TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 32

Chapter: 32

Iaḳovi izi viči Esavi be͑ś č̣eyseynaḳ häzirluġ be͑ġsun
İak'ovi izi viçi Esavi běš c'eyseynak' həzirluğ běğsun

Verse: 1

Iaḳov isä hayzeri ṗurum yaq̇ane bafṭi, izi be͑śal Buxaʒ́uġoy angelxone č̣eri.
İak'ov isə hayzeri p'urum yaq'ane baft'i, izi běšal Buxačuğoy angelxone c'eri.

Verse: 2

Iaḳoven šoṭoġo aḳaṭan pine: "Buxaʒ́uġoy q̇ošunxo hari čurḳala gane mo". Metär piyal ṭe gane c̣iya Maxanayime ^* laxi.
İak'oven şot'oğo ak'at'an pine: «Buxačuğoy q'oşunxo hari çurk'ala gane mo». Metər piyal t'e gane s'iya Maxanayime ^* laxi.

Verse: 3

Hari Edoma, izi viči Esav yäšäyinšala oćali ṭe Seir uḳala burux ganxo ə͑śalayinšakaṭan Iaḳoven ičuxun be͑ś elčiġo yaq̇abi
Hari Edoma, izi viçi Esav yəşəyinşala oç̌ali t'e Seir uk'ala burux ganxo ı̌šalayinşakat'an İak'oven içuxun běš elçiğo yaq'abi

Verse: 4

šoṭoġo tapšurebi ki, taci izi vičä me äyitmoġoq̇aṭun pi: "Takinan bezi kala viči Esava upanan ki, izi ḳul bakala Iaḳoven metäre nex: "Zu heq̇ädär vädäne ki, q̇ärib ölkinä, Lavani ṭo͑ġo͑lez bake.
şot'oğo tapşurebi ki, taśi izi viçə me əyitmoğoq'at'un pi: «Takinan bezi kala viçi Esava upanan ki, izi k'ul bakala İak'oven metəre nex: "Zu heq'ədər vədəne ki, q'ərib ölkinə, Lavani t'ǒğǒlez bake.

Verse: 5

   Häysä bezi öküzxoval buzax, elemxoval, eġel-kečiġoy sürüyoxal buzax, čuux q̇a išq̇ar nökärxoval.
   Həysə bezi öküzxoval buzax, elemxoval, eğel-keçiğoy sürüyoxal buzax, çuux q'a işq'ar nökərxoval.
   Isä mone, bezi aġay turelez hare, ägär izi piyes šaaṭez aḳesasa, barta avabakesṭeq̇an moṭo bez yaq̇abi me elčiġo"".
   İsə mone, bezi ağay turelez hare, əgər izi piyes şaat'ez ak'esasa, barta avabakest'eq'an mot'o bez yaq'abi me elçiğo"».

Verse: 6

Elčiyox Iaḳovi ṭo͑ġo͑l qaybaki piṭun: "Vi viči Esavi ṭo͑ġo͑lxunyan eysa häysä. Pine vi be͑ś ič č̣eġale, izi ṭo͑ġo͑l biṗbać tan amdaral bune".
Elçiyox İak'ovi t'ǒğǒl qaybaki pit'un: «Vi viçi Esavi t'ǒğǒlxunyan eysa həysə. Pine vi běš iç c'eğale, izi t'ǒğǒl bip'baç̌ tan amdaral bune».

Verse: 7

Moṭo ibakaṭan Iaḳova q̇ə͑yene haq̇i, isä ḳäq̇an bi tene avay. Ečeriyal izi amdarxo, bušurxo, eġel-kečiġo -- bitova ṗä͑ gala ǯöyebi ki,
Mot'o ibakat'an İak'ova q'ı̌yene haq'i, isə k'əq'an bi tene avay. Eçeriyal izi amdarxo, buşurxo, eğel-keçiğo -- bitova p'ə̌ gala cöyebi ki,

Verse: 8

Esaven hari ičoġo ḳac̣ḳayin, iz bul sa däsṭinä gärgürbakaṭan, ṭe soġo däsṭinä bakalṭoġon ṭiṭeri ičoġoy elmoġo čarḳesṭesq̇aṭun baki.
Esaven hari içoğo k'as'k'ayin, iz bul sa dəst'inə gərgürbakat'an, t'e soğo dəst'inə bakalt'oğon t'it'eri içoğoy elmoğo çark'est'esq'at'un baki.

