Busaluġen isä taysun gelene haq̇layinšbsay Känan oćala.
Vičimoġon Misiräxun ečeri arumal čareḳi, ṭe vädä Iaḳoven izi ġarmoġo pine: "Takinan samalal arum haq̇i ečanan Misiräxun".
Ama Iudan qaybaki izi bava metäre pi: "Ṭe amdaren yax qay pine ki, efi mic̣iḳ vičä nu ečaynan, bezi piyes ma aḳeynan.
Beši vičä yaxun yaq̇anbsasa, yanal taġen vi uḳalṭu bi arum haq̇en eġen.
Ama tää, "tez yaq̇absa" nexnusa, ṭe vädä beši äš tene bu ṭiya. Amdaren yax qay pine ki, efi vičä nu ečaynan bezi piyes aḳmayekinan".
Ṭe vädä Israilen pine: "Mani haq̇əlennan taci ṭe amdara nex ki, ḳoya sa vičiyal buyax? Bezi bula bälinänan badi čurpi gala!"
Ama ġarmoġon qaybaki ičoġoy bava metärṭun pi: "Ṭe amdaren ičine burqi yaxun bitova xavar haq̇i avabaksa: šuyax bu, hema äyelyan, be͑yn beši bava dirisṭe, ṗurene... Ičin xavare haq̇say, yanal ǯoġabyan tasṭay, ḳäyan avay ki, moṭin "efi vičäl miya ečanan" uḳale?!"
Oša Iudan saal äyitpsa burqi izi bava Israila pine: "Äylä zaxun tärba, č̣eġen taġen. Tene hunal, yanal, beši äyluxal -- bito busa ḳac̣eġalyan.
Šoṭo qaydi vi ṭo͑ġo͑l ešṭun zaluġe -- Binyamini mux tene ḳoribakal, va äyitez tasṭa. Šoṭo ḳänesa bakayin hari za unḳon me äyitmoġo, ćomä͑yinq̇uzbaki zu bezi ömüri axəral ciriḳ ägär va tadi äyiti loxol nu čurḳayiz.
Nu boxoybiynuy, isä ṗä͑ käräm taci hareyaniy!"
Ṭe vädä Israilen izi ġarmoġo pine: "Äš ki me galane, barta efi uḳaloq̇an baki. Ṭe vädä ekinan metär ben, me oćalen tadala baraxun girbanan bapanan efi xaralxoy boš, än šaaṭorox manunesa šoṭoġoxun: šaaṭ adeġala č̣äyin, uć̣, adeġala oyur q̇a mät, ereq̇ q̇a badam. Moṭoġo bitova ṭe amdareynaḳ pay tašanan.
Gümüšäxun isä ṗä͑ q̇at exṭanan, šoṭo görä ki, ṭe dönä laxi tänginä tašeri q̇aysṭune lazəm, banekon särf bakiṭun laxiyo.
Isä hayzanan Binyaminal exṭanan takinan ṭe amdari ṭo͑ġo͑l.
Barta Bitova Bašarbala Buxaʒ́uġon vä͑xun Izi šaaṭluġa kammaq̇anbi, ṭe amdarenal ǯügübaki Simeona q̇a Binyamina tärbeq̇an ki, vä͑nal efi vičimoġo exṭi qaybaki bito sagala bezi ṭo͑ġo͑l eyes bakanan. Šuḳḳalen izi q̇əsmaṭaxun avuzin ukes batenekon, bezi ḳodoġo äylux aćespsun camecenesa, moṭo badalbsun beši kiyel tene. Ene ḳä bakalesa bakale".
Hametär, vičimoġon ičoġoy häzirbi paya q̇a lazəmbakalṭuxun ṗä͑q̇at gele tänginäl exṭi Misirä yaq̇aṭun bafṭi. Binyaminal ičoġoxuney. Šorox hari Misirä ṗaṗala ḳinäḳ Iosifi ṭo͑ġo͑lṭun taci.
Iosifen Binyamina šoṭoġoy ṭo͑ġo͑l aḳaṭan izi ḳožin äšurxo tašala nökärä pine: "Me amdarxo bezi ḳoya taša. Sa heyvan śampa ukunal häzirba, berezäre q̇onaġboz koṭoġo".
Nökären iču pi ḳinäḳäl bine, šoṭoġo haq̇i taneci Iosifi ḳoya.
Ama vičimoġo q̇ə͑yene haq̇i ičoġo exṭi Iosifi ḳoya tašṭuna avabakaṭan, burṭunqi ičoġoy arane metär upsa: "Mo ṭe tängin exläte, miya süfṭä eġaṭan beši xaralxoy boš laxi gümüšä göräṭun tašṭa yax me amdari ḳoya! Yax oġriluġi loxol taxsərkär č̣evḳi ṭaṗḳalṭun, ošal exṭi yax ḳul ḳinäḳ izi loxol äšṗesṭale, beši elemxoval bakale izi!"
