Iaḳovi u͑mu͑ġo hari ṗaneṗi ki, Lavani ġarmoġon metärṭun nex: "Häysä Iaḳovasṭa bakala var-dövlät bito beši bavay kiyexun haq̇iyoroxe! Beši bavay hünärene varlayinšake ko!"
Iaḳoven ičinal hisebsay ki, Lavan ičuxun be͑śin ḳinäḳ tene.
Ṭe vädä Q̣ONƷ́UĠON Iaḳova pine: "Vi bavay ṭo͑ġo͑l, vi č̣eri gala qaybaka. Q̣ə͑maba, Zu dim vaxun bakoz!"
Iaḳovenal Raxiläynaḳ q̇a Leaynaḳ xavar yaq̇abi šoṭoġo čöle, izi sürüġo otarišala gala ečesṭi
pine: "Ibakanan ḳäz nex. Axər vädine azaksa ki, efi bavay ara zaxun be͑śin ḳinäḳ šaaṭ tene. Ama bezi bavay bul ḳoc̣pala Buxaʒ́ux dim zaxune.
Vä͑nal avanan ki, bez elmoġo laxiz äšṗe efi bavay loxol zu.
Šoṭin isä bezi haq̇q̇ ḳäq̇an baki pi vic̣ käräm fikire badalbi. Ama Buxaʒ́ux här däfä bezi täräfe baki.
Uḳaṭan ki, čil-čil baloox vi bakale, heyvanxoy ečala baloox hari bito čil-čile baki. Oša pine, ṗoy tää, campi baloox vi bakale, ṭe vädäl hari bito campine baki.
Hametär, Buxaʒ́uġon heyvanxoy sürüġo ef bavay kiyexun exṭi zane tadi.
Sa ġi, heyvanxoy öörä taġala vädäney, neṗe boš azḳi ki, diši kečiġoy loxol laġala ärkäy kečiġoy bito čil-čil, campi saal läkäläne.
Buxaʒ́uġoy angelen za neṗe boš ḳalpi pine: "Iaḳov!" Zuval qaybaki "izbaksa" pizu.
Šoṭin pine: "Be͑ġa, diši kečiġoy loxol laġala ärkäy kečiġoy bito čil-čil, campi saal läkäläne, šoṭo görä ki, avazu Zu Lavanen vaynaḳ laxi šärturxo.
Beṭela vi neṗa baci Buxaʒ́uxzu Zu, ṭeṭiya vi biin oq̇a laxi źe͑na exṭi tikenbi hun, iz loxol zeytuni č̣äyin lapiyal Za elasṗi äyiten tadi. * Isä hayza č̣eki me oćalaxun, vi č̣eri ganu, vi nanaxun baki oćala qaybaka"".
Raxilän q̇a Lean qaybaki metärṭun pi: "Meyin oša yaynaḳ bavay var-dövlätäxun pay tene bu.
Yan häysä šoṭaynaḳ hiḳḳal teyan. Yax va tadaṭan äyitṗi tänginäl käye beši bavan.
Šoṭo göräl, Buxaʒ́uġon beši bavay kiyexun exṭi va tadiyorox bito beši q̇a beši äyloġoye hesabbaksa. Isä Buxaʒ́uġon va hetär nexe, haṭetäräl ba!"
Iaḳovenal ečeri izi äyloġo q̇a čupuxxo bušurxoy loxol arceveḳi,
P̣addan-Arama girbi ḳä var-dövlät buṭuxsa exṭi, izi sürüġo bakala heyvanxoval bitova iz be͑ś badi Känana, iz bava Isaaḳi ṭo͑ġo͑l yaq̇ane bafṭi.
Lavan eġelxo q̇ačibsane tacey, Raxilänal baci iz bavay ḳoya bakala biniḳ buxaʒ́uxxo exṭi č̣ere.
Hametär, Iaḳoven izi ṭayi bakala me aramlu Lavana izi taysuna nu avabakesṭi šoṭo äfčiduġine baki.
Šoṭin izi me usenxosṭa girbiṭoġo bitova exṭine ṭe oćalxoxun č̣eri. Hariyal Yevfrat oqa ṗaṗi šoṭo č̣ovakiṭuxun oša Gilead buruxmoġoče taysa burqi.
Xib ġinaxun oša Iaḳovi č̣eri taysun hari Lavana ṗaneṗi.
Moṭo avabakala ḳinäḳ Lavanen ičuxun ə͑śa bakala q̇oomxo girbi šoṭay bać̣anexune bafṭi, vu͑ġ ġi yaq̇ taciṭuxun ošal hari Gilead buruxmoġo č̣ovakaṭan šoṭo ṗaneṗi.
