TITUS
Biblia Udica, Versio Nizhensis: Vetus Testamentum
Part No. 189
Previous part

Chapter: 59 

59-ǯi ω͑vel mä͑ġ
59-ci Ǐvel mə̌ğ



Farḳalxoy däsṭin kalaṭaynaḳ. Davidi "za efa" uḳala faren mä͑ġe͑ġala mikṭam. *
Fark'alxoy dəst'in kalat'aynak'. Davidi "za efa" uk'ala faren mə̌ğěğala mikt'am. *

Šaulen Davida bespsun čureci šoṭay ḳoža busmišbseynaḳ amdar yaq̇abaṭan cameci mä͑ġ. *
Şaulen Davida bespsun çureśi şot'ay k'oja busmişbseynak' amdar yaq'abat'an śameśi mə̌ğ. *


Verse: 1    Ay bez Buxaʒ́ux, bez düšmänxoy kiyexun čarḳesṭa za,
   Ay bez Buxačux, bez düşmənxoy kiyexun çark'est'a za,
    Bez loxol e͑qeciṭoġoxun q̇oriša!
    Bez loxol ěqeśit'oğoxun q'orişa!

Verse: 2    Šär äš biq̇alṭoġoxun ä͑xilba za,
   Şər əş biq'alt'oğoxun ə̌xilba za,
    P̣i ciḳalxoy kiyexun exṭa.
    P'i śik'alxoy kiyexun ext'a.

Verse: 3    Mone, bez elmoġo haq̇seynaḳ zaṭun busmišbsa,
   Mone, bez elmoğo haq'seynak' zat'un busmişbsa,
    Gireci bez äleyinä äyitäṭun sabsa me zaləmxon.
    Gireśi bez əleyinə əyitət'un sabsa me zalımxon.
    Ama bezi sal sa taxsər nääl günax tezax bu, ay Q̣ONƷ́UX.
    Ama bezi sal sa taxsır nəəl günax tezax bu, ay Q'ONČUX.

Verse: 4    Sal sa pis äš tez biq̇e zu,
   Sal sa pis əş tez biq'e zu,
    Ama šorox bez loxol eyseynaḳṭun kape,
    Ama şorox bez loxol eyseynak't'un kape,
    Eki ṗaṗa, ay Buxaʒ́ux! Bez därdä nu aksuna ma laxa.
    Eki p'ap'a, ay Buxačux! Bez dərdə nu aksuna ma laxa.

Verse: 5    Ay Q̣ošuni Q̣ONƷ́UX bakala Buxaʒ́ux!
   Ay Q'oşuni Q'ONČUX bakala Buxačux!
    Ay Israili Buxaʒ́ux,
    Ay İsraili Buxačux,
    Hayza Vi Šu baksuna aḳesṭa!
    Hayza Vi Şu baksuna ak'est'a!
    Va nu čalxala bito me azuḳxoy ǯazina tada!
    Va nu çalxala bito me azuk'xoy cazina tada!
    Ičoġoy boš šären buy bakala me xayinxo gorox ma eki!
    İçoğoy boş şəren buy bakala me xayinxo gorox ma eki!

Verse: 6    Me pisorox här biyäs eṭunsa,
   Me pisorox hər biyəs et'unsa,
    Hari šähäri härräminäṭun biq̇esṭa,
    Hari şəhəri hərrəminət'un biq'est'a,
    Xä͑ ḳinäḳ amdari loxolṭun eysa šorox!
    Xə̌ k'inək' amdari loxolt'un eysa şorox!

Verse: 7    Sa be͑ġa ičoġoy źomoxun č̣eġalṭoġon
   Sa běğa içoğoy ǰomoxun c'eğalt'oğon
    Heṭäre ġayin me ḳinäḳ bosṭa!
    Het'əre ğayin me k'inək' bost'a!
    Axəri ṭetärṭun fikirbsa ki, ičoġo ibakal butene.
    Axıri t'etərt'un fikirbsa ki, içoğo ibakal butene.

Verse: 8    Ama Hun axśumi ga balnu šoṭoġo, ay Q̣ONƷ́UX,
   Ama Hun axšumi ga balnu şot'oğo, ay Q'ONČUX,
    Axśumpesṭalnu Va nu čalxala bito azuḳxoy loxol!
    Axšumpest'alnu Va nu çalxala bito azuk'xoy loxol!

