TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 38

Chapter: 38

Iuda q̇a Tamar
İuda q'a Tamar

Verse: 1

Me arane isä Iuda izi vičimoġoxun ǯöybaki adullamlu Xira uḳala sa amdari ṭo͑ġo͑le köčṗi taci.
Me arane isə İuda izi viçimoğoxun cöybaki adullamlu Xira uk'ala sa amdari t'ǒğǒle köçp'i taśi.

Verse: 2

Miya Šua uḳala sa känanlun xuyärä aḳiyal, šoṭo haq̇i ičeynaḳ čuuxe bi.
Miya Şua uk'ala sa kənanlun xuyərə ak'iyal, şot'o haq'i içeynak' çuuxe bi.

Verse: 3

Šoṭin bə͑hi baki sa ġare ečeri, Iudanal me ġare c̣iya Ere laxi.
Şot'in bǐhi baki sa ğare eçeri, İudanal me ğare s'iya Ere laxi.

Verse: 4

Oša šo saal äyläne mandi, hari ṗä͑mǯi ġar bakaṭanal Iudan äylin c̣iya Onane laxi.
Oşa şo saal əyləne mandi, hari p'ə̌mci ğar bakat'anal İudan əylin s'iya Onane laxi.

Verse: 5

Iuday čuġon sa ġaral enečeri, ġare c̣iyal ečeri Šelaṭun laxi. Me xibimǯi ġar bakaṭan šorox Ḳezivaṭun baksay.
İuday çuğon sa ğaral eneçeri, ğare s'iyal eçeri Şelat'un laxi. Me xibimci ğar bakat'an şorox K'ezivat'un baksay.

Verse: 6

Äylux hari kalaṭunbaki, Iudanal izi kala ġareynaḳ Tamar uḳala sa xuyäre haq̇i.
Əylux hari kalat'unbaki, İudanal izi kala ğareynak' Tamar uk'ala sa xuyəre haq'i.

Verse: 7

Ama Iuday kala ġar Er izi biq̇i pis äšurxo görä Q̣ONƷ́UĠOY piyes šaaṭ tene aḳesay pi Q̣ONƷ́UĠON šoṭay elmoġo haneq̇i.
Ama İuday kala ğar Er izi biq'i pis əşurxo görə Q'ONČUĞOY piyes şaat' tene ak'esay pi Q'ONČUĞON şot'ay elmoğo haneq'i.

Verse: 8

Ṭe vädä Iudan izi ṗä͑mǯi ġar Onana pine: "Isä vi ṗuri vičey čuġo hun haq̇alanu, barta vaxun äylux ečereq̇an ki, vi vičey c̣i maq̇an batḳi". ^*
T'e vədə İudan izi p'ə̌mci ğar Onana pine: «İsə vi p'uri viçey çuğo hun haq'alanu, barta vaxun əylux eçereq'an ki, vi viçey s'i maq'an batk'i». ^*

Verse: 9

Onanen avaney ki, ičuxun bakala äyloġoy loxol izi tää, izi vičey c̣i bakale, šoṭo göräl här Tamaraxun bakaṭan izi cilä oq̇ane ciney ki, šo äylä maq̇an mandi.
Onanen avaney ki, içuxun bakala əyloğoy loxol izi təə, izi viçey s'i bakale, şot'o görəl hər Tamaraxun bakat'an izi śilə oq'ane śiney ki, şo əylə maq'an mandi.

Verse: 10

Q̣ONƷ́UĠOY piyesal šoṭay biq̇ala me äš gele pise aḳeci, šoṭo göräl Q̣ONƷ́UĠON Onani elmoġo haneq̇i.
Q'ONČUĞOY piyesal şot'ay biq'ala me əş gele pise ak'eśi, şot'o görəl Q'ONČUĞON Onani elmoğo haneq'i.

