Hametär, Iosif hayzeri faraoni ṭo͑ġo͑l taci pine: "Bezi bavan q̇a vičimoġon ičoġoy sürüġo bakala heyvanxo saal ičoġoy ḳä bunesa bitova girbi hareṭun miya, häysääl Gošen oćalaṭun".
Šoṭin izi vičimoġoy bošṭan qoaraṭu č̣äḳṗi šoṭoġo faraoni be͑śe č̣evḳi.
Faraonenal šoṭoġoxun "efi äšlin c̣i hiḳä" pi xavar haq̇aṭan vičimoġon piṭun: "Me vi ḳulurxoy äš heyvan be͑ġsune, mo hälä beši bavoġoy dööräxun metäre bake.
Hareyan samal vädä miya bakayan, šoṭo görä ki, Känan oćala busaluġen haq̇ene tanesa. Me vi ḳulurxon ičoġoy heyvanxo otarišbseynaḳ gaal teṭun bä͑ġä͑bsa häysä ṭiya, oćali ćoyel * uḳala šey tene bu. Häysääl šoṭo göräyan vi ṭo͑ġo͑l hari źomo ä͑mbsa, barta me vi ḳulurxo taci Gošen oćala arceq̇aṭun".
Faraonen Iosifa pine: "Isä ki vi bava q̇a vičimux vi ṭo͑ġo͑lṭun köčṗi hare,
mo Misiri oćal, mo vä͑n! Taša vi q̇oomxo ičoġoy heyvanxo otarišbseynaḳ än šaaṭ ga manunesa, haṭiya arcesṭa. Barta taci Gošen oćala arceq̇aṭun. Saal ibaka ḳäz nex: ičoġoy bošṭan izi äšlä šaaṭ avabakalorox manunesa, šoṭoġoxun č̣äḳṗa, taci bezi sürüġoval be͑ġeq̇aṭun".
Oša Iosifen izi bavane ečeri faraoni ṭo͑ġo͑l, Iaḳovenal faraoni be͑ś bul ḳoc̣ṗi "xeyirq̇an baki" pine.
Faraonen Iaḳovaxun xavare haq̇i: "Hema yäšvax bu?"
Iaḳovenal qaybaki metäre pi: "Sabać otuz yäšzax bu, šoṭay gele payal čätinluġ q̇a q̇äribluġ zapsunen č̣ovakesṭuna hesabbayin mo hiḳḳal tene. Bezi bavoġoy yäšä hari ṗaṗitez hälä".
Hame exläte baki, Iaḳoven ṗurumal faraoni be͑ś bul ḳoc̣ṗi sarayaxun č̣ere.
Iosifen faraonen ämirbi ḳinäḳäl bine, tašeri izi bava q̇a vičimoġo Misiri Ramses uḳala bölginä än šaaṭ ganxo manunesa šoṭoġo tadi, haṭiyal arceveḳi.
Iosifen izi bava, vičimoġo, bavaxun sagala hari šu bunesa, bitoṭu ukunal tanedi. Härṭin izi külfäti boš bakala amdari saya görä ukune haq̇i.
Busaluġen isä taysun gelene haq̇layinšbsay, sal sa galal arum tene buy. Misir q̇a Känan oćal ṭe ġinaxey ki, amdarxon ičoġoy ukala śuma teṭun bä͑ġä͑bsay.
Ene šuḳḳali kiyel tängäl tene buy, bitova Iosifaxun arum haq̇i čarḳesṭeṭuniy. Iosifen isä amdarxo arum toydi girbi me tängoġo bitova tašeri faraoni xäzninäne laxsay.
Misirä q̇a Känan oćala ene tängä uḳala šey nu mandaṭan misirluyox gireci Iosifi ṭo͑ġo͑l hari piṭun: "Yax arum tada! Atenksa busa ḳac̣yansa? Ene tängäl teyax bu ki, haq̇ayan".
Ṭe vädä Iosifen metäre pi: "Tängä čarḳiyal bakayin, efi sürüġo heyvan ki bune? Šoṭoġo ečanan miya, zuval vä͑x izi gala arum tadoz".
Amdarxonal burṭunqi ičoġoy heyvanxo ečeri izi gala arum exsṭa. E͑k, eġel, beli, keči, elem -- ḳoya ḳä heyvan bune haq̇i eṭunsay. Hametär, amdarxon ṭe usenal č̣ovakesṭundi, Iosifen šoṭoġoy ečala heyvanxoy gala arum tadi šoṭoġo busa tene efi.
