TITUS
Biblia Udica, Versio Nizhensis: Vetus Testamentum
Part No. 203
Previous part

Chapter: 73 

73-ǯi ω͑vel mä͑ġ
73-ci Ǐvel mə̌ğ



Asafi ω͑vel mä͑ġ.
Asafi Ǐvel mə̌ğ.


Verse: 1    Be͑ġa Buxaʒ́uġon israilluġoynaḳ,
   Běğa Buxačuğon israilluğoynak',
    Be͑ġa Iz yaq̇en taġalṭoġoynaḳ heq̇ädär xeyirxax äšure biq̇sa!
    Běğa İz yaq'en tağalt'oğoynak' heq'ədər xeyirxax əşure biq'sa!

Verse: 2    Ama zu bez yaq̇a aćespsaxzuy,
   Ama zu bez yaq'a aç̌espsaxzuy,
    Düz yaq̇axun č̣eyseynaḳ male mandey bezi.
    Düz yaq'axun c'eyseynak' male mandey bezi.

Verse: 3    Pisṭoġoy be͑ś baysuna,
   Pist'oğoy běš baysuna,
    Ičoġoxun iräziṭoġoy šaaṭ ġina aḳi paxəlluġezbsay zu!
    İçoğoxun irəzit'oğoy şaat' ğina ak'i paxılluğezbsay zu!

Verse: 4    Därd hiḳä teṭun ava,
   Dərd hik'ə tet'un ava,
    Ömüri axəral ciriḳ azar tene lafsṭa šoṭoġo.
    müri axıral śirik' azar tene lafst'a şot'oğo.

Verse: 5    Hiḳḳalaxun koruġ teṭun zaṗe,
   Hik'k'alaxun koruğ tet'un zap'e,
    Tur źe͑na tene lafsṭa šoṭoġoy.
    Tur ǰěna tene lafst'a şot'oğoy.

Verse: 6    Ičoġoxun iräzi baksuna sal č̣aṗteṭunpsa,
   İçoğoxun irəzi baksuna sal c'ap'tet'unpsa,
    Amdarxo äzyät tasṭunaxun färäxläyinšaki
    Amdarxo əzyət tast'unaxun fərəxləyinşaki
    Hälä sa moṭo piyelal baṭunsṭa.
    Hələ sa mot'o piyelal bat'unst'a.

Verse: 7    Ičoġoy ṭolnu teṭun ṗaq̇sa,
   İçoğoy t'olnu tet'un p'aq'sa,
    Üḳe pisluġaxun bašq̇a hiḳḳaleynaḳ ga butene šoṭoġoy!
    Ük'e pisluğaxun başq'a hik'k'aleynak' ga butene şot'oğoy!

Verse: 8    Ičoġoy äš laġa haq̇sune,
   İçoğoy əş lağa haq'sune,
    Źomoxun č̣eġala här äyit amdarane lafsṭa,
    J̌omoxun c'eğala hər əyit amdarane lafst'a,
    Exläti bul q̇ə͑desṭun q̇a pul haq̇sune šoṭoġoy!
    Exləti bul q'ı̌dest'un q'a pul haq'sune şot'oğoy!

Verse: 9    Göynuxunṭun taysa,
   Göynuxunt'un taysa,
    Mani märäkäye arcayṭun ičoġoy źomo tene giresa!
    Mani mərəkəye arśayt'un içoğoy ǰomo tene giresa!

Verse: 10    Ǯamaatenal hälä arci moṭoġo u͑mu͑xelaxsa,
   Camaatenal hələ arśi mot'oğo ǔmǔxelaxsa,
    Šoṭoġoy äyitmoġonṭun näfäs haq̇sa!
    Şot'oğoy əyitmoğont'un nəfəs haq'sa!

Verse: 11    Buxaʒ́uġoy här šeya aksaxun,
   Buxačuğoy hər şeya aksaxun,
    Ala Arciṭay piyexun hiḳḳal č̣aṗ nu mansṭunaxun xavar butene šoṭoġoy!
    Ala Arśit'ay piyexun hik'k'al c'ap' nu manst'unaxun xavar butene şot'oğoy!

Verse: 12    Ṭema arxayinṭun ki,
   T'ema arxayint'un ki,
    Narahat bala hiḳḳal buteṭux me pisṭoġoy,
    Narahat bala hik'k'al butet'ux me pist'oğoy,
    Var-dövlät avuzbsunaxun bašq̇a därd buteṭux šoṭoġoy!
    Var-dövlət avuzbsunaxun başq'a dərd butet'ux şot'oğoy!

Verse: 13    Isä ṭetäre č̣eysa ki, nä bezi düz yaq̇en taysuni,
   İsə t'etəre c'eysa ki, nə bezi düz yaq'en taysuni,
    Nääl günaxaxun ä͑xil čurpi tämiz mansṭuni määnä tene bu?
    Nəəl günaxaxun ə̌xil çurpi təmiz manst'uni məənə tene bu?

Verse: 14    P̣oy ene heṭaynaḳez za här ġi äzyät tasṭay,
   P'oy ene het'aynak'ez za hər ği əzyət tast'ay,
    Savaxṭan bez pula qayḳala ḳinäḳ za ǯaza zapesṭay?
    Savaxt'an bez pula qayk'ala k'inək' za caza zapest'ay?

