TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 30

Chapter: 30

Iaḳovi izi čupuxxoy nökärxoxun baki äylux q̇a Iosifi nanaxun baksun
İak'ovi izi çupuxxoy nökərxoxun baki əylux q'a İosifi nanaxun baksun

Verse: 1

Raxilän aḳaṭan ki, ičuxun äyel tene baksa, bureqi izi xunča paxəlluġbi Iaḳovi ćoya čuksa: "Za äyel tada, tene biyoz!"
Raxilən ak'at'an ki, içuxun əyel tene baksa, bureqi izi xunça paxılluğbi İak'ovi ç̌oya çuksa: «Za əyel tada, tene biyoz!»

Verse: 2

Iaḳoviyal me äyiti loxol äǯuġon biq̇i pine: "Va Buxaʒ́uġon äyel nu tadiṭuxun oša, ḳä besez bakon ki zu?"
İak'oviyal me əyiti loxol əcuğon biq'i pine: «Va Buxačuğon əyel nu tadit'uxun oşa, k'ə besez bakon ki zu?»

Verse: 3

Raxilän pine: "Exṭa, va bezi nökär Bilhaz tasṭa. Koṭoxun basḳa, barta vaxun sa äyel ečeri bezi q̇uželq̇an tadi. Metärluġen beziyal vaxun sa äyel bakale".
Raxilən pine: «Ext'a, va bezi nökər Bilhaz tast'a. Kot'oxun bask'a, barta vaxun sa əyel eçeri bezi q'ujelq'an tadi. Metərluğen beziyal vaxun sa əyel bakale».

Verse: 4

Exṭiyal izi nökär Bilha Iaḳova čuux pi tanedi, Iaḳoval baci šoṭoxun baseḳi.
Ext'iyal izi nökər Bilha İak'ova çuux pi tanedi, İak'oval baśi şot'oxun basek'i.

Verse: 5

Bilha bə͑hi baki Iaḳoveynaḳ sa ġare ečeri.
Bilha bǐhi baki İak'oveynak' sa ğare eçeri.

Verse: 6

Ṭe vädä Raxilän pine: "Buxaʒ́uġon bezi äšlä be͑ġi za haq̇lune č̣evḳi, bezi afərəna ibaki za äyelsuz tene efi". Metär piyal äylin c̣iya Dane ^* laxi.
T'e vədə Raxilən pine: «Buxačuğon bezi əşlə běği za haq'lune c'evk'i, bezi afırına ibaki za əyelsuz tene efi». Metər piyal əylin s'iya Dane ^* laxi.

Verse: 7

Oša Raxiläy nökär Bilha saal äylä mandi Iaḳoveynaḳ sa ġaral enečeri.
Oşa Raxiləy nökər Bilha saal əylə mandi İak'oveynak' sa ğaral eneçeri.

Verse: 8

Raxilän pine: "Bez xunčaxunez bul-bula hari zu, ama Buxaʒ́uġon za me davinaxun ćomac̣ine č̣evḳi". Metär piyal äylin c̣iya Nafṭaline ^* laxi.
Raxilən pine: «Bez xunçaxunez bul-bula hari zu, ama Buxačuğon za me davinaxun ç̌omas'ine c'evk'i». Metər piyal əylin s'iya Naft'aline ^* laxi.

Verse: 9

Lean isä be͑neġi ki, ič ene äylä tene mansṭa, exṭi izi nökär Zilṗane Iaḳova čuux pi tadi.
Lean isə běneği ki, iç ene əylə tene manst'a, ext'i izi nökər Zilp'ane İak'ova çuux pi tadi.

Verse: 10

Šoṭinal Iaḳoveynaḳ sa ġare ečeri.
Şot'inal İak'oveynak' sa ğare eçeri.

Verse: 11

Ṭe vädä Lean "bezi naxəšen bineq̇i" pi ečeri äylin c̣iya Gade ^* laxi.
T'e vədə Lean "bezi naxışen bineq'i" pi eçeri əylin s'iya Gade ^* laxi.