Verse: 9

Šoṭin Buxaʒ́uġo ḳalpi pine: "Ay bezi bavoġoy Buxaʒ́ux, ay Avrahami q̇a Isaaḳi Buxaʒ́ux bakala Q̣ONƷ́UX, Hun za pinu ki, hayza vi č̣eri gala, vi bavay ṭo͑ġo͑l taki, Zuval va e͑qevḳoz. ^*
Şot'in Buxačuğo k'alpi pine: «Ay bezi bavoğoy Buxačux, ay Avrahami q'a İsaak'i Buxačux bakala Q'ONČUX, Hun za pinu ki, hayza vi c'eri gala, vi bavay t'ǒğǒl taki, Zuval va ěqevk'oz. ^*

Verse: 10

Tene lafsṭa me vi ḳul Hun izi belxun oq̇a cipi ṭe nu badalbakala čuresuna q̇a xeyirxaxluġa. Zu me oćalxoxun č̣eri Iordan oqe ṭe soġo täräf č̣ovakaṭan bezi sa čombaġaxun q̇eräz hiḳḳal butezaxiy. Isä mone, ṗä͑ däsṭinenez qaybaksa zu me oćalxo.
Tene lafst'a me vi k'ul Hun izi belxun oq'a śipi t'e nu badalbakala çuresuna q'a xeyirxaxluğa. Zu me oç̌alxoxun c'eri İordan oqe t'e soğo tərəf c'ovakat'an bezi sa çombağaxun q'erəz hik'k'al butezaxiy. İsə mone, p'ə̌ dəst'inenez qaybaksa zu me oç̌alxo.

Verse: 11

Va xoyinśezbsa, za bezi viči Esavi kiyexun čarḳesṭa! Q̣ə͑zbsa hari zaal besṗane, äyloġo q̇a čupuxxoval bitova ḳac̣kane.
Va xoyinšezbsa, za bezi viçi Esavi kiyexun çark'est'a! Q'ı̌zbsa hari zaal besp'ane, əyloğo q'a çupuxxoval bitova k'as'kane.

Verse: 12

Axəri za "ma q̇ə͑ba, tez kambal vaxun Bezi xeyir-bäräkätä, vaxun ämälä eġala näsili saya dänizi börine bakala q̇ume hama booz" pi äyiten tadey Hun". ^*
Axıri za "ma q'ı̌ba, tez kambal vaxun Bezi xeyir-bərəkətə, vaxun əmələ eğala nəsili saya dənizi börine bakala q'ume hama booz" pi əyiten tadey Hun». ^*

Verse: 13

Hametär, Iaḳoven ṭe üše ṭiya käyebi, savaxṭanal hayzeri bureqi izi heyvanxoxun č̣äḳṗi Esaveynaḳ pay häzirbsa:
Hametər, İak'oven t'e üşe t'iya kəyebi, savaxt'anal hayzeri bureqi izi heyvanxoxun c'ək'p'i Esaveynak' pay həzirbsa:

Verse: 14

ṗä͑bać dänä diši keči q̇a q̇a dänä ärkäy keči, ṗä͑bać dänä diši eġel q̇a q̇a dänä ärkäy eġel,
p'ə̌baç̌ dənə dişi keçi q'a q'a dənə ərkəy keçi, p'ə̌baç̌ dənə dişi eğel q'a q'a dənə ərkəy eğel,

Verse: 15

otuz dänä čaxeġala buš izi baloġoxun sagala, q̇ərx dänä čur, vic̣ dänä araḳ saal q̇a dänä diši elem q̇a vic̣ dänä ärkäy elem.
otuz dənə çaxeğala buş izi baloğoxun sagala, q'ırx dənə çur, vis' dənə arak' saal q'a dənə dişi elem q'a vis' dənə ərkəy elem.