Verse: 15    Ama tää! Metär pi bakiyzuy,
   Ama təə! Metər pi bakiyzuy,
    Vi č̣äḳṗi azuḳaxun baksuna layiġ tez bakoy zu!
    Vi c'ək'p'i azuk'axun baksuna layiğ tez bakoy zu!

Verse: 16    Düze, moṭoġo tam q̇amišakamin
   Düze, mot'oğo tam q'amişakamin
    Zaynaḳ čätine aḳesay me äš.
    Zaynak' çətine ak'esay me əş.

Verse: 17    Ama Vi bakala ə͑vel galaz baci zu sa ġi,
   Ama Vi bakala ı̌vel galaz baśi zu sa ği,
    Bez pulmuxe qayeci unḳon ṭe vädä,
    Bez pulmuxe qayeśi unk'on t'e vədə,
    Me pisṭoġoynaḳ häzirbakiṭoġoz aḳi zu!
    Me pist'oğoynak' həzirbakit'oğoz ak'i zu!

Verse: 18    Mone, šoṭoġoy taġala yaq̇a fərc̣eḳal balnu Hun,
   Mone, şot'oğoy tağala yaq'a fırs'ek'al balnu Hun,
    Saki xorḳalnu, bula alabi hayzes teṭun bakal!
    Saki xork'alnu, bula alabi hayzes tet'un bakal!

Verse: 19    Q̣ə͑yen haq̇ale šoṭoġo,
   Q'ı̌yen haq'ale şot'oğo,
    Bürdän ṭetär äfčibakalṭun ki, ičoġoxun tozal tene mandal!
    Bürdən t'etər əfçibakalt'un ki, içoğoxun tozal tene mandal!

Verse: 20    Vi Šu baksuna aḳesṭalnu Hun me pisṭoġo, ay Q̣ONƷ́UX,
   Vi Şu baksuna ak'est'alnu Hun me pist'oğo, ay Q'ONČUX,
    Sa neṗ ḳinäḳ hari č̣ovakalṭun šorox!
    Sa nep' k'inək' hari c'ovakalt'un şorox!

Verse: 21    Q̣ubarbala vädämuxe buy bezi,
   Q'ubarbala vədəmuxe buy bezi,
    Därde kiyexun zaynaḳ ga tez bä͑ġä͑bsay.
    Dərde kiyexun zaynak' ga tez bə̌ğə̌bsay.

Verse: 22    Q̣ammazzuy, hiḳḳal q̇amištezuy,
   Q'ammazzuy, hik'k'al q'amiştezuy,
    Vi piyes heyvanaxun avuzin sa ga tezax buy bezi.
    Vi piyes heyvanaxun avuzin sa ga tezax buy bezi.

Verse: 23    Ama isä azaksa ki, Hun hämišä zaxunnu,
   Ama isə azaksa ki, Hun həmişə zaxunnu,
    Vi kula zaxun zaṗḳala vädä tene bake Vi!
    Vi kula zaxun zap'k'ala vədə tene bake Vi!

Verse: 24    Hunnu za düz yaq̇ aḳesṭalo,
   Hunnu za düz yaq' ak'est'alo,
    Hun balnu za hörmäti q̇onʒ́ux!
    Hun balnu za hörməti q'ončux!

Verse: 25    Bez besṭa Hun bakiṭuxun oša
   Bez best'a Hun bakit'uxun oşa
    Q̣eräz šuva ehṭiyäǯ bakes bakon bezi, ay göynul bakala bez Buxaʒ́ux?
    Q'erəz şuva eht'iyəc bakes bakon bezi, ay göynul bakala bez Buxačux?
    Me dünyäne šuz čurecez bakon ene?
    Me dünyəne şuz çureśez bakon ene?

Verse: 26    Bez üḳ xä͑xä͑yeġala vädine za üḳ tadalo,
   Bez ük' xə̌xə̌yeğala vədine za ük' tadalo,
    Halnuxun bitaṭan za turelbalo Hunnu, ay Buxaʒ́ux!
    Halnuxun bitat'an za turelbalo Hunnu, ay Buxačux!
    Bez paynu kofṭi, bez ḳodoġo cameci neymät Hunnu!
    Bez paynu koft'i, bez k'odoğo śameśi neymət Hunnu!

Verse: 27    Vaxun ä͑xil bakalṭoġoy axər tene bakal,
   Vaxun ə̌xil bakalt'oğoy axır tene bakal,
    Äfčibalnu Hun Vi laxi yaq̇axun č̣eriṭoġo!
    Əfçibalnu Hun Vi laxi yaq'axun c'erit'oğo!

Verse: 28    Zu isä Va ə͑śabaksunenez šaaṭluġ bä͑ġä͑bsa,
   Zu isə Va ı̌šabaksunenez şaat'luğ bə̌ğə̌bsa,
    Vasṭaz umudi ganu aksa, ay bitoṭuxun üsṭün bakala Q̣ONǮUX Buxaʒ́ux!
    Vast'az umudi ganu aksa, ay bitot'uxun üst'ün bakala Q'ONCUX Buxačux!
    Vi biq̇i äšurxo bez muzel ečeri ǯar sakoz zu!
    Vi biq'i əşurxo bez muzel eçeri car sakoz zu!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.