Moiseyen israilluġoy bütüm q̇uruma girbi šoṭoġo pine: "Q̣ONƷ́UĠON vä͑x me šeyurxo ämälbsunane ämirbe:
u͑q ġi äšṗanan, vu͑ġu͑mǯi ġi isä Q̣ONƷ́UĠO häsrbaki ə͑vel Šamaṭ ġine, sal sa äš nu biq̇ala ġine. Ṭe ġi äš biq̇alṭu besṗanan. *
Šamaṭ ġine ef yäšäyinšala gala sal aruxalmabanan".
)
)
Moiseyen bütüm israilluġoy q̇uruma pine: "Q̣ONƷ́UĠON metäre ämirbi:
vä͑sṭa bakala šeyurxoxun Q̣ONƷ́UĠOYNAḲ sa pay ečanan. Barta iz üḳen čureġalṭin Q̣ONƷ́UĠOYNAḲ me šeyurxoq̇an ečeri: q̇əzəl, gümüš nääl mis,
göyin, mumuśaḳi nääl tünd ć̣oć̣a irängen ṭuriyox, näziḳ kätani parča q̇a kečin xa,
ć̣oć̣a iräng duġeci eġeli ṭol q̇a q̇eräzäl näziḳ ṭolurxo, yasämäni duruṭ,
čiraġa bapseynaḳ zeytuni č̣äyin, lä͑ä͑msṭeynaḳ bakala č̣äyineynaḳ q̇a boḳospseynaḳ šaaṭ adeġala oyurxo,
samǯi be͑yinśi döšlin saal suruḳ ǯuye loxol laxseynaḳ oniks saal q̇eräz \ toyexlu źe͑yurxo.
Barta Q̣ONƷ́UĠON bašaraġ tadi usṭoġon hari Šoṭay ämirbi bütüm me šeyurxo düzbeq̇aṭun:
ə͑vel čadəra q̇a iz loxolxun buṭkseynaḳ bakala q̇aturxo, iz q̇armaġxo, čärčüvoġo, pešṭuvanxo, sütünxo saal iz turmoġo,
sanduġa saal šoṭo tašṭeynaḳ bakala duruṭxo, baġəšlayinšbsuni q̇apaġa, ə͑vel ganu än ə͑vel ganuxun ǯöybala pärdinä;
isṭola saal šoṭo tašṭeynaḳ bakala duruṭxo, iz bütüm q̇av-q̇aǯaġxo, Q̣onʒ́uġo häsrbakala śumurxo;
pisosa q̇a šoṭo lazəm bakala šeyurxo, čiraġxo saal šoṭo bapseynaḳ bakala č̣äyinä;
buxur q̇urban ečala ganu saal šoṭo tašṭeynaḳ lazəm bakala duruṭxo; lä͑ä͑msṭeynaḳ bakala č̣äyinä; boḳospseynaḳ bakala šaaṭ adeġala oyurxo; čadəra baġala ganeynaḳ bakala pärdinä;
boḳospsuni q̇urban ešṭeynaḳ q̇urban ečala ganu, šoṭay misnä rešoṭḳina, duruṭxo saal bütüm lazəm bakalṭoġo; läänä saal šoṭo laxala ganu;
määlin pärdoġo, sütünxo saal šoṭay turmoġo, määlin baġala ganeynaḳ bakala pärdinä,
čadəri mixčoġo, määlneynaḳ bakala mixčoġo, šoṭoġoynaḳ bakala kändürxo;
ə͑vel gala q̇ulluġbseynaḳ bakala ä͑leci paltarxo: be͑yinś Aaroneynaḳ ə͑vel paltarxo saal iz ġarmoġoynaḳ be͑yinśluġi paltarxo".
Hametär, israilluyox Moiseyi ṭo͑ġo͑lxun carṭunci.
Oša taci iz üḳen čureġalṭin ə͑vel čadəra biq̇seynaḳ, šoṭay boš bakala q̇ulluġeynaḳ saal ə͑vel paltarxo düzbseynaḳ Q̣ONƷ́UĠOYNAḲ mu͑q-mu͑q pay ešṭaṭun burqi.
Čureġalorox bito eṭunsay - išq̇arxoval, čupuxxoval. Šoṭoġon ičoġoy q̇əzəli brošḳoġo, sərəġanxo, boġoćalxo saal cepurxoṭun ešṭay. Šoṭoġon me q̇əzəli šeymoġo alabi moṭoġoy Q̣ONƷ́UĠOYNAḲ sa pay baksunaṭun aḳesṭay.
Šusṭa göyün, mumuśaḳi saal tünd ć̣oć̣a irängen ṭuri, näziḳ kätan, kečin xa, ć̣oć̣a iräng duġeci eġeli ṭol saal q̇eräz näziḳ ṭol buneysa, moṭoġone ešṭay.
Bakalṭin Q̣ONƷ́UĠOYNAḲ gümüš nääl mise ešṭay. Šusṭa yasämäni duruṭ buneysa, šoṭone čadəreynaḳ lazəm bakala šeyurxo düzbseynaḳ pay tasṭay.
Buxaʒ́uġon bašaraġ tadi čupuxxon ičoġoy kiin urtṭi göyün, mumuśaḳi, tünd ć̣oć̣a irängen ṭuri q̇a näziḳ kätani parčaṭun ešṭay.
Ičoġoy kiyexun ayeġala saal me äš ičoġoy üḳexun č̣ovakala čupuxxon isä kečin xayaxunṭun ṭuri urtṭi ešṭay.
Azuḳi kalaṭoġonal samǯi be͑yinśi döšlin q̇a suruḳ ǯuye loxol laxseynaḳ oniks saal q̇eräz toyexlu źe͑yurxo,
boḳospseynaḳ bakala šaaṭ adeġala oyurxo, pisoseynaḳ q̇a lä͑ä͑msṭeynaḳ bakala č̣äyineynaḳ šaaṭ adeġala oyurxo saal zeytuni č̣äyinṭun ešṭay.
Hametär, israillu bakala išq̇arxon q̇a čupuxxon Q̣ONƷ́UĠON Moiseyaxun ičoġo ṗaṗesṗiṭoġo ämälṭunbi. \ Šoṭoġon ḳä eṭunšṭaysa üḳinṭun ešṭay
Moiseyen israilluġo pine: "Be͑ġanan, Q̣ONƷ́UĠON Iuday tayfinaxun Xure nävä bakala Urin ġar Besalela č̣äḳṗi
šoṭo Buxaʒ́uġoy Urufen, müdrikluġen, q̇amišaksunen, haq̇əlen saal här sa ǯürä bašaraġen buybene ki,
q̇əzəlen, gümüšen saal misen äšbsuna,
toyexlu źe͑ kišṗi pul laxsuna, duruṭen äšbsuna bašarbeq̇an, iz kiyexun här ǯürä äš ayeceq̇an.
Q̣ONƷ́UĠON šoṭo saal Dane tayfinaxun bakala Ahisamaxi ġar Oholiabina q̇eräzṭoġo zombsuni bašaraġal tadene.
Šoṭoġo duruṭ kišbsuni, naxəš č̣evksuni, göyin, mumuśaḳi saal tünd ć̣oć̣a irängen ṭurinen naxəš laxsuni, näziḳ kätani parčina ä͑lsṭuni bašaraġe tade ki, ičoġoy kiyexun här šey ayeceq̇an.
