Iosifen izi ḳožin äšurxo tašala nökärä pine: "Me amdarxoy xaralxo ičoġoy tašes bakala hama arumen buyba, ćoyexunal ičoġoy ečeri gümüši tängoġo qayda laxa.
Mic̣iḳ vičey xarali boš isä izi ečeri gümüši tängoġoxun ǯöy bezi gümüši ǯamal laxa". Nökärenal Iosifen pi ḳinäḳ bine.
Savaxṭan išiġ bitala ḳinäḳ vičimoġo ičoġoy elemxoval tadi tärṭunbi ki, taceq̇aṭun.
Ama šorox hälä täzä šähärexunṭun č̣erey, Iosifen izi äšurxo tašala nökärä metär pi yaq̇anebi: "Hayza usum bafṭa šoṭoġoy bać̣anexun, ṗaṗala ḳinäḳäl upa ki, heṭu göränan vä͑ynaḳ bi šaaṭluġa ćaxćuxṗi?
Bezi aġay ǯama heṭu göränan bašq̇i tašṭa? Izi u͑ġä͑lä ǯamey ko, hamal fale be͑ġsay koṭay boš! Sal šaaṭ äš tenan biq̇i vä͑n!"
Iosifi nökärenal taci šoṭoġo ṗaṗi izi aġay tapšurbiṭoġo uḳaṭan
vičimoġon qaybaki iču metärṭun pi: "Ko hetär äyite nexnu, beši aġa?! Sal ketär äš biṭunq̇on me vi ḳulurxon?
Yan beši xaralxoy boš bä͑ġä͑bi gümüši tängoġo exsṭuna yax ṗaq̇esṭes teyan bake, šoṭoġo qaydi Känan oćalaxun eyančere vaynaḳ! Isä heṭu göräq̇an beši pul vi aġay q̇əzəli q̇a gümüši loxol baki?
Beši bošṭan sunṭay kiyel vi uḳala ṭe ǯama bä͑ġä͑bayvax, sal mandimaq̇an šo! Äfčiyan nexesa, barta yanal beši aġaynaḳ ḳul baken!"
Nökären pine: "Baneki, barta efi uḳala ḳinäḳq̇an baki. Ama ǯama ši kiyel bä͑ġä͑bayiz, šoṭo zaynaḳ ḳul booz, mandiṭoġoxun bezi äš butene".
Vičimoġon ečeri kap ičoġoy xaralxo civḳi šoṭoġoy źomo qayṭunpi,
Iosifi nökärenal bureqi bitoṭay xaralxo soġo-soġo be͑ġsa. Šoṭin kalaṭuxun burqi mic̣iḳṭul ciriḳ bitoṭay xaralxo be͑neġi, ǯamal hari Binyamini xarali bošṭane č̣eri.
Vičimoġoy bel źe͑ne biti moṭo aḳaṭan, ičoġoy loxol bakala paltaraṭun zəġzəġbi šoṭoġon därde kiyexun, xaralxo elemxoy loxol lapiyal šähäreṭun qaybakala baki.
Iosif hälä ḳoyaney Iudan izi vičimoġoval exṭi šoṭay ṭo͑ġo͑l eġaṭan. Vičimux baci šoṭay turin oq̇a biṭunti,
Iosifen isä metäre pi: "Vä͑n äšlä biq̇aṭan fikirnanbsa sal ḳäyan bsa mo, ši ǯamayan bašq̇sa? Fala be͑ġi här šeya avabakala amdarzu zu, mo č̣aṗ mandaley zaxun?!"
Iudan pine: "Ḳä uḳaz, bezi aġa, äyitäl tez bä͑ġä͑bsa. Ḳä pi yax tämizä č̣evḳaz? Aneḳi Buxaʒ́uġon beši biq̇i äšurxo, isääl hari č̣enesa beši be͑ś. Vi ḳulyan yan meyin ṭaġay -- yanal, vi ǯam ši kiyel bä͑ġä͑yecene šoval".
