Q̣ONƷ́UĠON Moiseya pine: "Süfṭin źe͑yurxo ošq̇ar ṗä͑ dänä ṭä͑ṗä͑ḳ źe͑ kišṗa; hun xoxṗi süfṭin ṭä͑ṗä͑ḳ źe͑ne loxol cameci äyitmoġo täzä źe͑ne loxol camḳoz.
Savaxṭan häzir baka. Sinay buruġo laci buruġoy bel Bezi be͑ś čurpa.
Šuḳḳal vaxun maq̇an laci, buruġo sal sa amdar maq̇an aḳeci. Buruġoy tume lap eġel-keči nääl beliyal ma otarišanan".
Moiseyen Q̣ONƷ́UĠON iču bürmiši ḳinäḳ süfṭinṭoġo ošq̇ar ṗä͑ dänä ṭä͑ṗä͑ḳ źe͑ne kišṗi. Savaxṭan üšenen hayzeri isä, šoṭoġo exṭi Sinay buruġone laci.
Q̣ONƷ́UXAL asoyi boš ciri Moiseyi ṭo͑ġo͑l čurepi. Oša Iz c̣iya bayanbsun
Moiseyi be͑śṭan č̣ovaki pine: "Q̣ONƷ́UX, Q̣ONƷ́UX, Zu üḳ boḳosṗala, šaaṭluġ aḳesṭala Buxaʒ́uxzu. Zu säbürlu, Ičusṭa čuresun gele bakala saal Bez äyitä ġać Buxaʒ́uxzu. *
Zu hazarxon näsilä Bezi \ nu badalbakala čuresunaz aḳesṭa, yaq̇nuxun č̣eysuna, ḳanunsuzluġa saal günaxa baġəšlayinšezbsa. Ama taxsər bakalṭu ǯazasuz tez bare: bavoġoy ǯazina xibimǯi-biṗimǯi näsiläl ciriḳ nävä-nätiǯoġoz tasṭa". *
Moisey haṭeṭiya oq̇a pasṭeci Q̣ONƷ́UĠO bul ḳoc̣bi
pine: "Ay Q̣onʒ́ux, ägär Vi piyes šaaṭluġ bä͑ġä͑bezusa, xoyinśezbsa, Hun, Q̣onʒ́ux, yaxun taki. Yan inadkär sa azuḳ baalkayan, beši yaq̇nuxun č̣eysuna saal günaxxo baġəšlayinša, yax Vi azuḳ ḳinäḳ q̇abulba".
; Ḳan. 7:1-5; 16:1-7)
; K'an. 7:1-5; 16:1-7)
Q̣ONƷ́UĠON Moiseya pine: "Mone, Zu vä͑xun iräziluġez ġaćesa. Bütüm azuḳi piin be͑ś ṭetär möǯüzoox aḳesṭoz ki, dünyäne sal sa gala, sal sa milläti boš metäro tene bake. Ef härräminä bakala bütüm azuḳxonal aḳalṭun ki, Zu, Q̣ONƷ́UĠON vaynaḳ bala äšurxo kalane.
Zu ġe vä͑x tadala ämirxo ämälbanan. Zuval ef be͑śṭan emorluġo, känanluġo, xeṭluġo, ṗerizluġo, xivluġo saal yevusluġo šäṗeġoz.
Vä͑x ef taġala oćala yäšäyinšala amdarxoxun iräziluġ ġaćesunaxun efanan, tenesa mo vä͑ynaḳ sa tälä bakale.
Šoṭoġoy q̇urban ečala ganxo carpanan, ičoġoy ə͑vel źe͑ne sütünxo xoxṗanan, čuux- \ buxaʒ́ux Ašera efala sütünxo boṭanan. *
Q̣eräz sal sa buxaʒ́uxxo bul ma ḳoc̣banan, šoṭaynaḳ ki, Q̣ONƷ́UĠOY c̣i Nu Portbale, Šo q̇eräz buxaʒ́uxxo nu portbala Buxaʒ́uxe.
Be͑ġanan, ṭe oćala yäšäyinšalṭoġoxun iräziluġ ma ġaćekinan. Tene, šoṭoġon ičoġoy buxaʒ́uxxoynaḳ q̇urban ečeri Za xäyanätbaṭan vä͑xal ičoġoy ṭo͑ġo͑l ḳalḳalṭun, vä͑nal šoṭoġoy q̇urbani yeq̇axun ukalnan.
