TITUS
Biblia Udica, Versio Nizhensis: Vetus Testamentum
Part No. 46
Previous part

Chapter: 46 


Iaḳovi Misirä köčṗi taysun
İak'ovi Misirə köçp'i taysun


Verse: 1  Link to rar   Israilen izi ḳä bunesa bitova girbi yaq̇ane bafṭi, hariyal Beer-Ševina ṗaṗi miya izi bava Isaaḳen bul ḳoc̣ṗala Buxaʒ́uġoynaḳ q̇urbanxone śampi.
   İsrailen izi k'ə bunesa bitova girbi yaq'ane baft'i, hariyal Beer-Şevina p'ap'i miya izi bava İsaak'en bul k'os'p'ala Buxačuğoynak' q'urbanxone šampi.

Verse: 2  Link to rar   Buxaʒ́uġon isä üše šoṭay neṗe boš baci pine: "Iaḳov! Iaḳov!" Iaḳovenal qaybaki "izbaksa" pine.
   Buxačuğon isə üşe şot'ay nep'e boş baśi pine: «İak'ov! İak'ov!» İak'ovenal qaybaki "izbaksa" pine.

Verse: 3  Link to rar   Oša Buxaʒ́uġon metäre pi: "Zu Buxaʒ́uxzu, vi bavayal bul ḳoc̣ṗi Buxaʒ́ux. Q̣ə͑maba, arxayin taki Misirä, Zu ṭetär booz ki, vaxun kala sa azuḳ töräyinšakale ṭiya.
   Oşa Buxačuğon metəre pi: «Zu Buxačuxzu, vi bavayal bul k'os'p'i Buxačux. Q'ǐmaba, arxayin taki Misirə, Zu t'etər booz ki, vaxun kala sa azuk' törəyinşakale t'iya.

Verse: 4  Link to rar   Zu vaxun bakoz: va ṭiya tašoz, oša Bezi kiinal qaydi č̣evḳoz ṭeṭiin vaxun töräyinšakiṭoġo. Vi ṭo͑ġo͑l bakale Iosif hun vi pula q̇ič̣ṗi ṭe dünyäne taġaṭan".
   Zu vaxun bakoz: va t'iya taşoz, oşa Bezi kiinal qaydi c'evk'oz t'et'iin vaxun törəyinşakit'oğo. Vi t'ǒğǒl bakale İosif hun vi pula q'ic'p'i t'e dünyəne tağat'an».

Verse: 5  Link to rar   Moṭoxun oša Iaḳov arxayin baki ṗurum yaq̇ane bafṭi. Israili ġarmoġon ičoġoy bava saal äyloġo q̇a čupuxxo faraonen yaq̇abi araboġo arcesṭiṭun tašṭay,
   Mot'oxun oşa İak'ov arxayin baki p'urum yaq'ane baft'i. İsraili ğarmoğon içoğoy bava saal əyloğo q'a çupuxxo faraonen yaq'abi araboğo arśest'it'un taşt'ay,

Verse: 6  Link to rar   ičan isä heyvanxoṭun č̣idi tašṭay. Hametär, Iaḳoven izi külfätäl, Känan oćala q̇azayinši girbiṭoġoval bitova exṭi Misiräne köčṗi.
   içan isə heyvanxot'un c'idi taşt'ay. Hametər, İak'oven izi külfətəl, Kənan oç̌ala q'azayinşi girbit'oğoval bitova ext'i Misirəne köçp'i.


Iaḳovaxun sagala Misirä hariyorox
İak'ovaxun sagala Misirə hariyorox


Verse: 7  Link to rar   Iaḳoven izi ġarmoġo q̇a ġar nävoġo, xuyärmoġo q̇a xuyär nävoġo -- izi ǯənsaxun bakalṭoġoy bitova exṭine köčṗey Misirä.
   İak'oven izi ğarmoğo q'a ğar nəvoğo, xuyərmoğo q'a xuyər nəvoğo -- izi cınsaxun bakalt'oğoy bitova ext'ine köçp'ey Misirə.

