TITUS
Biblia Udica, Versio Nizhensis: Vetus Testamentum
Part No. 195
Previous part

Chapter: 65 

65-ǯi ω͑vel mä͑ġ
65-ci Ǐvel mə̌ğ



Farḳalxoy däsṭin kalaṭaynaḳ. Davidi ω͑vel mä͑ġ.
Fark'alxoy dəst'in kalat'aynak'. Davidi Ǐvel mə̌ğ.


Verse: 1    Vi tärif Vaxune Siona, * ay Buxaʒ́ux,
   Vi tərif Vaxune Siona, * ay Buxačux,
    Bex ṗaṗesṗalyan yan Va elasṗi tadi äyitmoġo!
    Bex p'ap'esp'alyan yan Va elasp'i tadi əyitmoğo!

Verse: 2    Va afərəpi ḳalḳalṭoġo ibakalonu Hun,
   Va afırıpi k'alk'alt'oğo ibakalonu Hun,
    Vi ṭo͑ġo͑l eġalṭun amdarxo bito!
    Vi t'ǒğǒl eğalt'un amdarxo bito!

Verse: 3    Günaxxoy boš batḳeyan tayansa,
   Günaxxoy boş batk'eyan tayansa,
    Ama Hun beš taxsərxoxun č̣ovaki beš elmoġo čarḳesṭalonu.
    Ama Hun beş taxsırxoxun c'ovaki beş elmoğo çark'est'alonu.

Verse: 4    He bäxṭäväre Hun č̣äḳṗi Va ə͑śabiyo,
   He bəxt'əvəre Hun c'ək'p'i Va ı̌šabiyo,
    Ičeynaḳ Vi bakala ə͑vel gala mesbiyo.
    İçeynak' Vi bakala ı̌vel gala mesbiyo.
    Vi ḳožen, Vi ə͑vel ganen tadala neymätxon bošalyan yan!
    Vi k'ojen, Vi ı̌vel ganen tadala neymətxon boşalyan yan!

Verse: 5    Ay Buxaʒ́ux, ay yax čarḳesṭala Buxaʒ́ux,
   Ay Buxačux, ay yax çark'est'ala Buxačux,
    Hun heq̇ädär zorba, heq̇ädär düzgün baksunane aḳesṭa Vi yax kul boxosṭunen!
    Hun heq'ədər zorba, heq'ədər düzgün baksunane ak'est'a Vi yax kul boxost'unen!
    Dirisṭ dünyäni, lap dänizxoy ṭe ćoye bakalṭoġoynaḳ umudi ganu Hun!
    Dirist' dünyəni, lap dənizxoy t'e ç̌oye bakalt'oğoynak' umudi ganu Hun!

Verse: 6    Kala zore q̇onʒ́ux bakalo,
   Kala zore q'ončux bakalo,
    Buruxmoġoy binorina Vi kiin osṭaarbi laxiyonu Hun!
    Buruxmoğoy binorina Vi kiin ost'aarbi laxiyonu Hun!

Verse: 7    Dänizi guġultina boṭiyo,
   Dənizi guğultina bot'iyo,
    E͑qeci läpoġo basḳesṭi ḳinäḳ,
    Üqeśi ləpoğo bask'est'i k'inək',
    E͑qe͑ci azuḳxoval basḳesṭiyonu Hun!
    Üqěśi azuk'xoval bask'est'iyonu Hun!

Verse: 8    Dünyäni ṭe bel bakalṭoġonal Vi biq̇i äšurxo aḳi Va bulṭun ḳoc̣bsa,
   Dünyəni t'e bel bakalt'oğonal Vi biq'i əşurxo ak'i Va bult'un k'os'bsa,
    Be͑ġč̣eġalaxun be͑ġ batḳala täräfäl ciriḳ,
    Běğc'eğalaxun běğ batk'ala tərəfəl śirik',
    Oćalin ćoyel bakalṭoġoy bitoṭin Va tärifläyinšala mä͑ġure mä͑ġe͑.
    Oç̌alin ç̌oyel bakalt'oğoy bitot'in Va tərifləyinşala mə̌ğure mə̌ğě.

Verse: 9    Oćalin q̇ayġinan mansṭa Hun,
   Oç̌alin q'ayğinan manst'a Hun,
    Šoṭo xe duġi bäräkätlun bsa.
    Şot'o xe duği bərəkətlun bsa.
    Buxaʒ́uġon xe duġala arxe źomo biq̇teneġon,
    Buxačuğon xe duğala arxe ǰomo biq'teneğon,
    Šoṭay be͑ġala oćalen tadala bar bole bakon,
    Şot'ay běğala oç̌alen tadala bar bole bakon,
    Axəri Hun Vi kiinen häzirbsa me oćala!
    Axıri Hun Vi kiinen həzirbsa me oç̌ala!

Verse: 10    Hunen särnoġo xenen buybsa,
   Hunen sərnoğo xenen buybsa,
    Ezbi ganxo aġalinen ǯugübi hamavarbsa.
    Ezbi ganxo ağalinen cugübi hamavarbsa.
    Vi xeyir-bäräkätene göyünbaksa biti här cil!
    Vi xeyir-bərəkətene göyünbaksa biti hər śil!

Verse: 11    Beši här usen exṭala baren
   Beşi hər usen ext'ala baren
    Vi heq̇ädär kulqay baksunane aḳesṭa,
    Vi heq'ədər kulqay baksunane ak'est'a,
    Vi kul lafṭala här ganen bolluġe ešṭa!
    Vi kul laft'ala hər ganen bolluğe eşt'a!

Verse: 12    Be͑ġa xam ganu göyün oyen,
   Běğa xam ganu göyün oyen,
    Buruxmoġo mu͑qluġen hetäre haq̇e!
    Buruxmoğo mǔqluğen hetəre haq'e!

Verse: 13    Q̣oruġxo sürüġoy,
   Q'oruğxo sürüğoy,
    Däroġo taxəli kiyexun aḳes tene baksa,
    Dəroğo taxıli kiyexun ak'es tene baksa,
    Bitoṭay üḳe qayesa, muz qaypi mä͑ġṭunne šoṭoġon!
    Bitot'ay ük'e qayesa, muz qaypi mə̌ğt'unne şot'oğon!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.