Hametär, ismailluġon Iosifa eṭunčeri Misirä, misirlu P̣oṭifarenal miya šoṭo ismailluġoxun tängä tadi haneq̇i. Me P̣oṭifar isä mic̣iḳ amdar teney, faraoni q̇aroolčiġoy kaloney.
Iosif šoṭay ḳoyane mansṭa burqi, Q̣ONƷ́UXAL dim izi täräfe baksay pi Iosifen izi kula mani äšlä boxodayin buye č̣eysay. *
P̣oṭifaren ičinal aneksay Q̣onćugoy šoṭoxun baksuna, Iosifi äšurxoy šaaṭ taysunasṭa Q̣ONƷ́UĠOY kul baksuna avaney.
Šo izi üḳe ṭetäre basḳi ki, ečeri šoṭo izi nökärxoy loxol kalone laxi, isä ene sayǯä ičune q̇ulluġbsay. Iosif P̣oṭifari yön kule baki: misirlun ḳä bunesa bito iz kiyexune č̣ovaksay, šoṭay ḳožin äšurxoval ičine tašṭay.
Q̣ONƷ́UĠONAL P̣oṭifaraxun Izi xeyir-bäräkätä kamtenebsay, šoṭay äšurxo Iosifene tašṭay pi moṭay äväzä bol-bole tasṭay. Q̣ONƷ́UĠOY xeyir-bäräkäte buy P̣oṭifari ḳožin loxolal, qavuna ḳä buṭuxsa šoṭoġoy loxolal,
šoṭo göräl izi ḳä bunesa bitova Iosifane tapšurbi faraoni q̇aroolčiġoy kalaṭin. Ičin isä käyi-u͑ġi taranney, ḳožin äšurxo iz ozane exsṭunen šoṭay äšläne suuḳṗey Iosifen.
P̣oṭifari čuġoy pul šoṭay loxoley. Sa ġiyal šoṭo izi ṭo͑ġo͑l ḳalpi pine: "Eki zaxun basḳa".
Ama Iosifen qaybaki čuġo metäre pi: "Me ḳoya här šeya zane tapšurbe bezi aġan, zaxun arxayine pi izi kula sa äšlä tene duġsa.
Za me ḳožin kalone laxe, bezi äyite č̣ovaksa miya izi äyit č̣ovaḳala ḳinäḳ. Isä hetärez šoṭay čuġoy loxol q̇eräz piin be͑ġon zu, šoṭay śuma ćaxćuxṗi Buxaʒ́uġo bə͑hi taġala me äšlä hetärez biq̇on?"
Čuġon isä me exlätäxun ošal kul tene haq̇say, Iosifa här ġi izi ṭo͑ġo͑l ḳalpi šoṭo belxun č̣evksune čuresay, ama Iosifen nä šoṭoxun basksun, nä izi ṭo͑ġo͑l čurpsun čurtenesay.
Sa ġi Iosif hari ḳoya baneci ki, izi äšurxo bale. Ḳoyal q̇eräz šuḳḳal tene buy pi
P̣oṭifari čuġon Iosifa aḳala ḳinäḳ šoṭay paltaraxun biq̇i läčäq̇eci ki, eki zaxun basḳa. Ama Iosif šoṭay kiyexun č̣efṭi ṭetäre ṭiṭeri ki, izi ćoyexun laḳala paltar čuġoy kiyel manedi.
Čuġon Iosifi paltara efi č̣eri ṭisṭuna aḳaṭan
nökärxo ḳalpi bureqi izi säsä exṭi haraypsa: "Vä͑n sa me äbraninasṭa bakala ćoya be͑ġanan! Bezi išq̇aren iču ečeri ḳoyane bade, moṭin za äyite bosṭa! Harene ki, eki zaxun basḳa, šoval be͑neġi ki, harayezne,
bezi harayaxun q̇ə͑bi č̣eri ṭineṭeri. Mone, izi ćoyexun laḳala paltaral bezi kiyel manedi".
Čuġon Iosifi paltara izi išq̇ar ḳoya eġamin oq̇a tene laxi,
išq̇ar hari ḳoya baġala ḳinäḳäl bureqi nökärxo piṭoġo moṭoval upsa: "Vi ečeri ḳoya badi äbraninen avanu ḳä be? Harene za nexe ki, eki zaxun basḳa!
Šoval be͑neġi ki, bezi säsä exṭez harayezne, č̣eri ṭineṭeri. Mone, izi paltaral bezi kiyel manedi".
Čuġon "vi ečeri ḳoya badi nökären za metär äyite pe" uḳaṭan P̣oṭifari belxun küüne č̣eri,
šoṭin ämirebi ki, Iosifa biq̇i zindanaq̇aṭun badi. Hametär, Iosifa biq̇i baṭundi padčaġi ämiren biq̇eciṭoġoy arcala zindana.
Ama Q̣ONƷ́UĠON miyal Iosifi loxolxun Izi kula tene zapi, šoṭo Izi nu badalbakala čuresuna aḳesṭi ṭetäre bi ki, zindani kalaṭay üḳene basḳi Iosif. *
Šoṭinal ečeri Iosifa zindana arciṭoġoy loxol kalaluġbsunane tapšurbi. Zindana bakala äšurxoy bitova Iosifene tašṭay pi
zindani kalaṭin pes banekon äš tene äšpsay: tapšurbeney bitova Iosifa, ičal arxayin taranney. Iosifi äšurxo šaaṭe taysay, šoṭo görä ki, Q̣ONƷ́UX izi täräfey.
