Iosifen be͑neġi ki, ene iču efes tene baksa, haraypi bito nökärxo č̣eveḳi otaġaxun. Šoṭin izi šu baksuna vičimoġo uḳaṭan šoṭoġoy ṭo͑ġo͑l ičoġoxun q̇eräz šuḳḳal tene buy.
Ama Iosifen ṭetäre hönkür-hönkür o͑nepi ki, bitoṭin inebaki šoṭay o͑neni säsä, lap faraoni sarayal šoṭay o͑nenaxunṭun äyitey.
Iosifen izi vičimoġo "zu Iosifzu! Hetäre bezi bava häysä?" uḳaṭan šorox haq̇eci manṭundi, ičoġoy źomo ä͑mbi äyit pes teṭun baksay.
Ṭe vädä Iosifen saal äyitpsa burqi pine: "Sa bezi ṭo͑ġo͑l ə͑śa ekinan". Vičimuxal šoṭo ə͑śalayinšakaṭan Iosifen pine: "Mone, efi viči Iosifzu zu, efi tänginen toydi Misirä yaq̇abi Iosif!
Ama pis ma bakanan za toysṭuna görä, moṭo vä͑ynaḳ därd ma banan. Buxaʒ́uġoy äšey mo, Šoṭine za vä͑xun be͑ś miya yaq̇abi ki, amdarxo busaluġaxun čarḳesṭaz.
P̣ä͑ usene ki, busaluġen haq̇layinšene tanesa bito ganu, hälä qo usenal me oćalxo nä ezteneġal, nä exteneġal.
Ama Buxaʒ́uġon za vä͑xun be͑ś yaq̇anebi ki, efi tum maq̇an äfčibaki me oćali ćoyexun, za yaq̇absunasṭane aḳi Šoṭin efi čarḳesuna.
Efi tää, Buxaʒ́uġoy äše za miya yaq̇absun! Šoṭine za ečeri faraoni yön kul bi, me ölkin padčaġi ḳožin kaloz baki zu, bezi äyite č̣ovaksa me oćala.
Isä ibakanan ḳäz nex: takinan bezi bava upanan ki, Iosifen nexe Buxaʒ́uġon za dirisṭ Misiri kalone be. Upanan ičal hayzeri usum bezi ṭo͑ġo͑lq̇an hari,
miya Gošen uḳala oćala, za ə͑śa yäšäyinšale. Ičal, izi äyluxal, izi nävooxal, izi sürünä bakala heyvanxo, izi ḳä bunesa bitova exṭi hareq̇an miya.
Šoṭo ṭetär be͑ġoz ki, nä ičin, nä izi külfäten hiḳḳalaxun koruġ tene zaṗḳal, izi sürünä bakala heyvanxoy q̇a izi ṭo͑ġo͑l bakala amdarxoyal boššamin ukun bakale. Tene, gele čätinluġ aḳalṭun, šoṭo görä ki, me busaluġen hälä qo usenal zaṗḳale.
Ananksa za? Anksa za, Binyamin? Zuzu mo, ay viči, Iosife vä͑x häysä me äyitmoġo uḳalo!
Isä takinan miya aḳiṭoġo q̇a bakiṭoġo bitova bava upanan, barta avabakeq̇an Misirä bezi hetär sa c̣iye q̇onʒ́ux baksuna, haq̇anan ekinan bezi bava miya".
Oša Iosifen izi viči Binyamina q̇užbi bureqi o͑nepsa, Binyaminenal šoṭone q̇užbi o͑neney.
Iosifen vičimoġoy bitova q̇užbi mučepi, šoṭin izi piin neġa efes tene baksay. Vičimoġoyal muze qayeci, arci burṭunqi Iosifaxun exlätpsa.
Iosifi vičimoġoy eysuni xavar taci faraoni sarayal ṗaneṗi, faraonen q̇a izi sarayi amdarxonal moṭo pis teṭun be͑ġi.
Faraonen Iosifa pine: "Vi vičimoġo upa ki, heyvanxoval yükläyinši Känan oćalaq̇aṭun taci,
barta taci vi baval, ičoġoy külfätäl haq̇i hareq̇aṭun miya. Misirä än bäräkätlu, heyvanxo otarišbseynaḳ än šaaṭ oćalxo manunesa, šoṭoġoy bakale, hiḳḳalaxunal koruġ teṭun zaṗḳal.
Šoṭoġo upa ičoġoxun memiin elemxon č̣idi tašala arabooxal tašereq̇aṭun ki, eġaṭan čupuxxo q̇a äyloġo ešṭun hasandq̇an baki. Ämirba taci vi bava haq̇i hareq̇aṭun.
Eġaṭan ičoġoy pul qoš maq̇an mandi, Misiri oćalen tades bakalṭoġoy än šaaṭo manunesa, ičoġoy bakale".
Israili ġarmoġonal ičoġo pi ḳinäḳ biṭun. Iosifen faraoni äyitäxun nu č̣eri izi vičimoġo arabooxe tadi, yaq̇eynaḳ śume laxi.
Šoṭin härṭu sa q̇at paltaral tanedi, Binyamini paya isä avuzbi qo q̇ate bi, hälä izi loxolxun xibbać dänä gümüši tängäl lanexi.
Iosifen bavaynaḳal payure yaq̇abi: vic̣ dänä ärkäy elemi loxol Misiri oćalen tadala än šaaṭ neymätxoxune lapi, vic̣ dänä diši elemi loxol isä arum, mu saal qaybakaṭan yaq̇a q̇eräz ḳä lazəmesa šoṭoġo.
Oša vičimoġo "isä takinan, vä͑xal yaq̇a be͑ġanan" pi yaq̇anebadi.
Hametär, vičimux Misiräxun č̣erṭun, hariyal Känan oćala, ičoġoy bava Iaḳovi ṭo͑ġo͑l ṗaṗi
bitova šoṭaynaḳ exlätṭunbi. Šoṭoġon "Iosif dirisṭe, Misiri kalone bake šo!" uḳaṭan Iaḳovi male mandi üḳ čurḳane, ve͑bakes tene baksay moṭo.
Ama ġarmoġoy źomoxun Iosifi piṭoġo bitova ibaki, šoṭay iču tašṭeynaḳ yaq̇abi araboġo izi piin aḳaṭan Iaḳovi üḳe qayeci.
Ṭe vädä metäre pi Israilen: "Bäsebaki za bezi ibakiyorox q̇a aḳiyorox! Dirisṭe bezi ġar, tene ṗure bezi Iosif! Ekinan taġen, häläki bezi elmux bezi boše, taci aḳoz bezi ġara".