Verse: 8  Link to rar   Moval Iaḳovaxun bakiṭoġoy, Misirä köčṗi, ošal israilluyox uḳala azuḳi ämälä eysuna bulbiṭoġoy siyäyi. Iaḳov ičal me siyäyin boše.
   Moval İak'ovaxun bakit'oğoy, Misirə köçp'i, oşal israilluyox uk'ala azuk'i əmələ eysuna bulbit'oğoy siyəyi. İak'ov içal me siyəyin boşe.
   Iaḳovi kala ġar Ruvenaxun burqen.
   İak'ovi kala ğar Ruvenaxun burqen.

Verse: 9  Link to rar   Ruveni ġarmux: Xanoḳ, P̣allu, Xecron saal Ḳarmi.
   Ruveni ğarmux: Xanok', P'allu, Xeśron saal K'armi.

Verse: 10  Link to rar   Simeoni ġarmux: Yemuel, Yamin, Oxad, Yaḳin, Sohar saal känanlu čuġoxun baki Šaul.
   Simeoni ğarmux: Yemuel, Yamin, Oxad, Yak'in, Sohar saal kənanlu çuğoxun baki Şaul.

Verse: 11  Link to rar   Levin ġarmux: Geršon, Ḳohaṭ saal Merari.
   Levin ğarmux: Gerşon, K'ohat' saal Merari.

Verse: 12  Link to rar   Iuday ġarmux: Er, Onan, Šela, P̣erec saal Cerax. Er q̇a Onan hälä Känan oćala bakaṭan ṗureṭuniy. * P̣ereci isä ṗä͑ ġare buy: Xecron q̇a Xamul.
   İuday ğarmux: Er, Onan, Şela, P'ereś saal Śerax. Er q'a Onan hələ Kənan oç̌ala bakat'an p'uret'uniy. * P'ereśi isə p'ə̌ ğare buy: Xeśron q'a Xamul.

Verse: 13  Link to rar   Issaḳari ġarmux: Ṭola, P̣uva, Yov saal Šimron.
   İssak'ari ğarmux: T'ola, P'uva, Yov saal Şimron.

Verse: 14  Link to rar   Zevuluni ġarmux: Sered, Elon saal Yaxleel.
   Zevuluni ğarmux: Sered, Elon saal Yaxleel.

Verse: 15  Link to rar   Morox Iaḳovi Leaxun baki ġarmoġoxun töräyinšakiyoroxey. Lean me ġarmoġo q̇a Dina uḳala xuyärä P̣addan-Arama bakaṭane ečerey. Iaḳovi me ġarmoġo q̇a ičoġoxun töräyinšakiṭoġo bitova sagala exṭaṭan otuz xib tane bsay.
   Morox İak'ovi Leaxun baki ğarmoğoxun törəyinşakiyoroxey. Lean me ğarmoğo q'a Dina uk'ala xuyərə P'addan-Arama bakat'ane eçerey. İak'ovi me ğarmoğo q'a içoğoxun törəyinşakit'oğo bitova sagala ext'at'an otuz xib tane bsay.

Verse: 16  Link to rar   Gade ġarmux: Cifyon, Haggi, Šuni, Ecbon, Eri, Arodi saal Areli.
   Gade ğarmux: Śifyon, Haggi, Şuni, Eśbon, Eri, Arodi saal Areli.

Verse: 17  Link to rar   Ašeri ġarmux: Imna, Išva, Išvi, Beria saal ičoġoy xunči Serah. Beriay ġarmux: Xever q̇a Malḳiel.
   Aşeri ğarmux: İmna, İşva, İşvi, Beria saal içoğoy xunçi Serah. Beriay ğarmux: Xever q'a Malk'iel.

Verse: 18  Link to rar   Morox Iaḳovi Zilṗaxun, Lavanen izi xuyär Leay bać̣anexun tadi nökäräxun baki ġarmoġoxun töräyinšakiyoroxey. Iaḳovi me ġarmoġo q̇a ičoġoxun töräyinšakiṭoġo bitova sagala exṭaṭan u͑qe͑c̣c̣e tane bsay.
   Morox İak'ovi Zilp'axun, Lavanen izi xuyər Leay bač'anexun tadi nökərəxun baki ğarmoğoxun törəyinşakiyoroxey. İak'ovi me ğarmoğo q'a içoğoxun törəyinşakit'oğo bitova sagala ext'at'an ǔqěs's'e tane bsay.

