TITUS
Biblia Udica, Versio Nizhensis: Vetus Testamentum
Part No. 66
Previous part

Chapter: 16 

Q̣onʒ́uġoy israilluġoynaḳ manna q̇a bildirčinxo yaq̇absun
Q'ončuğoy israilluğoynak' manna q'a bildirçinxo yaq'absun


Verse: 1  Link to rat Elimaxun č̣eriṭuxun oša isä israilluyox hari Elimi q̇a Sinay buruġoy arane bakala Sin amc̣i oćalaṭun ṗaṗi. Mo ṗä͑mǯi xaše qoc̣c̣emǯi ġiney, israilluġoy Misiräxun č̣eysun sa xašey.
   Elimaxun c'erit'uxun oşa isə israilluyox hari Elimi q'a Sinay buruğoy arane bakala Sin ams'i oç̌alat'un p'ap'i. Mo p'ə̌mci xaşe qos's'emci ğiney, israilluğoy Misirəxun c'eysun sa xaşey.

Verse: 2  Link to rat Amc̣i oćala ṗaṗiṭuxun oša bütüm israilluġon Moiseyaxun q̇a Aaronaxun ṗurum ṭoṭopsaṭun burqi.
   Ams'i oç̌ala p'ap'it'uxun oşa bütüm israilluğon Moiseyaxun q'a Aaronaxun p'urum t'ot'opsat'un burqi.

Verse: 3  Link to rat Šoṭoġon nexṭuniy: "Q̣ONƷ́UĠON yax Misiri ölkinä besṗiniy moṭoxun šaaṭey! Ṭiya yeq̇e leveṭi ṭo͑o͑x arci boššamin śumyan uksay. Moṭoġon isä yax me amc̣i oćala busaluġaxun bespseynaḳṭun ečere".
   Şot'oğon next'uniy: "Q'ONČUĞON yax Misiri ölkinə besp'iniy mot'oxun şaat'ey! T'iya yeq'e levet'i t'ǒǒx arśi boşşamin šumyan uksay. Mot'oğon isə yax me ams'i oç̌ala busaluğaxun bespseynak't'un eçere".

Verse: 4  Link to rat Ṭe vädä Q̣ONƷ́UĠON Moiseya pine: \ "Zu vä͑ynaḳ göynuxun śum cipesṭoz. Barta här ġi ǯamaaten č̣eri iz ġiluġ śuma girbeq̇an. Metär Zu šoṭoġoy Bezi ḳanuna ämälbsuna yoxlayinšoz. *
   T'e vədə Q'ONČUĞON Moiseya pine: \ "Zu və̌ynak' göynuxun šum śipest'oz. Barta hər ği camaaten c'eri iz ğiluğ šuma girbeq'an. Metər Zu şot'oğoy Bezi k'anuna əməlbsuna yoxlayinşoz. *

Verse: 5  Link to rat U͑q ġi girbeq̇aṭun, u͑qu͑mǯi ġine girbiyo isä q̇eräz ġimxo girbiṭuxun ṗä͑q̇at geleq̇an baki, haṭe ġiyal šoṭo häzirbeq̇aṭun".
   Ǔq ği girbeq'at'un, ǔqǔmci ğine girbiyo isə q'erəz ğimxo girbit'uxun p'ə̌q'at geleq'an baki, hat'e ğiyal şot'o həzirbeq'at'un".

Verse: 6  Link to rat Metärluġen, Moiseyen q̇a Aaronen israilluġo piṭun: "Biyäsin avabakalnan ki, vä͑x Misiräxun č̣evḳiyo Q̣ONƷ́UXE.
   Metərluğen, Moiseyen q'a Aaronen israilluğo pit'un: "Biyəsin avabakalnan ki, və̌x Misirəxun c'evk'iyo Q'ONČUXE.

Verse: 7  Link to rat Savaxṭan isä Šoṭay kalaluġa aḳalnan. Axəri Šoṭin efi Ičuxun ṭoṭopsuna inebaki. Yan šuyan ki, yaxunnan ṭoṭone?"
   Savaxt'an isə Şot'ay kalaluğa ak'alnan. Axıri Şot'in efi İçuxun t'ot'opsuna inebaki. Yan şuyan ki, yaxunnan t'ot'one?"

