TITUS
Biblia Udica, Versio Nizhensis: Vetus Testamentum
Part No. 293
Previous part

Chapter: 13 

Verse: 1    Müdrik ġaren bavay tadala tärbiyinä u͑mu͑xe laxon,
   Müdrik ğaren bavay tadala tərbiyinə ǔmǔxe laxon,
    Ćoboćunen isä töhmätä fikir tene tadon.
    Ç̌oboç̌unen isə töhmətə fikir tene tadon.

Verse: 2    Amdaren iz muze šaaṭ äyitin xeyiräne aḳon,
   Amdaren iz muze şaat' əyitin xeyirəne ak'on,
    Ičusṭa šaaṭluġ nu bakalṭin isä q̇äddarluġe qä͑veġon.
    İçust'a şaat'luğ nu bakalt'in isə q'əddarluğe qə̌veğon.

Verse: 3    Iz muza efalṭin iz elmoġone q̇orišon,
   İz muza efalt'in iz elmoğone q'orişon,
    Yänšäġen isä iz bula bälinäne badon.
    Yənşəğen isə iz bula bəlinəne badon.

Verse: 4    Tänbäli niyät iz boše mandon,
   Tənbəli niyət iz boşe mandon,
    Äšbsun čureġalṭay niyätxo isä bexe ṗaṗon.
    Əşbsun çureğalt'ay niyətxo isə bexe p'ap'on.

Verse: 5    Düzgün amdaren äfčinä nifrätebon,
   Düzgün amdaren əfçinə nifrətebon,
    Šär amdaren isä xäǯälät q̇a biyaburčuluġe ečon.
    Şər amdaren isə xəcələt q'a biyaburçuluğe eçon.

Verse: 6    Kamilluġi yaq̇a bakalṭu düzgünluġen q̇orišebon,
   Kamilluği yaq'a bakalt'u düzgünluğen q'orişebon,
    Günaxbalṭu isä šären sanekon.
    Günaxbalt'u isə şəren sanekon.

Verse: 7    Amdaro ki, izi hiḳḳal butene, iču varlune aḳesṭa,
   Amdaro ki, izi hik'k'al butene, içu varlune ak'est'a,
    Ṭetärono ki, iz dövlät gelene, ama iču käsibe aḳesṭa.
    T'etərono ki, iz dövlət gelene, ama içu kəsibe ak'est'a.

Verse: 8    Dövläten amdari elmoġo xatinaxun čarḳesedon,
   Dövləten amdari elmoğo xatinaxun çark'esedon,
    Käsib isä ṭe xatina bafaltenedon.
    Kəsib isə t'e xatina bafaltenedon.

Verse: 9    Düzgün amdarxoy išiġ güre boḳon,
   Düzgün amdarxoy işiğ güre bok'on,
    Šär amdarxoy čiraġ isä anećon.
    Şər amdarxoy çirağ isə aneç̌on.

Verse: 10    Amdari iču ala biq̇sunen sayǯä davane ečon,
   Amdari içu ala biq'sunen saycə davane eçon,
    Šaaṭ näsyätä u͑mu͑xlaxsunen isä müdrikluġ.
    Şaat' nəsyətə ǔmǔxlaxsunen isə müdrikluğ.

Verse: 11    Havayi eġala dövlät usume irameġon,
   Havayi eğala dövlət usume irameğon,
    Zähmäten q̇azayinšala dövlät isä avuzebakon.
    Zəhməten q'azayinşala dövlət isə avuzebakon.

Verse: 12    Č̣äyi bex ṗaṗala arzu üḳe q̇ać̣e,
   C'əyi bex p'ap'ala arzu ük'e q'ač'e,
    Niyätä ṗaṗsun isä yäšäyinšesṭala xod ḳinäḳ.
    Niyətə p'ap'sun isə yəşəyinşest'ala xod k'inək'.