Verse: 12

Oša Leay nökär Zilṗa ṗurum äylä mandi Iaḳoveynaḳ sa ġaral enečeri.
Oşa Leay nökər Zilp'a p'urum əylə mandi İak'oveynak' sa ğaral eneçeri.

Verse: 13

Ṭe vädä Lean pine: "Bäxṭävärzu zu! "Bäxṭäväre" pi ḳäšinen aḳesṭalṭun za čupuxxon!" Metär piyal ečeri äylin c̣iya Ašere ^* laxi.
T'e vədə Lean pine: «Bəxt'əvərzu zu! "Bəxt'əvəre" pi k'əşinen ak'est'alt'un za çupuxxon!» Metər piyal eçeri əylin s'iya Aşere ^* laxi.

Verse: 14

Sa ġi, arum exṗala vädäney, Ruvenen čölexun mandragor ^* uḳala meyvinäxun bä͑ġä͑bi izi nana Leaynaḳe ečeri. Raxilän moṭo aḳi Lea pine: "Vi ġaren ečeri mandragorxoxun zaal tandon samal?"
Sa ği, arum exp'ala vədəney, Ruvenen çölexun mandragor ^* uk'ala meyvinəxun bə̌ğə̌bi izi nana Leaynak'e eçeri. Raxilən mot'o ak'i Lea pine: «Vi ğaren eçeri mandragorxoxun zaal tandon samal?»

Verse: 15

Lean isä metäre pi: "Bezi išq̇ara bezi kiyexun exṭenu, isääl bezi ġaren ečeri mandragorxoy loxole vi pul?" Raxilänal qaybaki "isä ki ketären nex, exṭa me üše išq̇ar vaxunq̇an basḳi, hunal moṭay gala za ke mandragorxo tada" pine.
Lean isə metəre pi: «Bezi işq'ara bezi kiyexun ext'enu, isəəl bezi ğaren eçeri mandragorxoy loxole vi pul?» Raxilənal qaybaki "isə ki ketəren nex, ext'a me üşe işq'ar vaxunq'an bask'i, hunal mot'ay gala za ke mandragorxo tada" pine.

Verse: 16

Hametär, biyäsin Iaḳov čölexun ḳoya eġaṭan Lean šoṭay be͑ś č̣eri pine: "Me üše zaxun basḳalnu, me haq̇q̇a bezi ġaren ečeri mandragorxo tadi hazq̇e bez xunčaxun". Iaḳoval baci ṭe üše Leaxun baseḳi.
Hametər, biyəsin İak'ov çölexun k'oya eğat'an Lean şot'ay běš c'eri pine: «Me üşe zaxun bask'alnu, me haq'q'a bezi ğaren eçeri mandragorxo tadi hazq'e bez xunçaxun». İak'oval baśi t'e üşe Leaxun basek'i.

Verse: 17

Buxaʒ́uġon isä Leay afərəġo ibaki šoṭo ṭe üše äyläne mandesṭi, šoval bə͑hi baki Iaḳoveynaḳ qomǯi käräm ġare ečeri.
Buxačuğon isə Leay afırığo ibaki şot'o t'e üşe əyləne mandest'i, şoval bı̌hi baki İak'oveynak' qomci kərəm ğare eçeri.

Verse: 18

Ṭe vädä Lean pine: "Mone, bez nökärä exṭi išq̇ara čuux pi tasṭuni äväzäne tadi za Buxaʒ́uġon". Metär piyal ečeri äylin c̣iya Issaḳare ^* laxi.
T'e vədə Lean pine: «Mone, bez nökərə ext'i işq'ara çuux pi tast'uni əvəzəne tadi za Buxačuğon». Metər piyal eçeri əylin s'iya İssak'are ^* laxi.

Verse: 19

Oša Lea ṗurum äylä mandi Iaḳoveynaḳ u͑qu͑mǯi ġarane ečeri.
Oşa Lea p'urum əylə mandi İak'oveynak' ǔqǔmci ğarane eçeri.