Verse: 19  Link to rar   Iaḳovi Raxiläxun baki ġarmoġoy c̣i Iosif q̇a Binyaminey.
   İak'ovi Raxiləxun baki ğarmoğoy s'i İosif q'a Binyaminey.

Verse: 20  Link to rar   Iosif Misirä bakaṭan On šähäri be͑yinś P̣oṭiferani xuyär Asenaṭen šoṭaynaḳ ṗä͑ ġare ečeri: Menašše saal Efraim. *
   İosif Misirə bakat'an On şəhəri běyinš P'ot'iferani xuyər Asenat'en şot'aynak' p'ə̌ ğare eçeri: Menaşşe saal Efraim. *

Verse: 21  Link to rar   Binyamini ġarmux: Bela, Beḳer, Ašbel, Gera, Naaman, Exi, Roš, Muṗṗim, Xuṗṗim saal Ard.
   Binyamini ğarmux: Bela, Bek'er, Aşbel, Gera, Naaman, Exi, Roş, Mup'p'im, Xup'p'im saal Ard.

Verse: 22  Link to rar   Morox Iaḳovi Raxiläxun baki ġarmoġoxun töräyinšakiyoroxey. Iaḳovi me ġarmoġo q̇a ičoġoxun töräyinšakiṭoġo bitova sagala exṭaṭan biṗec̣c̣e tane bsay.
   Morox İak'ovi Raxiləxun baki ğarmoğoxun törəyinşakiyoroxey. İak'ovi me ğarmoğo q'a içoğoxun törəyinşakit'oğo bitova sagala ext'at'an bip'es's'e tane bsay.

Verse: 23  Link to rar   Dane sa ġare buy, iz c̣i Xušim.
   Dane sa ğare buy, iz s'i Xuşim.

Verse: 24  Link to rar   Nafṭalini ġarmux: Yaxceel, Guni, Yecer, Šillem.
   Naft'alini ğarmux: Yaxśeel, Guni, Yeśer, Şillem.

Verse: 25  Link to rar   Morox Iaḳovi Bilhaxun, Lavanen izi xuyär Raxiläy bać̣anexun tadi nökäräxun baki ġarmoġoxun töräyinšakiyoroxey. Iaḳovi me ġarmoġo q̇a ičoġoxun töräyinšakiṭoġo bitova sagala exṭaṭan vu͑ġ tane bsay.
   Morox İak'ovi Bilhaxun, Lavanen izi xuyər Raxiləy bač'anexun tadi nökərəxun baki ğarmoğoxun törəyinşakiyoroxey. İak'ovi me ğarmoğo q'a içoğoxun törəyinşakit'oğo bitova sagala ext'at'an vǔğ tane bsay.

Verse: 26  Link to rar   Binxoxun ǯöy, Iaḳovaxun sagala Misirä hari ġarmoġoy q̇a šoṭoġoxun töräyinšakiṭoġoy say bito sagala altməš u͑q taney.
   Binxoxun cöy, İak'ovaxun sagala Misirə hari ğarmoğoy q'a şot'oğoxun törəyinşakit'oğoy say bito sagala altmış ǔq taney.

Verse: 27  Link to rar   Iosifi Misirä baki ṗä͑ ġaral exṭaṭan Iaḳovaxun töräyinšakiṭoġoy say bito sagala yetmiš tane bsay. Mo Iaḳovaxun sagala Misirä köčṗi hariṭoġoy sayey. *
   İosifi Misirə baki p'ə̌ ğaral ext'at'an İak'ovaxun törəyinşakit'oğoy say bito sagala yetmiş tane bsay. Mo İak'ovaxun sagala Misirə köçp'i harit'oğoy sayey. *