Šoṭaynaḳ ki, vä͑n šoṭoġoy xuyärmoġo ef ġarmoġoynaḳ haq̇alnan šoṭoġonal ičoġoy buxaʒ́uxxoynaḳ q̇urban ečaṭan ef ġarmoġoval Za xäyanätbesṭalṭun.
Vä͑ynaḳ q̇äliben buxaʒ́uxxo ma düzbanan. *
Ä͑yinsuz Šume axsibay * č̣ovakesṭanan: vu͑ġ ġi Zu vä͑x ämirbi ḳinäḳ ä͑yinsuz śum ukanan. Moṭo aviv xašesṭa banan, šoṭaynaḳ ki, haṭe xašesṭanan Misiräxun č̣ere.
Bütüm nanaxun süfṭin baki ġarmux saal bütüm ef heyvanxoy - belin, eġeli, kečinal süfṭin baki ärkäy baloox Bezine. *
Süfṭin baki elemi balin galal sa eġeli nääl kečin bala tadanan. Ägär tades nu bakaynan, ṭe elemi balin ozana xoxṗanan. Ef \ süfṭin ġare galal sa eġeli nääl kečin bala tadanan. \ Šuḳḳal Bezi be͑ś amc̣i kiin maq̇an hari. *
U͑q ġi ef äšurxo banan, vu͑ġu͑mǯi ġine isä ma äšṗanan. Eze q̇a exe vädineyal moṭo ämälbanan. *
Čöle bakala äkini süfṭin exaxun Exe axsibay * č̣ovakesṭanan. Payizin axərasṭa isä Bare axsibaya * č̣ovakesṭanan.
Usena xib käräm ef bütüm išq̇arxo Q̣ONƷ́UĠOY, israilluġoy Buxaʒ́uġoy be͑śq̇aṭun hari.
Vä͑n ef Buxaʒ́ux bakala Q̣ONƷ́UĠOY be͑ś č̣eġaṭan šuḳḳalen ef oćalxo tene exṭal, šoṭaynaḳ ki, Zu ef oćalaxun q̇eräz millätxo šäṗeġoz. Ef oćalxoval gele bakale.
Be͑ġanan ki, ä͑yinen häzirbaki hiḳḳal Zaynaḳ ečala q̇urbani ṗiya maq̇an lafṭi. Č̣ovaksuni axsibayi q̇urbani yeq̇ savaxal ciriḳ maq̇an mandi. *
Ef oćalaxun gireci än šaaṭ nübärä ef Buxaʒ́ux Q̣ONƷ́UĠOY ḳoya ečanan. \ Q̣uzina iz nanay muć̣anaq̇i boš ma aṗesṗanan". *
Oša Q̣ONƷ́UĠON Moiseya pine: "Me äyitmoġo campa, šoṭaynaḳ ki, me šärturxonez Zu vaxun saal bütüm israilluġoxun ə͑vel iräziluġ ġaćesa".
Moiseyal Q̣ONƷ́UĠOXUN sagala q̇ərx ġi-q̇ərx šü manedi, hiḳḳal tene käyi, hiḳḳal tene u͑ġi. Šoṭin źe͑ne loxol iräziluġi äyitmoġo - Vic̣ ämiräne campi.
Moiseyen ṗä͑ dänä iräziluġi źe͑na iz kiyel biq̇i Sinay buruġoxun ciġaṭan tene avay ki, Q̣ONƷ́UĠOXUN äyitṗiṭuxun oša iz ćoyen c̣alesṭa.
Aaronen q̇a israilluġon Moiseyi ćoyen c̣alsṭuna aḳaṭan, šoṭo ə͑śalayinšaksuna qə͑ṭunbi.
Ama Moiseyen šoṭoġo ḳalepi. Aaron q̇a q̇urumi kaloroxal ə͑śalayinšaki Moiseyaxun exlätṭunbi.
Oša ǯamaatal bito šoṭo ə͑śalayinšebaki. Moiseyen Q̣ONƷ́UĠON Sinay buruġo iču pi ämirxo bitova šoṭoġo ṗaṗesebi.
Moiseyen exlätä čarḳi iz ćoya čalminen buṭeḳi.
Šoṭin iz ćoya sayǯä Q̣ONƷ́UĠOXUN exlätpseynaḳ Šoṭay be͑ś taġaṭane qayey. Č̣eriṭuxun oša Moiseyen Buxaʒ́uġoy äyitmoġo israilluġone ṗaṗespsay,
šoṭoġonal izi ćoyen c̣alsṭuna aṭunksay. Moiseyen isä eġala dönüš Q̣ONƷ́UĠOXUN exlätpseynaḳ bona baġamin ṗurum iz ćoya čalminen buṭeksay. *