Verse: 20

Ṭe vädä Lean pine: "Buxaʒ́uġon za tadi paye toy tene bu! Isä ene hörmätbale za bez išq̇aren, šoṭo görä ki, u͑q ġarez ečeri šoṭaynaḳ". Metär piyal äylin c̣iya Zevulune ^* laxi.
T'e vədə Lean pine: «Buxačuğon za tadi paye toy tene bu! İsə ene hörmətbale za bez işq'aren, şot'o görə ki, ǔq ğarez eçeri şot'aynak'». Metər piyal əylin s'iya Zevulune ^* laxi.

Verse: 21

Me äyläxun oša Lean sa xuyäräl enečeri, šoṭay c̣iya Dinane laxi.
Me əyləxun oşa Lean sa xuyərəl eneçeri, şot'ay s'iya Dinane laxi.

Verse: 22

Ama Buxaʒ́uġon Raxiläy loxolal be͑neġi, šoṭo äyläne mandesṭi,
Ama Buxačuğon Raxiləy loxolal běneği, şot'o əyləne mandest'i,

Verse: 23

šoval bə͑hi baki sa ġare ečeri. Ṭe vädä Raxilän pine: "Mone, ćomac̣inebi za Buxaʒ́uġon.
şoval bı̌hi baki sa ğare eçeri. T'e vədə Raxilən pine: «Mone, ç̌omas'inebi za Buxačuğon.

Verse: 24

Barta Q̣ONƷ́UĠON zaynaḳ sa ġaral avuzbeq̇an". Metär piyal äylin c̣iya Iosife ^* laxi.
Barta Q'ONČUĞON zaynak' sa ğaral avuzbeq'an». Metər piyal əylin s'iya İosife ^* laxi.

Iaḳovi varlayinšaksun
İak'ovi varlayinşaksun

Verse: 25

Raxilän Iosifa ečeriṭuxun oša Iaḳoven Lavana pine: "Za tärba bezi č̣eri gala, bezi ölkinä qaybakaz.
Raxilən İosifa eçerit'uxun oşa İak'oven Lavana pine: «Za tərba bezi c'eri gala, bezi ölkinə qaybakaz.

Verse: 26

Bezi čupuxxo q̇a äyloġoval tada č̣eġaz taġaz. Hunal avanu ki, šoṭoġo exsṭun bezi haq̇q̇e, vi loxol heq̇ädär äšezbe!"
Bezi çupuxxo q'a əyloğoval tada c'eğaz tağaz. Hunal avanu ki, şot'oğo exst'un bezi haq'q'e, vi loxol heq'ədər əşezbe!»

Verse: 27

Lavanen isä qaybaki metäre pi: "Ägär bezi xätirä čurensasa, čurpa miya, ma taki! Fala be͑ġesṭi avabakezu ki, Q̣ONƷ́UĠON va göräne za xeyir-bäräkät tasṭa".
Lavanen isə qaybaki metəre pi: «Əgər bezi xətirə çurensasa, çurpa miya, ma taki! Fala běğest'i avabakezu ki, Q'ONČUĞON va görəne za xeyir-bərəkət tast'a».

Verse: 28

Oša metäräl pine: "Moṭo görä heq̇ädären čuresasa upa, tadoz".
Oşa metərəl pine: «Mot'o görə heq'ədəren çuresasa upa, tadoz».

Verse: 29

Iaḳoven pine: "Ene zu tez nex. Hunal avanu ki, vi loxol äšṗi elmuxez laxe zu, bezi piin išiġ ḳinäḳez be͑ġe vi sürüġo.
İak'oven pine: «Ene zu tez nex. Hunal avanu ki, vi loxol əşp'i elmuxez laxe zu, bezi piin işiğ k'inək'ez běğe vi sürüğo.