Verse: 8  Link to rat Oša Moiseyen pine: "Vä͑n metär avabakalnan ki, vä͑x Misiräxun č̣evḳiyo Q̣ONƷ́UXE: me biyäsin Q̣ONƷ́UĠON vä͑ynaḳ yeq̇, savaxṭan isä boššamin śum ṗaṗesṗale. Šoṭin ef ṭoṭoltina inebaki. Yan šuyan ki? Ef ṭoṭolti yaxun tää, Q̣ONƷ́UĠOXUNE".
   Oşa Moiseyen pine: "Və̌n metər avabakalnan ki, və̌x Misirəxun c'evk'iyo Q'ONČUXE: me biyəsin Q'ONČUĞON və̌ynak' yeq', savaxt'an isə boşşamin šum p'ap'esp'ale. Şot'in ef t'ot'oltina inebaki. Yan şuyan ki? Ef t'ot'olti yaxun təə, Q'ONČUĞOXUNE".

Verse: 9  Link to rat Moiseyen Aarona pine: "Bütüm israilluġo upa ki, Q̣ONƷ́UĠOY be͑śq̇aṭun č̣eri, šoṭaynaḳ ki, Šoṭin ičoġoy ṭoṭoltina inebaki".
   Moiseyen Aarona pine: "Bütüm israilluğo upa ki, Q'ONČUĞOY běšq'at'un c'eri, şot'aynak' ki, Şot'in içoğoy t'ot'oltina inebaki".

Verse: 10  Link to rat Aaronen israilluġoxun äyitḳala vädine šoṭoġon, mone, amc̣i oćala asoyi boš Q̣ONƷ́UĠOY kalaluġaṭun aḳi.
   Aaronen israilluğoxun əyitk'ala vədine şot'oğon, mone, ams'i oç̌ala asoyi boş Q'ONČUĞOY kalaluğat'un ak'i.

Verse: 11  Link to rat Q̣ONƷ́UĠON Moiseya pine:
   Q'ONČUĞON Moiseya pine:

Verse: 12  Link to rat "Zu israilluġoy ṭoṭoltina izbaki. Šoṭoġo upa: "Biyäsćoye yeq̇ ukalnan, savaxṭan isä ef boššamin śum bakale. Ṭe vädä avabakalnan ki, ef Buxaʒ́ux bakala Q̣ONƷ́UX Zuzu".
   "Zu israilluğoy t'ot'oltina izbaki. Şot'oğo upa: "Biyəsç̌oye yeq' ukalnan, savaxt'an isə ef boşşamin šum bakale. T'e vədə avabakalnan ki, ef Buxačux bakala Q'ONČUX Zuzu".

Verse: 13  Link to rat Ṭe biyäsin israilluġoy čurpi ganu bildirčinxone purpi hari. Šoṭoġon dirisṭ ṭe ganu haq̇layinšebi. Savaxṭan isä israilluġoy čurpi gane härrämine xone arci.
   T'e biyəsin israilluğoy çurpi ganu bildirçinxone purpi hari. Şot'oğon dirist' t'e ganu haq'layinşebi. Savaxt'an isə israilluğoy çurpi gane hərrəmine xone arśi.

Verse: 14  Link to rat Xo e͑qeciṭuxun oša oćali ćoye ḳä͑yä ošq̇ar mac̣i xurupunxone aḳeci.
   Xo ěqeśit'uxun oşa oç̌ali ç̌oye k'ə̌yə oşq'ar mas'i xurupunxone ak'eśi.

Verse: 15  Link to rat Israilluġon moṭo aḳaṭan sun-sunaxun "mo hiḳä?" * pi xavar haq̇saṭun burqi, šoṭaynaḳ ki, moṭay ḳä baksuna teṭun avay. Moiseyen isä šoṭoġo pine: "Mo Q̣ONƷ́UĠON vä͑ynaḳ yaq̇abi ukune. *
   İsrailluğon mot'o ak'at'an sun-sunaxun "mo hik'ə?" * pi xavar haq'sat'un burqi, şot'aynak' ki, mot'ay k'ə baksuna tet'un avay. Moiseyen isə şot'oğo pine: "Mo Q'ONČUĞON və̌ynak' yaq'abi ukune. *

Verse: 16  Link to rat Q̣ONƷ́UĠOY ämir mone: här amdaren iz čadəra bakala amdarxoy saya göräq̇an girbi. Här amdara sa omer * hesabbi".
   Q'ONČUĞOY əmir mone: hər amdaren iz çadıra bakala amdarxoy saya görəq'an girbi. Hər amdara sa omer * hesabbi".

Verse: 17  Link to rat Israilluġon hametäräl biṭun. Šinesa gele, šinesa male girbi.
   İsrailluğon hametərəl bit'un. Şinesa gele, şinesa male girbi.

