TITUS
Biblia Udica, Versio Nizhensis: Vetus Testamentum
Part No. 202
Previous part

Chapter: 72 

72-ǯi ω͑vel mä͑ġ
72-ci Ǐvel mə̌ğ



Solomoni ω͑vel mä͑ġ.
Solomoni Ǐvel mə̌ğ.


Verse: 1    Ay Buxaʒ́ux, Vasṭa bakala düzgünluġaxun tada padčaġa,
   Ay Buxačux, Vast'a bakala düzgünluğaxun tada padçağa,
    Barta Vallariḳ bitoṭay loxol sa piinq̇an be͑ġi padčaġxoy näsiläxun bakalṭin!
    Barta Vallarik' bitot'ay loxol sa piinq'an běği padçağxoy nəsiləxun bakalt'in!

Verse: 2    Vi azuḳa düzgünluġenq̇an divanbi,
   Vi azuk'a düzgünluğenq'an divanbi,
    Faġərxon šikäätbaṭan bitoṭay loxol sa piin be͑ġiq̇an q̇ärar č̣evḳi.
    Fağırxon şikəətbat'an bitot'ay loxol sa piin běğiq'an q'ərar c'evk'i.

Verse: 3    Buruxmoġo bakala bolluġen azuḳi šaaṭ ġinax baksuna aḳesṭale,
   Buruxmoğo bakala bolluğen azuk'i şaat' ğinax baksuna ak'est'ale,
    Düzgünluġen yetišṭirišale täpoġo bakala xodurxoy bara!
    Düzgünluğen yetişt'irişale təpoğo bakala xodurxoy bara!

Verse: 4    Faġərxoy bać̣ane čurḳale padčaġ,
   Fağırxoy bač'ane çurk'ale padçağ,
    Käsibi baloġo čarḳesṭale,
    Kəsibi baloğo çark'est'ale,
    Pisṭoġoy bula ć̣aḳḳale šoṭin.
    Pist'oğoy bula č'ak'k'ale şot'in.

Verse: 5    Yaxun oša eġala näsilxonal bitoṭin Va čalxale, ay Buxaʒ́ux,
   Yaxun oşa eğala nəsilxonal bitot'in Va çalxale, ay Buxačux,
    Be͑ġ q̇a xaš göynuxun äfčibakamin Va bul ḳoc̣balxo bakale!
    Běğ q'a xaş göynuxun əfçibakamin Va bul k'os'balxo bakale!

Verse: 6    Caṗeci q̇oruġeynaḳ aġala ḳinäḳ,
   Üap'eśi q'oruğeynak' ağala k'inək',
    Večäläyinšala oye tuma lafṭala xe ḳinäḳ bakale padčaġ!
    Veçələyinşala oye tuma laft'ala xe k'inək' bakale padçağ!

Verse: 7    Düzgünorox be͑ś baġale me padčaġi dööräsṭä,
   Düzgünorox běš bağale me padçaği döörəst'ə,
    Šaaṭ ġi aḳalṭun šoṭoġon heq̇ädär ki, yan beš bula alabi göynul xašyan aksa.
    Şaat' ği ak'alt'un şot'oğon heq'ədər ki, yan beş bula alabi göynul xaşyan aksa.

Verse: 8    Oćalin me belxun ṭe bel bito šoṭay kiin oq̇a bakale,
   Oç̌alin me belxun t'e bel bito şot'ay kiin oq'a bakale,
    Yevfrat oqaxun burqi lap ṭe bel bakala dänizäl ciriḳ
    Yevfrat oqaxun burqi lap t'e bel bakala dənizəl śirik'
    Här šeye loxol šoṭin kalaluġbale. *
    Hər şeye loxol şot'in kalaluğbale. *

Verse: 9    Ä͑xil oćalxo yäšäyinšala azuḳxon šoṭo bul ḳoc̣balṭun,
   Ə̌xil oç̌alxo yəşəyinşala azuk'xon şot'o bul k'os'balt'un,
    Düšmänxon iz turin oq̇a biti toz lamḳalṭun.
    Düşmənxon iz turin oq'a biti toz lamk'alt'un.

Verse: 10    Taršiši q̇a dänizi ṭe bel bakala oćalxoy padčaġxon šoṭaynaḳ payur ečalṭun,
   Tarşişi q'a dənizi t'e bel bakala oç̌alxoy padçağxon şot'aynak' payur eçalt'un,
    Šebin q̇a Sebin kalaṭoġon šoṭaynaḳ zänbilxo buybi yaq̇abalṭun.
    Şebin q'a Sebin kalat'oğon şot'aynak' zənbilxo buybi yaq'abalt'un.

Verse: 11    Šoṭo bul nu ḳoc̣bala padčaġ,
   Şot'o bul nu k'os'bala padçağ,
    Šoṭay q̇ulluġa nu čurḳala azuḳ tene bakal!
    Şot'ay q'ulluğa nu çurk'ala azuk' tene bakal!

