TITUS
Lamprecht, Alexander (Strassburger Bearbeitung)
Part No. 51
Previous part

Chapter: 116  
Alexander schleicht sich verkleidet bei Darius ein


Verse: 2960       Alexander was von der stat,
Verse: 2961    dâ Darius mit here lah,

Verse: 2962    funf tageweide.
Verse: 2963    dâ enzwischen was ein heide

Verse: 2964    unde ein vil tiefer wâch.
Verse: 2965    mit sînen fursten nam er rât,

Verse: 2966    wâ er einen man funde,
Verse: 2967    den er ze boten sande

Verse: 2968    deme kuninge Dario
Verse: 2969    und ime sagete dar zô,

Verse: 2970    daz er daz wol vernême,
Verse: 2971    daz er ime quême

Verse: 2972    mit dem kriechischeme here:
Verse: 2973    ob er sîn lant wolde weren,

Verse: 2974    daz er griffe dar zô
Verse: 2975    beide spâte unde frô,

Verse: 2976    wander wêre sicherlîche
Verse: 2977    mitten in sînem rîche.

Verse: 2978       Der rât der wart ûf gelaht.
Verse: 2979    twerhes ubir di naht

Verse: 2980    dô troumete Alexandro, wî ein man
Verse: 2981    ginge vor ime stân

Verse: 2982    in allen dem gebêre,
Verse: 2983    alser sîn vater wêre.

Verse: 2984    in den bûchen hân ih gelesen,
Verse: 2985    daz ouh sîn vater solde wesen

Verse: 2986    ein gwaldiger got.
Verse: 2987    daz ist der leien spot,

Verse: 2988    di des niht ne wizzen,
Verse: 2989    waz man tût mit listen.

Verse: 2990    manic list ist sô getân,
Verse: 2991    swer is flîz wille hân,

Verse: 2992    wil er got verkiesen
Verse: 2993    und die sêle verliesen,

Verse: 2994    der tûbel hilfet ime dar zô,
Verse: 2995    daz er spâte unde frô

Verse: 2996    tûn mah besunder
Verse: 2997    vil manicfalden wunder.

Verse: 2998       Vil manichfalder liste
Verse: 2999    Philippus vil wiste,

Verse: 3000    der Alexandris vater was,
Verse: 3001    alsihz an den bûchen las.

Verse: 3002    dâ er an sînem bette lach,
Verse: 3003    in dem troume er ime zô sprah:

Verse: 3004    'Alexander, liebe sune,
Verse: 3005    durh dih bin ih here comen.

Verse: 3006    ih wil dir lâzen schîn,
Verse: 3007    daz ih ein gwaldich got bin:

Verse: 3008    ih wil dir sîn bereite
Verse: 3009    zô dîner arbeite.

Verse: 3010    dir ne mac nieman gescaden,
Verse: 3011    di wîl ih dir holt herze tragen.

Verse: 3012    tû du den rât mîn:
Verse: 3013    du salt selbe bote sîn

Verse: 3014    hin zô Dario.'
Verse: 3015    inrihte irwahter dô

Verse: 3016    und sagetiz sînen mannen.
Verse: 3017    dô rieten si ime alle,

Verse: 3018    daz er wêre dem gote
Verse: 3019    gevolgich ze sînem gebote.

Verse: 3020       Alexander dô mit ime nam
Verse: 3021    einen einigen man,

Verse: 3022    der hîz Eomulus.
Verse: 3023    si riten zwei snelle ros

Verse: 3024    und fûrten daz dritte in der hant
Verse: 3025    und riten verre ubir lant

Verse: 3026    und quâmen zô einem wâge,
Verse: 3027    der was geheizen Strâge.

Verse: 3028    der flûzit allen den tach
Verse: 3029    und irfrûsit inne der naht,

Verse: 3030    daz man dar ubir mohte rîten.
Verse: 3031    Alexander hîz dô bîten

Verse: 3032    sînen man mit einen volen.
Verse: 3033    al eine reit er dar ubir

Verse: 3034    und quam des tages an di stat,
Verse: 3035    dâ Darius lach

Verse: 3036    mit sînen grôzen here.
Verse: 3037    jene sprâchen: 'wer ist dere?

Verse: 3038    er glîchet sêre einem gote.'
Verse: 3039    er sprah wider: 'ih bin ein bote,

Verse: 3040    mîn hêre ist Alexander.
Verse: 3041    den nimet michil wunder,

Verse: 3042    wes Darius sûme,
Verse: 3043    wander gebeitet sîn vil kûme.'