Verse: 18  Link to rat Ama hari omeren usḳaṭan nä gele girbiṭay avuzin, nääl mal girbiṭay kam tene č̣eri. Härṭin iz q̇äräläne girbey. *
   Ama hari omeren usk'at'an nə gele girbit'ay avuzin, nəəl mal girbit'ay kam tene c'eri. Hərt'in iz q'ərələne girbey. *

Verse: 19  Link to rat Moiseyen israilluġo pine: "Savaxṭineynaḳ me ukunaxun ma efanan".
   Moiseyen israilluğo pine: "Savaxt'ineynak' me ukunaxun ma efanan".

Verse: 20  Link to rat Ama bäziṭoġon Moiseyi äyitä nu be͑ġi moṭoxun savaxineynaḳ eṭunfi. Ama šo meq bafṭi adebafṭi. Moiseyiyal šoṭoġoy loxol äǯuġone biq̇i.
   Ama bəzit'oğon Moiseyi əyitə nu běği mot'oxun savaxineynak' et'unfi. Ama şo meq baft'i adebaft'i. Moiseyiyal şot'oğoy loxol əcuğone biq'i.

Verse: 21  Link to rat Metärluġen, israilluġon här savaxṭan ṭe ukunaxun ičoġo \ heq̇ädär lazəmesa girṭunbsay, mandiyo isä be͑ġ gameġaṭan xebaki tanesay.
   Metərluğen, israilluğon hər savaxt'an t'e ukunaxun içoğo \ heq'ədər lazımesa girt'unbsay, mandiyo isə běğ gameğat'an xebaki tanesay.

Verse: 22  Link to rat Israilluġon me ukunaxun u͑q ġi girṭunbi, u͑qu͑mǯi ġine isä šoṭoxun ṗä͑q̇at avuz, ṗä͑ omerṭun girbi. Q̣urumi kalaluġbalxon hari moṭo Moiseya avabakesṭundi.
   İsrailluğon me ukunaxun ǔq ği girt'unbi, ǔqǔmci ğine isə şot'oxun p'ə̌q'at avuz, p'ə̌ omert'un girbi. Q'urumi kalaluğbalxon hari mot'o Moiseya avabakest'undi.

Verse: 23  Link to rat Moiseyen šoṭoġo pine: "Q̣ONƷ́UĠON metäre nex: "Äyč̣ä sal sa äš nu biq̇ala ġine - Q̣ONƷ́UĠO häsrbaki ə͑vel Šamaṭ ġine. Ġe ef badala här šeya badanan, źaldala här šeya źaldanan, mandala ukunal äyč̣ineynaḳ efanan". *
   Moiseyen şot'oğo pine: "Q'ONČUĞON metəre nex: "Əyc'ə sal sa əş nu biq'ala ğine - Q'ONČUĞO həsrbaki ı̌vel Şamat' ğine. Ğe ef badala hər şeya badanan, ǰaldala hər şeya ǰaldanan, mandala ukunal əyc'ineynak' efanan". *

Verse: 24  Link to rat Israilluġonal Moiseyen ičoġo ämirbi ḳinäḳ biṭun. Šoṭoġon mandi ukuna äyč̣in ġineynaḳ eṭunfi, šoval nä meq tene bafṭi, nä ad tene bafṭi.
   İsrailluğonal Moiseyen içoğo əmirbi k'inək' bit'un. Şot'oğon mandi ukuna əyc'in ğineynak' et'unfi, şoval nə meq tene baft'i, nə ad tene baft'i.

Verse: 25  Link to rat Moiseyen pine: "Me ukuna ġe ukanan, šoṭaynaḳ ki, ġeyin ġi Q̣ONƷ́UĠO häsrbaki Šamaṭ ġine. Ġe oćali ćoyexun ukun tenan bä͑ġä͑bal.
   Moiseyen pine: "Me ukuna ğe ukanan, şot'aynak' ki, ğeyin ği Q'ONČUĞO həsrbaki Şamat' ğine. Ğe oç̌ali ç̌oyexun ukun tenan bə̌ğə̌bal.

Verse: 26  Link to rat Vä͑n me ukuna u͑q ġi girbalnan, vu͑ġu͑mǯi - Šamaṭ ġine isä šo bakala tene".
   Və̌n me ukuna ǔq ği girbalnan, vǔğǔmci - Şamat' ğine isə şo bakala tene".

