TITUS
Biblia Udica, Versio Nizhensis: Vetus Testamentum
Part No. 284
Previous part

Chapter: 4 

Müdrikluġi här šeyaxun be͑ś baksun
Müdrikluği hər şeyaxun běš baksun


Verse: 1    Ay ġarmux, ef bavan tadi näsyätxo ef u͑mu͑ġo sərġa banan,
   Ay ğarmux, ef bavan tadi nəsyətxo ef ǔmǔğo sırğa banan,
    Fikir tadanan ki, q̇amišaksun topbanan.
    Fikir tadanan ki, q'amişaksun topbanan.

Verse: 2    Šoṭaynaḳ ki, zu vä͑x šaaṭ därsez tasṭa,
   Şot'aynak' ki, zu və̌x şaat' dərsez tast'a,
    Bezi zombsuna ma bosanan.
    Bezi zombsuna ma bosanan.

Verse: 3    Zuval bezi bavay ṭo͑ġo͑l bakaṭan,
   Zuval bezi bavay t'ǒğǒl bakat'an,
    Bezi nanay täk sa bala bakaṭan
    Bezi nanay tək sa bala bakat'an

Verse: 4    Bezi bavan za zombaṭan pine:
   Bezi bavan za zombat'an pine:
    "Bezi äyitmoġo vi eyexun ma č̣evḳa,
    "Bezi əyitmoğo vi eyexun ma c'evk'a,
    Bezi ämirxo ämälba ki, vi ömür boxoyq̇an baki.
    Bezi əmirxo əməlba ki, vi ömür boxoyq'an baki.

Verse: 5    Müdrikluġ q̇a q̇amišaksun q̇azayinša,
   Müdrikluğ q'a q'amişaksun q'azayinşa,
    Bezi äyitmoġo eyexun ma č̣evḳa, aḳesṭi yaq̇axunal ma č̣eki.
    Bezi əyitmoğo eyexun ma c'evk'a, ak'est'i yaq'axunal ma c'eki.

Verse: 6    Müdrikluġaxun ma ǯöybaka, šoṭin va q̇orišale,
   Müdrikluğaxun ma cöybaka, şot'in va q'orişale,
    Šoṭo čureki - va efale.
    Şot'o çureki - va efale.

Verse: 7    Müdrikluġ här šeyaxun vaǯibe, šoṭo q̇azayinša,
   Müdrikluğ hər şeyaxun vacibe, şot'o q'azayinşa,
    Ḳä topbayin, q̇amišaksunal topba.
    K'ə topbayin, q'amişaksunal topba.

Verse: 8    Šoṭo üsṭün laxayin, va alabale,
   Şot'o üst'ün laxayin, va alabale,
    Ägär šoṭo ġaćeġayin, va hörmätä ṗaṗesṗale.
    Əgər şot'o ğaç̌eğayin, va hörmətə p'ap'esp'ale.

Verse: 9    Šo vi bel gözäl bäzäy,
   Şo vi bel gözəl bəzəy,
    C̣aldala taǯ bakale".
    S'aldala tac bakale".

Verse: 10    Bez ġar, za u͑mu͑xlaxa,
   Bez ğar, za ǔmǔxlaxa,
    Bezi äyitmoġo q̇abulba ki,
    Bezi əyitmoğo q'abulba ki,
    Vi ömür boxoy bakane.
    Vi ömür boxoy bakane.

Verse: 11    Va müdrikluġi yaq̇a aḳesṭoz,
   Va müdrikluği yaq'a ak'est'oz,
    Va düz ǯəġərxon tašoz.
    Va düz cığırxon taşoz.

Verse: 12    Lä͑ngbaṭan vi tur tene lamandal,
   Lə̌ngbat'an vi tur tene lamandal,
    Ṭiṭaṭan vi tur tene fərc̣eġal.
    T'it'at'an vi tur tene fırs'eğal.

Verse: 13    Va tadala tärbiyinä ġaćeki, vaxun ä͑xil maba,
   Va tadala tərbiyinə ğaç̌eki, vaxun ə̌xil maba,
    Šoṭo efa, šoṭaynaḳ ki, šo vi yäšäyinše.
    Şot'o efa, şot'aynak' ki, şo vi yəşəyinşe.

