TITUS
Biblia Udica, Versio Nizhensis: Vetus Testamentum
Part No. 307
Previous part

Chapter: 27 

Verse: 1    Äyč̣in ġinaxun lovġalayinš ma baka,
   Əyc'in ğinaxun lovğalayinş ma baka,
    Axəri šoṭin vaynaḳ ḳä ešṭuna ten ava.
    Axıri şot'in vaynak' k'ə eşt'una ten ava.

Verse: 2    Barta va ṭə͑yä͑minṭinq̇an tärifläyinši, hun tää,
   Barta va t'ı̌yə̌mint'inq'an tərifləyinşi, hun təə,
    Q̣erṭay muzexunq̇an tärif č̣eri, vi tää.
    Q'ert'ay muzexunq'an tərif c'eri, vi təə.

Verse: 3    Źe bə͑hine, q̇umal suuḳ tene,
   J̌e bı̌hine, q'umal suuk' tene,
    Ama q̇ammazi äš galsṭun moṭoġoy ṗrannaxunal bə͑hine.
    Ama q'ammazi əş galst'un mot'oğoy p'rannaxunal bı̌hine.

Verse: 4    Äǯuġ amansuze, hirseyal be͑śinä͑mä haq̇sun čätine,
   Əcuğ amansuze, hirseyal běšinə̌mə haq'sun çətine,
    P̣oy šoṭoġoxun betär bakala paxəlluġa hetäre portṗes bakon?
    P'oy şot'oğoxun betər bakala paxılluğa hetəre portp'es bakon?

Verse: 5    Äyitä ćoyel upsun šiṗ čurḳala dosṭe čuresunaxun šaaṭe.
   Əyitə ç̌oyel upsun şip' çurk'ala dost'e çuresunaxun şaat'e.

Verse: 6    Dosṭe köfel lafṭala äyitäl iz čuresunaxune,
   Dost'e köfel laft'ala əyitəl iz çuresunaxune,
    Düšmäni isä mučbsunal äfčidäne.
    Düşməni isə muçbsunal əfçidəne.

Verse: 7    Boš tapana šamla uć̣enal aġuluġebon,
   Boş tapana şamla uč'enal ağuluğebon,
    Ama busa bakalṭaynaḳ aġu šeyural muć̣ane aḳeġon.
    Ama busa bakalt'aynak' ağu şeyural muč'ane ak'eğon.

Verse: 8    Iz yurdaxun ä͑xil bafṭi amdar
   İz yurdaxun ə̌xil baft'i amdar
    Iz mesaxun ǯöybaki sa q̇uš ḳinäḳe.
    İz mesaxun cöybaki sa q'uş k'inək'e.

Verse: 9    Hetär ki varde q̇a duxin ade amdari xošel eysa,
   Hetər ki varde q'a duxin ade amdari xoşel eysa,
    Dosṭe šaaṭ näsyätäl hametäre.
    Dost'e şaat' nəsyətəl hametəre.

Verse: 10    Ham vi dosṭa, hamal bavay dosṭa ma bosa,
   Ham vi dost'a, hamal bavay dost'a ma bosa,
    Ṭara bafṭaṭan vičey ḳoya ma taki,
    T'ara baft'at'an viçey k'oya ma taki,
    Ä͑xil bakala q̇oomaxunsa ə͑śa q̇onši šaaṭe.
    Ə̌xil bakala q'oomaxunsa ı̌ša q'onşi şaat'e.

Verse: 11    Bez ġar, müdrik baka ki, bez üḳä mu͑q̇ṭan,
   Bez ğar, müdrik baka ki, bez ük'ə mǔq't'an,
    Ṭe vädä za oṭṗesṭalṭuval ǯoġab tades bazkon.
    T'e vədə za ot'p'est'alt'uval coğab tades bazkon.

Verse: 12    Ä͑xilaḳalen saturbe͑ś šärä aḳi šoṭoxun ṭineṭon,
   Ə̌xilak'alen saturběš şərə ak'i şot'oxun t'inet'on,
    Q̣ammaz isä be͑ś taci ziyane bä͑ġä͑bon.
    Q'ammaz isə běš taśi ziyane bə̌ğə̌bon.

