Iaḳoven avabakaṭan ki, amdarxon aruma Misiräxunṭun ešṭa, izi ġarmoġo pine: "Ḳänan arce sunay loxol be͑ġsun?"
Oša metäre pi: "Ibakezu ki, bitoṭin taci Misiräxune arum haq̇i ešṭa. Takinan vä͑nal ṭeṭiin haq̇i ečanan ki, bešiyal ukala śumq̇an baki, tene busa biyalyan". *
Me exlätäxun oša Iosifi vic̣ vičiyal hayzeri Misirä arum haq̇saṭun taci.
Ama Iosifaxun nana sa bakala vičä, Binyamina Iaḳoven tene tärbi, enefi izi ṭo͑ġo͑l, šoṭay belal äše eġon pi q̇ə͑nebsay.
Hametär, dünyäni biṗ ṭo͑o͑xun gireci Misirä arum haq̇sa eġalṭoġoy boš Israili ġarmuxal baneki. Busaluġ hari Känan oćalal ṗaṗeney.
Ǯamaati arum haq̇seynaḳ eġala me ölkin kalo isä Iosifey. Arum toysṭuni äšläl šoṭine be͑ġsay pi vičimux šoṭay ṭo͑ġo͑lṭun hari, hariyal šoṭay be͑ś ćooq̇a biti bulṭun ḳoc̣ṗi.
Iosifen vičimoġo aḳala ḳinäḳ čalexi, ama iču nu čalxsuna laxi izi ḳodoġo cipiyal pine: "Mayinnan vä͑n?" Vičimoġonal "Känan oćalaxun, arum haq̇seynaḳyan hare" piṭun.
Iosifen ičin vičimoġo čalxiyal bakayin, vičimoġon iču teṭun čalxi.
Ṭe vädä eyexe bafṭi Iosifi izi šoṭoġoxun aḳi neṗur, * qaybakiyal izi vičimoġo metäre pi: "Xavar girbsanan hari bakon beši oćalxo! Yägin harenan be͑yn maya ḳä bu, be͑yn beši zäyif ganxo bä͑ġä͑bi yax sakes bananksa!"
Ama vičimoġon ičoġoy döšä ṭapsa burqi piṭun: "Buxaʒ́uġon maq̇an bi, beši aġa! Arumeynaḳe hare me vi ḳulurxo, q̇eräz hiḳḳal.
Yasṭa č̣aṗ äš buteyax, mone, qay nexyan: vičimuxyan baksa yan, bito sa bavaxun baki äyluxyan. Ke vi uḳala äšläxun ä͑xile me vi ḳulurxo!"
Ama Iosifen ṗurumal ǯügünubaki pine: "Ve͑tezu, beši ölkin zäyif ganxo bä͑ġä͑bi yax sakseynaḳnan hare vä͑n!"
Ṭe vädä vičimoġon piṭun: "P̣ac̣c̣e vičiyan yan, Känan oćalaxun bakala sa amdari ġarmuxe me vi ḳulurxo bito. Beši sa mic̣iḳ vičiyal buyax, šo tene hari yaxun, bavay ṭo͑ġo͑le čurpi. Sa vičiyal ṗurene".
Moṭo ibakaṭan Iosifen saal pine: "Mone, bezi uḳalo hari č̣ere, nexzu axəri vä͑n miya xavar girbsanan hare!
Ama faraoni elmoġoz elase ki, efi šu baksuna nu avabakayiz, vä͑x memiin tärtezbal! Hevaxṭ efi mic̣iḳ vičiyal eneġon, ṭe vädä č̣eri tananġon.
Barta efi bošṭan sunṭin taci šoṭo haq̇i hareq̇an, mandiyorox isä šorox eġamin zindana arcalṭun. Isä be͑ġalyan efi uḳalṭoġoy düz baki nu baksuna! Äfčinan nexesa, faraoni elmoġoz elase ki, bezi uḳalone, miya xavar girbsanan hare!"
Metär piyal xib ġi šoṭoġo zindana enefi.
Xib ġinaxun oša Iosifen vičimoġo izi ṭo͑ġo͑l ečesṭi pine: "Efi elmoġo čarḳesṭun čurnansasa bezi uḳalṭu banan, šoṭo görä ki, zuval vä͑x memiya haṭetär gala efsun čurtezsa, Buxaʒ́uġoxun q̇ə͑bala amdarzu zu.
Efi uḳalorox bito düzesa, barta efi bošṭan soġo čurpeq̇an miya, mandiṭoġon isä aruma exṭi taceq̇aṭun ḳoya. Ham efi busa külfäteynaḳ śum tašeri bakalṭun,
hamal qaybakaṭan efi mic̣iḳ vičä bezi ṭo͑ġo͑l ečalṭun. Ama miya nu qaybakaynan, efi piṭoġoy düz baksuna aḳesṭi efi vičä bezi ṭo͑ġo͑l nu ečaynan, bito biyalnan". Vičimuxal iräziṭunbaki.
Oša ičoġoy arane äyitpsa burqi piṭun: "Mone, beši vičey bel ečeriyoroxe, hari č̣enesa beši be͑ś! Heq̇ädäre yax xoyinśṗi izi ṭe čarasuz mandi ġine, ama sayǯäṭin šoṭo kul teyan boxodi. Isä mone, zaṗyanne ṭe ġine ǯazina!"
