TITUS
Heliand
Part No. 67
Previous part

Chapter: LXVII 
LXVII


Verse: 5621    Thuo uuarð thar an middian dag   [mahtig] têcan,
Verse: 5622    uuundarlîc giuuaraht   oƀar [thesan] uuerold [allan,]
Verse: 5623    thuo man thena godes suno   an thena galgon huof,
Verse: 5624    Crist an that crûci:   thuo uuarð it cûð oƀar all,
Verse: 5625    huô thiu sunna uuarð gisuorkan:   ni mahta suigli lioht
Verse: 5626    scôni giscînan,   ac [sia] scado farfeng,
Verse: 5627    thimm endi thiustri   endi [sô githrusmod neƀal].

Verse: 5628    [Uuarð] allaro dago druoƀost,   duncar suîðo
Verse: 5629    oƀar [thesan] uuîdun uueruld,   sô lango sô uualdand Crist
Verse: 5630    qual an themo crûcie,   cuningo rîkost,
Verse: 5631    ant nuon dages.   Thuo thie neƀal tiscrêd,
Verse: 5632    that gisuerc uuarð thuo tesuungan,   bigan sunnun lioht
Verse: 5633    hêdron an himile.   Thuo hreop [up] te gode
Verse: 5634    allaro cuningo craftigost,   thuo hie an themo crûcie stuod
Verse: 5635    faðmon gifastnot:   "fader alomahtig", quathie,
Verse: 5636    "te huî thu mik sô farlieti,   lieƀo drohtin,
Verse: 5637    hêlag heƀancuning,   endi thîna helpa dedos,
Verse: 5638    fullisti sô ferr?   Ik [standu] under theson fîondon hier
Verse: 5639    [uundron] giuuêgid."   Uerod Iudeono
Verse: 5640    hlôgun is im thuo te hosce:   gihôrdun thena hêlagun Crist,
Verse: 5641    drohtin furi them dôđe   drincan biddian,
Verse: 5642    quað that ina thurstidi.   Thiu thioda ne latta,
Verse: 5643    uurêða uuiðarsacon:   uuas im uuilleo mikil,
Verse: 5644    huat sia im bittres [tuo]   bringan mahtin.

