TITUS
Biblia Udica, Versio Nizhensis: Vetus Testamentum
Part No. 302
Previous part

Chapter: 22 

Verse: 1    Šaaṭ c̣i kala var-dövlätäxun,
   Şaat' s'i kala var-dövlətəxun,
    Hörmät q̇azayinšbsunal q̇əzəl-gümüšäxun üsṭüne.
    Hörmət q'azayinşbsunal q'ızıl-gümüşəxun üst'üne.

Verse: 2    Dövlätlü q̇a käsib amdar sa šeyasṭaṭun suna ošq̇ar:
   Dövlətlü q'a kəsib amdar sa şeyast'at'un suna oşq'ar:
    P̣rannal Yaratmišiyo Q̣ONƷ́UXE.
    P'rannal Yaratmişiyo Q'ONČUXE.

Verse: 3    Ä͑xilaḳala amdaren saturbe͑ś šärä aḳi šoṭoxun ṭineṭon,
   Ə̌xilak'ala amdaren saturběš şərə ak'i şot'oxun t'inet'on,
    Q̣ammazen isä be͑ś taci ziyane bä͑ġä͑bon.
    Q'ammazen isə běš taśi ziyane bə̌ğə̌bon.

Verse: 4    Äyitä be͑ġsunen q̇a Q̣ONƷ́UĠO čalxsunen
   Əyitə běğsunen q'a Q'ONČUĞO çalxsunen
    Dövlät, šäräf, saal yäšäyinše ečon.
    Dövlət, şərəf, saal yəşəyinşe eçon.

Verse: 5    Šär amdari yaq̇ caclane, ṭeṭiya täläno,
   Şər amdari yaq' śaślane, t'et'iya tələno,
    Iz elmoġo čureġalṭin šoṭoxun ä͑xile taraḳon.
    İz elmoğo çureğalt'in şot'oxun ə̌xile tarak'on.

Verse: 6    Äyelä ṭebelxun düz yaq̇a laxa,
   Əyelə t'ebelxun düz yaq'a laxa,
    Šo isä q̇ožabakaṭanal me yaq̇axun tene č̣eġal.
    Şo isə q'ojabakat'anal me yaq'axun tene c'eğal.

Verse: 7    Varlu amdar käsibi aġane bakon,
   Varlu amdar kəsibi ağane bakon,
    Borǯlu amdaral iču borǯ tadali ḳule bakon.
    Borclu amdaral içu borc tadali k'ule bakon.

Verse: 8    Haq̇suzluġ biṭalṭin ičeynaḳ bäläne exṗon,
   Haq'suzluğ bit'alt'in içeynak' bələne exp'on,
    Šoṭay sərišala čombaġal äfčinebakon.
    Şot'ay sırişala çombağal əfçinebakon.

Verse: 9    Käsibäxun iz śuma ǯöybala kulqay amdaren
   Kəsibəxun iz šuma cöybala kulqay amdaren
    Xeyir-bäräkäte q̇azayinšon.
    Xeyir-bərəkəte q'azayinşon.

Verse: 10    Masq̇arabala amdara šäṗenġon, daval čureḳon,
   Masq'arabala amdara şəp'enğon, daval çurek'on,
    Orobaksunal, köfel lafsṭunal tene bakon.
    Orobaksunal, köfel lafst'unal tene bakon.

Verse: 11    Üḳ tämiz, muć̣a muz amdari
   Ük' təmiz, muč'a muz amdari
    Padčaġal dosṭe bakon.
    Padçağal dost'e bakon.

Verse: 12    Q̣ONƷ́UĠON q̇amišaksuna q̇orišebon,
   Q'ONČUĞON q'amişaksuna q'orişebon,
    Xayini äfči äyitmoġo isä ćoyele č̣evḳon.
    Xayini əfçi əyitmoğo isə ç̌oyele c'evk'on.

Verse: 13    Tänbälen nexe: "Qavuna aslano,
   Tənbəlen nexe: "Qavuna aslano,
    Määlne č̣eġayiz, za carḳale".
    Məəlne c'eğayiz, za śark'ale".

Verse: 14    Äxlagsuz čuġoy źomo bä͑ġä͑loy kur ḳinäḳe,
   Əxlagsuz çuğoy ǰomo bə̌ğə̌loy kur k'inək'e,
    Q̣ONƷ́UĠON läänätbiyo ṭeṭiyane bafṭon.
    Q'ONČUĞON ləənətbiyo t'et'iyane baft'on.

