Me bakiṭoġoxun oša Buxaʒ́uġon Iaḳova pine: "Hayza Beṭela taki, vi čadərxo ṭiya laxi čurpa. Vi viči Esavi kiyexun ṭiṭaṭan vi neṗa baci Buxaʒ́uġoynaḳ q̇urban ečala gaal düzba ṭiya". *
Iaḳovenal izi külfäti boš bakalṭoġo q̇a izi nökärxoy bitova girbi pine: "Efi kiyel biniḳ buxaʒ́uxxo mandenesa bitova bosanan. Murdarluġaxun tämizbakseynaḳ efi loxol xe lapi paltaral badalbanan --
Beṭelayan taysa. Bezi ṭarnu ṗaṗiṭaynaḳ, maya taġayiz Izi kula bezi loxolxun nu zapi Buxaʒ́uġoynaḳ q̇urban ečala ga düzboz ṭiya".
Šoṭoġonal Iaḳovi äyitä be͑ġi ičoġoy kiyel bakala biniḳ buxaʒ́uxxo q̇a ičoġoy u͑mu͑ġo lavḳi sərəġanxo bitova č̣evḳi taṭundi, Iaḳovenal me buxaʒ́uxxo q̇a šoṭoġo bul ḳoc̣psuna aḳesṭala me sərəġanxo bitova tašeri Šekemi mä͑xluġ uḳala ganu xodin tume oćalaxebi.
Moṭoxun oša yaq̇aṭun bafṭi, ičoġoy yaq̇e loxol bakala šähärmoġoxunal šuḳḳalen č̣eri Iaḳovi ġarmoġoy be͑śṭan boṭestenedi, šoṭo görä ki, Buxaʒ́uġon ṭe oćali amdarxoy bitoṭay pula haq̇eney.
Hametär, Iaḳov q̇a ičuxun bakalorox bito hari Känan oćala bakala Luz, yäni Beṭel šähäre ṗaṭunṗi,
Iaḳovenal ečeri miya sa q̇urban ečala gane düzbi. Šoṭin me gane c̣iya El Beṭele * laxi, šoṭo görä ki, izi vičey kiyexun ṭiṭaṭan Buxaʒ́ux me ganune iz neṗa bacey.
Ṭe aramoġo Rebeḳay nökär, šoṭo döš tadi kalabi Devorane ṗuri, tašeriyal šoṭo Beṭele ṭo͑ġo͑l bakala mä͑xnä xodin oq̇a oćalaxṭunbi. Oša ṭe gane c̣i haṭetäräl manedi -- Allon-Baxuṭ. *
Iaḳov P̣addan-Aramaxun č̣eri Beṭela qaybakiṭuxun oša Buxaʒ́ux ṗurum šoṭo aḳeci, xeyir-bäräkät tadiyal
pine: "Vi c̣i Iaḳove, * ama meyin ṭaġay va Israil * pi ḳalḳalṭun, šoṭo görä ki, vi c̣iya Israilez laxsa!" Hametär, Iaḳovi c̣i baneki Israil.
Buxaʒ́uġon Iaḳova me äyitmoġoval pine: "Bitova Bašarbala Buxaʒ́uxzu Zu! Avuzbakalnu hun, vaxun töräyinšakiṭoġoy say ṭeq̇ädär bakale ki, azuḳxo ämälä eġale vi näsiläxun. Ičal sa azuḳ tää, ḳäšinen bo͑q̇ä͑lpi čarḳesṭes nu bakala hama! Padčaġxo č̣eġale vi näsiläxun!
Avrahama q̇a Isaaḳa äyit tadi me oćala va tadoz, vaxun töräyinšakiṭoġo mandale me oćal". *
Metär piyal haṭiya Iaḳovi piyexun aneći.
Iaḳoven ečeri Buxaʒ́uġon ičuxun äyitṗi me ganu sa źe͑ne tikṗi laxi. Šoṭay loxol fi q̇a zeytuni č̣äyin lapiyal źe͑ne Buxaʒ́uġoy c̣iyen laxesunane aḳesṭi.
Iaḳoven me gane c̣iya Beṭele * laxi, šoṭo görä ki, Buxaʒ́uġon miya ičuxun äyitepey.
Oša šorox Beṭelaxunal č̣erṭun. Yaq̇a bafṭi hari Efraṭa ṗaṗala vädine Raxiläy q̇ać̣en bineq̇i. Ama me däfä äylä bakesṭun tene bakesṭunsṭay,
mamačinenal be͑neġi Raxilän gelene äzyät aksa, äyel hari bakiṭuxun oša šoṭo üḳ tadi pine: "Isä vi üḳä buz ḳinäḳ efa, ene ṗä͑ ġarvax bu".
Raxilän haṭiya äylin c̣iya Ben-Oni * laxi elmuxe tadi, ama bavan äylin c̣iya badalbi Binyamine * bi.
Hametär, Raxilä äylin loxol ṗure, tašeriyal šoṭo haṭiya, Efraṭa taġala yaq̇e börine oćalaxṭunbi. Me Efraṭ šähäri c̣i häysä Beṭlexeme taysa.
Iaḳoven Raxiläy besṭa sa źe͑yal tikṗi lanexi, manu ki, häysääl haṭiya čurpene, bitoṭinal avane me gane Raxiläy oćalaxeci ga baksuna.
Israil ṗurum yaq̇ane bafṭi, tašeriyal izi čadərxo Migdal-Ederi ṭe soġo täräf laxi čurepi.
Šo me oćalxo čurpi vädine Ruven izi bavaynaḳ äylux ečeri čuux-nökär Bilhaxune basḳi, moval Israili u͑mu͑ġo hari ṗaneṗi.
Leay ečeri ġarmux: Iaḳovi süfṭin ġar Ruven, Simeon, Levi, Iuda, Issaḳar saal Zevulun.
Raxiläy ečeri ġarmux: Iosif q̇a Binyamin.
Raxiläy bać̣anexun hari nökär Bilhaxun baki ġarmux: Dan q̇a Nafṭali.
Leay bać̣anexun hari nökär Zilṗaxun baki ġarmux: Gad q̇a Ašer.
Hametär, Iaḳov hari Mamrena, izi bava bakala gala č̣ere. Giryaṭ-Arbada, yäni Xevrona ə͑śa bakala me oćalxo Avrahami, ošal Isaaḳi q̇ärib ḳinäḳ yäšäyinši ganey. *
Isaaḳ düz sabać säksän usen yäšäyinšebi.
P̣uri izi bavoġoy ṭo͑ġo͑l, izi pula q̇ič̣ṗi ṭe dünyäne taġaṭanal izi yäšä č̣ovaḳesṭi, iz pul boše taci. Šoṭo tašeri oćalaxṗiyoval izi ġarmuxe baki -- Esav q̇a Iaḳov.