Ama Buxaʒ́uġon haṭe üše Lavani neṗe boš baci šoṭo pine: "Be͑ġa, va nexzu, Iaḳova galtensṭa, vi źomo ä͑mbi šoṭo äyit ten nexe!"
Lavanen hari Iaḳova ṗaṗaṭan be͑neġi ki, šoṭin izi čadərxo buruxmoġo laxi čurpene, šoṭo görä ene ičinal izi q̇oomxoxun sagala ičoġoy čadərxo hamiya laxi čurṭunpi.
Šoṭin Iaḳova pine: "Ḳän bsa mo hun? Za äfčiduġi, bezi xuyärmoġoval ṭetären haq̇i taysa ki, unḳon düšmäni kiyexun malen ṭiṭevksa.
Za pinut č̣eri taysun ḳä upsune? Sal ten nex ki, bärkä me amdarenal vä͑x faren, äčinen yaq̇a basṭune čuresa,
hälä bito ṭo͑o͑x, izi xuyärmoġo q̇a nävoġo dirisṭoġonbi mučpsune čuresa! Sa äyiten haq̇əlsuz äše vi biq̇i me äš!
Häysä va memiya bezi tärs ćoya aḳesṭes bazkoy, ama č̣ovaki üše vi bavay bul ḳoc̣pala Buxaʒ́uġon za pine ki, Iaḳova galmada.
Lap uḳen č̣eri taysuna avazbaki, vi bavay ḳožeynaḳ tarəxmišakenu pi tansa. Me bezi biniḳ buxaʒ́uxxo bašqsuna ḳä uḳaz?"
Iaḳoven Lavana metäre ǯoġab tadi: "Q̣ə͑zbi ki, vi za tadi xuyärmoġo qaydi bezi kiyexun haq̇alnu.
Ama biniḳ buxaʒ́uxxoy exlät zaluġ tene. Čurensa miya gireci q̇oomxoy piin be͑ś baki qä͑ve͑ki, vi mal bunesa, exṭa viq̇an baki. Šinesa kiyel vi buxaʒ́uxxo bä͑ġä͑bayvax, avabaka ki, šo dirisṭ tene mandal!" Biniḳ buxaʒ́uxxo Raxiläy bašqsunaxun isä Iaḳovi xavar tene buy.
Lavanen baci Iaḳovi, Leay saal iz xuyärmoġo tadi ṗä͑ nökäri čadəra be͑neġi, ama hiḳḳal tene bä͑ġä͑bi. Oša Leay čadəraxun č̣eri Raxiläy čadərane baci,
Raxilän isä biniḳ buxaʒ́uxxo exṭi buše yähäri loxol suruḳṗala torayi boš laxi, ičal laci iz loxol arceney. Lavanen čadəri boš maya uḳayin be͑neġi, ama hiḳḳal tene bä͑ġä͑bi.
Raxilän iz bava pine: "Vi turel hayzesal tez baksa, bez aġa, ama vi äǯuġon maq̇an biq̇i, čupuxxosṭa bakalṭuxunez baksa, šoṭo görä tez haysṭa". Lavanenal dirisṭ čadəra šiṭepi, ama ṗurumal izi biniḳ buxaʒ́uxxo tene bä͑ġä͑bi.
Moṭo aḳi Iaḳovi äǯuġon ṭetäre biq̇i ki, bureqi Lavani ćoye iz boš bakalṭoġo bitova upsa: "Isä upa be͑yn bezi taxsər hiḳä? Bezi ḳä günaxzax bu ki, hayzeri vi amdarxoval exṭi bafṭenu bezi bać̣anexun?
P̣oy ḳä baki, bä͑ġä͑nbi ḳänesa? Vi nu be͑ġi ga tene mandi, isä eča laxa bə͑yex zasṭa vi sa čöpäl bakayin bä͑ġä͑benusa, barta beši q̇oomxonal aḳeq̇aṭun ši hetär baksuna.
Düz q̇a usen vi loxol äšezbe zu! Sal aḳenu vi sürünäxun bakala eġela tamaxṗi bakaz? Eġelxoy q̇a kečiġoy bala saksun hiḳä ki, hašoval tene bake bezi be͑ġala sürün boš!