Sa usen hametär č̣ovaneki, oša amdarxo ṗurum hayzeri harṭun Iosifi ṭo͑ġo͑l. Šoṭoġon piṭun: "Vaxun ḳä č̣aṗṗen, beši aġa, hunal avanu ki, nä tängä teyax bu, isä ene heyvanal teyax bu. Beši bakalṭu va tadi izi gala arumyan haq̇e. Isä mone, häysä va arumi gala tades bakala sayǯä oćalxoyax bu saal beši q̇ari elmux.
Heṭu görä busa ḳac̣eġen? Heṭu göräq̇an beši oćalxo äfčibaki taci? Exṭa beši oćalxo viq̇an baki, yanal izi gala vi loxol sa tapan śumal äšṗen. Barta vi yax tadala arumi gala faraoneynaḳ ḳul baken, beši oćalxoval ene iziq̇an baki. Sayǯä beši cilluġ aruma kammaba ki, nä yan busa ma manden, nääl beši oćalxo xam ganu maq̇an č̣ureci".
Iosifen haketäräl bine, Misirä bakala oćalxoy bitova haq̇i faraoni oćale bi. Busaluġen amdarxo ṭe ġinane badey ki, izi oćala Iosifa nu toydi amdar tene mandi Misirä. Hametär, oćalxoy bito baneki faraoni,
ölkinä bakala amdarxoval, me belxun ṭe bel šu bune bito, baneki faraoni ḳulurxo.
Iosifen sayǯä be͑yinśxoy oćalxo exṭes tene baki, faraonen šoṭoġoy paya kamtenebsay pi busa teṭun mansṭay. Faraoni xäzninäxun eġala tänginen yaq̇axṭun taysay, šoṭo göräl ṭeṭun toydi ičoġoy oćalxo Iosifa.
Iosifen amdarxo metäre pi: "Mone, efi oćalxo haq̇i faraonaz tadi, vä͑xal šoṭay ḳulez bi. Sa tapan śumal äšṗalnan vä͑n meyin oša. Exṭanan me cilluġ aruma, tašanan biṭanan.
Exṗala vädine arumi qo paye sunṭu faraona tadalnan, mandiyo isä efi bakale. Ṭeṭiin ham cilluġnan exṭon, hamal efi äyloġoy q̇a külfäti źomonan girbon".
Amdarxonal qaybaki Iosifa metärṭun pi: "Beši piin loxol gavax bu, beši aġa! Metär bi vi piyes šaaṭ aḳeġalyansa, yan faraoneynaḳ ḳul baksuna iräziyan, beši elmoġon čarḳesṭi hun!"
Iosifi laxi me ḳanun Misirä häysääl äšesa: exṗi arumi qo paye sunṭu faraonaṭun tasṭa. Be͑yinśxon isä ičoġoy oćalxo faraona teṭun toydey pi šoṭoġoynaḳ me ḳanun butene.
Hametär, Israilaxun töräyinšakiyorox Misirä, Iosifen ičoġo arcesṭi Gošen uḳala oćalaṭun yäšäyinšbsa burqi. Šoṭoġon miya tum saki avuzṭunbaki, ičoġoy sayal taysun gelenebaksay.
Iaḳoven Misirä vu͑ġec̣c̣e usene yäšäyinši, biyaṭanal izi sabać q̇ərx vu͑ġ yäše buy.
Hari lap q̇ožabaki vädine šoṭin Iosifa izi ṭo͑ġo͑l ḳalpi pine: "Ägär bezi xätirä čurensasa, vi kula bezi č̣ile loxol laxi za äyit tada: elasṗa ki, bezi häysä va uḳalṭoġo balnu. Zaxun vi šaaṭluġa kammaba -- za me Misiri ḳulnu ma oćalaxṗa!
Bezi pula q̇ič̣ṗi ṭe dünyäne taġaṭan za taša bezi bavoox oćalaxeci gala oćalaxṗa, za miya ma efa". Iosifenal qaybaki "arxayin baka, vi pi ḳinäḳ booz" pine. *
Ama Iaḳoven saal pine: "Elasṗa!" Iosifen elasepi, Iaḳovenal haṭe izi
