TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 65

Chapter: 15

Moiseyi q̇a Maryami mä͑ġ
Moiseyi q'a Maryami mə̌ğ

Verse: 1

Ṭe vädä Moiseyen q̇a israilluġon Q̣ONƷ́UĠOYNAḲ me mä͑ġä͑ṭun mä͑ġpi:
   T'e vədə Moiseyen q'a israilluğon Q'ONČUĞOYNAK' me mə̌ğə̌t'un mə̌ğpi:
    "Zu Q̣ONƷ́UĠOYNAḲ mä͑ġḳoz!
   "Zu Q'ONČUĞOYNAK' mə̌ğk'oz!
    Šoṭin kala q̇äläbäne q̇azayinši,
   Şot'in kala q'ələbəne q'azayinşi,
    E͑ka q̇a e͑klaṭu dänizäne bosi! ^*
   �Üka q'a ěklat'u dənizəne bosi! ^*

Verse: 2

Q̣ONƷ́UX bezi zore,
   Q'ONČUX bezi zore,
    Q̣ONƷ́UĠOYNAḲEZ mä͑ġe͑,
   Q'ONČUĞOYNAK'EZ mə̌ğě,
    Q̣ONƷ́UĠON za čarḳesedi.
   Q'ONČUĞON za çark'esedi.
    Q̣ONƷ́UX bezi Buxaʒ́uxe,
   Q'ONČUX bezi Buxačuxe,
    Zu Šoṭay c̣iya alaboz.
   Zu Şot'ay s'iya alaboz.
    Q̣ONƷ́UX Bezi bavay Buxaʒ́uxe,
   Q'ONČUX Bezi bavay Buxačuxe,
    Zu Šoṭo alxəšṗoz. ^*
   Zu Şot'o alxışp'oz. ^*

Verse: 3

Q̣ONƷ́UX q̇oččaġe,
   Q'ONČUX q'oççağe,
    Q̣ONƷ́UXE Šoṭay c̣i.
   Q'ONČUXE Şot'ay s'i.

Verse: 4

Šoṭin faraoni davin araboġo,
   Şot'in faraoni davin araboğo,
    Q̣ošunal dänizäne bosi.
   Q'oşunal dənizəne bosi.
    Faraoni č̣äḳeci davabalxo
   Faraoni c'ək'eśi davabalxo
    Ć̣oć̣a dänizäṭun batḳi.
   Č'oč'a dənizət'un batk'i.

Verse: 5

Bä͑ġä͑loy xenen ičoġo buṭḳi
   Bə̌ğə̌loy xenen içoğo but'k'i
    Źe ḳinäḳ tumel ciriḳ tanešeri.
   J̌e k'inək' tumel śirik' taneşeri.

Verse: 6

Ay Q̣ONƷ́UX! Vi yön kul osṭaar hamal zorbane.
   Ay Q'ONČUX! Vi yön kul ost'aar hamal zorbane.
    Ay Q̣ONƷ́UX! Vi yön kiinen düšmänä ḳac̣ṗi.
   Ay Q'ONČUX! Vi yön kiinen düşmənə k'as'p'i.

Verse: 7

Vi loxol eġalṭoġo Hun Vi kala c̣iyenen saki,
   Vi loxol eğalt'oğo Hun Vi kala s'iyenen saki,
    Vi äǯuġ bäč̣üḳeci šoṭoġo q̇ari o ḳinäḳ boḳosebi.
   Vi əcuğ bəc'ük'eśi şot'oğo q'ari o k'inək' bok'osebi.

Verse: 8

Vi bo͑xmo͑ġoy näfäsen xena čurpesedi,
   Vi bǒxmǒğoy nəfəsen xena çurpesedi,
    Šoval bari ḳinäḳe baki,
   Şoval bari k'inək'e baki,
    Dänizi posḳala xe buz ḳinäḳ osṭaare baki.
   Dənizi posk'ala xe buz k'inək' ost'aare baki.

Verse: 9

Düšmän lovġalayinšebaksay:
   Düşmən lovğalayinşebaksay:
    "Šoṭoġo šäṗeci biq̇oz,
   "Şot'oğo şəp'eśi biq'oz,
    Ičoġoy kiyel bakalṭoġo haq̇i za boševḳoz!
   İçoğoy kiyel bakalt'oğo haq'i za boşevk'oz!
    Bez q̇ələnǯa č̣evḳi šoṭoġo äfčiboz!"
   Bez q'ılınca c'evk'i şot'oğo əfçiboz!"

