TITUS
Biblia Udica, Versio Nizhensis: Vetus Testamentum
Part No. 190
Previous part

Chapter: 60 

60-ǯi ω͑vel mä͑ġ
60-ci Ǐvel mə̌ğ



Farḳalxoy däsṭin kalaṭaynaḳ. Davidi zombseynaḳ bakala mikṭam. *
Fark'alxoy dəst'in kalat'aynak'. Davidi zombseynak' bakala mikt'am. *

"Geśe vard ḳinäḳ gözäl bakala iräziluġ" uḳala faren mä͑ġe͑ġala ω͑vel mä͑ġ.
"Geše vard k'inək' gözəl bakala irəziluğ" uk'ala faren mə̌ğěğala Ǐvel mə̌ğ.

Daviden Naharayima q̇a Sovina bakala aramluġoxun davabiṭuxun saal Yoaven hari "elaxoy därä" uḳala ganu ṗac̣c̣e hazar edomluna ḳac̣ṗiṭuxun oša cameci mä͑ġ. *
Daviden Naharayima q'a Sovina bakala aramluğoxun davabit'uxun saal Yoaven hari "elaxoy dərə" uk'ala ganu p'as's'e hazar edomluna k'as'p'it'uxun oşa śameśi mə̌ğ. *


Verse: 1    Vi ćoya tarandi Hun yaxun, ay Buxaʒ́ux,
   Vi ç̌oya tarandi Hun yaxun, ay Buxačux,
    Yax oćalen san bi,
    Yax oç̌alen san bi,
    Äǯuxlunu Hun beš loxol!
    Əcuxlunu Hun beş loxol!
    Ama yax gorox eki, beš loxol be͑ġa ṗurum!
    Ama yax gorox eki, beş loxol běğa p'urum!

Verse: 2    Oćala iz ganuxunen galdi, šoṭo bə͑yexun ṭo͑pe͑vḳala ḳinäḳen bi Hun!
   Oç̌ala iz ganuxunen galdi, şot'o bı̌yexun t'ǒpěvk'ala k'inək'en bi Hun!
    Q̣olayba šoṭay ṭo͑pi ganxo, mone, hälä źə͑ḳesa šo!
    Q'olayba şot'ay t'ǒpi ganxo, mone, hələ ǰı̌k'esa şo!

Verse: 3    Ṭetären mä͑yinbi ki Vi azuḳi ġina Hun
   T'etəren mə̌yinbi ki Vi azuk'i ğina Hun
    Ičoġoy käyiṭoġo bo͑xmo͑ġo͑xun ḳaṭ-ḳaten ečeri!
    İçoğoy kəyit'oğo bǒxmǒğǒxun k'at'-k'aten eçeri!

Verse: 4    Ama Vi bać̣anexun taġalṭoġo Vi bayraġi oq̇an girbi Hun,
   Ama Vi bač'anexun tağalt'oğo Vi bayraği oq'an girbi Hun,
    Ičoġoynaḳ q̇ə͑ nu bakala, boseġala oxurxo ičoġo nu lafṭes bakala gala!
    İçoğoynak' q'ı̌ nu bakala, boseğala oxurxo içoğo nu laft'es bakala gala!

Verse: 5    Vi čureġalṭoġoy Va ḳalpsuna ibaka Hun, čarḳesṭa šoṭoġo!
   Vi çureğalt'oğoy Va k'alpsuna ibaka Hun, çark'est'a şot'oğo!
    Barta Vi yön kul beš loxolq̇an baki, efa yax!
    Barta Vi yön kul beş loxolq'an baki, efa yax!

Verse: 6    Axəri Buxaʒ́uġon Iz bakala ə͑vel gala metäre pey:
   Axıri Buxačuğon İz bakala ı̌vel gala metəre pey:
    "Bez kiyel badi Šekem šähäri oćalxo vä͑x payboz,
    "Bez kiyel badi Şekem şəhəri oç̌alxo və̌x payboz,
    Suḳḳoṭ uḳala ganu Bez azuḳi arane ǯöyboz.
    Suk'k'ot' uk'ala ganu Bez azuk'i arane cöyboz.

Verse: 7    Gileadi q̇a Menaššeni oćalxoval Bezine!
   Gileadi q'a Menaşşeni oç̌alxoval Bezine!
    Efraima arciz kalaluġbsa,
    Efraima arśiz kalaluğbsa,
    Iudeyinaz laxe Bez taxṭa Zu!
    İudeyinaz laxe Bez taxt'a Zu!

Verse: 8    Moava Bez tur oc̣ḳala läänez be,
   Moava Bez tur os'k'ala ləənez be,
    Edomi loxol toroḳal bosala exṭiyärzax bu Bezi. *
    Edomi loxol torok'al bosala ext'iyərzax bu Bezi. *
    Mone, filisṭluġoy oćalaxune č̣eysa Bez säs!"
    Mone, filist'luğoy oç̌alaxune c'eysa Bez səs!"

Verse: 9    P̣oy isä šin tašala yax ṭe q̇alala šähäri loxol?
   P'oy isə şin taşala yax t'e q'alala şəhəri loxol?
    Šu güväyinšaki taġalyan Edoma exsṭa?
    Şu güvəyinşaki tağalyan Edoma exst'a?

Verse: 10    Buxaʒ́uġon yaxun Iz ćoya taradiṭuxun oša,
   Buxačuğon yaxun İz ç̌oya taradit'uxun oşa,
    Beš q̇ošun davina č̣eġaṭan Šo yaxun nu bakiṭuxun oša mümkün tene mo!
    Beş q'oşun davina c'eğat'an Şo yaxun nu bakit'uxun oşa mümkün tene mo!

Verse: 11    Düšmänxo beš turin oq̇a laxsuna kömäyba yax, ay Buxaʒ́ux!
   Düşmənxo beş turin oq'a laxsuna köməyba yax, ay Buxačux!
    Axəri Hun nu bakala gala insanen hiḳḳal bes tene bakon!
    Axıri Hun nu bakala gala insanen hik'k'al bes tene bakon!

Verse: 12    Buxaʒ́uxe yaynaḳ q̇äläbä ečalo,
   Buxačuxe yaynak' q'ələbə eçalo,
    Šone düšmänxo beš turin oq̇a saki ćaxćuxṗesṭalo!
    Şone düşmənxo beş turin oq'a saki ç̌axç̌uxp'est'alo!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.