TITUS
Biblia Udica, Versio Nizhensis: Vetus Testamentum
Part No. 61
Previous part

Chapter: 11 

Vic̣imǯi, än bə͑hi ǯazin barada xavardarluġ
Vis'imci, ən bı̌hi cazin barada xavardarluğ


Verse: 1  Link to rat Ṭe vädä Q̣ONƷ́UĠON Moiseya pine: "Faraoni q̇a misirluġoy loxol sa ǯazal yaq̇aboz. Moṭoxun oša šoṭin vä͑x memiin tärbale, lap šäṗeġala bakale!
   T'e vədə Q'ONČUĞON Moiseya pine: "Faraoni q'a misirluğoy loxol sa cazal yaq'aboz. Mot'oxun oşa şot'in və̌x memiin tərbale, lap şəp'eğala bakale!

Verse: 2  Link to rat Hun isä azuḳa upa ki, ičoġoy boš ḳä išq̇ar saal čuux bunesa, taci ičoġoy q̇onšiġoxun q̇əzəl-gümüši šeyurxoq̇aṭun čureci".
   Hun isə azuk'a upa ki, içoğoy boş k'ə işq'ar saal çuux bunesa, taśi içoğoy q'onşiğoxun q'ızıl-gümüşi şeyurxoq'at'un çureśi".

Verse: 3  Link to rat Q̣ONƷ́UĠON ṭetäre bey ki, misirluġon Iz azuḳi loxol pis teṭun be͑ġsay. Moiseya isä faraoni sarayi amdarxoy q̇a adi ǯamaati kala hörmäṭoy.
   Q'ONČUĞON t'etəre bey ki, misirluğon İz azuk'i loxol pis tet'un běğsay. Moiseya isə faraoni sarayi amdarxoy q'a adi camaati kala hörmət'oy.

Verse: 4  Link to rat Metärluġen, Moiseyen faraona \ pine: "Q̣ONƷ́UĠON metäre nex: "Üšeni qə͑ṭusṭa Zu Misiri oćalaxun č̣ovakoz,
   Metərluğen, Moiseyen faraona \ pine: "Q'ONČUĞON metəre nex: "Üşeni qı̌t'ust'a Zu Misiri oç̌alaxun c'ovakoz,

Verse: 5  Link to rat Misirä bakala bütüm süfṭin ġar äyloxal biyale. Taxṭa arci faraoni ġaraxun burqi kiin ding äšṗesṭala čuux nökäri ġaral ciriḳ. Heyvanxoyal süfṭin ärkäy baloox biyale.
   Misirə bakala bütüm süft'in ğar əyloxal biyale. Taxt'a arśi faraoni ğaraxun burqi kiin ding əşp'est'ala çuux nökəri ğaral śirik'. Heyvanxoyal süft'in ərkəy baloox biyale.

Verse: 6  Link to rat Dirisṭ Misiri oćalaxun ṭetär sa šivan č̣eġale ki, metäro baki tene, bakalal tene.
   Dirist' Misiri oç̌alaxun t'etər sa şivan c'eğale ki, metəro baki tene, bakalal tene.

Verse: 7  Link to rat Ama israilluġoy q̇a ičoġoy heyvanxoy loxol sa xä͑yenal tene bä͑pḳal". Ṭe vädä avabakalnan ki, Q̣ONƷ́UĠON israilluġoy q̇a misirluġoy arane hetär färge laxe.
   Ama israilluğoy q'a içoğoy heyvanxoy loxol sa xə̌yenal tene bə̌pk'al". T'e vədə avabakalnan ki, Q'ONČUĞON israilluğoy q'a misirluğoy arane hetər fərge laxe.

Verse: 8  Link to rat Bütüm me vi sarayi amdarxo bezi ṭo͑o͑x eġalṭun, bezi be͑ś čökṭi xoyinśbalṭun ki, zuval, bezi azuḳal ef ölkinäxun č̣eri taġayan! Moṭoxun oša zu č̣eġoz". Moṭoġo pi Moisey gele äǯuġlu faraoni ṭo͑o͑xun č̣ere.
   Bütüm me vi sarayi amdarxo bezi t'ǒǒx eğalt'un, bezi běš çökt'i xoyinšbalt'un ki, zuval, bezi azuk'al ef ölkinəxun c'eri tağayan! Mot'oxun oşa zu c'eğoz". Mot'oğo pi Moisey gele əcuğlu faraoni t'ǒǒxun c'ere.

Verse: 9  Link to rat Q̣ONƷ́UĠON Moiseya "faraonen vä͑x u͑mu͑x tene laxal, Zuval ṭe vädä Misiri oćala Bezi möǯüzoġo geleboz" peney.
   Q'ONČUĞON Moiseya "faraonen və̌x ǔmǔx tene laxal, Zuval t'e vədə Misiri oç̌ala Bezi möcüzoğo geleboz" peney.

Verse: 10  Link to rat Moiseyen q̇a Aaronen bütüm me möǯüzoġo faraoni be͑ś aḳesṭeṭuniy. Ama Q̣ONƷ́UĠON faraona inadkär beney, šoṭinal israilluġo iz oćalaxun tene tärbsay.
   Moiseyen q'a Aaronen bütüm me möcüzoğo faraoni běš ak'est'et'uniy. Ama Q'ONČUĞON faraona inadkər beney, şot'inal israilluğo iz oç̌alaxun tene tərbsay.



Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.