Verse: 11

   Ṭe vädä Iudan izi mic̣iḳ ġar Šelal ḳänesa banekon pi q̇ə͑nebi, šoṭo göräl izi bin Tamara metäre pi: "Va bezi ġar Šelaynaḳ haq̇alazu, ama šo hälä mic̣iḳe.
   T'e vədə İudan izi mis'ik' ğar Şelal k'ənesa banekon pi q'ǐnebi, şot'o görəl izi bin Tamara metəre pi: «Va bezi ğar Şelaynak' haq'alazu, ama şo hələ mis'ik'e.
   Taki Šela kalabakamin vi bavay ḳoya manda, vi yasa ṭiya efa. Bezi ġar kalabakaṭan isä va šoṭaynaḳ ečoz". Tamaral taci izi bavay ḳoyane mansṭa burqi.
   Taki Şela kalabakamin vi bavay k'oya manda, vi yasa t'iya efa. Bezi ğar kalabakat'an isə va şot'aynak' eçoz». Tamaral taśi izi bavay k'oyane manst'a burqi.

Verse: 12

Sa heq̇ädär vädä hari č̣ovakiṭuxun oša, Iuday čuux Šuay xuyäräl ṗure. Iuda yasaxun č̣ere, hayzeriyal izi dosṭ bakala adullamlu Xiraxun sagala Ṭimninane taci, ṭiya izi eġelxone buy q̇ačibala.
Sa heq'ədər vədə hari c'ovakit'uxun oşa, İuday çuux Şuay xuyərəl p'ure. İuda yasaxun c'ere, hayzeriyal izi dost' bakala adullamlu Xiraxun sagala T'imninane taśi, t'iya izi eğelxone buy q'açibala.

Verse: 13

Tamara isä mo hari ṗaneṗi. Šoṭin izi q̇ayinbay Ṭimnina eġelxo q̇ačibsa taysuna ibakaṭan
Tamara isə mo hari p'anep'i. Şot'in izi q'ayinbay T'imnina eğelxo q'açibsa taysuna ibakat'an

Verse: 14

izi loxol bakala yase paltara č̣evḳi q̇eräz paltare lapi. Izi ćoya butḳiyal taci Ṭimnina taġala yaq̇e loxol bakala Enayim šähäre baġala darvazin tume areci. Tamar izi q̇ayinbaxun äǯuxluney: Šela ene kala išq̇arey, ama häläl hari iču tateṭunšṭay.
izi loxol bakala yase paltara c'evk'i q'erəz paltare lapi. İzi ç̌oya butk'iyal taśi T'imnina tağala yaq'e loxol bakala Enayim şəhəre bağala darvazin tume areśi. Tamar izi q'ayinbaxun əcuxluney: Şela ene kala işq'arey, ama hələl hari içu tatet'unşt'ay.

Verse: 15

Tamari ćo buṭey pi Iudan šoṭo aḳaṭan čaltenexi, yaq̇nuxun č̣eri sa čuuxe zändbi.
Tamari ç̌o but'ey pi İudan şot'o ak'at'an çaltenexi, yaq'nuxun c'eri sa çuuxe zəndbi.

Verse: 16

Fərəpi šoṭay ṭo͑ġo͑l taciyal pine: "Eki zaxun, vaxun basḳoz". Iudan yaq̇e ṭo͑ġo͑l arci me čuġoy izi bin baksuna tene avay, šoṭo göräne metär pi. Tamaren isä qaybaki "bezi haq̇q̇ ḳä bakale ṗoy?" pine.
Fırıpi şot'ay t'ǒğǒl taśiyal pine: «Eki zaxun, vaxun bask'oz». İudan yaq'e t'ǒğǒl arśi me çuğoy izi bin baksuna tene avay, şot'o görəne metər pi. Tamaren isə qaybaki "bezi haq'q' k'ə bakale p'oy?" pine.

