TITUS
Biblia Udica, Versio Nizhensis: Vetus Testamentum
Part No. 309
Previous part

Chapter: 29 

Verse: 1    Töhmätxo nu be͑ġi inadkärluġ balo
   Töhmətxo nu běği inadkərluğ balo
    Bürdän äfčinebakon iz čaral tene bä͑ġä͑yeġon.
    Bürdən əfçinebakon iz çaral tene bə̌ğə̌yeğon.

Verse: 2    Düzgün amdarxoy ooren azuḳa mu͑qedon,
   Düzgün amdarxoy ooren azuk'a mǔqedon,
    Pis amdarxoy kalaluġbsunen isä azuḳa o͑no͑nedon.
    Pis amdarxoy kalaluğbsunen isə azuk'a ǒnǒnedon.

Verse: 3    Müdrikluġa qä͑veġalṭin iz bava mu͑qedon,
   Müdrikluğa qə̌veğalt'in iz bava mǔqedon,
    Ama taraḳala čuġo gärbakalṭay kiyexun iz bakal-nu bakalo č̣eneġon.
    Ama tarak'ala çuğo gərbakalt'ay kiyexun iz bakal-nu bakalo c'eneğon.

Verse: 4    Düzgünluġen kalaluġbala padčaġen iz ölkinä möhḳämebon,
   Düzgünluğen kalaluğbala padçağen iz ölkinə möhk'əmebon,
    Rüšvät exṭalṭin isä šoṭo careḳon.
    Rüşvət ext'alt'in isə şot'o śarek'on.

Verse: 5    Iz ə͑śaṭaynaḳ äfčidän muć̣a muz ciḳalo,
   İz ı̌šat'aynak' əfçidən muč'a muz śik'alo,
    Šoṭay turin oq̇axun kaśḳalone.
    Şot'ay turin oq'axun kašk'alone.

Verse: 6    Pis amdari günaxen iču tälinäne badon,
   Pis amdari günaxen içu təlinəne badon,
    Düzgün amdar isä mu͑qbaki, mä͑ġe͑ḳon.
    Düzgün amdar isə mǔqbaki, mə̌ğěk'on.

Verse: 7    Düzgün amdaren käsibxoy haq̇q̇a tanedon,
   Düzgün amdaren kəsibxoy haq'q'a tanedon,
    Pis amdaren isä moṭo tene aḳon.
    Pis amdaren isə mot'o tene ak'on.

Verse: 8    Ćoboćuṭoġon šähärä gärgürṭunbon,
   Ç̌oboç̌ut'oğon şəhərə gərgürt'unbon,
    Müdrik amdarxon isä äǯuġo basḳesṭundon.
    Müdrik amdarxon isə əcuğo bask'est'undon.

Verse: 9    Müdrik amdar q̇ammaza gärbaki šoṭoxun haq̇q̇ hesab tašayin,
   Müdrik amdar q'ammaza gərbaki şot'oxun haq'q' hesab taşayin,
    Axśumin q̇a laġlaġin gane bakon, serluġal tene aḳon.
    Axšumin q'a lağlağin gane bakon, serluğal tene ak'on.

Verse: 10    Amdar besṗalxon düzgün amdara nifrätṭunbon,
   Amdar besp'alxon düzgün amdara nifrətt'unbon,
    Düzgün amdari elmoġo haq̇sunṭun čureġon.
    Düzgün amdari elmoğo haq'sunt'un çureğon.

Verse: 11    Q̣ammaz hirsläyinšakaṭan posṗi ičuxun č̣eneġon,
   Q'ammaz hirsləyinşakat'an posp'i içuxun c'eneğon,
    Müdrik amdar isä säbürlüne bakon.
    Müdrik amdar isə səbürlüne bakon.

Verse: 12    Kalaṭin äfči äyitä u͑mu͑xlaxayin,
   Kalat'in əfçi əyitə ǔmǔxlaxayin,
    Bütüm iz sarayi amdarxoal šäräṭun taraḳon.
    Bütüm iz sarayi amdarxoal şərət'un tarak'on.

Verse: 13    Käsib amdar q̇a zaləm amdar sa šeyasṭaṭun suna ošq̇ar:
   Kəsib amdar q'a zalım amdar sa şeyast'at'un suna oşq'ar:
    P̣rannayal piyel išiġ tadiyo Q̣ONƷ́UXE.
    P'rannayal piyel işiğ tadiyo Q'ONČUXE.