Verse: 10

Ama Hun Vi näfäsen funpi, dänizenal šoṭoġo q̇uč̣epi.
   Ama Hun Vi nəfəsen funpi, dənizenal şot'oğo q'uc'epi.
    Q̣urq̇ušun ḳinäḳ bä͑ġä͑loy xene boš batṭunḳi.
   Q'urq'uşun k'inək' bə̌ğə̌loy xene boş batt'unk'i.

Verse: 11

Ay Q̣ONƷ́UX, buxaʒ́uxxoy arane Vallariḳo butene!
   Ay Q'ONČUX, buxačuxxoy arane Vallarik'o butene!
    Vallariḳ ə͑veloval butene!
   Vallarik' ı̌veloval butene!
    Vi kalaluġ alxəša q̇a q̇ə͑ya layiġe,
   Vi kalaluğ alxışa q'a q'ı̌ya layiğe,
    Möǯüzoox yaratmišal Vallariḳo butene!
   Möcüzoox yaratmişal Vallarik'o butene!

Verse: 12

Vi yön kula boxondi, oćalenal düšmänxo q̇uč̣epi.
Vi yön kula boxondi, oç̌alenal düşmənxo q'uc'epi.

Verse: 13

Vi nu badalbakala čuresunen azuḳa čarḳesṭi yaq̇en aḳesṭi.
   Vi nu badalbakala çuresunen azuk'a çark'est'i yaq'en ak'est'i.
    Vi zoren Vi ə͑vel ganun tašeri.
   Vi zoren Vi ı̌vel ganun taşeri.

Verse: 14

Azuḳxon moṭo ibaki ṭuṭuḳalṭun,
   Azuk'xon mot'o ibaki t'ut'uk'alt'un,
    Filisṭluġo q̇ə͑yen boṭale.
   Filist'luğo q'ı̌yen bot'ale.

Verse: 15

Edomi kalaluġbalxoval ṭe vädä q̇ə͑yen haq̇ale,
   Edomi kalaluğbalxoval t'e vədə q'ı̌yen haq'ale,
    Moavi kalorox kala q̇ə͑ya bafṭalṭun,
   Moavi kalorox kala q'ı̌ya baft'alt'un,
    Känanluyox isä q̇ič̣eci mandalṭun.
   Kənanluyox isə q'ic'eśi mandalt'un.

Verse: 16

Šoṭoġo q̇ə͑yen q̇a välvälinen haq̇ale.
   Şot'oğo q'ı̌yen q'a vəlvəlinen haq'ale.
    Vi azuḳ č̣ovakamin
   Vi azuk' c'ovakamin
    Vi zorba kiin oq̇a šorox źe͑ ḳinäḳ lal-kar bakalṭun!
   Vi zorba kiin oq'a şorox ǰě k'inək' lal-kar bakalt'un!
    Ay Q̣ONƷ́UX, Vi čarḳesṭi me azuḳ č̣ovakale!
   Ay Q'ONČUX, Vi çark'est'i me azuk' c'ovakale!

Verse: 17

Šoṭoġo ečeri Vi buruġo ṗaṗesṗalnu,
   Şot'oğo eçeri Vi buruğo p'ap'esp'alnu,
    Vi yäšäyinšbseynaḳ yaratmiši gala,
   Vi yəşəyinşbseynak' yaratmişi gala,
    Ay Q̣ONƷ́UX, Vi kiin biq̇i ə͑vel gala!
   Ay Q'ONČUX, Vi kiin biq'i ı̌vel gala!

Verse: 18

Q̣ONƷ́UĠON hämišäluġ padčaġluġbale".
Q'ONČUĞON həmişəluğ padçağluğbale".

Verse: 19

Faraoni e͑kurxo, davin araboox saal e͑klorox dänizä baġaṭan Q̣ONƷ́UĠON dänizi xena šoṭoġoy loxol qoše qaydey. Israilluyox isä dänizi bə͑yexun, q̇ari ganuxunṭun č̣ovakey.
Faraoni ěkurxo, davin araboox saal ěklorox dənizə bağat'an Q'ONČUĞON dənizi xena şot'oğoy loxol qoşe qaydey. İsrailluyox isə dənizi bı̌yexun, q'ari ganuxunt'un c'ovakey.

Verse: 20

Aaroni xunči xavarečal Maryamen iz kiyel däpe exṭi. Bütüm čupuxxonal ičoġoy kiyel däp exṭi äčiḳa šoṭay bać̣anexunṭun taci.
Aaroni xunçi xavareçal Maryamen iz kiyel dəpe ext'i. Bütüm çupuxxonal içoğoy kiyel dəp ext'i əçik'a şot'ay bač'anexunt'un taśi.