Iaḳovi hari Misirä č̣eysun
İak'ovi hari Misirə c'eysun


Verse: 28  Link to rar   Hametär, Iaḳoven izi ḳä bunesa girbi Känan oćalaxun č̣ere, hariyal Misirä ṗaṗala vädine Iuda be͑ś yaq̇anebi ki, taci Iosifaxun Gošen uḳala ganu taġala yaq̇a avabakeq̇an. Šorox hari Gošena ṗaṭunṗi,
   Hametər, İak'oven izi k'ə bunesa girbi Kənan oç̌alaxun c'ere, hariyal Misirə p'ap'ala vədine İuda běš yaq'anebi ki, taśi İosifaxun Goşen uk'ala ganu tağala yaq'a avabakeq'an. Şorox hari Goşena p'at'unp'i,

Verse: 29  Link to rar   Iosifenal moṭo avabakala ḳinäḳ izi arabina e͑ka ġaćṗesṭi ičal ṭiya taneci ki, izi bavay be͑ś č̣eġale. Hariyal izi bava Israila aḳaṭan šoṭo boxoy q̇užbi bureqi o͑nepsa.
   İosifenal mot'o avabakala k'inək' izi arabina ěka ğaç̌p'est'i içal t'iya taneśi ki, izi bavay běš c'eğale. Hariyal izi bava İsraila ak'at'an şot'o boxoy q'ujbi bureqi ǒnepsa.

Verse: 30  Link to rar   Ṭe vädä Israilen metäre pi: "Häysä va dirisṭ azḳi -- mo za bäse, ene za ḳulen exedon".
   T'e vədə İsrailen metəre pi: «Həysə va dirist' azk'i -- mo za bəse, ene za k'ulen exedon».

Verse: 31  Link to rar   Oša Iosifen izi vičimoġo q̇a bavaxun sagala hariṭoġo bitova pine: "Häysä faraoni ṭo͑ġo͑l taġoz, taci šoṭo uḳoz ki, bezi bavan izi külfätäl girbi Känan oćalaxun miya, bezi ṭo͑ġo͑le hare.
   Oşa İosifen izi viçimoğo q'a bavaxun sagala harit'oğo bitova pine: «Həysə faraoni t'ǒğǒl tağoz, taśi şot'o uk'oz ki, bezi bavan izi külfətəl girbi Kənan oç̌alaxun miya, bezi t'ǒğǒle hare.

Verse: 32  Link to rar   Šoṭo efi heyvan be͑ġsuna, efi sürüġo q̇a ḳä buvä͑xsa bitova exṭi eysunal uḳoz.
   Şot'o efi heyvan běğsuna, efi sürüğo q'a k'ə buvə̌xsa bitova ext'i eysunal uk'oz.

Verse: 33  Link to rar   Faraonenal vä͑x izi ṭo͑ġo͑l ḳalpi "efi äšlin c̣i hiḳä" pi xavar haq̇aṭan
   Faraonenal və̌x izi t'ǒğǒl k'alpi "efi əşlin s'i hik'ə" pi xavar haq'at'an

Verse: 34  Link to rar   upanan heyvanyan be͑ġsa. Šoṭo metär upanan: "Yan, me vi ḳulurxon, beši pula qaypeyan ki, heyvanyan be͑ġsa, mo hälä beši bavoġoy dööräxun metäre bake, häysääl haketäre". Metär uḳaynan, vä͑x hame Gošen oćalal arcevḳale, šoṭo görä ki, misirluġoynaḳ heyvan be͑ġalxo ə͑śa bisṭun ičoġoy kul murdar sa šeya lafsṭun ḳinäḳe hesabbaksa".
   upanan heyvanyan běğsa. Şot'o metər upanan: "Yan, me vi k'ulurxon, beşi pula qaypeyan ki, heyvanyan běğsa, mo hələ beşi bavoğoy döörəxun metəre bake, həysəəl haketəre". Metər uk'aynan, və̌x hame Goşen oç̌alal arśevk'ale, şot'o görə ki, misirluğoynak' heyvan běğalxo ı̌ša bist'un içoğoy kul murdar sa şeya lafst'un k'inək'e hesabbaksa».
Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.