Verse: 13    Tärbiyinä nu q̇abulbalṭin ičune zäräl tadon,
   Tərbiyinə nu q'abulbalt'in içune zərəl tadon,
    Buyruġa hörmätbalṭin isä šaaṭ ġine aḳon.
    Buyruğa hörmətbalt'in isə şaat' ğine ak'on.

Verse: 14    Müdrik amdari zombsun yäšäyinšesṭala orayine,
   Müdrik amdari zombsun yəşəyinşest'ala orayine,
    Amdara bisuna tašala tälinäxune ä͑xilbon.
    Amdara bisuna taşala təlinəxune ə̌xilbon.

Verse: 15    Düz q̇amišakalo amdarxoy piyes šaaṭe aḳeġon,
   Düz q'amişakalo amdarxoy piyes şaat'e ak'eğon,
    Ičusṭa šaaṭluġ nu bakalṭay yaq̇en isä bisunane tašon.
    İçust'a şaat'luğ nu bakalt'ay yaq'en isə bisunane taşon.

Verse: 16    Ä͑xilaḳalṭin här äšlä avabaksunene biq̇sa,
   Ə̌xilak'alt'in hər əşlə avabaksunene biq'sa,
    Axmaġen isä iz säfeyluġane bütümä aḳesṭa.
    Axmağen isə iz səfeyluğane bütümə ak'est'a.

Verse: 17    Pis elči bälinäne bafṭon,
   Pis elçi bəlinəne baft'on,
    Exṭibärlu elčinen isä serluġe ečon.
    Ext'ibərlu elçinen isə serluğe eçon.

Verse: 18    Tärbiyinä iradbalo käsib saal biyabure bakon,
   Tərbiyinə iradbalo kəsib saal biyabure bakon,
    Maslaata q̇abulbalṭin isä hörmäte q̇azayinšon.
    Maslaata q'abulbalt'in isə hörməte q'azayinşon.

Verse: 19    Arzuna ṗaṗsun amdareynaḳ muć̣ane eġon,
   Arzuna p'ap'sun amdareynak' muč'ane eğon,
    Q̣ammaz isä pisluġaxun qaybaksun tene čureġon.
    Q'ammaz isə pisluğaxun qaybaksun tene çureğon.

Verse: 20    Müdrikxoxun arci-hayzalṭin müdrikluġe q̇azayinšon,
   Müdrikxoxun arśi-hayzalt'in müdrikluğe q'azayinşon,
    Q̣ammazxoxun dosṭ bakalṭin isä iz bula bälinäne badon.
    Q'ammazxoxun dost' bakalt'in isə iz bula bəlinəne badon.

Verse: 21    Günaxkäräxun šär kamtene,
   Günaxkərəxun şər kamtene,
    Düzgün amdaren isä šaaṭ ġi aḳale.
    Düzgün amdaren isə şaat' ği ak'ale.

Verse: 22    Šaaṭ amdari girbiyo iz nävoġoynaḳe mandon,
   Şaat' amdari girbiyo iz nəvoğoynak'e mandon,
    Günaxkäri girbi dövlät isä düzgün amdarane č̣ovakon.
    Günaxkəri girbi dövlət isə düzgün amdarane c'ovakon.

Verse: 23    Käsibi oćalen bol mähsul taaldayin,
   Kəsibi oç̌alen bol məhsul taaldayin,
    Düzgünluġ nu bakala gala äfčinebakon.
    Düzgünluğ nu bakala gala əfçinebakon.

Verse: 24    Ġara nu čureġalṭin šoṭo tene ǯazalayinšon,
   Ğara nu çureğalt'in şot'o tene cazalayinşon,
    Čureġalṭin isä ḳovala ṭo͑o͑x tene boson.
    Çureğalt'in isə k'ovala t'ǒǒx tene boson.

Verse: 25    Düzgün amdar hämišä boše bakon,
   Düzgün amdar həmişə boşe bakon,
    Šär amdar isä busane mandon.
    Şər amdar isə busane mandon.


Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.