Verse: 12    Faġəri ṭarnu ṗaṗalo,
   Fağıri t'arnu p'ap'alo,
    Izi šuḳḳal nu bakala käsibi kiyexun biq̇alo bakale šo.
    İzi şuk'k'al nu bakala kəsibi kiyexun biq'alo bakale şo.

Verse: 13    Ehṭiyäǯi boš bakalṭoġoynaḳ q̇a bać̣ansuzṭoġoynaḳ üḳ boḳosṗale šoṭin,
   Eht'iyəci boş bakalt'oğoynak' q'a bač'ansuzt'oğoynak' ük' bok'osp'ale şot'in,
    Goroxṭoġoy elmoġo čarḳesṭale!
    Goroxt'oğoy elmoğo çark'est'ale!

Verse: 14    Exṭale šoṭoġo zülüm zapesṭala zaləmxoy kiyexun,
   Ext'ale şot'oğo zülüm zapest'ala zalımxoy kiyexun,
    Axəri däyärlune šoṭoġoy elmux iz piyes.
    Axıri dəyərlune şot'oğoy elmux iz piyes.

Verse: 15    Dirisṭq̇an baki padčaġ, boxoy ömürenq̇an baki!
   Dirist'q'an baki padçağ, boxoy ömürenq'an baki!
    Barta Šebaxun ečeri q̇əzəlq̇aṭun cipi šoṭay belxun oq̇a,
    Barta Şebaxun eçeri q'ızılq'at'un śipi şot'ay belxun oq'a,
    Barta šoṭaynaḳ afərəpi Buxaʒ́uġoq̇aṭun ḳalpi üše-ġena,
    Barta şot'aynak' afırıpi Buxačuğoq'at'un k'alpi üşe-ğena,
    Ičoġoy xeyir-bäräkätä kammaq̇aṭunbi šoṭoxun amdarxon.
    İçoğoy xeyir-bərəkətə kammaq'at'unbi şot'oxun amdarxon.

Verse: 16    Barta ölkinä śum bolq̇an baki,
   Barta ölkinə šum bolq'an baki,
    Buruxmoġoy döšel bakala taxəla mušen duġaṭan üḳq̇an qayeci.
    Buruxmoğoy döşel bakala taxıla muşen duğat'an ük'q'an qayeśi.
    Barta xodurxo oćalaq̇an lafṭi č̣epi meyvin kiyexun,
    Barta xodurxo oç̌alaq'an laft'i c'epi meyvin kiyexun,
    Livana bakala gözäl xodur hiḳḳalq̇an baki šoṭoġoy ṭo͑ġo͑l.
    Livana bakala gözəl xodur hik'k'alq'an baki şot'oğoy t'ǒğǒl.
    Barta šähärmoġo bakala amdarxoy say ṭə͑q̇ṗi č̣eġala oye hamaq̇an baki!
    Barta şəhərmoğo bakala amdarxoy say t'ı̌q'p'i c'eğala oye hamaq'an baki!

Verse: 17    Barta padčaġi c̣i hämišäq̇an ṭaṗeci,
   Barta padçaği s'i həmişəq'an t'ap'eśi,
    Barta göynul bakala be͑ġen tadala išiġ nu aćala ḳinäḳ
    Barta göynul bakala běğen tadala işiğ nu aç̌ala k'inək'
    Šoṭayal ḳožin išiġ maq̇an aći.
    Şot'ayal k'ojin işiğ maq'an aç̌i.
    Xeyir-bäräkätä šoṭay c̣iya duġi haq̇alṭun azuḳxon,
    Xeyir-bərəkətə şot'ay s'iya duği haq'alt'un azuk'xon,
    Bäxṭävär uḳaṭan šoṭo čalxalṭun!
    Bəxt'əvər uk'at'an şot'o çalxalt'un!

Verse: 18    Alxəšq̇an baki israilluġoy Buxaʒ́ux bakala Q̣ONƷ́UĠO,
   Alxışq'an baki israilluğoy Buxačux bakala Q'ONČUĞO,
    Nu aḳeci äšur biq̇ala Buxaʒ́uxe Šo!
    Nu ak'eśi əşur biq'ala Buxačuxe Şo!

Verse: 19    Barta Šoṭay kala c̣iya duġi hämišä alxəšṗeq̇aṭun,
   Barta Şot'ay kala s'iya duği həmişə alxışp'eq'at'un,
    Šoṭay kalaluġaxunq̇an äyitṗi barta dirisṭ dünyänen!
    Şot'ay kalaluğaxunq'an əyitp'i barta dirist' dünyənen!
    Ammen! Ammen!
    Ammen! Ammen!

Verse: 20    Memiya Yesseyi ġar Daviden campi afərəyox čareksa.
   Memiya Yesseyi ğar Daviden śampi afırıyox çareksa.



Girke xibimǯi hissä: 73-89-ǯi ω͑vel mä͑ġurxo
Girke xibimci hissə: 73-89-ci Ǐvel mə̌ğurxo


Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.