TITUS
Biblia Udica, Versio Nizhensis: Vetus Testamentum
Part No. 311
Previous part

Chapter: 31 

Padčaġ Lemueli nanay äyitmux
Padçağ Lemueli nanay əyitmux


Verse: 1    Padčaġ Lemueli äyitmux, iz nanan šoṭo zombiyorox.
   Padçağ Lemueli əyitmux, iz nanan şot'o zombiyorox.

Verse: 2    Ḳä uḳaz, bez ġar, ay zaxun baki ġar,
   K'ə uk'az, bez ğar, ay zaxun baki ğar,
    Bezi afərəġo q̇a elasxo ibaki za tadeci ġar?
    Bezi afırığo q'a elasxo ibaki za tadeśi ğar?

Verse: 3    Vi zora čupuxxoy,
   Vi zora çupuxxoy,
    Vi baǯaraġa me padčaġxo äfčibalṭoġoy loxol ma čarḳesṭa.
    Vi bacarağa me padçağxo əfçibalt'oğoy loxol ma çark'est'a.

Verse: 4    Ay Lemuel, fi u͑ġsun padčaġxo tene yarayinšbsa,
   Ay Lemuel, fi ǔğsun padçağxo tene yarayinşbsa,
    Finaġoy baksunal kalaluġbalṭoġoynaḳ tene.
    Finağoy baksunal kalaluğbalt'oğoynak' tene.

Verse: 5    Tene, u͑ġi q̇ayda-ḳanuna eyexun č̣evṭunḳon,
   Tene, ǔği q'ayda-k'anuna eyexun c'evt'unk'on,
    Faġərxoy haq̇q̇a pozmišṭunbon.
    Fağırxoy haq'q'a pozmişt'unbon.

Verse: 6    Finaġoybala ičḳinä
   Finağoybala içk'inə
    Äzyätin q̇a därde boš bakalṭoġo tadanan,
    Əzyətin q'a dərde boş bakalt'oğo tadanan,

Verse: 7    Barta u͑ġi ičoġoy käsibluġa eyexun č̣evḳeq̇aṭun,
   Barta ǔği içoğoy kəsibluğa eyexun c'evk'eq'at'un,
    Ičoġoy därdäl ene maq̇aṭun eyex badi.
    İçoğoy dərdəl ene maq'at'un eyex badi.

Verse: 8    Muzsuzṭoġoynaḳ vi źomo qaypa,
   Muzsuzt'oğoynak' vi ǰomo qaypa,
    Bütüm ehṭiyäǯi boš bakalṭoġoy haq̇q̇a q̇oriša.
    Bütüm eht'iyəci boş bakalt'oğoy haq'q'a q'orişa.

Verse: 9    Vi źomo qaypi düzgün divanba,
   Vi ǰomo qaypi düzgün divanba,
    Käsibxoy, faġərxoy haq̇q̇a q̇oriša
    Kəsibxoy, fağırxoy haq'q'a q'orişa



Šaaṭ čuux
Şaat' çuux


Verse: 10    Šaaṭ čuux šina bä͑ġä͑bon?
   Şaat' çuux şina bə̌ğə̌bon?
    Šo toyexlu źe͑naxunal däyärlune.
    Şo toyexlu ǰěnaxunal dəyərlune.

Verse: 11    Iz išq̇ari üḳ šoṭoxun arxayine,
   İz işq'ari ük' şot'oxun arxayine,
    Ṭe čuġoxun šoṭin zäräl tene zaṗḳal.
    T'e çuğoxun şot'in zərəl tene zap'k'al.

Verse: 12    Iz ömüri axəral ciriḳ išq̇areynaḳ pisluġ tää, šaaṭluġe ešṭa.
   İz ömüri axıral śirik' işq'areynak' pisluğ təə, şaat'luğe eşt'a.

Verse: 13    Xaye, kätani šaaṭṭune č̣äḳe,
   Xaye, kətani şaat't'une c'ək'e,
    Iz kiyexun här äš ayesa.
    İz kiyexun hər əş ayesa.

Verse: 14    Toyeġala mal ečala gämi ḳinäḳe,
   Toyeğala mal eçala gəmi k'inək'e,
    Ä͑xiläxune iz śuma ešṭa.
    Ə̌xiləxune iz šuma eşt'a.

Verse: 15    Üšenen hayesṭa,
   Üşenen hayest'a,
    Iz külfäteynaḳ ukune häzirbsa,
    İz külfəteynak' ukune həzirbsa,
    Iz čuux nökärxoval tanesṭa.
    İz çuux nökərxoval tanest'a.