Verse: 3044       Dô lîz ein Daries man
Verse: 3045    den boten vor den kuninc gân,

Verse: 3046    daz er wurbe sîne botescaf.
Verse: 3047    zô Dario er dô sprah:

Verse: 3048    'man saget, Daris edele kuninc,
Verse: 3049    du sîs gwaldich unde frumich

Verse: 3050    und stolz dînes gemûtis
Verse: 3051    und milde dînis gûtis.

Verse: 3052    daz ne schînet niwit wol.
Verse: 3053    vernem, waz ih dir sagen sol:

Verse: 3054    dir enbûtit Alexander
Verse: 3055    und manic ander

Verse: 3056    enbietent dir besunder,
Verse: 3057    si nême des michil wunder,

Verse: 3058    wes du sô lange bîtes,
Verse: 3059    daz du niht ne rîtes

Verse: 3060    und riches di scande,
Verse: 3061    di dîne vîande

Verse: 3062    dir tûn allir tagelîche.
Verse: 3063    du sûmes zagelîche.

Verse: 3064    dir sint di burge und daz lant
Verse: 3065    beroubit unde verbrant

Verse: 3066    und dîn lût gevangen.
Verse: 3067    du sûmis al ze lange.

Verse: 3068    diz ist dir gût vernomen:
Verse: 3069    mîn hêre heizit dir comen

Verse: 3070    bî den Strâge an einen velde,
Verse: 3071    den zins wil er dir gelden

Verse: 3072    den er hât versezzen.
Verse: 3073    dâ wil er dih is irgetzen

Verse: 3074    er und sîne recken
Verse: 3075    mit irn scarfin ecken

Verse: 3076    mit sulher mâzen,
Verse: 3077    daz du si mûzes lâzen

Verse: 3078    imer mêr âne nôt.
Verse: 3079    diz ist, daz er dir enbôt.'

Verse: 3080    Darius der rîche
Verse: 3081    der tete hêrlîche:

Verse: 3082    er nam den boten bî der hant
Verse: 3083    und sprah: 'nû du here bist gesant,

Verse: 3084    sô mûstu gûten fride hân.
Verse: 3085    in mînen sal soltu gân

Verse: 3086    und wesen ze mîner wirtscaf.
Verse: 3087    dîn hêre des selben sitis plach:

Verse: 3088    alsô dicke sô ih sande
Verse: 3089    zô sîneme lande,

Verse: 3090    sô liez er di boten mîn
Verse: 3091    zô sîner wirtscafte sîn.'

Verse: 3092       Alexander frowete sînen mût.
Verse: 3093    daz geleite dûhte ime alsô gût,

Verse: 3094    daz in der rîche Darius
Verse: 3095    selbe leite in sîn hûs

Verse: 3096    zô sîner wirtscaft.
Verse: 3097    dâ was eine michele maht

Verse: 3098    der hêren von manigen landen.
Verse: 3099    dô hîz man Alexandren

Verse: 3100    ingegen den kuninc sitzen gân.
Verse: 3101    daz wart umbe daz getân,

Verse: 3102    daz Darius selbe sêge,
Verse: 3103    daz man sîn wol plêge.

Verse: 3104       Den fursten was daz ungemach,
Verse: 3105    daz man sîn sô wole plach.

Verse: 3106    ih wil û sagen umbe waz:
Verse: 3107    si versmâheten in umbe daz,

Verse: 3108    wander was sô cleine.
Verse: 3109    si sprâchen al gemeine,

Verse: 3110    er wêre ein wênich twirgelîn,
Verse: 3111    waz boten er mohte sîn

Verse: 3112    eines alsô rîchen mannes.
Verse: 3113    dannoh wisten si lutzil des,

Verse: 3114    daz an ime was gereit
Verse: 3115    alsô manich frumicheit.

Verse: 3116       Vil wol der hêre diz vernam
Verse: 3117    der vil wunderlîche man.

Verse: 3118    iz quam in rehte in den gedanc:
Verse: 3119    diu goltfaz, dâ er abe tranc,

Verse: 3120    di warf er al in sîne scôz.
Verse: 3121    dô den schenken des verdrôz,

Verse: 3122    daz er ime mêr brâhte,
Verse: 3123    dô stunt er unde dâhte,

Verse: 3124    daz er ein dieb wêre:
Verse: 3125    und sagetiz sînem hêren,

Verse: 3126    daz der bote, der dâ saz,
Verse: 3127    verstêle sîne goltfaz.

