geflozzen

Verse: 3290    daz blût den lîb al ze tale.
Verse: 3291    man sah dâ in dem wale

Verse: 3292    manigen schilt verhowen.
Verse: 3293    dâ mohten man scowen

Verse: 3294    di kriechischen recken
Verse: 3295    mit den scarfen ecken

Verse: 3296    di helme verscrôten.
Verse: 3297    si frumeten manigen tôten

Verse: 3298    dem rîchem kuninge Dario,
Verse: 3299    der vil starke clagete dô,

Verse: 3300    daz er ze Kriechlande
Verse: 3301    nâh deme zinse ie gesande.

Verse: 3302       Der Persen kuninc hêre,
Verse: 3303    der vil grôzir êre

Verse: 3304    wielt ubir manich rîche,
Verse: 3305    der trûrte grôzlîche,

Verse: 3306    daz der wunderlîche man
Verse: 3307    durh sîn laster ûz quam.

Verse: 3308    daz begunder sêre clagen
Verse: 3309    wander sah in den walphade

Verse: 3310    manigen helt gûten
Verse: 3311    beflozzen mit dem blûte,

Verse: 3312    sîne tûrlîchen recken,
Verse: 3313    di ime dâ vore dicke

Verse: 3314    hulfen sîner êren.
Verse: 3315    sint niemer mêre

Verse: 3316    ne wart Darius frô,
Verse: 3317    daz bûch sagit uns alsô,

Verse: 3318    wande dâ viel manic man,
Verse: 3319    der nie wunde ne gwan

Verse: 3320    von stiche noh von slage.
Verse: 3321    ih wil û wêrlîchen sagen:

Verse: 3322    si wâren gûte knehte
Verse: 3323    und sturben durh ir vehten

Verse: 3324    in Darien halbe.
Verse: 3325    dô man si gezalde,

Verse: 3326    zwei hundirt tûsunt der was,
Verse: 3327    der nie nehein ne gnas;

Verse: 3328    ân di, di in den Strâge
Verse: 3329    ouh vertrunken lâgen:

Verse: 3330    der ne mohte man neheine zale
Verse: 3331    gescrîben noch gesagen wale.

Verse: 3332       Alse Darius gesah,
Verse: 3333    daz sîner sô vil tôt lah,

Verse: 3334    beide gewunt und irslagen,
Verse: 3335    dô begunder irzagen.

Verse: 3336    er was der êriste man,
Verse: 3337    der dâ flîhen began.

Verse: 3338    des gewan sîn her grôz
Verse: 3339    vil michelen untrôst.

Verse: 3340    si fluhin al gemeine,
Verse: 3341    man mah noh hûte weinen

Verse: 3342    den mort, der dâ gescach.
Verse: 3343    Alexander reit in alliz nâh.

Verse: 3344    und slûch si nider alsein vê.
Verse: 3345    si schrûwen ach unde wê.

Verse: 3346       Dô daz mêre dô quam
Verse: 3347    ubir alle Persiam,

Verse: 3348    daz der kuninc wêre sigelôs,
Verse: 3349    dô wart dâ michil untrôst

Verse: 3350    ubir alle di lant,
Verse: 3351    dâ der kuninc was bekant.

Verse: 3352    der jâmer wart dâ vil grôz.
Verse: 3353    vil manic sînen genôz

Verse: 3354    weinete unde clagete,
Verse: 3355    den er verlorn habite.

Verse: 3356    der vater weinete sîn kint,
Verse: 3357    daz wâren jâmerlîche dinc;

Verse: 3358    manic man sînen eidem,
Verse: 3359    wande ime was vil leide; -

Verse: 3360    di swester irn brûder,
Verse: 3361    irn lieben sun di mûter.

Verse: 3362    ouh weinte di irn amîs,
Verse: 3363    di dâ stille was gehît.

Verse: 3364    di frowen weinten irn trût,
Verse: 3365    den si minneten ubirlût.

Verse: 3366    di man ze manne solde geben,
Verse: 3367    der leidete daz leben;

Verse: 3368    si weinte alsô sêre
Verse: 3369    alse si gehît wêre.

Verse: 3370    di jungen an der strâzen,
Verse: 3371    dâ si ze spile sâzen,

Verse: 3372    di weineten vil sêre
Verse: 3373    ir mâge unde ir hêren.

Verse: 3374    di kint an den wagen,
Verse: 3375    sô si weinen sâgen

Verse: 3376    und alse manz in gezalde,
Verse: 3377    si weineten alse di alde

Verse: 3378    und lebeten âne wunne.
Verse: 3379    di mâne unde di sunne

Verse: 3380    di verwandelôten ir lieht
Verse: 3381    und ne wolden schînen nieht

Verse: 3382    und ne wolden niet besehen
Verse: 3383    den mort, der dâ was geschên.

Verse: 3384       Darius der blôde man
Verse: 3385    starke flîhende quam

Verse: 3386    von mannen und von mâgen
Verse: 3387    ubir den wâc Strâgen

Verse: 3388    und sînes heris ein michil teil.
Verse: 3389    verlorn heter daz heil.

Verse: 3390    er quam ûf sînen sal.
Verse: 3391    daz lût weinte ubir al

Verse: 3392    und clagete grôzlîchen
Verse: 3393    Darium den rîchen.

Verse: 3394    ûf sînen estrich er sih warf.
Verse: 3395    er clagete, daz er niet ne starb.

Verse: 3396    ime wêre lieber der tôt,
Verse: 3397    dan er sus wêre gelasterôt.

Verse: 3398    er clagete, daz er ie genas,
Verse: 3399    und sprah: 'waz hilfit mir, daz ih was

Verse: 3400    kuninc ubir manige lant,
Verse: 3401    di ih selbe bedwanc

Verse: 3402    wîlen mit mîner frumicheit.
Verse: 3403    zô mîneme dieniste was gereit

Verse: 3404    manic lant in dem mere.
Verse: 3405    manic dûsint was dere,

Verse: 3406    di mir zins gâben
Verse: 3407    und mih doh nie gesâgen.

Verse: 3408    swâ si gehôrten mînen namen,
Verse: 3409    dâ dieneten si mir alle samen.

Verse: 3410    nû bin ih verwunnen,
Verse: 3411    vil kûme her entrunnen

Verse: 3412    von einen kriechischen man.
Verse: 3413    von mînen sunden daz leider quam

Verse: 3414    und durh mînen ubirmût.
Verse: 3415    Ungelucke, waz ir mir leides tût!

Verse: 3416    Fortuna di ist sô getân:
Verse: 3417    ir schîbe lâzet si umbegân.

Verse: 3418    si hilfit den armen, sô si wile,
Verse: 3419    den rîchen hât si ze spile;

Verse: 3420    umbeloufet ir rat,
Verse: 3421    dicke vellet, der dâ vaste saz.'




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.