TITUS
Heliand
Part No. 66
Previous part

Chapter: LXVI 
LXVI


Verse: 5532    Thuo sia thar an griete   galgon rihtun,
Verse: 5533    an them felde [uppan]   folc Iudeono,
Verse: 5534    bôm an berege,   endi thar an that barn godes
Verse: 5535    quelidun an crûcie:   slôgun cald îsarn,
Verse: 5536    niuua naglos   nîðon scarpa
Verse: 5537    hardo mid hamuron   thuru is hendi endi [thuru is] fuoti,
Verse: 5538    bittra bendi:   is blôd ran an erða,
Verse: 5539    drôr fan ûson drohtine.   Hie ni uuelda thoh thia dâd uurecan
Verse: 5540    grimma an them Iudeon,   ac hie [thes] god fader
Verse: 5541    mahtigna bad,   that hie ni uuâri them manno folke,
Verse: 5542    them uuerode thiu [uurêðra]:   "huand sia ni uuitun, huat sia [duot]", quathie.

Verse: 5543    Thuo thia uuîgandos   giuuâdi Cristes,
Verse: 5544    [drohtines] dêldun,   dereƀia [mann],
Verse: 5545    thes rîken girôbi.   Thia rincos ni mahtun
Verse: 5546    umbi [thena selƀon] . . .   samuuurdi [gisprecan],
Verse: 5547    êr sia an iro [huaraƀe]   hlôtos uuurpun,
Verse: 5548    huilic iro scoldi hebbian   thia hêlagun pêda,
Verse: 5549    allaro giuuâdio uunsamost.   Thes [uuerodes] hirdi
Verse: 5550    hiet thuo, the heritogo,   oƀar them [hôƀde selƀes]
Verse: 5551    [Cristes an] crûce scrîƀan,   that that uuâri cuning Iudeono,
Verse: 5552    Iesus fan Nazarethburh,   thie thar neglid stuod
Verse: 5553    an niuuon galgon   thuru nîðscipi,
Verse: 5554    an bômin treo.   Thuo bâdun thia liudi
Verse: 5555    that uuord uuendian,   quâðun that hie im sô an is uuilleon sprâki,
Verse: 5556    selƀo sagdi,   that hie habdi thes gisîðes giuuald,
Verse: 5557    cuning uuâri oƀar Iudeon.   Thuo sprac eft thie kêsures bodo,
Verse: 5558    hard heritogo:   "it ist iu sô oƀar is hôƀde giscriƀan,
Verse: 5559    uuîslîco giuuritan,   sô ik it nu uuendian ni mag."
Verse: 5560    Dâdun thuo thar te uuîtie   [uuerod] Iudeono
Verse: 5561    tuêna fartalda man   an tuâ halƀa
Verse: 5562    Cristes an crûci:   lietun sia [qualm] tholon
Verse: 5563    an them [uuaragtreuue]   uuerco te lône,
Verse: 5564    lêðaro dâdio.   Thia liudi sprâcun
Verse: 5565    hoscuuord manag   hêlagon Criste,
Verse: 5566    grottun ina mid gelpu:   sâuuun allaro gumono then beston
Verse: 5567    quelan an themo crûcie:   "ef thu sîs cuning oƀar all", quâðun sia,
Verse: 5568    "suno drohtines,   sô thu haƀis selƀo [gisprocan],
Verse: 5569    neri thik fan thero nôdi   endi nîðes atuomi,
Verse: 5570    gang thi hêl herod;   than uuelliat an thik heliðo barn,
Verse: 5571    thesa liudi gilôƀian."   Sum imo ôk lastar sprac
Verse: 5572    suîðo gêlhert Iudeo,   thar hie fur them galgon stuod:
Verse: 5573    "uuah uuarð thesaro uueroldi", quathie,   "ef thu iro scoldis giuuald êgan.

