Iaḳov hari Känan oćala, izi bava Isaaḳiyal q̇ärib ḳinäḳ yäšäyinši me ölkinäne čurḳala baki.
Isä ekinan Iaḳovaxun bakiṭoġoy bel hariṭoġoxun exlätṗen.
Iosif Israili piin išiġey, izi q̇ožabaki vädinene bakey pi ġarmoġoy boš bitoṭuxun gele šoṭone čuresay. Ečeri šoṭaynaḳ toyexlu, campi sa paltaral e͑besṭeney.
Vičimoġon hisṭunbsay bavay ičoġo č̣äḳpsuna, šoṭo göräl Iosifa aḳala pul teṭux buy, šoṭoxun muć̣a äyitṗesal teṭun baksay.
Sa ġi isä Iosifen neṗe aḳi. Hayzeriyal izi aḳi me neṗa vičimoġo exlätṗiṭuxun oša lap šoṭoġoy piyexun bineti.
Iosifen metäre exlätṗi izi aḳi neṗa: "Sa be͑ġanan neṗe boš ḳäz aḳe!
Azḳi ki, q̇oruġa yoqyan ġaće: bezi ġaćṗi yoq tik čurpene, efi ġaćṗiṭoġonal bezi yoqe be͑ś biti šoṭo bulṭun ḳoc̣psa".
Iosifi vičimoġon qaybaki iču metärṭun pi: "Isä ḳä upsunen čuresa ki? Padčaġ baki beši loxol kalaluġbala fikirvax bu?!" Iosifen me neṗa exlätṗiṭuxun oša vičimoġon šoṭo lap geleṭun nifrätbsa burqi.
Oša Iosifen sa neṗal aneḳi. Hayzeri šoṭoval izi vičimoġoynaḳ exlätpsa burqi pine: "Sa neṗal azḳi zu: be͑zġi ki, göynul bakala be͑ġ q̇a xaše, izi ṭo͑ġo͑lal sac̣c̣e dänä muć̣uli -- biteṭun za bulṭun ḳoc̣psa!"
Iosifi aḳi me neṗa bavan ibakaṭan isä šoṭo töymätbi metäre pi: "Mo hetär neṗuren aksa hun?! Ḳä upsune mo? Yäni zuval, vi nananal, vi vičimoġonal hari vi be͑ś biti bul ḳoc̣pala bakalyan va?"
Iosifi aḳala me neṗurxo görä izi vičimoġoy iču aḳala pul teṭux buy, bavay isä eyexun tene č̣eysay Iosifi piyorox.
Sa ġi, Iosifi vičimoġon heyvanxo tašeri Šekemi härrämine bakala oćalxo otarišala vädine,
Israilen Iosifa ḳalpi pine: "Vi vičimoġon heyvanxo tašeri Šekema otarišbsuna avanu. Va šoṭoġoy ṭo͑ġo͑lez yaq̇absun čuresa". Iosifenal qaybaki "lap šaaṭ, hetär nexnu baz" pine.
Ṭe vädä Israilen Iosifa tapšurbi pine: "Taki be͑ġa be͑yn, vi vičimux ṭiya hetärṭun, ḳäṭun bsa. Be͑yn heyvanxo salamate, ḳä bu, ḳä tene bu -- bitova avabaka, eki zaynaḳ sa xavar eča". Hametär, Iosif ičoġoy čurpi Xevroni däränexun č̣eri Šekemač yaq̇ane bafṭi.
čöle izi vičimoġo qä͑ve͑ġala gala iču sa amdare iräsṭhari. Ṭe amdaren ičuxun "ḳän qä͑ve͑sa miya" pi xavare haq̇i,
Iosifenal qaybaki "bezi vičimoġo, ten ava šoṭoġon mayaṭun heyvanxo otarišbsa?" pine.
Ṭe amdaren metäre pi: "Č̣erṭun šorox memiin, unḳon Doṭanaṭun taci, ketär sa äyit lafedi bezi u͑mu͑ġo". Moṭo ibaki Iosifal taneci Doṭana, taciyal izi vičimoġo ṭiya bä͑ġä͑nebi.
Vičimoġon Iosifa hälä ä͑xiläxun aḳi čalṭunxi, hari ičoġo ṗaṗaminal äyitä saṭunbi ki, šoṭo besṗalṭun.
Šoṭoġon ičoġoy arane metärṭun pi: "Mone, enesa beši neṗ aḳala ġar!