Verse: 14    Padčaġen käsibxo düzgün divanbsunen
   Padçağen kəsibxo düzgün divanbsunen
    Iz taxṭa hämišäluġ möhḳämebon.
    İz taxt'a həmişəluğ möhk'əmebon.

Verse: 15    Ṭaṗen q̇a tärbiyinen müdrikluġe ečon,
   T'ap'en q'a tərbiyinen müdrikluğe eçon,
    Kalanut äyelen isä iz nana biyaburebon.
    Kalanut əyelen isə iz nana biyaburebon.

Verse: 16    Pis amdarxoy zor gele bakaṭan ǯinayät avuze bakon,
   Pis amdarxoy zor gele bakat'an cinayət avuze bakon,
    Ama düzgünṭoġon šoṭoġoy bisṭuna aḳalṭun.
    Ama düzgünt'oğon şot'oğoy bist'una ak'alt'un.

Verse: 17    Ġara tärbiyä tada ki, vi bulal dinǯq̇an baki,
   Ğara tərbiyə tada ki, vi bulal dincq'an baki,
    Šoṭinal va mu͑qq̇andi.
    Şot'inal va mǔqq'andi.

Verse: 18    Buxaʒ́uġoxun qayeci äyit nu bakaṭan, azuḳ ičuxun č̣eneġon.
   Buxačuğoxun qayeśi əyit nu bakat'an, azuk' içuxun c'eneğon.
    Buxaʒ́uġoy ḳanuna ämäl balo isä he bäxṭäväre!
    Buxačuğoy k'anuna əməl balo isə he bəxt'əvəre!

Verse: 19    Ḳula sayǯä äyiten tärbiyä tades tene bakon,
   K'ula saycə əyiten tərbiyə tades tene bakon,
    Šoṭaynaḳ ki, q̇amišal bakayin äyitä tene be͑ġon.
    Şot'aynak' ki, q'amişal bakayin əyitə tene běğon.

Verse: 20    Fikirbinuṭ äyitḳalṭu aḳenu?
   Fikirbinut' əyitk'alt'u ak'enu?
    Šoṭoxunsa q̇ammaza gele umudo.
    Şot'oxunsa q'ammaza gele umudo.

Verse: 21    Ärköyün kalabakala ḳul
   Ərköyün kalabakala k'ul
    Axərda iz q̇onʒ́uġoynaḳ därde bakon.
    Axırda iz q'ončuğoynak' dərde bakon.

Verse: 22    Äǯuġlu amdaren davane galdon,
   Əcuğlu amdaren davane galdon,
    Usum posḳalṭinal iz günaxxone avuzbon.
    Usum posk'alt'inal iz günaxxone avuzbon.

Verse: 23    Amdari iču ala efsunen axərda iču sanekon,
   Amdari içu ala efsunen axırda içu sanekon,
    Faġər amdaren isä hörmäte q̇azayinšon.
    Fağır amdaren isə hörməte q'azayinşon.

Verse: 24    Oġrina gärbakalo ič iz düšmäne,
   Oğrina gərbakalo iç iz düşməne,
    Elasṗiyal bakayin, divanbala gala düzä tene nex.
    Elasp'iyal bakayin, divanbala gala düzə tene nex.

Verse: 25    Amdaraxun q̇ə͑bsunen tälinäne badon,
   Amdaraxun q'ı̌bsunen təlinəne badon,
    Ama Q̣ONƷ́UĠO güväyinšakalṭaynaḳ q̇ə͑ butene.
    Ama Q'ONČUĞO güvəyinşakalt'aynak' q'ı̌ butene.

Verse: 26    Geleṭine kalaluġbalxoxun ičeynaḳ haq̇q̇ yaq̇be͑ġsa,
   Gelet'ine kalaluğbalxoxun içeynak' haq'q' yaq'běğsa,
    Ama mo sayǯä Q̣ONƷ́UĠOXUNE.
    Ama mo saycə Q'ONČUĞOXUNE.

Verse: 27    Düzgün amdarxon haq̇lu nu bakalṭoġoxun,
   Düzgün amdarxon haq'lu nu bakalt'oğoxun,
    Pis amdarxon isä düzgünṭoġoxunṭun iriṭe.
    Pis amdarxon isə düzgünt'oğoxunt'un irit'e.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.