TITUS
Biblia Udica, Versio Nizhensis: Vetus Testamentum
Part No. 304
Previous part

Chapter: 24 

Verse: 1    Pis amdarxo paxəlluġ maba,
   Pis amdarxo paxılluğ maba,
    Šoṭoġo gärbaksun ma čureki.
    Şot'oğo gərbaksun ma çureki.

Verse: 2    Šoṭaynaḳ ki, šoṭoġoy üḳe zaləmluġbsuni fikirxono,
   Şot'aynak' ki, şot'oğoy ük'e zalımluğbsuni fikirxono,
    Šoṭoġoy muzen q̇äddarluġaxune äyite.
    Şot'oğoy muzen q'əddarluğaxune əyite.

Verse: 3    Ḳož müdrikluġene biq̇esa,
   K'oj müdrikluğene biq'esa,
    Q̣amišaksunenal šoṭo möhḳämebsa.
    Q'amişaksunenal şot'o möhk'əmebsa.

Verse: 4    Iz otaġxo avabaksuni kömäyen,
   İz otağxo avabaksuni köməyen,
    Här ǯürä däyärlü, toyexlu šeyurxone buybaksa.
    Hər cürə dəyərlü, toyexlu şeyurxone buybaksa.

Verse: 5    Müdrik išq̇ar zorbane bakon,
   Müdrik işq'ar zorbane bakon,
    Avabakala amdaren iz zorane avuzbon.
    Avabakala amdaren iz zorane avuzbon.

Verse: 6    Davabaṭan maslaatxo u͑mu͑xlaxa,
   Davabat'an maslaatxo ǔmǔxlaxa,
    Düz näsyät tadalo gelenesa, davina tanšon.
    Düz nəsyət tadalo gelenesa, davina tanşon.

Verse: 7    Q̣ammazeynaḳ müdrikluġ kul nu ṗaṗala sa šeye,
   Q'ammazeynak' müdrikluğ kul nu p'ap'ala sa şeye,
    Darvazin ṭo͑ġo͑l * ǯamaati be͑ś iz źomoval qaypes tene bakal.
    Darvazin t'ǒğǒl * camaati běš iz ǰomoval qaypes tene bakal.

Verse: 8    Iz fikire šär äš biq̇esṭalo äšgaldale ḳalesa.
   İz fikire şər əş biq'est'alo əşgaldale k'alesa.

Verse: 9    Säfeyi pis niyät günaxe,
   Səfeyi pis niyət günaxe,
    Amdarxonal ćoboćuṭoġo murdare hesabbsa.
    Amdarxonal ç̌oboç̌ut'oğo murdare hesabbsa.

Verse: 10    Ṭar ġine osṭaar tenusa,
   T'ar ğine ost'aar tenusa,
    He zäyif amdarnu!
    He zəyif amdarnu!

Verse: 11    Bespsa tašalṭoġo čarḳesṭa,
   Bespsa taşalt'oğo çark'est'a,
    Ḳac̣esunač taġalṭoġo qoš qayda.
    K'as'esunaç tağalt'oğo qoş qayda.

Verse: 12    Hun ualḳayin ki, "moṭoxun bez xavar tenoy",
   Hun ualk'ayin ki, "mot'oxun bez xavar tenoy",
    Üḳürxo Yoxlayinšalṭin moṭo ateneḳon ki?
    Ük'ürxo Yoxlayinşalt'in mot'o atenek'on ki?
    Vi elmoġo Q̣orišalṭin moṭo avatenebakon ki?
    Vi elmoğo Q'orişalt'in mot'o avatenebakon ki?
    Šoṭin amdarxo ičoġoy ämälxo görä tene tadon ki?
    Şot'in amdarxo içoğoy əməlxo görə tene tadon ki?

Verse: 13    Bez ġar, uć̣ uka, axəri šo xeyire,
   Bez ğar, uč' uka, axıri şo xeyire,
    Šamla uć̣e tadal vi ṭamaġeynaḳ muć̣ane.
    Şamla uč'e tadal vi t'amağeynak' muč'ane.

Verse: 14    Avabaka ki, müdrikluġal vi elmoġoynaḳ hametäre,
   Avabaka ki, müdrikluğal vi elmoğoynak' hametəre,
    Šoṭo bä͑ġä͑bayin, gäläǯäyäl bakale,
    Şot'o bə̌ğə̌bayin, gələcəyəl bakale,
    Vi umud amc̣ina tene č̣eġal.
    Vi umud ams'ina tene c'eğal.

Verse: 15    Šär amdar ḳinäḳ düzgün amdari ḳoža väränbseynaḳ
   Şər amdar k'inək' düzgün amdari k'oja vərənbseynak'
    Busq̇u ma biq̇a, šoṭay yurda ma carpa.
    Busq'u ma biq'a, şot'ay yurda ma śarpa.

Verse: 16    Düzgün amdar vu͑ġ käräm bitayinal, ṗurum hayzale,
   Düzgün amdar vǔğ kərəm bitayinal, p'urum hayzale,
    Šär amdareynaḳ bälä eġaṭan isä šoṭo sanekon.
    Şər amdareynak' bələ eğat'an isə şot'o sanekon.

