TITUS
Biblia Udica, Versio Nizhensis: Vetus Testamentum
Part No. 214
Previous part

Chapter: 84 

84-ǯi ω͑vel mä͑ġ
84-ci Ǐvel mə̌ğ



Farḳalxoy däsṭin kalaṭaynaḳ. Giṭṭiten * mä͑ġe͑ġala Goraxi ġarmoġoy ω͑vel mä͑ġ.
Fark'alxoy dəst'in kalat'aynak'. Git't'iten * mə̌ğěğala Goraxi ğarmoğoy Ǐvel mə̌ğ.


Verse: 1    Ay Göye Q̣ošuni Q̣ONƷ́UX,
   Ay Göye Q'oşuni Q'ONČUX,
    Vi mäsḳän saki ganuxun bošala šey tene!
    Vi məsk'ən saki ganuxun boşala şey tene!

Verse: 2    Q̣ONƷ́UĠOY xrame määlne bayseynaḳ bez ǯiǯirxone ćaye,
   Q'ONČUĞOY xrame məəlne bayseynak' bez cicirxone ç̌aye,
    Mu͑qbaksune čuresa bez elmux, Vi c̣iya alabala mä͑ġure mä͑ġpsun čuresa bez üḳen,
    Mǔqbaksune çuresa bez elmux, Vi s'iya alabala mə̌ğure mə̌ğpsun çuresa bez ük'en,
    Yäšäyinšesṭala Buxaʒ́uġoy ṭo͑ġo͑l baksunaxun bašq̇a hiḳḳal čurtezsa zu.
    Yəşəyinşest'ala Buxačuğoy t'ǒğǒl baksunaxun başq'a hik'k'al çurtezsa zu.

Verse: 3    Ay Göye Q̣ošuni Q̣ONƷ́UX,
   Ay Göye Q'oşuni Q'ONČUX,
    Ay bez padčaġ bakala Buxaʒ́ux,
    Ay bez padçağ bakala Buxačux,
    Čovalxonal hari Vi q̇urban ečala gane ṭo͑ġo͑lṭun ičoġoy mesa biq̇sa,
    Çovalxonal hari Vi q'urban eçala gane t'ǒğǒlt'un içoğoy mesa biq'sa,
    Bać̣aynoġonal ičoġoy baloġo ṭe ganu ə͑śaṭun č̣evksa!
    Bač'aynoğonal içoğoy baloğo t'e ganu ı̌šat'un c'evksa!

Verse: 4    Bäxṭävärṭun Vi mäsḳän saki ganu yäšäyinšalorox,
   Bəxt'əvərt'un Vi məsk'ən saki ganu yəşəyinşalorox,
    Vi ṭo͑ġo͑l baki hämišä Va tärifläyinšala mä͑ġur mä͑ġpes bakalorox!
    Vi t'ǒğǒl baki həmişə Va tərifləyinşala mə̌ğur mə̌ğpes bakalorox!

Verse: 5    He bäxṭävärṭun zora Vaxun haq̇alorox,
   He bəxt'əvərt'un zora Vaxun haq'alorox,
    Ičoġoy üḳexun Siona * laci ṭiya bul ḳoc̣bsun č̣ovakalorox!
    İçoğoy ük'exun Siona * laśi t'iya bul k'os'bsun c'ovakalorox!

Verse: 6    Xesuz mandi däränexun č̣ovakaṭan
   Xesuz mandi dərənexun c'ovakat'an
    Ṭiyana źalpi č̣eġala orayinxoy mäsḳän ḳinäḳ aḳaloroxe šorox!
    T'iyana ǰalpi c'eğala orayinxoy məsk'ən k'inək' ak'aloroxe şorox!
    Ṭe oćala xeyir-bäräkät ečala aġalinen puśṗi sa oćal ḳinäḳṭun aksa šoṭoġon!
    T'e oç̌ala xeyir-bərəkət eçala ağalinen pušp'i sa oç̌al k'inək't'un aksa şot'oğon!

Verse: 7    Ṭiya laysunene zorba bsa šoṭoġo,
   T'iya laysunene zorba bsa şot'oğo,
    Axəri taci Siona Buxaʒ́uġo bul ḳoc̣balṭun šoṭoġon!
    Axıri taśi Siona Buxačuğo bul k'os'balt'un şot'oğon!

Verse: 8    Ay Göye Q̣ošuni Q̣ONƷ́UX, bezi afərəna ibaka!
   Ay Göye Q'oşuni Q'ONČUX, bezi afırına ibaka!
    Ay Iaḳovi Buxaʒ́ux, za ǯoġabsuz ma efa!
    Ay İak'ovi Buxačux, za coğabsuz ma efa!

Verse: 9    Yaynaḳ bać̣an bakala padčaġa nu aksuna ma laxa, ay Buxaʒ́ux,
   Yaynak' bač'an bakala padçağa nu aksuna ma laxa, ay Buxačux,
    Barta Vi č̣äḳṗiyo Vi piyes šaaṭq̇an aḳeci.
    Barta Vi c'ək'p'iyo Vi piyes şaat'q'an ak'eśi.

Verse: 10    Vi xrame määline č̣ovakesṭala sa ġi
   Vi xrame məəline c'ovakest'ala sa ği
    Zaynaḳ Vi bakala ganuxun ä͑xil č̣ovakesṭala hazar ġinaxun šaaṭe!
    Zaynak' Vi bakala ganuxun ə̌xil c'ovakest'ala hazar ğinaxun şaat'e!
    Vi mäsḳän saki gane ćomoy tume čurpsun
    Vi məsk'ən saki gane ç̌omoy tume çurpsun
    Pisṭoġoy gam čadəri boš arsṭunaxun šaaṭe!
    Pist'oğoy gam çadıri boş arst'unaxun şaat'e!

Verse: 11    Axəri Q̣ONƷ́UX Buxaʒ́ux beš bać̣ane,
   Axıri Q'ONČUX Buxačux beş bač'ane,
    Yaynaḳ be͑ġ baki yaq̇ aḳesṭalone!
    Yaynak' běğ baki yaq' ak'est'alone!
    Yax Iz üḳ boḳospsuna aḳesṭalo q̇a hörmäti q̇onʒ́ux balone Šo,
    Yax İz ük' bok'ospsuna ak'est'alo q'a hörməti q'ončux balone Şo,
    Düzgün yaq̇en taġalṭuxun Iz šaaṭluġa kamtenebon Šoṭin!
    Düzgün yaq'en tağalt'uxun İz şaat'luğa kamtenebon Şot'in!

Verse: 12    Ay Göye Q̣ošuni Q̣ONƷ́UX,
   Ay Göye Q'oşuni Q'ONČUX,
    Va bać̣an taradalo he bäxṭäväre!
    Va bač'an taradalo he bəxt'əvəre!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.