Verse: 5645    Habdun im unsuôti   ecid endi galla
Verse: 5646    gimengid thia mênhuaton;   stuod [ên] mann garo,
Verse: 5647    suîðo sculdig scaðo,   thena habdun sia giscerid te thiu,
Verse: 5648    farspanan mid sprâcon,   that hie sia en êna spunsia nam,
Verse: 5649    lîðo thes lêðosten,   druog it an [ênon] langan scafte,
Verse: 5650    gibundan an ênon bôme   endi deda it them barne godes,
Verse: 5651    mahtigon te mûðe.   Hie ankenda iro mirkiun dâdi,
Verse: 5652    gifuolda iro fêgnes:   furðor [ni uuelda
Verse: 5653    is sô] bittres anbîtan,   ac hreop that barn godes
Verse: 5654    hlûdo te them himiliscon fader:   "ik an thina hendi [befilhu",] quathie,
Verse: 5655    "mînon gêst an godes uuillion;   hie ist nu garo te thiu,
Verse: 5656    fûs te faranne."   [Firiho] drohtin
Verse: 5657    gihnêgida thuo is hôƀid,   hêlagon âðom
Verse: 5658    liet fan themo lîkhamen.   Sô thuo thie landes uuard
Verse: 5659    sualt an them sîmon,   sô uuarð sân after thiu
Verse: 5660    uundartêcan giuuaraht,   [that] thar uualdandes dôđ
Verse: 5661    [unqueðandes] sô filo   antkennian scolda,
Verse: 5662    [thiadnes] êndagon:   erða biƀoda,
Verse: 5663    hrisidun thia hôhun bergos,   harda stênos cluƀun,
Verse: 5664    felisos after them felde,   endi that [fêha lacan] tebrast
Verse: 5665    an middion an tuê,   that êr managan dag
Verse: 5666    an themo uuîhe innan   uuundron gistriunid
Verse: 5667    hêl hangoda   - ni muostun heliðo barn,
Verse: 5668    thia liudi scauuon,   huat under themo lacane uuas
Verse: 5669    hêlages behangan:   thuo mohtun an that horð sehan
Verse: 5670    Iudeo liudi -   graƀu uuurðun giopanod
Verse: 5671    dôdero manno,   endi sia thuru drohtines craft
Verse: 5672    an iro lîchamon   libbiandi astuodun
Verse: 5673    [up] fan erðu   endi uurðun giôgida thar
Verse: 5674    mannon te mârðu.   That uuas sô mahtig thing,
Verse: 5675    that thar [Cristes] dôð   antkennian scoldun,
Verse: 5676    sô filo thes gifuolian,   [thie] gio mid firihon ne sprac
Verse: 5677    uuord an thesaro uueroldi.   Uuerod Iudeono
Verse: 5678    sâuuun seldlîc thing,   ac uuas im iro slîði hugi
Verse: 5679    sô farhardod an iro herten,   that thar io sô hêlag ni uuarð
Verse: 5680    têcan gitôgid,   that sia trûodin thiu bat
Verse: 5681    an thia Cristes craft,   that hie cuning oƀar all,
Verse: 5682    thes uuerodes uuâri.   Suma sia thar mid iro uuordon gisprâcun,
Verse: 5683    thia thes hrêuues thar   huodian scoldun,
Verse: 5684    that that uuâri te uuâren   uualdandes suno,
Verse: 5685    godes gegnungo,   that thar an them galgon sualt,
Verse: 5686    barno that besta.   Slôgun an iro briost filo
Verse: 5687    uuôpiandero uuîƀo:   uuas im thiu uuunderquâla
Verse: 5688    harm an iro herten   endi iro hêrren dôð
Verse: 5689    suîðo an sorogon.   Than uuas sido Iudeono,
Verse: 5690    that sia thia [haftun thuru thena hêlagon dag]   hangon ni [lietin]
Verse: 5691    lengerun huîla,   [than] im that lîf scriði,
Verse: 5692    thiu seola besunki:   slîðmuoda mann
Verse: 5693    gengun im mid nîðscipiu nâhor,   thar [sô beneglida stuodun
Verse: 5694    theoƀos] tuêna,   tholodun bêðia
Verse: 5695    quâla bi Criste:   uuârun im quica noh than,
Verse: 5696    untthat sia thia grimmun   Iudeo liudi
Verse: 5697    bênon bebrâcon,   that sia bêðia samad
Verse: 5698    lîf [farlietun,]   suohtun im lioht ôðer.

Verse: 5699    Sia ni thorftun drohtin Crist   dôðes bêdian
Verse: 5700    furðor mid ênigon firinon:   fundun ina gifaranan thuo iu:
Verse: 5701    is seola uuas gisendid   an suoðan uueg,
Verse: 5702    an langsam lioht,   is liði cuolodun,
Verse: 5703    that [ferah] uuas af them [flêske.]   Thuo geng im ên thero fîondo tuo
Verse: 5704    an nîðhugi,   druog negilid sper
Verse: 5705    hard an is handon,   mid heruthrummeon stac,
Verse: 5706    liet uuâpnes ord   [uuundum] snîðan,
Verse: 5707    that an selƀes uuarð   sîdu Cristes
Verse: 5708    antlocan is lîchamo.   Thia liudi gisâuun,
Verse: 5709    that thanan bluod endi uuater   bêðiu sprungun,
Verse: 5710    uuellun fan thero uuundun,   all sô is uuillio geng
Verse: 5711    endi hie habda [gimarcod êr]   manno cunnie,
Verse: 5712    firiho barnon te frumu:   thuo uuas it all gifullid sô.




Next part


This text is part of the TITUS edition of Heliand.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.