Iudan metär uḳaṭan Iosifen pine: "Lazəm tene baksa! Vä͑x bitova miya efala fikir tezax bu! Bezi ǯam ši kiyel bä͑ġä͑yecenesa, šoṭo bezi ḳul booz, mandiṭoġo isä tärezbsa, č̣ekinan arxayin takinan efi bavay ṭo͑ġo͑l".
Ṭe vädä Iudan Iosifa ə͑śalayinšaki pine: "Vi äǯuġon nu biq̇ayin me vi ḳulen sa äyite uḳon, bezi aġa, axəri faraoni be͑ś čurpi ḳinäḳzu häysä zu.
Vi eyexe bakon, bezi aġa, yaxun xavaren haq̇i ki, efi bava nääl q̇eräzäl sa viči buvä͑x?!
Yanal piyan, q̇oža sa bavayax bu saal sa mic̣iḳ viči. Piyan beši bava q̇ožabakiṭuxun oša baki äyele šo, bavanal izi piin išiġ ḳinäḳe be͑ġsa šoṭo. Me äyel beši ṗuri vičey nanan ečeri äyel baksunal piyan, me ṗä͑ ġaraxun q̇eräz äyel tene bakey šoṭay.
Hunal yax qaybaki pinu ki, efi ṭe vičä bezi ṭo͑ġo͑l ečanan šoṭo bezi piin aḳaz.
Yanal va piyan ki, beši aġa, bavaxun ǯöybes bateyankon beši ṭe vičä, biyone šo izi mic̣iḳ ġara izi ṭo͑ġo͑lxun tärbayin.
Ama hun ten ǯügübaki, me vi ḳulurxo pinu ki, efi vičä nu ečaynan ma aḳeynan bezi piyes.
Yanal, bezi aġa, ḳoya taciṭuxun oša vi piṭoġoy bitova ṗaṗesyanbi vi ḳul bakala beši bava.
Oša sa ġi, beši bavan ukaṭan ki, takinan ṗurum arum haq̇i ečanan,
piyan mic̣iḳ vičä yaxun nu tašayan, ṭiya beš äš tene bu. Yax ṭe amdaren pene ki, efi vičä nu ečaynan, bezi piyes ma aḳeynan.
Ṭe vädä vi ḳul bakala beši bavan metäre pi: "Bakalo ṗä͑ ġarzax bu bezi Raxiläxun,
šoṭayal soġo ṗurene. Ä͑qnä heyvanxoynaḳ yeme baki pi, šoṭoxun oša bezi ġare ćoya tez aḳi zu.
Isääl nexnan, moṭoval tada tašalyan. Bezi me ġaral ḳänesa bakayin ḳäz bon zu? Ene upanan tašeri oćalaxyanpsa va, me yäšṭä ke därdä portṗala üḳ tezax bu bezi!"
Isä hun upa, zu me äyitmoġoxun oša hetärez be͑ġon bezi bavay ćoyel Binyamina miya efi taġayiz? Vi ḳul bakala beši bavay piin išiġe izi mic̣iḳ ġar,
aḳayin ki, šoṭo efiyan hare -- biyale. Nexnu tašen beši kiin laxen šoṭo ḳule oq̇a? Q̣ožabakene vi ḳul bakala beši bava, tene portṗal šo ke därdä.
Zuz exṭey bezi mic̣iḳ vičä qaydi bavay ṭo͑ġo͑l ešṭuna bezi ozane. Me vi ḳulen äyite tade izi bava, pezu vi ġare mux ḳoribakayin ćomä͑yinq̇uzbaki zu vi be͑ś bezi ömüri axəral ciriḳ.
Häysä šoṭo göräz vi ṭo͑ġo͑l źomo ä͑mbsa, bezi aġa! Va xoyinśezbsa, barta bezi mic̣iḳ vičey gala zu čurḳaz memiya, tärba šoṭo taceq̇an izi vičimoġoxun ḳoya.
Axəri mani ćoyenez qaybakon zu bavay ṭo͑ġo͑l bezi mic̣iḳ vičä miya efi?! Buxaʒ́uġon maq̇an aḳesṭi za bezi bavay pis ġina!"