Verse: 30

Zu vi ṭo͑ġo͑l eġaṭan bakala sürün q̇a häysäṭin sürün arane bakala färg piin be͑śe. Bineti bezi tur va, Q̣ONƷ́UĠON va Izi xeyir-bäräkätä tadi avuzebi vi sürüġo bakala heyvanxoy saya. P̣oy zu hevaxṭ ǯöy ḳož-mes bakoz?"
Zu vi t'ǒğǒl eğat'an bakala sürün q'a həysət'in sürün arane bakala fərg piin běše. Bineti bezi tur va, Q'ONČUĞON va İzi xeyir-bərəkətə tadi avuzebi vi sürüğo bakala heyvanxoy saya. P'oy zu hevaxt' cöy k'oj-mes bakoz?»

Verse: 31

Iaḳoven metär uḳaṭan Lavanen pine: "Hun sayǯä upa, zu va ḳä čurensa tadoz". Iaḳoven qaybaki pine: "Za hiḳḳal tene lazəm, ama vi sürüġo memačaġ hetär be͑ġezusa meyin ošal bezi be͑ġsuna čurensasa, va sa šey uḳoz, šoṭo ba, q̇eräz hiḳḳal čurtezsa.
İak'oven metər uk'at'an Lavanen pine: «Hun saycə upa, zu va k'ə çurensa tadoz». İak'oven qaybaki pine: «Za hik'k'al tene lazım, ama vi sürüğo memaçağ hetər běğezusa meyin oşal bezi běğsuna çurensasa, va sa şey uk'oz, şot'o ba, q'erəz hik'k'al çurtezsa.

Verse: 32

Eki vi sürüġo dirisṭ taraḳen, iz bošṭan ḳä čil-čil, campi nääl dirisṭ mä͑yin eġel, q̇uzi saal keči bunesa č̣äḳken beziq̇an baki. Meyin ošal sürün boš ketär sa q̇uzi nääl kečin bala nanaxun bakaṭan, bezi hesabbakale.
Eki vi sürüğo dirist' tarak'en, iz boşt'an k'ə çil-çil, śampi nəəl dirist' mə̌yin eğel, q'uzi saal keçi bunesa c'ək'ken beziq'an baki. Meyin oşal sürün boş ketər sa q'uzi nəəl keçin bala nanaxun bakat'an, bezi hesabbakale.

Verse: 33

Häysä iräziluġa eġayan, gäläǯäye vi za yoxlayinšbsunal iräät bakale. Hari bezi sürün boš čil-čil, campi nääl dirisṭ mä͑yin nu bakala sa eġel q̇a keči aḳayvax, avabakalnu ki, mo bezi vaxun bašq̇i heyvane".
Həysə irəziluğa eğayan, gələcəye vi za yoxlayinşbsunal irəət bakale. Hari bezi sürün boş çil-çil, śampi nəəl dirist' mə̌yin nu bakala sa eğel q'a keçi ak'ayvax, avabakalnu ki, mo bezi vaxun başq'i heyvane».

Verse: 34

Lavanenal qaybaki "lap šaaṭ, barta vi uḳala ḳinäḳq̇an baki" pine.
Lavanenal qaybaki "lap şaat', barta vi uk'ala k'inək'q'an baki" pine.

Verse: 35

Haketäräl biṭun, Lavanen haṭe ġi izi sürünä tarapi iz bošṭan ḳä čil-čil q̇a campi ärkäy keči, mä͑yini loxol mac̣i läkälä q̇a mac̣i zolaġla diši keči saal dirisṭ mä͑yin eġel q̇a q̇uzi bunesa č̣äḳeṗi, ošal exṭi izi ġarmoġone tadi ki, be͑ġeq̇aṭun.
Haketərəl bit'un, Lavanen hat'e ği izi sürünə tarapi iz boşt'an k'ə çil-çil q'a śampi ərkəy keçi, mə̌yini loxol mas'i ləkələ q'a mas'i zolağla dişi keçi saal dirist' mə̌yin eğel q'a q'uzi bunesa c'ək'ep'i, oşal ext'i izi ğarmoğone tadi ki, běğeq'at'un.