Ekinan koṭo besṗen, ošal sa kure boš bosen taceq̇an! Ḳoyal uyanḳon ki, ä͑qnä heyvanxone carpe. Ṭe vädä be͑yanġon be͑yn ḳä bese baksa izi aḳi neṗurxon!"
Ama Ruvenen šoṭoġoy me exlätxo ibaki, Iosifa čarḳesṭune čureci. Šoṭin pine: "Besmabanan!
P̣i cipi günax äšṗesṭun lazəm bateneksa. Šoṭo ef kiin ma besṗanan, me xam ganu bakala kururxoxun sunṭay boš bosaynan, bäse". Ruveni fikir isä šoney ki, oša hari Iosifa kure bošṭan č̣evḳi qaydi bavay ṭo͑ġo͑l tašale.
Hametär, Iosif hari vičimoġoy ṭo͑ġo͑l ṗaṗala ḳinäḳ lavabaki šoṭay loxolxun ṭe toyexlu paltara zapi č̣evṭunḳi,
ošal biq̇i boṭunseri kure boš. Kur isä amc̣iney, iz boš xe tene buy.
Oša arci śum ukala gala be͑ṭunġi Gileadi täräfäxun sa kärvane eysa. Mo ismailluġoy kärvaney, bušurxoy loxol šaaṭ adeġala oyurxo, č̣äyin saal mät lapi tašeri Misirä toyṭunsṭay.
Ṭe vädä Iudan izi vičimoġo pine: "Isä uḳen ṗure beši viči, moṭoxun ḳä q̇azayinši bakalyan? Lap moṭo bitoṭuxun č̣aṗalbayan, beši ozanene me günax!
Šaaṭo šone besmaben koṭo, toyden taceq̇an me ismailluġo. Heq̇ädär uḳayan, ṗurumal beši vičine, sa ṗine taysa beši bitoṭay boš". Vičimux Iuday äyitä basṭunki,
hariyal kärvan ičoġoy ṭo͑ġo͑lxun č̣ovakaṭan Iosifa kure bošṭan č̣evḳi ismailluġo q̇a dänä gümüši tänginäl toyṭundi. Hametär, Midyan oćalaxun mal tašeri toydalxon Iosifa ičoġoxun haq̇i taṭunci Misirä.
Me bakiṭoġoxun izi xavar nu bakala Ruvenen isä hayzeri taneci ki, Iosifa kurnuxun č̣evḳi čarḳesṭale. Hariyal aḳaṭan ki, Iosif kure boš butene, bureqi izi loxol bakala paltara zəġ-zəġbi o͑nepsa, ṭemane šoṭaynaḳ izi üḳ boḳi.
Šo izi vičimoġoy ṭo͑ġo͑l hari pine: "Butene bezi mic̣iḳ viči! Isä bezi bula haq̇i maya taġaz zu?!"
Ṭe vädä vičimoġon sa keči śampi, ošal Iosifi loxolxun zapi č̣evḳi paltara dirisṭ ṗiyalṭunbi.
Šoṭoġon ṭe toyexlu, campi paltara bavaynaḳ ečeri piṭun: "Sa miya be͑ġa ḳäyan bä͑ġä͑be! Beši zänden mo vi ġare paltare, tene ki?"
Iaḳoven paltara aḳala ḳinäḳ čalxi harayepi: "Bezi ġare paltare mo, bezi Iosifi paltare! Taneci bezi ġar, ä͑qnä heyvanxoynaḳ yeme baki!"
Metär piyal bureqi izi loxol bakala paltara zəġ-zəġbi o͑nepsa. Izi loxol čul lavḳi * hema ġi yase efi Iaḳoven, šuḳḳalenal šoṭo šiṗbes tene baksay.
Izi ġarmoġon q̇a xuyärmoġon gireci iču üḳ tasṭun čureġaṭan isä qaybaki metäre nexey: "Ma galdanan za, bartanan o͑neḳaz bezi ġareynaḳ! Bisunez čuresa zu, ṭe dünyäne, bezi ġare ṭo͑ġo͑l taysunez čuresa!" Hametär, Iosifi bisunen Iaḳova gelene boḳosṗi.
Šo izi ġare loxol o͑nepsaxey, midyanluġon isä Iosifa Misirä tašeri šoṭo faraoni q̇aroolčiġoy kalo bakala P̣oṭifara toyṭundi.