Verse: 21

Maryamen šoṭoġoynaḳ me mä͑ġä͑ne mä͑ġpi:
   Maryamen şot'oğoynak' me mə̌ğə̌ne mə̌ğpi:
    "Q̣ONƷ́UĠOYNAḲ mä͑ġpanan,
   "Q'ONČUĞOYNAK' mə̌ğpanan,
    Šo gele kalane.
   Şo gele kalane.
    E͑ka saal e͑klaṭoġo dänizäne bosi!"
   �Üka saal ěklat'oğo dənizəne bosi!"

Q̣onʒ́uġoy amdarxon Iz äyitä ämälbsuna yoxlayinšbsun
Q'ončuğoy amdarxon İz əyitə əməlbsuna yoxlayinşbsun

Verse: 22

Moiseyen israilluġo Ć̣oć̣a dänizi ṭo͑o͑xun Šur c̣iyen amc̣i oćalane tašeri. Šorox ṭeṭiya xib ġi yaq̇ṭun taci, ama xe teṭun bä͑ġä͑bi.
Moiseyen israilluğo Č'oč'a dənizi t'ǒǒxun Şur s'iyen ams'i oç̌alane taşeri. Şorox t'et'iya xib ği yaq't'un taśi, ama xe tet'un bə̌ğə̌bi.

Verse: 23

Mara uḳala gala ṗaṗaṭan isä ṭiya bakala xena u͑ġe͑s teṭun baki, šoṭo görä ki, aġuney. Koṭo göräne ṭe ga Mara ^* ḳalesa.
Mara uk'ala gala p'ap'at'an isə t'iya bakala xena ǔğěs tet'un baki, şot'o görə ki, ağuney. Kot'o görəne t'e ga Mara ^* k'alesa.

Verse: 24

Azuḳen "ḳä u͑ġe͑n?" pi ṭoṭonepi, Moiseyi ćoyel äyitpsaṭun burqi.
Azuk'en "k'ə ǔğěn?" pi t'ot'onepi, Moiseyi ç̌oyel əyitpsat'un burqi.

Verse: 25

Ṭe vädä Moiseyen Q̣ONƷ́UĠO xoyinśebi, Q̣ONƷ́UĠONAL šoṭo sa xodin taye aḳesṭi. Moiseyen šoṭo xenane bosi, xeyal u͑ġä͑läne baki.
   T'e vədə Moiseyen Q'ONČUĞO xoyinšebi, Q'ONČUĞONAL şot'o sa xodin taye ak'est'i. Moiseyen şot'o xenane bosi, xeyal ǔğə̌ləne baki.
    Ṭeṭiya Q̣ONƷ́UĠON israilluġoy Izi
   T'et'iya Q'ONČUĞON israilluğoy İzi
    äyitä ämälbsuna yoxlayinšbseynaḳ šoṭoġoynaḳ q̇ayda-ḳanun laxi pine:
   əyitə əməlbsuna yoxlayinşbseynak' şot'oğoynak' q'ayda-k'anun laxi pine:

Verse: 26

"Ägär vä͑n ef Buxaʒ́ux bakala Q̣ONƷ́UĠO u͑mu͑xlaxaynan, Šoṭay piyes düzgün aḳeġala äšurxo biq̇aynan, Šoṭay ämirxo ämälbi ḳanunxo efaynan, misirluġoy loxol hari azarxoy sayǯo vä͑ynaḳ eġala tene. Axəri vä͑x q̇olaybala Q̣ONƷ́UX Zuzu".
"Əgər və̌n ef Buxačux bakala Q'ONČUĞO ǔmǔxlaxaynan, Şot'ay piyes düzgün ak'eğala əşurxo biq'aynan, Şot'ay əmirxo əməlbi k'anunxo efaynan, misirluğoy loxol hari azarxoy sayco və̌ynak' eğala tene. Axıri və̌x q'olaybala Q'ONČUX Zuzu".

Verse: 27

Oša israilluyox Maraxun č̣eri Elimaṭun hari. Ṭeṭiya ṗac̣c̣e xene orayin saal yetmiš xurmin xodoy. Šoṭoġon ṭe orayinxoy ṭo͑ġo͑l ičoġoynaḳ čurḳala gaṭun düzbi. ^*
Oşa israilluyox Maraxun c'eri Elimat'un hari. T'et'iya p'as's'e xene orayin saal yetmiş xurmin xodoy. Şot'oğon t'e orayinxoy t'ǒğǒl içoğoynak' çurk'ala gat'un düzbi. ^*

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.