Verse: 3128       Darius sprah dem boten zû
Verse: 3129    'wî torstistu daz getû,

Verse: 3130    daz du stêle mîne goltvaz?'
Verse: 3131    Alexander dar wider sprah,

Verse: 3132    daz der site wêre
Verse: 3133    zô dem tische sînes hêren,

Verse: 3134    daz allirmanne gelîch
Verse: 3135    di vaz nême zô sih,

Verse: 3136    dâ er ûz trunke.
Verse: 3137    'vil wol mih des bedunket,

Verse: 3138    man ne phlege hie des sites niet:
Verse: 3139    nû diz alsus ist geschiet,

Verse: 3140    nû heiz nemen dîne goltfaz.
Verse: 3141    zwâren sagen ih dir daz,

Verse: 3142    daz mir vil ummêre sîn
Verse: 3143    dîne goltfaz unde dîn wîn.'

Verse: 3144       Under disen worten
Verse: 3145    ein furste merkete harte

Verse: 3146    an des boten gebêre
Verse: 3147    wî iz Alexander selbe wêre.

Verse: 3148    er hetin wîlin bekant,
Verse: 3149    dô in Darius hete gesant

Verse: 3150    nâh deme zinse zô Philippo.
Verse: 3151    dô sprah er ze Dario:

Verse: 3152    'hêre, ih wil dir sagen
Verse: 3153    ein dinc, daz ih gemerkit habe:

Verse: 3154    den boten, den wir hie gesehen,
Verse: 3155    wol ne wil er is niht bejehen,

Verse: 3156    daz is selbe Alexander.
Verse: 3157    nû rich dînen anden

Verse: 3158    an den wunderlîchen man,
Verse: 3159    sô mahtu imer mêre fride hân.'

Verse: 3160       Vil wol der listige man
Verse: 3161    der hêren gerûne vernam

Verse: 3162    und rûmete von deme sale.
Verse: 3163    des gehalf ime vil wale

Verse: 3164    ein brinninde vakele, di er nam.
Verse: 3165    einen persischen man,

Verse: 3166    den slûch er vor di zande,
Verse: 3167    daz er sih verwânde,

Verse: 3168    daz er ê solde sterben,
Verse: 3169    ê er quême zô der erden.

Verse: 3170    er dranc durh Darien man.
Verse: 3171    schiere er vor di ture quam.

Verse: 3172    ûf sîn ros er gespranc,
Verse: 3173    ân ir allir danc

Verse: 3174    reit er zô dem Strâge.
Verse: 3175    ê er dar ubir quême,

Verse: 3176    gwan er michil arbeit:
Verse: 3177    daz îs undir ime spleiz,

Verse: 3178    daz ime sîn ros dâ entflôz.
Verse: 3179    sîner craft er dâ genôz,

Verse: 3180    daz er den anderen stat gwan,
Verse: 3181    ouh half ime wol sîn man.

Verse: 3182       Dô reit er hine zô sînem here.
Verse: 3183    hundrit tûsunt was dere

Verse: 3184    und zwênzich tûsint dar zô.
Verse: 3185    vil wol entphiengen si in dô

Verse: 3186    und hiezen in willecome sîn.
Verse: 3187    alsus antworter in:

Verse: 3188    'o wol ûh, kriechische man,
Verse: 3189    ze heile mûz iz û irgân.

Verse: 3190    ih ne wille niwit liegen
Verse: 3191    noh niemanne betriegen.

Verse: 3192    wir ne mugin niwit gelîchen
Verse: 3193    Dario dem rîchen.

Verse: 3194    ih wâne, daz ûf dir erden
Verse: 3195    nieman mohte gewerden,

Verse: 3196    der zô ime gestunde
Verse: 3197    oder alsô grôz here gewunne.

Verse: 3198    dâ bî wil ih û sagen:
Verse: 3199    ein her fliegen mach nit gescaden

Verse: 3200    zwein wênigen wespen,
Verse: 3201    dâ si varen ze neste.'




Next part


This text is part of the TITUS edition of Lamprecht, Alexander (Strassburger Bearbeitung).

Copyright TITUS Project, Frankfurt a/M, 12.9.2008. No parts of this document may be republished in any form without prior permission by the copyright holder.