TITUS
Biblia Udica, Versio Nizhensis: Vetus Testamentum
Part No. 285
Previous part

Chapter: 5 

Äxlagsuzluġaxun ä͑xil baka
Əxlagsuzluğaxun ə̌xil baka


Verse: 1    Bez ġar, bezi müdrikluġa fikir tada,
   Bez ğar, bezi müdrikluğa fikir tada,
    Bezi haq̇ullu äyitmoġo u͑mu͑xlaxa.
    Bezi haq'ullu əyitmoğo ǔmǔxlaxa.

Verse: 2    Ṭe vädä q̇amišaksuna ġaćeġalnu,
   T'e vədə q'amişaksuna ğaç̌eğalnu,
    Avabaksunen äyitḳalnu.
    Avabaksunen əyitk'alnu.

Verse: 3    Q̣erṭay čuġoy muzexun uć̣e barsṭa,
   Q'ert'ay çuğoy muzexun uč'e barst'a,
    Iz exlät č̣äyinäxun ǯügüne.
    İz exlət c'əyinəxun cügüne.

Verse: 4    Ama axərda aġune baksa,
   Ama axırda ağune baksa,
    P̣ä͑täräflu ġayin q̇ələnǯ ḳinäḳ ġayine baksa.
    P'ə̌tərəflu ğayin q'ılınc k'inək' ğayine baksa.

Verse: 5    Šoṭay turmoġon bisunane tašṭa,
   Şot'ay turmoğon bisunane taşt'a,
    Šoṭay lä͑ngurxon gärämzinäne ešṭa.
    Şot'ay lə̌ngurxon gərəmzinəne eşt'a.

Verse: 6    Yäšäyinšesṭala yaq̇a fikir tene tasṭa,
   Yəşəyinşest'ala yaq'a fikir tene tast'a,
    Šoṭay yaq̇ ḳorine, sal ičinal tene ava.
    Şot'ay yaq' k'orine, sal içinal tene ava.

Verse: 7    Häysä, ay ġarmux, za u͑mu͑xlaxanan,
   Həysə, ay ğarmux, za ǔmǔxlaxanan,
    Bezi źomoxun č̣eġalṭoġo fikir tadanan.
    Bezi ǰomoxun c'eğalt'oğo fikir tadanan.

Verse: 8    Metär čuġoxun ä͑xil baka,
   Metər çuğoxun ə̌xil baka,
    Šoṭay ḳožin ćomo ə͑śa ma taki.
    Şot'ay k'ojin ç̌omo ı̌ša ma taki.

Verse: 9    Tene, vi ǯäyilluġaxunen bakon,
   Tene, vi cəyilluğaxunen bakon,
    Vi ömürä zaləmxon särfbon.
    Vi ömürə zalımxon sərfbon.

Verse: 10    Vi bakalṭu q̇erṭoġone ukon,
   Vi bakalt'u q'ert'oğone ukon,
    Vi q̇azanǯ q̇erṭay ḳoyane taġon.
    Vi q'azanc q'ert'ay k'oyane tağon.

Verse: 11    Vi ömüri axər ṗaṗaṭan,
   Vi ömüri axır p'ap'at'an,
    Elmoġosṭal hal nu mandaṭan,
    Elmoğost'al hal nu mandat'an,
    Vi bel ṭapi metären uḳon:
    Vi bel t'api metəren uk'on:

Verse: 12    "Heṭaynaḳez tärbiyinä nifrätbi,
   "Het'aynak'ez tərbiyinə nifrətbi,
    Näsyätxo heṭaynaḳ tez q̇abulbi!
    Nəsyətxo het'aynak' tez q'abulbi!

Verse: 13    Bezi määlimi äyitä tez be͑ġi,
   Bezi məəlimi əyitə tez běği,
    Tärbiyä tadalxo tez u͑mu͑xlaxi.
    Tərbiyə tadalxo tez ǔmǔxlaxi.

Verse: 14    Isääl bütüm ǯamaati piin be͑ś,
   İsəəl bütüm camaati piin běš,
    Hörmätäxun bisti"
    Hörmətəxun bisti"



Vi čuġo ġać baka
Vi çuğo ğaç̌ baka


Verse: 15    Täkč̣ä vi orayini xenaxun,
   Təkc'ə vi orayini xenaxun,
    Vi kärizi xenaxun u͑ġä͑.
    Vi kərizi xenaxun ǔğə̌.

Verse: 16    Heṭaynaḳq̇an vi orayini xe küčämoġo,
   Het'aynak'q'an vi orayini xe küçəmoğo,
    Arxurxoy xe meydanxo bari taci?
    Arxurxoy xe meydanxo bari taśi?

Verse: 17    Šorox sayǯä viq̇an baki,
   Şorox saycə viq'an baki,
    Q̣erṭoġo ma payba.
    Q'ert'oğo ma payba.

Verse: 18    Barta vi orayin bäräkätluq̇an baki,
   Barta vi orayin bərəkətluq'an baki,
    Ǯäyil vädine vi laśḳoybaki čuġoxun mu͑q yäšäyinša!
    Cəyil vədine vi lašk'oybaki çuğoxun mǔq yəşəyinşa!

Verse: 19    Vi čureġala maralen, gözäl ǯeyranen,
   Vi çureğala maralen, gözəl ceyranen,
    Hämišä va iz döšurxon boševḳeq̇an,
    Həmişə va iz döşurxon boşevk'eq'an,
    Šoṭo čuresunen va finoġoy beq̇an.
    Şot'o çuresunen va finoğoy beq'an.

Verse: 20    Bez ġar, heṭaynaḳ q̇erṭay čuġo bänd bakan,
   Bez ğar, het'aynak' q'ert'ay çuğo bənd bakan,
    Q̣erṭay čuġo q̇užbavax?
    Q'ert'ay çuğo q'ujbavax?

Verse: 21    Axəri amdarxoy yaq̇mux Q̣ONƷ́UĠOY piin be͑śe,
   Axıri amdarxoy yaq'mux Q'ONČUĞOY piin běše,
    Šoṭoġoy här lä͑ngä yoxlayinšebsa.
    Şot'oğoy hər lə̌ngə yoxlayinşebsa.

Verse: 22    Šär amdar iz taxsəra görä biq̇eġon,
   Şər amdar iz taxsıra görə biq'eğon,
    Iz günaxi torane läč̣üreġon.
    İz günaxi torane ləc'üreğon.

Verse: 23    Tärbiyä nu baksunaxune biyon,
   Tərbiyə nu baksunaxune biyon,
    Kala q̇ammaz baksunaxune yaq̇a aćesṗon.
    Kala q'ammaz baksunaxune yaq'a aç̌esp'on.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.