TITUS
Lamprecht, Alexander (Strassburger Bearbeitung)
Part No. 53
Previous part

Chapter: 124  
Darius' 4. Brief an Alexander (Friedensangebot)


Verse: 3422       Darius sih dô ûf hûb
Verse: 3423    unde trôste sînen mût.

Verse: 3424    er dihte selbe einen brieb.
Verse: 3425    mit sîner hant er in screib.

Verse: 3426    er santin Alexandro.
Verse: 3427    dar ane stunt gescriben sô:

Verse: 3428    'frô wis unde gesunt,
Verse: 3429    Alexander, zaller stunt.

Verse: 3430    iz ist mir nû alsô comen,
Verse: 3431    wiltu mir scaden oder fromen,

Verse: 3432    des hâstu gûten gwalt.
Verse: 3433    mir is dicke gezalt,

Verse: 3434    daz iz dem manne wol stât,
Verse: 3435    alsime sîn heil vore gât,

Verse: 3436    daz er sîne mâze
Verse: 3437    an gûten dingen lâze.

Verse: 3438    nit ne verhebe du des dih,
Verse: 3439    daz du hâs verwunnen mih.

Verse: 3440    iz kumet dir rehte.
Verse: 3441    nû gedenc ane mîn geslehte

Verse: 3442    unde an mînen gwalt.
Verse: 3443    swer mir daz hête gezalt,

Verse: 3444    daz mir sus solde geschên,
Verse: 3445    ih ne hêtis ime niet gejehen,

Verse: 3446    wandih ne mohtis niht getrûwen.
Verse: 3447    mir mûz nû balde rûwen,

Verse: 3448    daz ih unde mîne man
Verse: 3449    den kuninc Xersem ie verwan,

Verse: 3450    den rîchen unde den frumigen
Verse: 3451    und andre manige kuninge,

Verse: 3452    ih nam in lant unde gût.
Verse: 3453    owî wî wê mir nû daz tût,

Verse: 3454    daz ih sol lîden
Verse: 3455    den spot von den wîben.

Verse: 3456    iedoch sô verwêne ih mih,
Verse: 3457    daz du tûst sô kuninclîch,

Verse: 3458    swen sô du verwinnes,
Verse: 3459    wande du dih wol versinnes,

Verse: 3460    di lâzestu sunderlingen
Verse: 3461    an dîne gnâde dingen

Verse: 3462    und lâzes si dir sîn undertân
Verse: 3463    und di lant vor dir hân.

Verse: 3464    wiltu alsus mit mir tûn,
Verse: 3465    des hâstu êre unde rûm:

Verse: 3466    sô gebe ih dir den meisten scaz,
Verse: 3467    der mîner forderen was,

Verse: 3468    den si zesamene trûgen
Verse: 3469    und in der erde grûben.

Verse: 3470    der ligit zô Mynjatan,
Verse: 3471    ze Susis und ze Batran.

Verse: 3472    daz saltu wizzen âne wân,
Verse: 3473    daz nie nehein man,

Verse: 3474    der ie an diser werlt quam,
Verse: 3475    sô vil scazzis gewan.

Verse: 3476    dar zô vernim noh mêre:
Verse: 3477    ih wil dih machen hêren

Verse: 3478    ze Medentrîche ubir daz lant,
Verse: 3479    Persiam gebih an dîne hant.

Verse: 3480    du maht dih frowen dirre geben
Verse: 3481    di wîle di du solt leben.

Verse: 3482    dar zô jehen ih dir des siges.
Verse: 3483    nû bitte ih al ze spâte frides.'

Verse: 3484       Alexander las disen brieb.
Verse: 3485    ein furste ime al di wîle riet,

Verse: 3486    daz er nême alliz daz
Verse: 3487    beide lant unde scaz

Verse: 3488    und Darium lieze leben
Verse: 3489    und hieze ime wider sîn wîb geben

Verse: 3490    und sîne mûter dar zô.
Verse: 3491    Alexander sprah dô,

Verse: 3492    daz er des nit ne tête,
Verse: 3493    wandime des wunder hête,

Verse: 3494    ob er si ime sande
Verse: 3495    wider heim ze lande,

Verse: 3496    ob er si nemen wolde.
Verse: 3497    diz sprah er durh di sculde,

Verse: 3498    durh andris neheine nôt,
Verse: 3499    wander ime dâ vore enbôt,

Verse: 3500    er zugis wol ze râte,
Verse: 3501    waz er dâ mite tâte.




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.