Verse: 36

Šoṭoġonal Iaḳoveynaḳ ǯöybi me heyvanxo exṭi ičoġoy bavay sürünäxun xib ġiluġ yaq̇e hama ä͑xil taci ṭiyaṭun burqi šoṭoġo otarišbsa. Iaḳoven isä izi pi ḳinäḳäl bi, čurpi Lavana iču mandi sürünäne be͑ġi.
Şot'oğonal İak'oveynak' cöybi me heyvanxo ext'i içoğoy bavay sürünəxun xib ğiluğ yaq'e hama ə̌xil taśi t'iyat'un burqi şot'oğo otarişbsa. İak'oven isə izi pi k'inək'əl bi, çurpi Lavana içu mandi sürünəne běği.

Verse: 37

Iaḳoven ečeri q̇uanġna, badami saal činari xodurxoy täzä taymoġoxun xoxṗi, bureqi šoṭoġoy loxol ičoġoy qo͑lä č̣eq̇i mac̣i zolaġxo düzbsa.
İak'oven eçeri q'uanğna, badami saal çinari xodurxoy təzə taymoğoxun xoxp'i, bureqi şot'oğoy loxol içoğoy qǒlə c'eq'i mas'i zolağxo düzbsa.

Verse: 38

Oša šoṭoġo heyvanxon xe u͑ġä͑lä nä͑vurxoy boše laxi ki, kečiġon q̇a eġelxon hari xe u͑ġä͑ṭan me zolaġla taymoġoy loxolq̇aṭun be͑ġi. Heyvanxoval gele vädä xe u͑ġä͑ṭanṭun öörä taysay pi,
Oşa şot'oğo heyvanxon xe ǔğə̌lə nə̌vurxoy boşe laxi ki, keçiğon q'a eğelxon hari xe ǔğə̌t'an me zolağla taymoğoy loxolq'at'un běği. Heyvanxoval gele vədə xe ǔğə̌t'ant'un öörə taysay pi,

Verse: 39

här öörä taġaṭan me zolaġla taymux ičoġoy piin be͑śe baksay. Metärluġen, me kečiġoxun q̇a eġelxoxun bakala balooxal bito hari campi, čil-čil nääl läkäläne baksay.
hər öörə tağat'an me zolağla taymux içoğoy piin běše baksay. Metərluğen, me keçiğoxun q'a eğelxoxun bakala balooxal bito hari śampi, çil-çil nəəl ləkələne baksay.

Verse: 40

Iaḳoven me baloġo ǯöye efsay, Lavani sürünä isä tetäre fərədi efsay ki, ičoġoy ćo dim me campi sürün täräfq̇an baki. Hametär, Iaḳoven ičeynaḳ be͑ġi kalabala campi baloġoy say taysun gelenebaksay.
İak'oven me baloğo cöye efsay, Lavani sürünə isə tetəre fırıdi efsay ki, içoğoy ç̌o dim me śampi sürün tərəfq'an baki. Hametər, İak'oven içeynak' běği kalabala śampi baloğoy say taysun gelenebaksay.

Verse: 41

Xe u͑ġsa eġaṭan öörä taġala heyvanxoval be͑neġsay: värkär heyvanesa, iz düzbi campi taymoġo lanexsay nä͑ve boš,
Xe ǔğsa eğat'an öörə tağala heyvanxoval běneğsay: vərkər heyvanesa, iz düzbi śampi taymoğo lanexsay nə̌ve boş,

Verse: 42

zäyif heyvanesa, tää. Metärluġen, värkär heyvanxo ičune kofsṭay, zäyiforox isä Lavana.
zəyif heyvanesa, təə. Metərluğen, vərkər heyvanxo içune kofst'ay, zəyiforox isə Lavana.

Verse: 43

   Samal oša Iaḳov baneki varlu sa amdar, šoṭay sürünen heyvanxone buy: eġelxo q̇a kečiyox, bušurxo q̇a elemxo.
   Samal oşa İak'ov baneki varlu sa amdar, şot'ay sürünen heyvanxone buy: eğelxo q'a keçiyox, buşurxo q'a elemxo.
   Šoṭay čuux q̇a išq̇ar nökärxoval geleney.
   Şot'ay çuux q'a işq'ar nökərxoval geleney.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.