TITUS
Biblia Udica, Versio Nizhensis: Vetus Testamentum
Part No. 312
Previous part

Book: Jon. 

Xavarečal Ionay girk
Xavareçal İonay girk

Chapter: 1 
Ionay Q̣ONƷ́UĠOXUN ṭisṭun
İonay Q'ONČUĞOXUN t'ist'un


Verse: 1    Amiṭṭayi ġar Iona * Q̣ONƷ́UĠON metär sa äyite ṗaṗespi:
   Amit't'ayi ğar İona * Q'ONČUĞON metər sa əyite p'ap'espi:

Verse: 2    "Hayza Ninevina taki! Ṭe kala šähäre bakala amdarxo ǯar ḳalpi ṗaṗesṗa ki, ičoġoy biq̇ala pis äšurxo Za ṗaṗene".
   "Hayza Ninevina taki! T'e kala şəhəre bakala amdarxo car k'alpi p'ap'esp'a ki, içoğoy biq'ala pis əşurxo Za p'ap'ene".

Verse: 3    Iona isä Q̣ONƷ́UĠOXUN ṭisṭun čureci hayzeri iču pi gala tää, Taršišane yaq̇a bafṭi. Taci Yafona čurpi gämiġoxun Taršiša taġalṭu bä͑ġäbi, iz yaq̇e tänginal tadi ṭe gäminä areci ki, Q̣ONƷ́UĠOXUN ṭiṭale.
   İona isə Q'ONČUĞOXUN t'ist'un çureśi hayzeri içu pi gala təə, Tarşişane yaq'a baft'i. Taśi Yafona çurpi gəmiğoxun Tarşişa tağalt'u bə̌ğəbi, iz yaq'e tənginal tadi t'e gəminə areśi ki, Q'ONČUĞOXUN t'it'ale.

Verse: 4    Ama Q̣ONƷ́UĠON dänizä osṭaar muše yaq̇abi. Dänizä ṭetär sa tufane e͑qe͑ci ki, male mansṭay gäminä bə͑yexun č̣oybane.
   Ama Q'ONČUĞON dənizə ost'aar muşe yaq'abi. Dənizə t'etər sa tufane ěqěśi ki, male manst'ay gəminə bı̌yexun c'oybane.

Verse: 5    Gäminä bakalṭoġo q̇ə͑yene haq̇i, härṭin bureqi iz buxaʒ́uġo ḳalpi iču čarkesṭeynaḳ xoyinśbsa. Gäminä bakala yükäl č̣evḳi boṭunseri dänizä ki, gämi suuḳbeq̇an. Iona isä ciri gämin boš bakala oṭaġxoxun sunṭu basḳi osṭaar nepaxeci.
   Gəminə bakalt'oğo q'ı̌yene haq'i, hərt'in bureqi iz buxačuğo k'alpi içu çarkest'eynak' xoyinšbsa. Gəminə bakala yükəl c'evk'i bot'unseri dənizə ki, gəmi suuk'beq'an. İona isə śiri gəmin boş bakala ot'ağxoxun sunt'u bask'i ost'aar nepaxeśi.

Verse: 6    Gämičiġoy kalo šoṭay ṭo͑ġo͑l hari pine: "Ḳän basḳe? Hayza vi buxaʒ́uġo ḳalṗa, bärkä šoṭin yax gorox hari čarḳesadi".
   Gəmiçiğoy kalo şot'ay t'ǒğǒl hari pine: "K'ən bask'e? Hayza vi buxačuğo k'alp'a, bərkə şot'in yax gorox hari çark'esadi".

Verse: 7    Gämičiġonal suna piṭun: "Ekinan čöp bosen, me bälä beš bel ši görä eysuna avabaken!" Čöpä boṭunseri, čöpäl hari Ionay loxole čurpi.
   Gəmiçiğonal suna pit'un: "Ekinan çöp bosen, me bələ beş bel şi görə eysuna avabaken!" Çöpə bot'unseri, çöpəl hari İonay loxole çurpi.

Verse: 8    Ṭe vädä gämičiġon šoṭoxun xavarṭun haq̇i: "Šunu hun? Ši göräne me bälä beš bel hare? Vi äšlin c̣i hiḳä? Mayinen eysa, mayalunu? Mani azuḳaxunnu?"
   T'e vədə gəmiçiğon şot'oxun xavart'un haq'i: "Şunu hun? Şi görəne me bələ beş bel hare? Vi əşlin s'i hik'ə? Mayinen eysa, mayalunu? Mani azuk'axunnu?"

