TITUS
Biblia Udica, Versio Nizhensis: Vetus Testamentum
Part No. 186
Previous part

Chapter: 56 

56-ǯi ω͑vel mä͑ġ
56-ci Ǐvel mə̌ğ



Farḳalxoy däsṭin kalaṭaynaḳ. "Ä͑xil mä͑xluġa bakala göyärčin" uḳala faren mä͑ġe͑ġala Davidi mikṭam. *
Fark'alxoy dəst'in kalat'aynak'. "Ə̌xil mə̌xluğa bakala göyərçin" uk'ala faren mə̌ğěğala Davidi mikt'am. *

Filisṭluġon Davida Gaṭ šähäre biq̇aṭane camece. *
Filist'luğon Davida Gat' şəhəre biq'at'ane śameśe. *


Verse: 1    Ay Buxaʒ́ux, za gorox eki!
   Ay Buxačux, za gorox eki!
    Bez bać̣anexun bafṭiyorox hari za ṗaṗsaxṭun,
    Bez bač'anexun baft'iyorox hari za p'ap'saxt'un,
    Üše-ġena bez loxolṭun eysa, za saki ćaxćuxpsunṭun čuresa.
    Üşe-ğena bez loxolt'un eysa, za saki ç̌axç̌uxpsunt'un çuresa.

Verse: 2    Bezi här ġina mä͑yinṭunbsa šoṭoġon,
   Bezi hər ğina mə̌yint'unbsa şot'oğon,
    Za nu čureġalorox ṭeq̇ädäre ki,
    Za nu çureğalorox t'eq'ədəre ki,
    Bo͑q̇ä͑lpi čarḳala šey tene, ay ala arci Buxaʒ́ux.
    Bǒq'ə̌lpi çark'ala şey tene, ay ala arśi Buxačux.

Verse: 3    Za q̇ə͑yen haq̇ala vädine
   Za q'ı̌yen haq'ala vədine
    Sayǯä Vaz umudbaksa zu.
    Saycə Vaz umudbaksa zu.

Verse: 4    Za tadi äyitä görä Va alxəšṗi
   Za tadi əyitə görə Va alxışp'i
    Vaz bać̣an tarasṭa zu.
    Vaz bač'an tarast'a zu.
    Umudi ganu Vasṭa aḳi hiḳḳalaxun tez q̇ə͑bsa!
    Umudi ganu Vast'a ak'i hik'k'alaxun tez q'ı̌bsa!
    Axəri Hun bakala gala insanen za ḳä bese bakon?
    Axıri Hun bakala gala insanen za k'ə bese bakon?

Verse: 5    Üše-ġena bez turin oq̇axunṭun kaśe bez düšmänxon,
   Üşe-ğena bez turin oq'axunt'un kaše bez düşmənxon,
    Bezi äyitmoġo fərədi za pisluġbsune ičoġoy niyät.
    Bezi əyitmoğo fırıdi za pisluğbsune içoğoy niyət.

Verse: 6    Č̣äṗḳin gireci äyitä saṭunbsa,
   C'əp'k'in gireśi əyitə sat'unbsa,
    Za busmiši bespsunṭun čuresa!
    Za busmişi bespsunt'un çuresa!

Verse: 7    Šoṭoġoy me günaxa ǯazasuz ma efa,
   Şot'oğoy me günaxa cazasuz ma efa,
    Vi äǯuġoy bäč̣üḳesun ḳä baksuna aḳesṭa, ay Buxaʒ́ux.
    Vi əcuğoy bəc'ük'esun k'ə baksuna ak'est'a, ay Buxačux.
    Me azuḳxo Vi turin oq̇a laxi ćaxćuxṗa!
    Me azuk'xo Vi turin oq'a laxi ç̌axç̌uxp'a!

Verse: 8    Bez därdurxoy bitovan soġo-soġo ava Hun,
   Bez dərdurxoy bitovan soğo-soğo ava Hun,
    Bez piyexun bari här ḳaṭ neġan bo͑q̇ä͑lpi.
    Bez piyexun bari hər k'at' neğan bǒq'ə̌lpi.
    Vi girke bošen campi Hun šoṭoġoy bitova!
    Vi girke boşen śampi Hun şot'oğoy bitova!

Verse: 9    Mone, Vaz kömäyä ḳale zu,
   Mone, Vaz köməyə k'ale zu,
    Bez düšmänxonal q̇ə͑bi qošṭun qaybaksa.
    Bez düşmənxonal q'ı̌bi qoşt'un qaybaksa.
    Buxaʒ́uġoy zaxun baksuna metärez avabaksa zu!
    Buxačuğoy zaxun baksuna metərez avabaksa zu!

Verse: 10    Iz tadi äyiti loxol čurḳala Q̣ONǮUĠOZ tärifläyinšbsa zu,
   İz tadi əyiti loxol çurk'ala Q'ONCUĞOZ tərifləyinşbsa zu,
    Iz tadi äyiti loxol čurḳala Buxaʒ́uġoz täräifläyinšbsa zu,
    İz tadi əyiti loxol çurk'ala Buxačuğoz tərəifləyinşbsa zu,

Verse: 11    Umudi ganu Buxaʒ́uġosṭa aḳi hiḳḳalaxun tez q̇ə͑bsa!
   Umudi ganu Buxačuğost'a ak'i hik'k'alaxun tez q'ı̌bsa!
    Axəri insanen za ḳä bese bakon?
    Axıri insanen za k'ə bese bakon?

Verse: 12    Ay Buxaʒ́ux, Va tadi äyiti loxol čurḳoz zu,
   Ay Buxačux, Va tadi əyiti loxol çurk'oz zu,
    Q̣urbanxo ečeri Va šükürbsuna aḳesṭoz.
    Q'urbanxo eçeri Va şükürbsuna ak'est'oz.

Verse: 13    Axəri Hun bez elmoġon čarḳesṭi,
   Axıri Hun bez elmoğon çark'est'i,
    Bez tur źe͑na lafsṭa ten barti.
    Bez tur ǰěna lafst'a ten barti.
    Za Buxaʒ́uġon išiġ sakala me dünyäne yäšäyinšbsunen q̇əsmatbi.
    Za Buxačuğon işiğ sakala me dünyəne yəşəyinşbsunen q'ısmatbi.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 30.11.2024. No parts of this document may be republished in any form without prior permission by the copyright holder.