TITUS
Biblia Udica, Versio Nizhensis: Vetus Testamentum
Part No. 188
Previous part

Chapter: 58 

58-ǯi ω͑vel mä͑ġ
58-ci Ǐvel mə̌ğ



Farḳalxoy däsṭin kalaṭaynaḳ. Davidi "za efa" uḳala faren mä͑ġe͑ġala mikṭam. *
Fark'alxoy dəst'in kalat'aynak'. Davidi "za efa" uk'ala faren mə̌ğěğala mikt'am. *


Verse: 1    Ay kalaluġbalxo, efi č̣evḳala q̇ärarxo düzgüne ki?
   Ay kalaluğbalxo, efi c'evk'ala q'ərarxo düzgüne ki?
    Bitoṭay loxol sa piin be͑ġinan divanbsa ki vä͑n?
    Bitot'ay loxol sa piin běğinan divanbsa ki və̌n?

Verse: 2    Tää, insaf uḳala šey tene bu ef üḳe,
   Təə, insaf uk'ala şey tene bu ef ük'e,
    Zor äšṗesṭun än čureġala äše efi!
    Zor əşp'est'un ən çureğala əşe efi!

Verse: 3    Hälä nanaxun bakaṭan ičoġoy yaq̇a aćesṗiyoroxe me pisorox,
   Hələ nanaxun bakat'an içoğoy yaq'a aç̌esp'iyoroxe me pisorox,
    Mic̣iḳ hamaq̇un äfčiduġsune šoṭoġoy äš, yaq̇nuxun č̣ereṭun šorox.
    Mis'ik' hamaq'un əfçiduğsune şot'oğoy əş, yaq'nuxun c'eret'un şorox.

Verse: 4    Šoṭoġoy źomoxun č̣eġala pisluġxo
   Şot'oğoy ǰomoxun c'eğala pisluğxo
    Diziḳi źomoxun č̣eġala zähär ḳinäḳe.
    Dizik'i ǰomoxun c'eğala zəhər k'inək'e.
    Iz u͑mu͑ġo lafṭala säsä ičin nu čureġayin nu ibakala,
    İz ǔmǔğo laft'ala səsə için nu çureğayin nu ibakala,

Verse: 5    Diziḳäčidal heq̇ädär bašaraġlu baalkayin,
   Dizik'əçidal heq'ədər başarağlu baalkayin,
    Šoṭo farpi nu äčides bakala sa gürzä diziḳi zähär ḳinäḳ.
    Şot'o farpi nu əçides bakala sa gürzə dizik'i zəhər k'inək'.

Verse: 6    Šoṭoġoy uluxxo duġa cipa ičoġoy źomoxun, ay Buxaʒ́ux!
   Şot'oğoy uluxxo duğa śipa içoğoy ǰomoxun, ay Buxačux!
    Čäninä duġa saka šoṭoġoy!
    Çəninə duğa saka şot'oğoy!

Verse: 7    Barta šorox bari taġala xe ḳinäḳ äfčibakeq̇aṭun,
   Barta şorox bari tağala xe k'inək' əfçibakeq'at'un,
    Barta ičoġoy bosala ox hälä kamanaxun č̣eġamin xoxbakeq̇an!
    Barta içoğoy bosala ox hələ kamanaxun c'eğamin xoxbakeq'an!

Verse: 8    Barta älbiz yavaš-yavaš xebaki taġala ḳinäḳ xebaki taceq̇aṭun,
   Barta əlbiz yavaş-yavaş xebaki tağala k'inək' xebaki taśeq'at'un,
    Barta nanay tapane ṗuri äylen me dünyäni išiġa ene nu aḳes bakala ḳinäḳ
    Barta nanay tapane p'uri əylen me dünyəni işiğa ene nu ak'es bakala k'inək'
    Šoroxal me dünyäni išiġa häsrätq̇aṭun baki!
    Şoroxal me dünyəni işiğa həsrətq'at'un baki!

Verse: 9    Šoṭoġon ičoġoy bel hariṭoġo hälä tam q̇amišakinut äfčibaki taġalṭun.
   Şot'oğon içoğoy bel harit'oğo hələ tam q'amişakinut əfçibaki tağalt'un.
    Mušen iz be͑ś badi fupi tašala sa göyün o ḳinäḳ,
    Muşen iz běš badi fupi taşala sa göyün o k'inək',
    Q̣ari sa koloś ḳinäḳ!
    Q'ari sa kološ k'inək'!

Verse: 10    Me pisṭoġon ičoġoy ǯazina zapsunen düzgün bakalṭoġo mu͑qṭale,
   Me pist'oğon içoğoy cazina zapsunen düzgün bakalt'oğo mǔqt'ale,
    Šoṭoġoy axəra aḳi ičoġoy üḳ čaxeci bakale!
    Şot'oğoy axıra ak'i içoğoy ük' çaxeśi bakale!

Verse: 11    Amdarxonal ṭe vädä metär uḳalṭun:
   Amdarxonal t'e vədə metər uk'alt'un:
    "Düzgün bakalṭuxun Buxaʒ́uġon Iz šaaṭluġa kamtenebon,
    "Düzgün bakalt'uxun Buxačuğon İz şaat'luğa kamtenebon,
    Hägigiyal Buxaʒ́ux bune,
    Həgigiyal Buxačux bune,
    Me dünyänä düzgün divanbala Buxaʒ́uxe!"
    Me dünyənə düzgün divanbala Buxačuxe!"



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.