Verse: 9    Ionan šoṭoġo ǯoġabe tadi: "Zu *äbranizu. Dänizxo, oćalxo yaratmiši göynul bakala Buxaʒ́uġo, Q̣ONƷ́UĠOZ bul ḳoc̣bsa zu".
   İonan şot'oğo coğabe tadi: "Zu *əbranizu. Dənizxo, oç̌alxo yaratmişi göynul bakala Buxačuğo, Q'ONČUĞOZ bul k'os'bsa zu".

Verse: 10    Šoṭoġoynaḳ izi Q̣ONƷ́UĠOXUN ṭisṭuna exlätbaṭan isä gämičiġo q̇ə͑yene haq̇i. Šoṭoġon ičoġoy bula biq̇i piṭun: "Hun mo he äšen biq̇i?!"
   Şot'oğoynak' izi Q'ONČUĞOXUN t'ist'una exlətbat'an isə gəmiçiğo q'ı̌yene haq'i. Şot'oğon içoğoy bula biq'i pit'un: "Hun mo he əşen biq'i?!"

Verse: 11    Tufan taysun osṭaarebaksay, ṭe vädä gämičiġon ṗurum piṭun: "Isä yan va ḳä ben? Me tufana hetär šipben?"
   Tufan taysun ost'aarebaksay, t'e vədə gəmiçiğon p'urum pit'un: "İsə yan va k'ə ben? Me tufana hetər şipben?"

Verse: 12    Ionan šoṭoġo "za exṭanan dänizä bosanan, šipbakale däniz ṭe vädä, me tufani za görä e͑q̇esuna avazu" pine.
   İonan şot'oğo "za ext'anan dənizə bosanan, şipbakale dəniz t'e vədə, me tufani za görə ěq'esuna avazu" pine.

Verse: 13    Ama gämičiġon ičoġoy axərənǯi zora laxi avar zapsaṭun burqi. Taci q̇ariluġa č̣eyseynaḳṭun čaləšaksay, ama mušen tetäre funey ki, ičoġoy čabalayinšsun amc̣inane taysay.
   Ama gəmiçiğon içoğoy axırınci zora laxi avar zapsat'un burqi. Taśi q'ariluğa c'eyseynak't'un çalışaksay, ama muşen tetəre funey ki, içoğoy çabalayinşsun ams'inane taysay.

Verse: 14    Ṭe vädä šoṭoġon Q̣ONƷ́UĠO ḳalpi piṭun: "Ay Q̣ONƷ́UX, me amdari elmoġo haq̇suna görä Hunal beš elmoġo ma haq̇a! Me taxsərsuzi ṗiya cipsuni ǯazina yax zapesmada! Axəri me bakiyorox bito Vi čuresunene baki, ay Q̣ONƷ́UX!"
   T'e vədə şot'oğon Q'ONČUĞO k'alpi pit'un: "Ay Q'ONČUX, me amdari elmoğo haq'suna görə Hunal beş elmoğo ma haq'a! Me taxsırsuzi p'iya śipsuni cazina yax zapesmada! Axıri me bakiyorox bito Vi çuresunene baki, ay Q'ONČUX!"

Verse: 15    Hametär, šoṭoġon Iona exṭi dänizäṭun boseri, dänizä e͑qeci tufanal boṭebaki.
   Hametər, şot'oğon İona ext'i dənizət'un boseri, dənizə ěqeśi tufanal bot'ebaki.

Verse: 16    Q̣ONƷ́UĠOY kalaluġa aḳi q̇ə͑yene haq̇i gämičiġo ṭe vädä. Šoṭaynaḳ q̇urbanxoṭun ečeri, elas tadi niyätṭunbi.
   Q'ONČUĞOY kalaluğa ak'i q'ı̌yene haq'i gəmiçiğo t'e vədə. Şot'aynak' q'urbanxot'un eçeri, elas tadi niyətt'unbi.

Verse: 17    Q̣ONƷ́UĠON isä ṭetäre bi ki, Iona kala sa čälinene q̇uč̣ṗi. Xib ġi-xib šü šo ṭe čälin tapanene mandi. *
   Q'ONČUĞON isə t'etəre bi ki, İona kala sa çəlinene q'uc'p'i. Xib ği-xib şü şo t'e çəlin tapanene mandi. *



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.