TITUS
Heliand
Part No. 68
Previous part

Chapter: LXVIII 
LXVIII


Verse: 5713    Sô thuo gisêgid uuarð   seðle nâhor
Verse: 5714    hêdra sunna   mid heƀantunglon
Verse: 5715    an them druoƀen dage,   thuo geng im ûses drohtines thegan
Verse: 5716    - uuas im glau gumo,   iungro Cristes
Verse: 5717    managa huîla,   sô it thar manno filo
Verse: 5718    ne uuissa te uuâron,   huand hie it mid is uuordon hal
Verse: 5719    [Iuđeono] gumscipie:   Ioseph uuas hie hêtan,
Verse: 5720    darnungo uuas hie ûses drohtines iungro:   hie ni uuelda thero farduanun thiod
Verse: 5721    [folgon] te ênigon firinuuercon,   ac hie bêd im under them folke Iudeono,
Verse: 5722    hêlag himilo rîkies -   hie geng im thuo uuið thena heritogon mahlian,
Verse: 5723    thingon uuið thena thegan kêsures,   thigida ina gerno,
Verse: 5724    that hie muosti alôsian   thena lîkhamon
Verse: 5725    Cristes fan themo crûcie,   thie thar giquelmid stuod,
Verse: 5726    thes guoden fan them galgen   endi an graf leggian,
Verse: 5727    foldu bifelahan.   Im ni uuelda thie folctogo thuo
Verse: 5728    uuernian thes uuillien,   ac im giuuald fargaf,
Verse: 5729    that hie sô muosti gifrummian.   Hie giuuêt im thuo forð thanan
Verse: 5730    gangan te them galgon,   thar hie [uuissa that godes barn,]
Verse: 5731    hrêo hangondi   hêrren sînes,
Verse: 5732    nam ina thuo [an] thero niuuun ruodun   endi ina fan naglon atuomda,
Verse: 5733    antfeng ina mid is faðmon,   sô man is frôhon scal,
Verse: 5734    lioƀes lîchamon,   endi ina an lîne biuuand,
Verse: 5735    druog ina diurlîco   - sô uuas thie drohtin uuerð -,
Verse: 5736    thar sia thia stedi haƀdun   an ênon stêne innan
Verse: 5737    handon gihauuuan,   thar gio heliðo barn
Verse: 5738    gumon ne bigruoƀon.   Thar sia [that godes barn]
Verse: 5739    te iro landuuîsu,   lîco hêlgost
Verse: 5740    foldu bifulhun   endi mid ênu felisu belucun
Verse: 5741    allaro graƀo guodlîcost.   Griotandi sâtun
Verse: 5742    idisi [armscapana],   thia that all forsâuun,
Verse: 5743    thes gumen grimman dôð.   Giuuitun [im] thuo gangan thanan
Verse: 5744    uuôpiandi uuîf   endi uuara nâmun,
Verse: 5745    [huô sia eft te them graƀe]   gangan mahtin:
Verse: 5746    haƀdun im farseuuana   [soroga] ginuogia,
Verse: 5747    mikila muodkara:   Maria uuârun sia hêtana,
Verse: 5748    idisi armscapana.   Thuo uuarð âƀand cuman,
Verse: 5749    naht mid neflu.   Niðfolc [Iudeono]
Verse: 5750    [uuarð] an moragan eft,   menigi gisamnod,
   ..................................................
Verse: 5751    rekidun an rûnon:   "huat, thu uuêst, huô thit rîki uuas
Verse: 5752    thuru thesan ênan man   all gituîflid,
Verse: 5753    uuerod giuuorran:   nu ligid hie uuundon siok,
Verse: 5754    diopa bidolƀan.   Hie sagda [simnen], [that hie scoldi fan dôðe astandan]
Verse: 5755    [an thriddian dage.]   Thius thiod gilôƀit te filo,
Verse: 5756    thit uuerod after is uuordon.   Nu thu hier uuardon hêt,