Verse: 16

Oša me heyvanxo hametär izi č̣äḳṗi ḳinäḳäl ǯöy-ǯöy ḳulurxo tapšurbi pine: "Härṭin iču tapšurbaki sürünä exṭi zaxun be͑ś taceq̇an, ama sunaxun samal ä͑xil takinan ki, efi sürüġo bakala heyvanxo suna gärbakimaq̇aṭun".
Oşa me heyvanxo hametər izi c'ək'p'i k'inək'əl cöy-cöy k'ulurxo tapşurbi pine: «Hərt'in içu tapşurbaki sürünə ext'i zaxun běš taśeq'an, ama sunaxun samal ə̌xil takinan ki, efi sürüğo bakala heyvanxo suna gərbakimaq'at'un».

Verse: 17

Bitoṭuxun be͑ś taġalṭu isä metäre pi tapšurbi: "Bezi viči Esav vi be͑ś č̣eri vaxun xavar haq̇ayin ki, ši nökärnu, mayan taysa, me vi č̣idala sürü šiya,
Bitot'uxun běš tağalt'u isə metəre pi tapşurbi: «Bezi viçi Esav vi běš c'eri vaxun xavar haq'ayin ki, şi nökərnu, mayan taysa, me vi c'idala sürü şiya,

Verse: 18

upa vi ḳul Iaḳovi sürüne, bezi aġa Esaveynaḳ paye yaq̇absa. Oša upa "mone, häysä ičal bezi bać̣anexun enesa"".
upa vi k'ul İak'ovi sürüne, bezi ağa Esaveynak' paye yaq'absa. Oşa upa "mone, həysə içal bezi bač'anexun enesa"».

Verse: 19

Iaḳoven hame äyitmoġo šoṭay bać̣anexun taġala ḳulal pine, ošin taġalṭuval. Hametär, Esaveynaḳ č̣äḳṗi heyvanxo č̣idi tašala ḳulurxo bitova hame sa äyitäne pi. Šoṭoġo metäre tapšurbi: "Esava aḳaṭan bezi vä͑x pi ḳinäḳ upanan,
İak'oven hame əyitmoğo şot'ay bač'anexun tağala k'ulal pine, oşin tağalt'uval. Hametər, Esaveynak' c'ək'p'i heyvanxo c'idi taşala k'ulurxo bitova hame sa əyitəne pi. Şot'oğo metəre tapşurbi: «Esava ak'at'an bezi və̌x pi k'inək' upanan,

Verse: 20

"häysä ičal beši bać̣anexun enesa" äyitä upsunal eyexun ma č̣evḳanan". Šoṭin fikirebsay ki, barta süfṭä pay yaq̇abaz Esav ǯügübakeq̇an, oša iz piyes aḳeġaz, bärkä ṭe vädä bezi loxol šaaṭe be͑ġi.
"həysə içal beşi bač'anexun enesa" əyitə upsunal eyexun ma c'evk'anan». Şot'in fikirebsay ki, barta süft'ə pay yaq'abaz Esav cügübakeq'an, oşa iz piyes ak'eğaz, bərkə t'e vədə bezi loxol şaat'e běği.

Verse: 21

Ḳulurxon Esavi payurxo exṭi taṭunci, Iaḳov isä hälä sa üšeyal izi čadərxo laxi čurpi gala manedi.
K'ulurxon Esavi payurxo ext'i tat'unśi, İak'ov isə hələ sa üşeyal izi çadırxo laxi çurpi gala manedi.

Buxaʒ́uġon Iaḳovi c̣iya Israil laxsun
Buxačuğon İak'ovi s'iya İsrail laxsun

Verse: 22

Šoṭin üše hayzeri izi ṗä͑ čuġo, ičeynaḳ äylux ečeri ṗä͑ nökärä saal izi sac̣c̣e ġara exṭi Yabboḳ uḳala oqe ćoġoloy ganuxun baci turin šoṭay ṭe soġo täräfe č̣ovaki.
Şot'in üşe hayzeri izi p'ə̌ çuğo, içeynak' əylux eçeri p'ə̌ nökərə saal izi sas's'e ğara ext'i Yabbok' uk'ala oqe ç̌oğoloy ganuxun baśi turin şot'ay t'e soğo tərəfe c'ovaki.