Verse: 14    Pis amdarxoy yaq̇a vi tura ma ćaxṗa,
   Pis amdarxoy yaq'a vi tura ma ç̌axp'a,
    Šär amdari yaq̇en ma taki.
    Şər amdari yaq'en ma taki.

Verse: 15    Qoš baka, me yaq̇a ə͑śaal ma bita,
   Qoş baka, me yaq'a ı̌šaal ma bita,
    Šoṭoxun ṭiṭa, q̇eräz sa yaq̇en č̣ovaka.
    Şot'oxun t'it'a, q'erəz sa yaq'en c'ovaka.

Verse: 16    Šoṭaynaḳ ki, šär amdarxon pisluġ nu bayṭun,
   Şot'aynak' ki, şər amdarxon pisluğ nu bayt'un,
    Basḳes teṭun bakon.
    Bask'es tet'un bakon.
    Šunesa nu sakayṭun,
    Şunesa nu sakayt'un,
    Ičoġoy neṗ ṭineṭon.
    İçoğoy nep' t'inet'on.

Verse: 17    Šoṭoġon šärä śum ḳinäḳṭun ukon,
   Şot'oğon şərə šum k'inək't'un ukon,
    Q̣äddarluġa fi ḳinäḳṭun u͑ġon.
    Q'əddarluğa fi k'inək't'un ǔğon.

Verse: 18    Düzgün amdari yaq̇ savaxṭan č̣eġala išiġ ḳinäḳe,
   Düzgün amdari yaq' savaxt'an c'eğala işiğ k'inək'e,
    Ġi boxoybaksunen samalal gelene c̣alsṭa.
    Ği boxoybaksunen samalal gelene s'alst'a.

Verse: 19    Pis amdarxoy yaq̇ isä bayinq̇luġ ḳinäḳe,
   Pis amdarxoy yaq' isə bayinq'luğ k'inək'e,
    Šoṭoġon teṭun ava heṭu lamandalṭun.
    Şot'oğon tet'un ava het'u lamandalt'un.

Verse: 20    Bez ġar, bezi äyitmoġo fikir tada,
   Bez ğar, bezi əyitmoğo fikir tada,
    Bezi uḳalṭoġo u͑mu͑xlaxa.
    Bezi uk'alt'oğo ǔmǔxlaxa.

Verse: 21    Šoṭoġo vi piin be͑śṭan ma ä͑xilba,
   Şot'oğo vi piin běšt'an ma ə̌xilba,
    Šoṭoġo vi üḳe boš efa.
    Şot'oğo vi ük'e boş efa.

Verse: 22    Šoṭaynaḳ ki, šoṭoġo bä͑ġä͑balṭaynaḳ,
   Şot'aynak' ki, şot'oğo bə̌ğə̌balt'aynak',
    Yäšäyinš q̇a elmoġoy dirisṭuġ bakale.
    Yəşəyinş q'a elmoğoy dirist'uğ bakale.

Verse: 23    Här šeyaxun be͑ś vi fikirxo tämiz efa,
   Hər şeyaxun běš vi fikirxo təmiz efa,
    Šoṭaynaḳ ki, šoroxe vi yäšäyinši orayin.
    Şot'aynak' ki, şoroxe vi yəşəyinşi orayin.

Verse: 24    Äfči äyitpsuna bosa,
   Əfçi əyitpsuna bosa,
    Vi źomo böhṭanen ma qaypa.
    Vi ǰomo böht'anen ma qaypa.

Verse: 25    Vi pulmoġon be͑śq̇an be͑ġi,
   Vi pulmoğon běšq'an běği,
    Düz vi taġala yaq̇a be͑ġa.
    Düz vi tağala yaq'a běğa.

Verse: 26    Vi ǯəġəra düzba ki,
   Vi cığıra düzba ki,
    Lä͑ngbaṭan üḳlü lä͑ngbavax.
    Lə̌ngbat'an ük'lü lə̌ngbavax.

Verse: 27    Nä yön, nä tärs ma fərəpa,
   Nə yön, nə tərs ma fırıpa,
    Vi turmoġo pisluġaxun zapa.
    Vi turmoğo pisluğaxun zapa.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.