Verse: 13    Q̣ärib amdari gala zamin čurḳalṭin iz paltaral girove tadon,
   Q'ərib amdari gala zamin çurk'alt'in iz paltaral girove tadon,
    Haketäräl q̇erṭay čuġoy gala zamin čurḳalṭine bon.
    Haketərəl q'ert'ay çuğoy gala zamin çurk'alt'ine bon.

Verse: 14    Iz q̇onšina savaxṭan üšenen osṭaar xeyir-bäräkät tadalo
   İz q'onşina savaxt'an üşenen ost'aar xeyir-bərəkət tadalo
    Źame q̇onʒ́uxe bakon.
    J̌ame q'ončuxe bakon.

Verse: 15    Ṭoṭoḳala čuux asoyla ġine nu boṭbakala aġalinane ošq̇ar.
   T'ot'ok'ala çuux asoyla ğine nu bot'bakala ağalinane oşq'ar.

Verse: 16    Šoṭo šipbsun muša nu efes baksun,
   Şot'o şipbsun muşa nu efes baksun,
    Nääl ki mä͑xin boš č̣äyinä nu efes baksun ḳinäḳe.
    Nəəl ki mə̌xin boş c'əyinə nu efes baksun k'inək'e.

Verse: 17    Dämirä dämiren ġayinbalṭullariḳ,
   Dəmirə dəmiren ğayinbalt'ullarik',
    Amdarxoval sun-sunaxunṭun zombaksa.
    Amdarxoval sun-sunaxunt'un zombaksa.

Verse: 18    Inǯilnä xoda beǯärišalṭin šoṭay baraxun ukala ḳinäḳ,
   İncilnə xoda becərişalt'in şot'ay baraxun ukala k'inək',
    Iz aġay q̇ayġina mandalṭinal šäräfe bä͑ġä͑bon.
    İz ağay q'ayğina mandalt'inal şərəfe bə̌ğə̌bon.

Verse: 19    Xenen ćoye surata aḳesṭala ḳinäḳ,
   Xenen ç̌oye surata ak'est'ala k'inək',
    Amdari üḳenal šoṭay šu baksunane aḳesṭa.
    Amdari ük'enal şot'ay şu baksunane ak'est'a.

Verse: 20    Bisun q̇a gärämzoġ nu bošala ḳinäḳ
   Bisun q'a gərəmzoğ nu boşala k'inək'
    Amdari pulal tene bošon.
    Amdari pulal tene boşon.

Verse: 21    Q̣əzəl-gümüši tämizluġ gam buxarin boše ćoyel č̣eġon,
   Q'ızıl-gümüşi təmizluğ gam buxarin boşe ç̌oyel c'eğon,
    Amdara isä q̇erṭay tärifene čalxesṭon.
    Amdara isə q'ert'ay tərifene çalxest'on.

Verse: 22    Aruma dingen ṭaṗḳayin, pä͑pe͑ č̣eġon,
   Aruma dingen t'ap'k'ayin, pə̌pě c'eğon,
    Ama säfeya heq̇ädär ṭaṗalḳayin, iz säfeyluġ tene č̣eġon.
    Ama səfeya heq'ədər t'ap'alk'ayin, iz səfeyluğ tene c'eğon.

Verse: 23    Sürünä šaaṭ be͑ġa,
   Sürünə şaat' běğa,
    Vi naxəra fikir tada,
    Vi naxıra fikir tada,

Verse: 24    Šoṭaynaḳ ki, nä var-dövlät hämišäluġ tene,
   Şot'aynak' ki, nə var-dövlət həmişəluğ tene,
    Nä taǯ näsiläxun näsilä tene č̣ovaksa.
    Nə tac nəsiləxun nəsilə tene c'ovaksa.

Verse: 25    Kolośa girbiṭuxun oša täzä o č̣eġaṭan,
   Kološa girbit'uxun oşa təzə o c'eğat'an,
    Buruġo o capeġala vädine
    Buruğo o śapeğala vədine

Verse: 26    Q̣uziġone va lapesṭon,
   Q'uziğone va lapest'on,
    Kečiġo toydin q̇oruġ haq̇es bakon.
    Keçiğo toydin q'oruğ haq'es bakon.

Verse: 27    Kečiġone va ṭeq̇ädär muć̣anaq̇ tadon ki,
   Keçiğone va t'eq'ədər muč'anaq' tadon ki,
    Mo vi külfätäl, nökärxoval bäse bakon.
    Mo vi külfətəl, nökərxoval bəse bakon.


Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.