Hari ćomoy tume ṗaṗala vädine vičimoġon Iosifi ḳožin äšurxo tašala nökärä ə͑śalayinšaki piṭun:
"Barḳaynan vä͑x sa äyityan upsun čuresa, beši aġa. Yan efi ölkinä sa käräm arumeynaḳ hareyan.
Qaybakaṭanal, üše mandaḳluġ haq̇seynaḳ čurpi gala, beši xaralxoy ćoya qaypi be͑yanġi ki, yaxun tängä exṭiteṭun, beši ečeri gümüši tängoox hetär ečereyan haṭetär čurpene, härsunṭayo izi xarali boš. Ama häysä ečereyan ṭe tänginä yaxun,
me däfin arumi tänginäl ǯöyyan ečere. Ṭe gümüši tängoġo xaralxoy boš šine qaydi laxe beši xavar buteyax".
Ama Iosifi ḳožin äšurxo tašala nökären qaybaki metäre pi: "Narahat ma bakanan, hiḳḳal tene bakon. Efi Buxaʒ́uġoy äše ko, efi bavan bul ḳoc̣pala Buxaʒ́uġone qaydi laxi bakon ṭe tängoġo xaralxoy boš, šoṭo görä ki, zu bezi exṭalṭu exṭez". Metär piyal taci Simeona haq̇i hare.
Oša šoṭoġo ḳoya badi ičoġoy turmoġo oc̣kseynaḳ xeyal enečeri, tašeri elemxo yemal tanedi.
Vičimoġon isä, avabakaṭan ki, Iosifen berezäre ḳoya hari ičoġoxun sagala śum ukale, šo eġamin ičoġoy ečeri payurxo č̣evḳi häzirṭunbi.
Iosif hare, vičimoġonal ičoġoy ečeri payurxo tadi šoṭay be͑ś biti bulṭun ḳoc̣ṗi.
Iosifen isä šoṭoġo "usumnan hare" pi, bureqi ičoġo xavar haq̇sa: "Efi bava hetäre, pinan ḳoya q̇oža bavavä͑x bu? Hiḳḳal tene bake, izi elmux izi boše?"
Šoṭoġonal qaybaki "vi ḳul bakala beši bava xavar haq̇suna görä dirisṭbaka, šaaṭe, izi elmuxal izi boše" pi ṗurum Iosifi be͑ś bulṭun ḳoc̣ṗi.
Iosifen izi be͑ś čurpi vičimoġo piyexun č̣ovakesṭaṭan be͑neġi ki, izi mic̣iḳ viči, ičuxun nana sa bakala Binyaminal ičoġoy ṭo͑ġo͑le. Šoṭin xavare haq̇i: "Efi uḳala mic̣iḳ viči mone?" Oša Binyamini loxol be͑ġi "barta Buxaʒ́uġon vaxun Izi üḳ boḳospsuna kammaq̇anbi, bez ġar" pine.
Metär piyal iču efes tene baki, č̣eri ṭiyä͑mi otaġa taci bureqi o͑nepsa. Ṭemane izi üḳ boḳi Binyamina aḳi.
Oša izi ćoya oc̣ḳi ṗurum hare q̇onaġxoy ṭo͑ġo͑l, iču kiyel haq̇iyal "isä ekinan śum uken" pine.
Nökärxon śuma ečeri bitoṭaynaḳ ǯöy-ǯöyṭun laxsay: Iosifeynaḳ ǯöy, q̇onaġxoynaḳ ǯöy, ṭiya bakala misirluġoynaḳal ǯöy. Axəri misirluġon äbraniġoxun sagala arci śum uteṭunksa, šoṭoġoxun sa sulfin bel arsṭun ičoġoy kul murdar sa šeya lafsṭun ḳinäḳe hesabbaksa.
Vičimoġo Iosifi be͑ś ičoġoy yäšä görä ṭetärṭun arcesṭey ki, här soġo izi galaney -- kalaṭuxun burqi mic̣iḳṭul ciriḳ. Vičimux me äšlä määṭṭäl mandi sunay loxolṭun be͑ġsa burqi,
ama ṗurumal mu͑qṭuniy arci Iosifaxun sagala vaxṭ č̣ovakesṭuna. Iosifen izi be͑ś eġala ukunxoxun šoṭoġoynaḳal yaq̇anebsay, ama Binyamini paya qo q̇at gelene bsay.