Verse: 15    Q̣ammazluġ äyläsṭa bune,
   Q'ammazluğ əyləst'a bune,
    Ama ṭaṗen šoṭo düzebon.
    Ama t'ap'en şot'o düzebon.

Verse: 16    Varlu bakseynaḳ käsibä zülüm baloval,
   Varlu bakseynak' kəsibə zülüm baloval,
    Varlu amdara pay tadaloval -
    Varlu amdara pay tadaloval -
    Morox ṗo͑ġä͑l ehṭiyäǯäne bafṭon.
    Morox p'ǒğə̌l eht'iyəcəne baft'on.



Otuz müdrik äyit
Otuz müdrik əyit


Verse: 17    Vi u͑mu͑xxo qaypa,
   Vi ǔmǔxxo qaypa,
    Müdrik amdarxoy äyitmoġo ibaka,
    Müdrik amdarxoy əyitmoğo ibaka,
    Bezi zombsuna fikir tada.
    Bezi zombsuna fikir tada.

Verse: 18    Šoṭoġo vi üḳe boš efayin,
   Şot'oğo vi ük'e boş efayin,
    Šoṭoġo bütümä vi muzel ečayin, vaynaḳ šaaṭe bakon.
    Şot'oğo bütümə vi muzel eçayin, vaynak' şaat'e bakon.

Verse: 19    Q̣ONƷ́UĠO exṭibärbavax pi
   Q'ONČUĞO ext'ibərbavax pi
    Ġe moṭoġo va, vaz avabakesṭa.
    Ğe mot'oğo va, vaz avabakest'a.

Verse: 20    Vaynaḳ otuz mäsälä, müdrik näsyät tez campi ki?
   Vaynak' otuz məsələ, müdrik nəsyət tez śampi ki?

Verse: 21    Šoṭoġon va haq̇q̇e q̇a serin ḳä baksuna avabakesṭi,
   Şot'oğon va haq'q'e q'a serin k'ə baksuna avabakest'i,
    Va yaq̇abiṭoġoy ṭo͑ġo͑l düz ǯoġaben qaybakavax.
    Va yaq'abit'oğoy t'ǒğǒl düz coğaben qaybakavax.

Verse: 22    Käsibä iz faġər baksuna görä fu͑q̇mapa,
   Kəsibə iz fağır baksuna görə fǔq'mapa,
    Divanbaṭan ehṭiyäǯi boš bakalṭu zülüm ma tada.
    Divanbat'an eht'iyəci boş bakalt'u zülüm ma tada.

Verse: 23    Šoṭaynaḳ ki, šoṭoġoy äšurxo Q̣ONƷ́UĠON Ičin be͑ġale,
   Şot'aynak' ki, şot'oğoy əşurxo Q'ONČUĞON İçin běğale,
    Šoṭoġo fu͑q̇ḳalṭoġo äfčibale.
    Şot'oğo fǔq'k'alt'oğo əfçibale.

Verse: 24    Usum äǯuġon biq̇alṭuxun dosṭ ma baka,
   Usum əcuğon biq'alt'uxun dost' ma baka,
    Usum ičuxun č̣eġala amdari yaq̇a ma bafṭa.
    Usum içuxun c'eğala amdari yaq'a ma baft'a.

Verse: 25    Tenesa, šoṭay yaq̇enen taġon,
   Tenesa, şot'ay yaq'enen tağon,
    Hun va tälinän badon.
    Hun va təlinən badon.

Verse: 26    Q̣erṭay gala zamin čurpsunaxun,
   Q'ert'ay gala zamin çurpsunaxun,
    Šoṭay gala äyit tasṭunaxun qoš baka.
    Şot'ay gala əyit tast'unaxun qoş baka.

Verse: 27    Ṭe amdari gala tadala hiḳḳal nu bakayin,
   T'e amdari gala tadala hik'k'al nu bakayin,
    Vi basḳala döšäyäl tašalṭun.
    Vi bask'ala döşəyəl taşalt'un.

Verse: 28    Bavoġon laxi damna zahmani źe͑ne ganu ma badalba.
   Bavoğon laxi damna zahmani ǰěne ganu ma badalba.

Verse: 29    Iz äšlä šaaṭ avabakalṭu anksa?
   İz əşlə şaat' avabakalt'u anksa?
    Šoṭin adi amdarxoynaḳ tää, padčaġxoynaḳ äšṗale.
    Şot'in adi amdarxoynak' təə, padçağxoynak' əşp'ale.


Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.