Ä͑qnä heyvani źomo kofṭiṭay xarǯal zuz zaṗey ki, ziyan va maq̇an lafṭi. * Ičal vaynaḳ tafoot tene buy hevädä bake äš: ġenaxunal carpi bakayin zuz zaṗey ziyana, üšeyal carpi bakayin. *
Ġi tez aḳe zu: nä bezi basksunaz avabake, nä bezi haysṭuna. Ġenaxun ć̣oć̣a be͑ġe ćoye, üšeyal miye bošez bake zu
vi ṭo͑ġo͑l baki me q̇a usenasṭa! Biṗec̣c̣e usen vi ṗä͑ xuyärä haq̇suni galaz äšṗe, u͑q usenal zaynaḳ kalabi sürün gala, här däfäl bezi haq̇q̇ ḳäq̇an baki pi vic̣ käräm vi fikirän badalbi hun!
Avrahami bul ḳoc̣pala, bezi bava Isaaḳi pula haq̇ala Buxaʒ́ux nu bakiyniy, isä hun sa čöpäl ten tadey za. Ama bezi zapi äzyät amc̣ina tene taci, bezi elmoġo laxi äšpsuni äväzä tanedi za Buxaʒ́uġon. Č̣ovaki šü hunal anḳi ki, Buxaʒ́ux bez täräfe".
Lavanen qaybaki Iaḳova metäre pi: "Me xuyärmuxal, ičoġoxun baki äyluxal, vi be͑ś badi haq̇i taġala me sürüyäl -- vi häysä ḳä bunesa bito bezi va tadine. Vi zänden, zu bezi xuyärmoġoy q̇a nävoġoy pisa čurezġon?
Isä eki vaxun sa iräziluġ ġaćeġen, barta gäläǯäye exlät bakayin beši kiyel subutq̇an baki".
Iaḳovenal me ga č̣äḳeceq̇an pi sa źe͑ exṭi tik lanexi.
Oša iz q̇oomxo pine: "Ečanan źe͑ girbanan miya". Šoṭoġonal źe͑ girbi ečeri xäräyen sunay loxol ciṭunpi. Me ganu ičoġoy iräziluġ ġaćesuna aḳesṭeynaḳ arci me xäräyen girbi źe͑ne ṭo͑ġo͑l śumal boṭunṭi.
Lavanen ečeri xäräyen cipi me źe͑ne c̣iya Yegar-Sahaduṭe laxi, Iaḳoven isä Galed. *
Lavanen pine: "Barta me źe͑yurxo ġe vi q̇a bezi arane ġaćeci iräziluġa eyex basṭeynaḳq̇an baki". Šoṭo görä ṭe gane c̣i haṭetäräl manedi -- Galed.
Ama ṭe gane c̣iya Misṗal * nexṭuniy, šoṭo görä ki, Lavanen me äyitmoġoval peney: "Barta yan memiin ǯöybakiṭuxun oša Q̣ONƷ́UĠOY pul beši loxolq̇an baki.
Avabaka ki, hevaxṭesa bezi xuyärmoġo pis be͑ġayvax, šoṭoġoy loxol q̇eräz čuux haq̇i ečayvax, moṭo zu nuval aḳayiz, Buxaʒ́uġon aneksa".
Oša Lavanen Iaḳova saal pine: "Be͑ġa, mo beši tikṗi laxi źe͑ q̇a ečeri xäräyen girbi źe͑yurxo. Barta korox yaynaḳ
beši ġaćeci iräziluġa eyex basṭeynaḳ laxeci sa niśan ḳinäḳq̇an baki. Eki häysä koṭoġoy be͑ś suna äyit taden ki, nä zu va pisluġbseynaḳ me xäräyi q̇a źe͑ne ṭe soġo täräf tez č̣ovakal, nääl hun me soġo täräf č̣ovaki za pisluġ ten bal.
Barta Avrahami q̇a Naxori, barta beši kalboġoy bavan bul ḳoc̣pala Buxaʒ́uġon Ičinq̇an beši äšlä be͑ġi". Iaḳovenal izi bava Isaaḳi pula haq̇ala Buxaʒ́uġo elasṗi äyite tadi.
Šoṭin ečeri ičoġoy čurpi me buruġo q̇urbanal śamepi, me hari q̇oomxoval bitova ḳalepi ki, arci ičuxun sagala śumq̇aṭun käyi. Bitoṭin käyi-u͑neġi, ṭe üšeyal haṭiya manṭundi.
Äyč̣indäri savaxṭan isä Lavanen hayzeri izi xuyärmoġo q̇a nävoġo mučepi, šoṭoġo xeyir-bäräkät tadiyal qaybaki iz ḳoyane taci.