Verse: 17

Iudan pine: "Vaynaḳ bezi sürünäxun sa q̇uzi yaq̇aboz". Ama Tamaren ṗurumal iräzi nu baki pine: "Haṭetär upsunen tene baksa. Ṭe q̇uzi hari za ṗaṗamin zasṭa ḳänesa efalanu, zuval avabakaz ki, vi äyiti loxol čurḳalnu".
İudan pine: «Vaynak' bezi sürünəxun sa q'uzi yaq'aboz». Ama Tamaren p'urumal irəzi nu baki pine: «Hat'etər upsunen tene baksa. T'e q'uzi hari za p'ap'amin zast'a k'ənesa efalanu, zuval avabakaz ki, vi əyiti loxol çurk'alnu».

Verse: 18

Ṭe vädä Iudan xavare haq̇i: "Ḳä efaz ki?" Tamarenal qaybaki "vi c̣i izi loxol bakala pečaṭa, šoṭo vi ozanexun suruḳṗala baġa saal vi kiyel bakala čombaġa" pine. Iuda iräzinebaki, Tamaren piṭoġo tadiyal taci šoṭoxun baseḳi. Tamar me basksunen äyläne mandi.
T'e vədə İudan xavare haq'i: «K'ə efaz ki?» Tamarenal qaybaki "vi s'i izi loxol bakala peçat'a, şot'o vi ozanexun suruk'p'ala bağa saal vi kiyel bakala çombağa" pine. İuda irəzinebaki, Tamaren pit'oğo tadiyal taśi şot'oxun basek'i. Tamar me basksunen əyləne mandi.

Verse: 19

Moṭoxun oša Tamar izi bavay ḳoya qaybaki, izi paltara badalbiyal ṗurum izi yasa efsane burqi.
Mot'oxun oşa Tamar izi bavay k'oya qaybaki, izi paltara badalbiyal p'urum izi yasa efsane burqi.

Verse: 20

Iudan isä izi adullamlu dosṭ Xira sa q̇uzi tadi yaq̇anebi ki, taci ṭe taraḳala čuġo bä͑ġä͑bi šoṭay kiyexun izi efiṭoġo exṭeq̇an. Ama ṭe amdaren maya uḳayin qä͑ve͑ci, ṗurumal čuġo tene bä͑ġä͑bi.
İudan isə izi adullamlu dost' Xira sa q'uzi tadi yaq'anebi ki, taśi t'e tarak'ala çuğo bə̌ğə̌bi şot'ay kiyexun izi efit'oğo ext'eq'an. Ama t'e amdaren maya uk'ayin qə̌věśi, p'urumal çuğo tene bə̌ğə̌bi.

Verse: 21

Ṭe vädä ṭiya bakala amdarxoxun xavare haq̇i: "Me Enayim šähäre baġala darvazin tume arcala čuġo tenan ava maya? Miya arci iču tänginen išq̇arxo toydalṭoġoxuney". Amdarxonal qaybaki "tene bake miya ketär čuux" piṭun.
T'e vədə t'iya bakala amdarxoxun xavare haq'i: «Me Enayim şəhəre bağala darvazin tume arśala çuğo tenan ava maya? Miya arśi içu tənginen işq'arxo toydalt'oğoxuney». Amdarxonal qaybaki "tene bake miya ketər çuux" pit'un.

Verse: 22

Xiran Iuday ṭo͑ġo͑l qaybaki pine: "Tez bä͑ġä͑bi vi uḳala čuġo. Lap amdarxoxunal xavarez haq̇i, bitoṭinal pine ki, miya ketär sa čuux tene bake".
Xiran İuday t'ǒğǒl qaybaki pine: «Tez bə̌ğə̌bi vi uk'ala çuğo. Lap amdarxoxunal xavarez haq'i, bitot'inal pine ki, miya ketər sa çuux tene bake».

Verse: 23

Iudan pine: "Ene lazəm tene baksa, barta mandeq̇an bezi tadiyorox izi kiyel, tene axśumi ga bakalyan. Zu bezi äyiti loxol čurpi q̇uzina yaq̇abez, iču bä͑ġä͑bes teyan baksasa, ko beši taxsər tene".
İudan pine: «Ene lazım tene baksa, barta mandeq'an bezi tadiyorox izi kiyel, tene axšumi ga bakalyan. Zu bezi əyiti loxol çurpi q'uzina yaq'abez, içu bə̌ğə̌bes teyan baksasa, ko beşi taxsır tene».