Ruvenen isä pine: "Zu vä͑x haṭe ġiyal pizu ki, ma galdanan äylä, efi ozane mandale ke günax! Ama u͑mu͑xtenanlaxi, isä zapanan efi cipi ṗiye ǯazina!" *
Vičimoġoy xavar buteney ki, Iosifen šoṭoġoy uḳalṭoġo bitova q̇amiše, axəri memačaġ Iosifen ečesṭi amdarene šoṭoġoy uḳalṭoġo misirluġoy muza taradi nexey.
Šoṭoġoy me äyitmoġo ibakaṭan Iosifen iču efes tene baki, č̣eri taci ṭo͑o͑x o͑nenepi. Oša qaybaki hari ṗurum bureqi šoṭoġoxun äyitpsa, ičoġoy bošṭan Simeona č̣äḳṗiyal vičimoġoy piin be͑ś šoṭay kul-tura ġaćṗesṭi tašeri banedi zindana.
Iosifen ämirebi ki, isä tašeri šoṭoġoy xaralxo arumen buybi, ičoġoy yaq̇e śumal laxi yaq̇abadeq̇aṭun. Hamal tapšurebi ki, šoṭoġoxun tängä maq̇aṭun exṭi, härṭay ečeri gümüši tänginä qaydi izi xarali boš laxeq̇aṭun.
Hametär, vičimoġon aruma elemxoy loxol lapi yaq̇aṭun bafṭi.
Biyäbakaṭanal sa ga bä͑ġä͑bi čurṭunpi ki, miya käybalṭun. Vičimoġoy sunṭin taci izi xarali bošṭan samal mu exṭi elema tasṭun čureġaṭan be͑neġi ki, mone, ćoyel izi gümüši tängoox!
Šoṭin iz vičimoġo ḳalpi bureqi haraypsa: "Zaxun tängä exṭiteṭun! Ekinan be͑ġanan, bezi tängoox hamiya xarali boše!" Me äyitä ibakaṭan vičimoġo q̇ə͑yene haq̇i, ičoġoy ṭuṭultina efes teṭun baksay. Burṭunqi sunay loxol be͑ġi upsa: "Buxaʒ́uġoy äše mo! Ḳä upsune čuresa yax?"
Vičimux hari Känan oćala, ičoġoy bava Iaḳovi ṭo͑ġo͑l ṗaṗiṭuxun oša ičoġoy bel hari äšurxo bitova exlätpsa burqi piṭun:
"Ṭe ölkin loxol kalaluġbalṭin yaxun sal muć̣a muzin tene äyitṗi, fikirebi ki, izi ölkinä xavar girbseynaḳyan hare.
Yanal qaybaki iču piyan ki, ketär äšurxoxun ä͑xilyan, beši ḳä bunesa ćoyene.
Oša beši ṗac̣c̣e viči baksunal piyan. Piyan ki, yan bito sa bavaxun baki äyluxyan, häysä beši mic̣iḳ viči bavay ṭo͑ġo͑l, Känan oćalane, soġoval ṗurene.
Ama ṭe ölkin kalaṭin yax ṗurumal ve͑tenebaki, beši uḳalṭoġoy düz baksuna avabakseynaḳ qaybaki pine ki, ṗoy vä͑xun sunṭu efoz miya, mandiṭoġon isä aruma exṭi taceq̇aṭun ičoġoy busa külfäti ṭo͑ġo͑l.
Ama sa šärten, beši mic̣iḳ vičäl exṭi qaybakalayan izi ṭo͑ġo͑l. Moṭoxun oša yax ve͑bakale, beši vičä tärbi, yaxal barḳale izi ölkinä tarapi beši üḳen čureġalṭoġo haq̇i-toysṭa".
Vičimoġon ečeri ičoġoy xaralxo amc̣ibaṭan be͑ṭunġi ki, ičoġoy tängooxal ṭiyane. Härṭin izi xarali boš bakala tänginä aḳaṭan, šoṭoġo q̇ə͑yene haq̇i. Iaḳoven ičinal q̇ə͑nebi,
šoṭin pine: "Bezi äyloġonan haq̇i vä͑n bezi kiyexun! Iosif butene, Simeona efi harenan, isääl nexnan ki, Binyaminal tada tašalyan! Mo he äše enesa bezi bel!"
Ṭe vädä Ruvenen metäre pi izi bava: "Bezi ṗä͑ ġaral va q̇urbane, Binyamina qaydi vi ṭo͑ġo͑l nu ečayiz, haq̇a šoṭoġoy elmoġo! Arxayin baka, šoṭo qaydi ešṭun bezi ozane!"
Ama Iaḳoven ṗurumal yaq̇alnuhari pine: "Tez yaq̇absa bezi ġara vä͑xun! Iosif ṗurene, Raxiläxun baki ġarmoġoxun sa dänä Binyamine mande. Koṭoval ḳänesa bakayin, ḳäz bon zu? Ene sa kärämluġ upanan ki, tašeri oćalaxyanpsa va! Me yäšṭä ke därdä portṗala üḳ tezax bu bezi!"