Verse: 5757    oƀar them graƀe gômian,   that ina is iungron thar
Verse: 5758    ne farstelan an themo stêne   endi seggian than, that hie astandan sî,
Verse: 5759    rîki fan raston:   than uuirðit thit rinco folc
Verse: 5760    mêr gimerrid,   ef [sia it biginnat] mârian hier."
Verse: 5761    Thuo uuurðun thar giscerida   fan thero scolu Iudeono
Verse: 5762    uueros te thero uuahtu:   giuuitun im mid iro giuuâpnion tharod
Verse: 5763    te them graƀe gangan,   thar sia scoldun thes godes barnes
Verse: 5764    hrêuues huodian.   Uuarð thie [hêlago] dag
Verse: 5765    Iudeono fargangan.   Sia oƀar themo graƀe sâtun,
Verse: 5766    uueros an thero uuahtun   [uuannom] nahton,
Verse: 5767    bidun undar iro bordon,   huan êr thie berehto dag
Verse: 5768    oƀar middilgard   mannon quâmi,
Verse: 5769    liudon te liohte.   Thuo ni uuas lang te thiu,
Verse: 5770    that thar uuarð thie gêst cuman   be godes crafte,
Verse: 5771    hâlag âðom   undar thena hardon stên
Verse: 5772    an [thena] lîchamon.   Lioht uuas thuo giopanod
Verse: 5773    [firiho] barnon te frumu:   uuas fercal manag
Verse: 5774    antheftid fan [helldoron]   endi te himile uueg
Verse: 5775    giuuaraht fan thesaro uueroldi.   Uuânom [up] astuod
Verse: 5776    friðubarn godes,   fuor im thuo thar hie uuelda,
Verse: 5777    sô thia uuardos thes   uuiht ni afsuoƀun,
Verse: 5778    [derƀia] liudi,   huan hie fan them dôðe astuod,
Verse: 5779    arês fan thero rastun.   Rincos sâtun
Verse: 5780    umbi that graf ûtan,   Iudeo liudi,
Verse: 5781    scola mid iro scildion.   Scrêd forðuuardes
Verse: 5782    suigli sunnun [lioht.]   Sîðodun idisi
Verse: 5783    te them graƀe gangan,   gumcunnies uuîf,
Verse: 5784    Mariun munilîca:   habdun mêðmo filo
Verse: 5785    gisald uuiðer [salƀum,]   siluƀres endi goldes,
Verse: 5786    uuerðes uuiðer uuurtion,   sô sia mahtun auuinnan mêst,
Verse: 5787    that sia thena lîchamon   lioƀes hêrren,
Verse: 5788    suno drohtines,   salƀon muostin,
Verse: 5789    [uuundun uuritanan.]   Thiu uuîf soragodun
Verse: 5790    an iro seƀon suîðo,   endi suma sprâcun,
Verse: 5791    huie im thena grôtan stên   fan themo graƀe scoldi
Verse: 5792    gihuereƀian an halƀa,   the sia oƀar that hrêo sâuuun
Verse: 5793    thia liudi leggian,   thuo sia thena lîchamon thar
Verse: 5794    befulhun an themo felise.   Sô thiu frî haƀdun
Verse: 5795    gegangan te them gardon,   that sia te them graƀe mahtun
Verse: 5796    gisehan selƀon,   thuo thar suôgan quam
Verse: 5797    engil thes alouualdon   oƀana fan radure,
Verse: 5798    faran an feðerhamon,   that all thiu folda [an scian,]
Verse: 5799    thiu erða dunida   endi thia erlos uuurðun
Verse: 5800    an uuêkan hugie,   uuardos Iuðeono,
Verse: 5801    bifellun bi them forahton:   ne uuândun ira [ferah] êgan,
Verse: 5802    lîf langerun huîl.




Next part


This text is part of the TITUS edition of Heliand.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.