Sa ġi, Iaḳovi Leaxun baki xuyär Dina hayzeri ičoġoy arci me oćali xuyärmoġo aksane taci.
Šoṭo miya me oćalxoy kalo bakala xivlu Xamori ġar Šekemen aneḳi, biq̇iyal xuyäräxun zorbaluġen baneki.
Ama xuyär Šekemi üḳe ṭetäre basḳi ki, šoṭo čuresa, šoṭoxun muć̣a äyitpsane burqi,
izi bava Xamoral pine ki, Dina ičeynaḳ čuuxq̇an haq̇i.
Šekemen Dinay bel ečeri äš hari Iaḳova ṗaneṗi. Ama moṭo ibaki vädine izi ġarmux čöle navadaṭuniy pi šorox eġamin izi säsä tene č̣evḳi ki, barta šoroxal hareq̇aṭun be͑yn oša me äšlä ḳä besṭun baksa.
Šekemi bava Xamor isä hayzeri Iaḳovi ṭo͑ġo͑le hari ki, šoṭay xuyärä izi ġareynaḳ čureġale.
Hame vädine Iaḳovi ġarmuxal me exlätxo ibaki čölexun harṭun, šoṭoġoy belxun ḳüüne č̣eysay. Axəri hetäre bakes bakon ki, Israilaxun töräyinšakiṭoġoy bel metär äš eġane, me biyaburčiluġ beyne ṗaq̇esṭala šey teney. Šinesa ġar zorbaluġen ičoġoy xunčaxune basḳe mani exläte?
Xamoren Iaḳova q̇a izi ġarmoġo metäre pi: "Efi xuyär bezi ġar Šekemi üḳe gelene basḳe, izi piin šoṭoxun q̇eräz šuḳḳala tene aksa. Zuval häysä efi xuyärä bezi ġareynaḳ čuresaz hare, vä͑nal iräzibakaynan gele mu͑qezbakon.
Ekinan meyin oša suna xuyär tadi haq̇en, q̇uda baki q̇oomluġben.
Mone, mo beši oćal, mo vä͑n: maya čurnansa efi čadərxo laxi čurpes banankon. Äšṗanan, q̇azayinšanan, haq̇i-toydanan, meyin oša yan hetär, vä͑nal haketär, bartanan beši arane vi-bezi exlät maq̇an baki".
Šekemen ičin isä metäre pi Dinay bava q̇a vičimoġo: "Sayǯä efi xuyärä za tasṭuna iräzibakanan, vä͑x ḳä čureġaynan tadoz.
Upanan xilä ḳäq̇an baki, zuval vä͑x tadaz, ečaz än toyexlu payurxo ef belxun oq̇a ciḳaz. Sayǯä ke xuyärä za tadanan!"
Ama Iaḳovi ġarmoġoy Šekemi biq̇i äšlä q̇uč̣ḳala fikir tene buy, šoṭo göräl bič̣luġ äšṗesṭi Šekema q̇a izi bava Xamora
metärṭun pi: "Bul biq̇ala äš tene mo, sünnätnubaki sa amdara išq̇ara tades teyan bakon yan beši xunča! Ene upanan beši bula alabi amdarxoy ćoyel ma be͑ġen yan!
Vä͑nal yallariḳ sünnätbakaynan, ef boš bakala mandi išq̇arxoval bito sünnätbakayṭun -- ṭe vädä hoo.
Ṭe vädä vä͑x xuyäräl tayandon, vä͑xun xuyäräl hayanq̇on, sunaxunal muć̣a, sa azuḳ ḳinäḳ yäšäyinšyanbon me oćala.
Ama uḳaynan ki, ṗoy tää, teyan sünnätbaksa, ṭe vädä ef eyexun č̣evḳanan yaxun xuyär haq̇suna, beši xunčal exṭi tayansa yan".
Xamoren q̇a iz ġar Šekemen me äšlä pis teṭun be͑ġi.