Verse: 27  Link to rat Azuḳi bošṭan bäziyorox vu͑ġu͑mǯi ġineyal ukun girbseynaḳ č̣erṭun, ama hiḳḳal teṭun bä͑ġä͑bi.
   Azuk'i boşt'an bəziyorox vǔğǔmci ğineyal ukun girbseynak' c'ert'un, ama hik'k'al tet'un bə̌ğə̌bi.

Verse: 28  Link to rat Q̣ONƷ́UĠON Moiseya pine: "Hevaxṭal ciriḳ Bezi ämirxo saal ḳanunxo tenan ämälbal?
   Q'ONČUĞON Moiseya pine: "Hevaxt'al śirik' Bezi əmirxo saal k'anunxo tenan əməlbal?

Verse: 29  Link to rat Ef eyex efanan, Q̣ONƷ́UĠON vä͑ynaḳ Šamaṭ ġine tadi. Moṭo göräl Šoṭin vä͑ynaḳ här u͑qu͑mǯi ġine ṗä͑ ġiluġ ukune tasṭa. Barta vu͑ġu͑mǯi ġi här soġo iz \ ḳoya mandi sal sa gala maq̇an č̣eri".
   Ef eyex efanan, Q'ONČUĞON və̌ynak' Şamat' ğine tadi. Mot'o görəl Şot'in və̌ynak' hər ǔqǔmci ğine p'ə̌ ğiluğ ukune tast'a. Barta vǔğǔmci ği hər soğo iz \ k'oya mandi sal sa gala maq'an c'eri".

Verse: 30  Link to rat Hametäräl, azuḳen vu͑ġu͑mǯi ġine sal sa äš tene biq̇say.
   Hametərəl, azuk'en vǔğǔmci ğine sal sa əş tene biq'say.

Verse: 31  Link to rat Israilluġon me ukuni c̣iya "mannane" * laxi. Šo häviǯi cil ḳinäḳey, iz iräng mac̣i, iz ṭad isä uć̣e yoxinane ošq̇arsṭay. *
   İsrailluğon me ukuni s'iya "mannane" * laxi. Şo həvici śil k'inək'ey, iz irəng mas'i, iz t'ad isə uč'e yoxinane oşq'arst'ay. *

Verse: 32  Link to rat Moiseyen pine: "Q̣ONƷ́UĠOY ämir mone: "Manninaxun sa omer buybi vä͑xun oša eġala näsileynaḳ efanan ki, Zu vä͑x Misiräxun č̣evḳi vädine amc̣i oćala tadi ukuna aḳaṭun".
   Moiseyen pine: "Q'ONČUĞOY əmir mone: "Manninaxun sa omer buybi və̌xun oşa eğala nəsileynak' efanan ki, Zu və̌x Misirəxun c'evk'i vədine ams'i oç̌ala tadi ukuna ak'at'un".

Verse: 33  Link to rat Metärluġen, Moiseyen Aarona pine: "Sa q̇av exṭa, šoṭay boš sa omer manna bapa. Šoṭo Q̣ONƷ́UĠOY be͑ś laxa ki, yaxun oša eġala näsileynaḳ q̇oriši efen".
   Metərluğen, Moiseyen Aarona pine: "Sa q'av ext'a, şot'ay boş sa omer manna bapa. Şot'o Q'ONČUĞOY běš laxa ki, yaxun oşa eğala nəsileynak' q'orişi efen".

Verse: 34  Link to rat Aaronenal Q̣ONƷ́UĠON Moiseya ämirbi ḳinäḳ ṭe manninen buy q̇ava q̇oriši efseynaḳ iräziluġi sanduġi be͑ś lanexi.
   Aaronenal Q'ONČUĞON Moiseya əmirbi k'inək' t'e manninen buy q'ava q'orişi efseynak' irəziluği sanduği běš lanexi.

Verse: 35  Link to rat Israilluġon ičoġoy amc̣i oćala bakala vädine - q̇ərx usen mannaṭun käyi. Šoṭoġon hari Känan oćali zahmana ṗaṗamin mannaṭun uksay. *
   İsrailluğon içoğoy ams'i oç̌ala bakala vədine - q'ırx usen mannat'un kəyi. Şot'oğon hari Kənan oç̌ali zahmana p'ap'amin mannat'un uksay. *

Verse: 36  Link to rat Sa omer - efa * uḳala usḳuni vic̣ payaxun sa paye.
   Sa omer - efa * uk'ala usk'uni vis' payaxun sa paye.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.