TITUS
Biblia Udica, Versio Nizhensis: Vetus Testamentum
Part No. 292
Previous part

Chapter: 12 

Verse: 1    Tärbiyinä čureġalṭin avabaksune čureġon,
   Tərbiyinə çureğalt'in avabaksune çureğon,
    Töhmätä nifrätbalo isä šuursuze.
    Töhmətə nifrətbalo isə şuursuze.

Verse: 2    Q̣ONƷ́UX šaaṭ amdaraxun iräzine mandon,
   Q'ONČUX şaat' amdaraxun irəzine mandon,
    Pisniyätlü amdari isä q̇ärarane č̣evḳon.
    Pisniyətlü amdari isə q'ərarane c'evk'on.

Verse: 3    Amdaren iču šären möhḳäm tene bon,
   Amdaren içu şəren möhk'əm tene bon,
    Düzgün amdari tum isä äfči tene bakon.
    Düzgün amdari tum isə əfçi tene bakon.

Verse: 4    Šaaṭ čuux išq̇ari biin taǯe,
   Şaat' çuux işq'ari biin tace,
    Išq̇ara biyaburbala čuux isä šoṭay üḳe sa q̇aratikän.
    İşq'ara biyaburbala çuux isə şot'ay ük'e sa q'aratikən.

Verse: 5    Düzgün amdarxoy niyät düzgünluġe,
   Düzgün amdarxoy niyət düzgünluğe,
    Šär amdarxoy maslaat isä äfči.
    Şər amdarxoy maslaat isə əfçi.

Verse: 6    Šär amdarxoy äyitmux ṗi cipseynaḳe,
   Şər amdarxoy əyitmux p'i śipseynak'e,
    Ama üḳ tämizṭoġoy muzen ičoġo čarḳesṭale.
    Ama ük' təmizt'oğoy muzen içoğo çark'est'ale.

Verse: 7    Pisorox biti äfčiṭunbakon,
   Pisorox biti əfçit'unbakon,
    Düzgün amdarxoy ḳož isä sal sa vädä carteneġon.
    Düzgün amdarxoy k'oj isə sal sa vədə śarteneğon.

Verse: 8    Müdrikluġa görä amdara tärifṭunbon,
   Müdrikluğa görə amdara tərift'unbon,
    Pis niyätluṭu isä biyabur.
    Pis niyətlut'u isə biyabur.

Verse: 9    Izi sa ḳul bakala adi amdar baksun
   İzi sa k'ul bakala adi amdar baksun
    Lovġalayinšakala, ama śum nu bä͑ġä͑bala amdaraxun šaaṭe.
    Lovğalayinşakala, ama šum nu bə̌ğə̌bala amdaraxun şaat'e.

Verse: 10    Düzgün amdaren iz heyvanal goroxe eysa,
   Düzgün amdaren iz heyvanal goroxe eysa,
    Šär amdari šaaṭluġbsun isä q̇äddarluġaxunal betäre.
    Şər amdari şaat'luğbsun isə q'əddarluğaxunal betəre.

Verse: 11    Iz oćala biṭi-exṗalṭin boššamin śume ukon,
   İz oç̌ala bit'i-exp'alt'in boşşamin šume ukon,
    Ama amc̣i šeyurxoy qošṭan taġalo q̇ammaze.
    Ama ams'i şeyurxoy qoşt'an tağalo q'ammaze.

Verse: 12    Šär amdaren pisluġi yaq̇e q̇azanǯane tamaxbon,
   Şər amdaren pisluği yaq'e q'azancane tamaxbon,
    Düzgün amdari tumen isä večäne duġon.
    Düzgün amdari tumen isə veçəne duğon.

Verse: 13    Pis amdara äfči äyitmoġon tälinäne badon,
   Pis amdara əfçi əyitmoğon təlinəne badon,
    Ama düzgün amdar ṭara bafaldayin ṭeṭiin salamate čarḳon.
    Ama düzgün amdar t'ara bafaldayin t'et'iin salamate çark'on.

Verse: 14    Amdari źomoxun č̣eġala šaaṭ äyitenal xeyir-bäräkäte ečon,
   Amdari ǰomoxun c'eğala şaat' əyitenal xeyir-bərəkəte eçon,
    Lap kiin zähmäten ečala q̇azanǯ ḳinäḳ.
    Lap kiin zəhməten eçala q'azanc k'inək'.