Verse: 5574    Thu sagdas that thu mahtis an ênon dage   all teuuerpan
Verse: 5575    that hôha hûs   heƀancuninges,
Verse: 5576    stênuuerco mêst   endi eft standan giduon
Verse: 5577    an thriddion dage,   sô is elcor ni thorfti bithîhan mann
Verse: 5578    theses folkes furðor.   Sînu huô thu nu gifastnod stês,
Verse: 5579    suîðo gisêrid:   ni maht thi selƀon uuiht
Verse: 5580    balouues gibuotian."   Thuo thar ôc an them bendion sprac
Verse: 5581    thero theoƀo ôðer,   all sô hie thia thioda gihôrda,
Verse: 5582    uurêðon uuordon   - ne uuas is uuillio guod,
Verse: 5583    thes thegnes githâht -:   "ef thu sîs thiodcuning", quathie,
Verse: 5584    "Crist, godes suno,   gang thi [than] fan them crûce niðer,
Verse: 5585    slôpi thi fan them sîmon   endi ûs samad allon
Verse: 5586    hilp endi hêli.   Ef thu sîs heƀancuning,
Verse: 5587    uualdand thesaro uueroldes,   giduo it than an thînon uuercon scîn,
Verse: 5588    mâri thik fur thesaro menigi."   Thuo sprac thero manno ôðer
Verse: 5589    an thero henginna,   thar hie giheftid stuod,
Verse: 5590    uuan uuunderquâla:   "behuî uuilt thu sulic uuord sprecan,
Verse: 5591    gruotis ina mid gelpu?   stês thi hier an galgen haft,
Verse: 5592    [gibrôcan] an bôme.   Uuit hier bêðia tholod
Verse: 5593    sêr thuru unca sundiun:   is unc unkero selƀero dâd
Verse: 5594    uuorðan te uuîtie.   Hie stêd hier uuammes lôs,
Verse: 5595    allaro sundiono sicur,   sô hie selƀo gio
Verse: 5596    firina ni gifrumida,   botan that hie thuru theses folkes nið
Verse: 5597    uuillendi an thesaro uueruldi   uuîti antfâhid.

Verse: 5598    Ik uuilliu thar gilôƀian tuo", quathie,   "endi uuilliu thena landes uuard,
Verse: 5599    thena godes suno   gerno biddian,
Verse: 5600    that thu mîn gihuggies   endi an helpun sîs,
Verse: 5601    râdendero best,   than thu an thîn rîki cumis:
Verse: 5602    uues mi than ginâðig."   Thuo sprak im eft neriendo Crist
Verse: 5603    uuordon tegegnes:   "ik seggiu thi te uuâron hier", quathie,
Verse: 5604    "[that thu noh hiudu môst   an himilrîke]
Verse: 5605    [mid mi samad   sehan lioht godes,]
Verse: 5606    an themo paradyse,   thoh thu nu an sulicoro pînu sîs."
Verse: 5607    Than stuod thar ôc Maria,   muoder Cristes,
Verse: 5608    blêc under them bôme,   gisah iro barn tholon,
Verse: 5609    uuinnan uuunderquâla.   Ôc uuârun thar uuîf mid iro
Verse: 5610    an sô mahtiges   minnia cumana -
Verse: 5611    than stuod thar ôc Iohannes,   iungro Cristes,
Verse: 5612    hriuui undar is hêrren,   uuas im is hugi sêrag -
Verse: 5613    [drûƀodun fur] them dôðe.   Thar sprac drohtin Crist
Verse: 5614    mahtig te thero muoder:   "nu ik thi hier mînemo scal
Verse: 5615    iungron befelhan,   them thi hier geginuuard stêd:
Verse: 5616    [uuis] thi an is gisîðie samad:   thu scalt ina furi suno hebbian."
Verse: 5617    Grôtta hie thuo Iohannes,   [hiet] that hie iru fulgengi [uuel],
Verse: 5618    minniodi sia sô [mildo],   sô man is muoder scal,
Verse: 5619    idis unuuamma.   Thuo hie sia an is êra antfeng
Verse: 5620    thuru hluttran hugi,   sô im is hêrro gibôd.




Next part


This text is part of the TITUS edition of Heliand.

Copyright TITUS Project, Frankfurt a/M, 15.10.2021. No parts of this document may be republished in any form without prior permission by the copyright holder.