Verse: 16    Q̣oruġa be͑ġi šoṭo haneq̇sa,
   Q'oruğa běği şot'o haneq'sa,
    Iz kiin q̇azanǯen ṭulluġe lasaksa.
    İz kiin q'azancen t'ulluğe lasaksa.

Verse: 17    Sal sa äšläxun qoš tene čure,
   Sal sa əşləxun qoş tene çure,
    Iz kulmoġo q̇aśampi äšebsa.
    İz kulmoğo q'ašampi əşebsa.

Verse: 18    Aneksa ki, iz haq̇i-toysṭun šaaṭe taysa,
   Aneksa ki, iz haq'i-toyst'un şaat'e taysa,
    Üšeyal iz čiraġ tene aśṭa.
    Üşeyal iz çirağ tene ašt'a.

Verse: 19    Iz kulmoġon žuḳe fərəsṭa,
   İz kulmoğon juk'e fırıst'a,
    Milurxo iz kiyexun tene tärbsa.
    Milurxo iz kiyexun tene tərbsa.

Verse: 20    Käsibxoynaḳ iz kul qaye,
   Kəsibxoynak' iz kul qaye,
    Faġərxo kule biq̇sa.
    Fağırxo kule biq'sa.

Verse: 21    ω͑źe eysun iz ailineynaḳ q̇ə͑ tene.
   Ǐǰe eysun iz ailineynak' q'ı̌ tene.
    Šoṭaynaḳ ki, bitoṭin toyexlu ṗä͑ q̇at paltare lape.
    Şot'aynak' ki, bitot'in toyexlu p'ə̌ q'at paltare lape.

Verse: 22    Iz döšäyeynaḳ ćone e͑bsa,
   İz döşəyeynak' ç̌one ěbsa,
    Iz paltar tünd ć̣oć̣ane, näziḳ kätanaxune.
    İz paltar tünd č'oč'ane, nəzik' kətanaxune.

Verse: 23    Iz išq̇ar šähäri darvazin ṭo͑ġo͑l hörmätlü amdare hesabbaksa,
   İz işq'ar şəhəri darvazin t'ǒğǒl hörmətlü amdare hesabbaksa,
    Ṭe oćali aġsaq̇q̇alxoxune arci-haysṭa.
    T'e oç̌ali ağsaq'q'alxoxune arśi-hayst'a.

Verse: 24    Metär čuġon haq̇i-toydalxo ičin ä͑ldi q̇ayinšxo q̇a
   Metər çuğon haq'i-toydalxo için ə̌ldi q'ayinşxo q'a
    Kätan paltarxone toysṭa.
    Kətan paltarxone toyst'a.

Verse: 25    Zor q̇a šäräf ičusṭane,
   Zor q'a şərəf içust'ane,
    Iz gäläǯäyeynaḳ tene q̇ə͑bsa.
    İz gələcəyeynak' tene q'ı̌bsa.

Verse: 26    Šoṭin müdrikluġene äyite,
   Şot'in müdrikluğene əyite,
    Iz źomoxun düzgün maslaatxone č̣eysa.
    İz ǰomoxun düzgün maslaatxone c'eysa.

Verse: 27    Iz ailin äšurxo yaq̇axe tašṭa,
   İz ailin əşurxo yaq'axe taşt'a,
    Tänbälluġ hiḳä tene ava.
    Tənbəlluğ hik'ə tene ava.

Verse: 28    Iz äyloġon sa säsen šoṭo alxəšṭunbsa,
   İz əyloğon sa səsen şot'o alxışt'unbsa,
    Iz išq̇arenal šoṭo tärifebsa:
    İz işq'arenal şot'o tərifebsa:

Verse: 29    "Šaaṭ čupuxxo gelene,
   "Şaat' çupuxxo gelene,
    Ama vi tay butene".
    Ama vi tay butene".

Verse: 30    Čuġoy šaaṭ aḳesun här šey upsun tene, gözälluġ amc̣i šeye,
   Çuğoy şaat' ak'esun hər şey upsun tene, gözəlluğ ams'i şeye,
    Sayǯä Q̣ONƷ́UĠO čalxala čuuxe tärifä layiġ.
    Saycə Q'ONČUĞO çalxala çuuxe tərifə layiğ.

Verse: 31    Šoṭo iz kiin haq̇q̇a tadanan,
   Şot'o iz kiin haq'q'a tadanan,
    Barta šähäri darvazin ṭo͑ġo͑l iz äšurxon šoṭaynaḳ tärifq̇an ečeri.
    Barta şəhəri darvazin t'ǒğǒl iz əşurxon şot'aynak' tərifq'an eçeri.




Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.