Šekemen sal yaq̇ tene be͑ġi, ečeri sünnätebaki, ṭemane čuresay Iaḳovi xuyärä. Šo mic̣iḳ amdaral teney, me oćali kalo bakala Xamoraxun töräyinšakiṭoġoy boš än hörmätlu amdarey.
Hametär bava-ġar hayzeri šähäre baġala darvazin be͑ś taci ṭiya gireci išq̇arxo metärṭun pi:
"Vä͑nal ananksa ki, me beši oćalxo hari arci amdarxoxun yax sa pisluġ tene lafsṭa, šoṭo göräl nexyan ki, barta hamiya arceq̇aṭun. Meq̇ädär oćalyax bu, šuḳḳali ga ṭar tene bakal. Barta yaxun barabar me oćali loxol äšṗi q̇azayinšeq̇aṭun, haq̇i-toydeq̇aṭun, yan hetär, šoroxal haṭetär. Šoṭoġoxun xuyäräl haq̇alyan, xuyäräl tadalyan.
Šoṭoġoy yaxun čureġalo isä sa šeye: beši išq̇arxoval bito ičoġollariḳ sünnätbakine buq̇on. Sünnätbakayan iräziṭun yaxun muć̣a baki, sa azuḳ ḳinäḳ me oćala arsṭuna, tene -- tää.
Metär exṭaṭan mo hiḳä ki?! Šoṭoġoy sürüġo bakala eġelxo, beliġo, ičoġoy ḳä bunesa bitova beši kiyel bades baksuni ṭo͑ġo͑l mo hiḳḳal tene! Ekinan sünnätbaken, hari beši boš arci yäšäyinšeq̇aṭun".
Hametär, šähäre baġala darvazin be͑ś gireci išq̇arxoy bito Xamori q̇a Šekemi piṭoġoxun iräziṭunbaki, bitoval sünnätṭunbaki.
Xib ġi oša isä, Xamori šähäre bakala išq̇arxoy hälä turel nu baki sa vädine, Dinaxun nana sa bakala vičimoġon, Iaḳovi Simeon q̇a Levi uḳala ġarmoġon ičoġoy q̇ələnǯxo exṭi baṭunci šähäri elmoġo. Šoṭoġon šähäre bakala išq̇arxoy bitova ḳac̣ṗi ciṭunpi, šuḳḳalenal ičoġoy be͑śinä͑mä͑ haq̇es tene baki.
Xamori q̇a Šekemi bulal boṭunṭi, Šekemi ḳoyaxun ičoġoy xunčal exṭi č̣erṭun.
Oša Iaḳovi ġarmoġon išq̇arxoy tumexun äfčibaki me šähäre qaybaki burṭunqi ḳä bune fu͑q̇ṗi tašṭa. Ičoġoy xunčey namus ćaxćuxeci me šähäre
ḳä eġel-keči, beli, elem bunesa bitova exṭi taṭunšeri, šähäri boš q̇a q̇oruġxo sa dänä heyvan teṭun efi.
Ičoġoy kiyel kofṭalṭu exṭunsṭay, baci ḳožurxoval fu͑q̇ṗiṭuxun oša šoṭoġoy äyloġo q̇a čupuxxoval bitova ičoġoy be͑ś badi haq̇i taṭunci.
Ṭe vädä Iaḳoven Simeona q̇a Levina pine: "Bezi bula bälinänan badi vä͑n, me oćala yäšäyinšala känanluġoy q̇a ṗerizluġoy piyexunnan saki za! Isä gireci beši loxol eġayṭun hetär bakale? Sal beš boš ṭema išq̇aral tene bu ki, šoṭoġoy be͑ś čurpes bakayan. Hari zaal besṗalṭun, vä͑xal bitova ḳac̣ḳalṭun, beši tuma äfčibalṭun šoṭoġon!"
Ama šoṭoġon qaybaki ičoġoy bava metärṭun pi: "Haq̇q̇yan be! Beši xunčey loxol yaq̇nuxun č̣eri xuyäri loxol be͑ġala piin be͑ġalṭun, yanal moṭo q̇uč̣ḳalyan?!"