Verse: 9    Za zor tadalo,
   Za zor tadalo,
    Umudi ganu Hun bezi, ay Buxaʒ́ux!
    Umudi ganu Hun bezi, ay Buxačux!
    Bezi bać̣an,
    Bezi bač'an,

Verse: 10    Vi nu badalbakala čuresuna zaxun nu kambala Buxaʒ́uxnu Hun bezi!
   Vi nu badalbakala çuresuna zaxun nu kambala Buxačuxnu Hun bezi!
    Qayḳale bez yaq̇a Buxaʒ́uġon,
    Qayk'ale bez yaq'a Buxačuğon,
    Bez düšmänxoy taševḳi bezi turin oq̇a bisṭuna aḳesṭale za!
    Bez düşmənxoy taşevk'i bezi turin oq'a bist'una ak'est'ale za!

Verse: 11    Ama ma besṗa šoṭoġo!
   Ama ma besp'a şot'oğo!
    Barta biti xoreceq̇aṭun,
    Barta biti xoreśeq'at'un,
    Barta Vi kiin zore ḳä baksuna aḳeq̇aṭun, ay beš bać̣an bakala Buxaʒ́ux!
    Barta Vi kiin zore k'ə baksuna ak'eq'at'un, ay beş bač'an bakala Buxačux!
    Tene bito usum eyexun č̣eri taġale bez azuḳi.
    Tene bito usum eyexun c'eri tağale bez azuk'i.

Verse: 12    Ičoġoy muzen ičoġo günaxa basṭuni ǯazina zapeq̇aṭun barta!
   İçoğoy muzen içoğo günaxa bast'uni cazina zapeq'at'un barta!
    Ičoġo bitoṭuxun üsṭün hesabsun,
    İçoğo bitot'uxun üst'ün hesabsun,
    Šuḳḳalaxun nu q̇ə͑bi źomoxun č̣eġalṭoġo nu fikir tasṭun
    Şuk'k'alaxun nu q'ı̌bi ǰomoxun c'eğalt'oğo nu fikir tast'un
    Ḳä baksuna aḳeq̇aṭun barta!
    K'ə baksuna ak'eq'at'un barta!
    Ičoġoy źomoxun č̣eri bito äfčiġoy q̇a q̇arġišxoy
    İçoğoy ǰomoxun c'eri bito əfçiğoy q'a q'arğişxoy

Verse: 13    Äǯuġo č̣evḳa šoṭoġoxun!
   Əcuğo c'evk'a şot'oğoxun!
    Tumexun äfčiba šoṭoġo!
    Tumexun əfçiba şot'oğo!
    Barta dünyäni ṭe belxun me bel bitoṭin avabakeq̇an ki,
    Barta dünyəni t'e belxun me bel bitot'in avabakeq'an ki,
    Buxaʒ́uġoy kule bu Iaḳovi näsili loxol!
    Buxačuğoy kule bu İak'ovi nəsili loxol!

Verse: 14    Me pisorox här biyäs eṭunsa,
   Me pisorox hər biyəs et'unsa,
    Hari šähäri härräminäṭun biq̇esṭa,
    Hari şəhəri hərrəminət'un biq'est'a,
    Xä͑ ḳinäḳ amdari loxolṭun eysa šorox!
    Xə̌ k'inək' amdari loxolt'un eysa şorox!

Verse: 15    Ama barta hari fərəpi taysunaxun bašq̇a hiḳḳal bes maq̇aṭun baki,
   Ama barta hari fırıpi taysunaxun başq'a hik'k'al bes maq'at'un baki,
    Barta busa mandi ulayinšeq̇aṭun šoṭoġon!
    Barta busa mandi ulayinşeq'at'un şot'oğon!

Verse: 16    Zu isä Vi zoraxun äyitḳala mä͑ġur mä͑ġḳoz,
   Zu isə Vi zoraxun əyitk'ala mə̌ğur mə̌ğk'oz,
    Savaxṭinaxun hayzeri Vi nu badalbakala čuresuna bez muzel ečoz!
    Savaxt'inaxun hayzeri Vi nu badalbakala çuresuna bez muzel eçoz!
    Axəri Hun bez bać̣an,
    Axıri Hun bez bač'an,
    Bez umudi gan bake ṭar ġine zaynaḳ!
    Bez umudi gan bake t'ar ğine zaynak'!

Verse: 17    Hun za zor tadalonu,
   Hun za zor tadalonu,
    Va tärifläyinšala mä͑ġur mä͑gḳoz zu!
    Va tərifləyinşala mə̌ğur mə̌gk'oz zu!
    Bez bać̣annu Hun, ay Buxaʒ́ux,
    Bez bač'annu Hun, ay Buxačux,
    Vi nu badalbakala čuresuna zaxun nu kambala Buxaʒ́uxnu Hun!
    Vi nu badalbakala çuresuna zaxun nu kambala Buxačuxnu Hun!



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.