Verse: 15    Säfeyi yaq̇ iz piyes düze aḳeġon,
   Səfeyi yaq' iz piyes düze ak'eğon,
    Müdrik amdaren isä näsyätäne u͑mu͑xlaxon.
    Müdrik amdaren isə nəsyətəne ǔmǔxlaxon.

Verse: 16    Säfeyen iz äǯuġo kap ćoyele č̣evḳon,
   Səfeyen iz əcuğo kap ç̌oyele c'evk'on,
    Ä͑xilaḳalṭin isä šäräfsuza fikir tene tadon.
    Ə̌xilak'alt'in isə şərəfsuza fikir tene tadon.

Verse: 17    Düzgün šahiden serinäne äyitḳon,
   Düzgün şahiden serinəne əyitk'on,
    Äfčiduġal šahiden isä äfči.
    Əfçiduğal şahiden isə əfçi.

Verse: 18    Fikirbinuṭ äyitḳalṭay muzen q̇ələnǯ ḳinäḳ yaralayinšebon,
   Fikirbinut' əyitk'alt'ay muzen q'ılınc k'inək' yaralayinşebon,
    Müdrikṭay muzen isä amdarxo q̇olayebon.
    Müdrikt'ay muzen isə amdarxo q'olayebon.

Verse: 19    Düz äyit hämišäluġe yäšäyinšon,
   Düz əyit həmişəluğe yəşəyinşon,
    Äfči äyiti ömür isä gödäye bakon.
    Əfçi əyiti ömür isə gödəye bakon.

Verse: 20    Pis niyät bakalṭay üḳe šäro,
   Pis niyət bakalt'ay ük'e şəro,
    Serluġ čureġalṭay üḳe isä mu͑qluġ.
    Serluğ çureğalt'ay ük'e isə mǔqluğ.

Verse: 21    Düzgün amdar sal sa vädä bälinä tene bafṭon,
   Düzgün amdar sal sa vədə bəlinə tene baft'on,
    Pis amdarxo isä hämišä koruġi boše bakon.
    Pis amdarxo isə həmişə koruği boşe bakon.

Verse: 22    Q̣ONƷ́UĠON äfči äyitäxun iriṭene,
   Q'ONČUĞON əfçi əyitəxun irit'ene,
    Düzgünṭoġoxun isä iräzine mansṭa.
    Düzgünt'oğoxun isə irəzine manst'a.

Verse: 23    Ä͑xilaḳalṭin iz avabakalṭu bayan tenebon,
   Ə̌xilak'alt'in iz avabakalt'u bayan tenebon,
    Q̣ammazen isä iz säfeyluġa bütümä yäymišebon.
    Q'ammazen isə iz səfeyluğa bütümə yəymişebon.

Verse: 24    Čaləšakalṭay kiin iču aġane bon,
   Çalışakalt'ay kiin içu ağane bon,
    Tänbälluġen isä amdara ṭə͑yä͑minṭay ḳule bon.
    Tənbəlluğen isə amdara t'ı̌yə̌mint'ay k'ule bon.

Verse: 25    Narahatluġen amdari üḳäne ṭo͑pevḳon,
   Narahatluğen amdari ük'əne t'ǒpevk'on,
    Šaaṭ äyiten isä mu͑qedon.
    Şaat' əyiten isə mǔqedon.

Verse: 26    Düzgün amdaren iz ə͑śaṭu yaq̇e aḳesṭon,
   Düzgün amdaren iz ı̌šat'u yaq'e ak'est'on,
    Šär amdaren isä iz yaq̇ane aćesṗon.
    Şər amdaren isə iz yaq'ane aç̌esp'on.

Verse: 27    Tänbäli kiyel o͑xä͑lbi heyvan bafaldayin šoṭo tene aṗesṗon,
   Tənbəli kiyel ǒxə̌lbi heyvan bafaldayin şot'o tene ap'esp'on,
    Äšbsun čureġalṭin isä gele var-dövläte q̇azayinšon.
    Əşbsun çureğalt'in isə gele var-dövləte q'azayinşon.

Verse: 28    Düzgünluġi yaq̇a yäšäyinše bu,
   Düzgünluği yaq'a yəşəyinşe bu,
    Ṭeṭiya bisun tene bu.
    T'et'iya bisun tene bu.


Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.