Verse: 17    Düšmäni bisṭuna mu͑q ma baka,
   Düşməni bist'una mǔq ma baka,
    Šoṭay lamansṭuna görä vi üḳ maq̇an čaxeci.
    Şot'ay lamanst'una görə vi ük' maq'an çaxeśi.

Verse: 18    Axəri Q̣ONƷ́UĠON moṭo aneḳon, Iz xošel tene eġon,
   Axıri Q'ONČUĞON mot'o anek'on, İz xoşel tene eğon,
    Vi düšmäni loxolxunal Iz äǯuġo exedon.
    Vi düşməni loxolxunal İz əcuğo exedon.

Verse: 19    Pisluġ balṭoġo görä vi äǯuġon maq̇an biq̇i,
   Pisluğ balt'oğo görə vi əcuğon maq'an biq'i,
    Šär amdarxo paxəlluġ maba,
    Şər amdarxo paxılluğ maba,

Verse: 20    Šoṭaynaḳ ki, pis amdari axər butene,
   Şot'aynak' ki, pis amdari axır butene,
    Šär amdari čiraġ anećon.
    Şər amdari çirağ aneç̌on.

Verse: 21    Bez ġar, Q̣ONƷ́UĠOXUN saal padčaġaxun q̇ə͑ba,
   Bez ğar, Q'ONČUĞOXUN saal padçağaxun q'ı̌ba,
    Šoṭoġo nu čalxalṭoġoxun dosṭ ma baka.
    Şot'oğo nu çalxalt'oğoxun dost' ma baka.

Verse: 22    Ṭe ṗrannan tadala bälä q̇äflätene eġon;
   T'e p'rannan tadala bələ q'əflətene eğon;
    Šoṭoġon tadala ǯazinal šina avabakon?
    Şot'oğon tadala cazinal şina avabakon?



Müdrik amdarxoy sa hemal müdrik äyitmux
Müdrik amdarxoy sa hemal müdrik əyitmux


Verse: 23    Me äyitmoġoval müdrikxone pe:
   Me əyitmoğoval müdrikxone pe:
   \ Divanbaṭan täräfkäšluġbsun šaaṭ tene.
   \ Divanbat'an tərəfkəşluğbsun şaat' tene.

Verse: 24    Taxsərkärṭu "hun düzgünnu" uḳala amdara azuḳxon q̇inäyinšebon,
   Taxsırkərt'u "hun düzgünnu" uk'ala amdara azuk'xon q'inəyinşebon,
    Tayfoġon läänätṭunbon.
    Tayfoğon ləənətt'unbon.

Verse: 25    Ama šoṭo ǯaza tadala amdaren xeyir bä͑ġä͑bale,
   Ama şot'o caza tadala amdaren xeyir bə̌ğə̌bale,
    Šoṭay loxol bol xeyir-bäräkät eġale.
    Şot'ay loxol bol xeyir-bərəkət eğale.

Verse: 26    Seri ǯoġab tasṭun amdara ćoyexun mučbsun ḳinäḳe.
   Seri coğab tast'un amdara ç̌oyexun muçbsun k'inək'e.

Verse: 27    Süfṭä qavuna bakala äšlä čarḳa, q̇oruġa tämizba,
   Süft'ə qavuna bakala əşlə çark'a, q'oruğa təmizba,
    Oša vaynaḳ ḳož biq̇a.
    Oşa vaynak' k'oj biq'a.

Verse: 28    Q̣onšin äleyinä äfči šahidluġ ma ba,
   Q'onşin əleyinə əfçi şahidluğ ma ba,
    Vi źomoxun fereṭṭala äyit maq̇an č̣eri.
    Vi ǰomoxun feret't'ala əyit maq'an c'eri.

Verse: 29    Ma upa: "Šoṭin za biṭu zuval šoṭo booz,
   Ma upa: "Şot'in za bit'u zuval şot'o booz,
    Šoṭay ämälxoy äväzä č̣eġoz".
    Şot'ay əməlxoy əvəzə c'eğoz".

Verse: 30    Tänbäli q̇oruġaxun,
   Tənbəli q'oruğaxun,
    Q̣ammazi ṭulluġaxunez č̣ovaksay.
    Q'ammazi t'ulluğaxunez c'ovaksay.

Verse: 31    Azḳi ki, här ganu cacen q̇a ilen haq̇ene,
   Azk'i ki, hər ganu śaśen q'a ilen haq'ene,
    Źene q̇alal barene.
    J̌ene q'alal barene.

Verse: 32    Be͑ġi moṭo fikirez tadi,
   Běği mot'o fikirez tadi,
    Moṭoxun därsez exṭi:
    Mot'oxun dərsez ext'i:

Verse: 33    Samalal basḳi neṗaxeġayin,
   Samalal bask'i nep'axeğayin,
    Turmoġo boxodi basḳayin,
    Turmoğo boxodi bask'ayin,

Verse: 34    Mone, käsibluġen oġri ḳinäḳ,
   Mone, kəsibluğen oğri k'inək',
    Ehṭiyäǯen amdar fu͑q̇ḳal ḳinäḳ vi loxol hüǯümebon.
    Eht'iyəcen amdar fǔq'k'al k'inək' vi loxol hücümebon.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.