Verse: 24

Me exläti loxolxun xib xaše č̣ovaki bakoy, Iuday u͑mu͑ġo hari ṗaneṗi ki, ṗoy izi bin tarapene, isääl bə͑hine. Iudanal moṭo ibakala ḳinäḳ pine: "Tašanan koṭo dirisṭ-dirisṭ boḳosṗanan!"
Me exləti loxolxun xib xaşe c'ovaki bakoy, İuday ǔmǔğo hari p'anep'i ki, p'oy izi bin tarapene, isəəl bı̌hine. İudanal mot'o ibakala k'inək' pine: «Taşanan kot'o dirist'-dirist' bok'osp'anan!»

Verse: 25

Ama Tamara exṭi boḳospsa tašaṭan šoṭin izi q̇ayinbaynaḳ xavar yaq̇abi pine: "Takinan bezi q̇ayinba upanan ki, bezi kiyel bakalorox šinesa, šoṭoxunzu bə͑hi". Metär piyal izi kiyel bakala pečata, baġa saal čombaġane aḳesṭi.
Ama Tamara ext'i bok'ospsa taşat'an şot'in izi q'ayinbaynak' xavar yaq'abi pine: «Takinan bezi q'ayinba upanan ki, bezi kiyel bakalorox şinesa, şot'oxunzu bı̌hi». Metər piyal izi kiyel bakala peçata, bağa saal çombağane ak'est'i.

Verse: 26

Iudan moṭoġo aḳala ḳinäḳ čalexi, pe͑śmanbakiyal pine: "Ćomä͑yinzu zu me xuyäri be͑ś! Düze nex, šoṭo bezi ġar Šela čuux pi tadiyzuy, metäräl tene bakoy!" Iudan šoṭo ene sal sa vädä izi kula tene duġi.
İudan mot'oğo ak'ala k'inək' çalexi, pěšmanbakiyal pine: «Ç̌omə̌yinzu zu me xuyəri běš! Düze nex, şot'o bezi ğar Şela çuux pi tadiyzuy, metərəl tene bakoy!» İudan şot'o ene sal sa vədə izi kula tene duği.

Verse: 27

Hametär, Tamari äyel bakala vädä hari ṗaneṗi, äylä bakesṭaṭanal be͑ṭunġi ki, äkize.
Hametər, Tamari əyel bakala vədə hari p'anep'i, əylə bakest'at'anal bět'unği ki, əkize.

Verse: 28

Äyloġoy sunṭay kul č̣ere, mamačinenal "mo süfṭä bakiyone" pi exṭi äylin kiyel ć̣oć̣a ṭurine ġaćṗi.
Əyloğoy sunt'ay kul c'ere, mamaçinenal "mo süft'ə bakiyone" pi ext'i əylin kiyel č'oč'a t'urine ğaç̌p'i.

Verse: 29

Ama oša be͑neġi me äylen izi kula qaydi badene, izi gala ṭiyä͑minone č̣eysa. Ṭe vädä määṭṭäl mandi pine: "Mo hun hetären zəġbi č̣eri?" Äylin c̣iya haketäräl laṭunxi -- P̣erec. ^*
Ama oşa běneği me əylen izi kula qaydi badene, izi gala t'iyə̌minone c'eysa. T'e vədə məət't'əl mandi pine: «Mo hun hetəren zığbi c'eri?» Əylin s'iya haketərəl lat'unxi -- P'ereś. ^*

Verse: 30

Oša ene izi kiyel ć̣oć̣a ṭuri bakaloval č̣ere, me äylin c̣iyal ečeri Ceraxṭun ^* laxi.
Oşa ene izi kiyel č'oč'a t'uri bakaloval c'ere, me əylin s'iyal eçeri Śeraxt'un ^* laxi.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.