Verse: 23

Iaḳoven čupuxxo q̇a äyloġo, izi ḳä bunesa bitova ṭe soġo täräf č̣ovakesṭiṭuxun oša
İak'oven çupuxxo q'a əyloğo, izi k'ə bunesa bitova t'e soğo tərəf c'ovakest'it'uxun oşa

Verse: 24

täk iče mandi. Hame vädine Sunṭin hari bureqi šoṭoxun düz käybakamin bušurupsa.
tək içe mandi. Hame vədine Sunt'in hari bureqi şot'oxun düz kəybakamin buşurupsa.

Verse: 25

Be͑neġi Iaḳova Izi zor tene ayesa, šoṭay bude loxol ṭetäre duġi ki, u͑q̇en iz ganuxune č̣efṭi.
Běneği İak'ova İzi zor tene ayesa, şot'ay bude loxol t'etəre duği ki, ǔq'en iz ganuxune c'eft'i.

Verse: 26

Šoṭin pine: "Tärba Za, ene käyebaksa". Iaḳovenal qaybaki "za xeyir-bäräkät nu tadayvax tez tärbal Va" pine.
Şot'in pine: «Tərba Za, ene kəyebaksa». İak'ovenal qaybaki "za xeyir-bərəkət nu tadayvax tez tərbal Va" pine.

Verse: 27

Me bürdän peydax baki Iaḳovaxun Bušuruḳalṭin xavare haq̇i: "Vi c̣i hiḳä?" Šoṭinal pine: "Iaḳov".
Me bürdən peydax baki İak'ovaxun Buşuruk'alt'in xavare haq'i: «Vi s'i hik'ə?» Şot'inal pine: «İak'ov».

Verse: 28

Ṭe vädä Iaḳovaxun Bušuruḳalṭin qaybaki iču metäre pi: "Vi c̣i ene Iaḳov ^* tää, Israil ^* bakale, šoṭo görä ki, hun Buxaʒ́uġoxun q̇a amdarxoxun bušurupi tanšeri". ^*
T'e vədə İak'ovaxun Buşuruk'alt'in qaybaki içu metəre pi: «Vi s'i ene İak'ov ^* təə, İsrail ^* bakale, şot'o görə ki, hun Buxačuğoxun q'a amdarxoxun buşurupi tanşeri». ^*

Verse: 29

Iaḳoven pine: "Hunal upa Vi c̣iya za, xoyinśezbsa!" Ičuxun Bušuruḳalṭinal qaybaki "Bezi c̣iya nuval avabakayvax banekon" pine. Metär piyal Iaḳova xeyir-bäräkäte tadi.
İak'oven pine: «Hunal upa Vi s'iya za, xoyinšezbsa!» İçuxun Buşuruk'alt'inal qaybaki "Bezi s'iya nuval avabakayvax banekon" pine. Metər piyal İak'ova xeyir-bərəkəte tadi.

Verse: 30

Iaḳoven ṭe gane c̣iya P̣eniele ^* laxi, šoṭo görä ki, metäre pi: "Buxaʒ́uġo Ičuval azḳi, ama bezi elmux hälä bez boše".
İak'oven t'e gane s'iya P'eniele ^* laxi, şot'o görə ki, metəre pi: «Buxačuğo İçuval azk'i, ama bezi elmux hələ bez boşe».

Verse: 31

Hari käyebaki, Iaḳovenal axsaġlayinšbsun me P̣eniel uḳala ganuxun č̣eri ṗurum yaq̇ane bafṭi. Üše bakiṭoġoxun oša šoṭay bud hälä q̇ać̣eney.
Hari kəyebaki, İak'ovenal axsağlayinşbsun me P'eniel uk'ala ganuxun c'eri p'urum yaq'ane baft'i. Üşe bakit'oğoxun oşa şot'ay bud hələ q'ač'eney.

Verse: 32

Israilluġon häysääl bude yeq̇e loxol bakala ṭamarla ganxo uteṭunksa, axəri Iaḳovaxun Bušuruḳalṭin šoṭay me ṭamarxoy loxole duġey.
İsrailluğon həysəəl bude yeq'e loxol bakala t'amarla ganxo utet'unksa, axıri İak'ovaxun Buşuruk'alt'in şot'ay me t'amarxoy loxole duğey.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.