TITUS Texts: Biblia Udica, Versio Nizhensis: Vetus Testamentum

TITUS
Biblia Udica, Versio Nizhensis: Vetus Testamentum
Part No. 29

Chapter: 29

Iaḳovi P̣addan-Arama eysun
İak'ovi P'addan-Arama eysun

Verse: 1

Oša Iaḳov ṗurum yaq̇anebafṭi, hariyal be͑ġč̣eġalač bakala azuḳxoy oćalxo č̣ere.
Oşa İak'ov p'urum yaq'anebaft'i, hariyal běğc'eğalaç bakala azuk'xoy oç̌alxo c'ere.

Verse: 2

Miya ṗaṗi be͑neġi ki, q̇oruġa sa kärize bu, izi ṭo͑ġo͑lal xib dänä eġeli sürü. Me kärizä eġelxo xe u͑ġesṭeynaḳṭun äšṗesṭay, izi ćoyelal kala sa źe͑ne buy.
Miya p'ap'i běneği ki, q'oruğa sa kərize bu, izi t'ǒğǒlal xib dənə eğeli sürü. Me kərizə eğelxo xe ǔğest'eynak't'un əşp'est'ay, izi ç̌oyelal kala sa ǰěne buy.

Verse: 3

Sürüyox hari bito gireġaṭan eġelbe͑ġalxon kärizi ćoyel bakala źe͑na taġaybi eġelxo u͑ġesṭunsṭay, oša qaydi buṭṭunksay kärizi ćoya.
Sürüyox hari bito gireğat'an eğelběğalxon kərizi ç̌oyel bakala ǰěna tağaybi eğelxo ǔğest'unst'ay, oşa qaydi but't'unksay kərizi ç̌oya.

Verse: 4

Iaḳoven eġelbe͑ġalxoxun xavare haq̇i: "Vä͑n mayalunan, ay vičimux?" Šoṭoġonal qaybaki "Xarranaxun" piṭun.
İak'oven eğelběğalxoxun xavare haq'i: «Və̌n mayalunan, ay viçimux?» Şot'oğonal qaybaki "Xarranaxun" pit'un.

Verse: 5

Ṭe vädä Iaḳoven pine: "P̣oy Naxori nävä Lavana čalnanxsa?" Šoṭoġonal "hoo, čalyanxsa" piṭun.
T'e vədə İak'oven pine: «P'oy Naxori nəvə Lavana çalnanxsa?» Şot'oğonal "hoo, çalyanxsa" pit'un.

Verse: 6

Iaḳoven saal xavare haq̇i: "Hetäre Lavan? Šaaṭe?" Eġelbe͑ġalxonal qaybaki "šaaṭe, moval izi xuyär Raxilä, eġelxo izi be͑ś badene enesa" piṭun.
İak'oven saal xavare haq'i: «Hetəre Lavan? Şaat'e?» Eğelběğalxonal qaybaki "şaat'e, moval izi xuyər Raxilə, eğelxo izi běš badene enesa" pit'un.

Verse: 7

Iaḳoven pine: "Biyäbakseynaḳ hälä gelene bu, heyvanxo badala vädä tene. Bartanan xenaxun u͑ġeq̇aṭun, oša č̣idi tašanan samalal oṭṭayinšeq̇aṭun".
İak'oven pine: «Biyəbakseynak' hələ gelene bu, heyvanxo badala vədə tene. Bartanan xenaxun ǔğeq'at'un, oşa c'idi taşanan samalal ot't'ayinşeq'at'un».

Verse: 8

Eġelbe͑ġalxon isä metärṭun ǯoġab tadi: "Beši zor aytenesa, bitoṭin ičoġoy sürüġo ečeri girecine buq̇on ki, kärizi ćoyel bakala źe͑na iz ganuxun galdi beši eġelxo u͑ġesṭes bakayan".
Eğelběğalxon isə metərt'un coğab tadi: «Beşi zor aytenesa, bitot'in içoğoy sürüğo eçeri gireśine buq'on ki, kərizi ç̌oyel bakala ǰěna iz ganuxun galdi beşi eğelxo ǔğest'es bakayan».

Verse: 9

Hametär exlätṗala gala Raxiläl izi sürünäxun sagala hari ṗaneṗi. Šoṭin izi bavay eġelxone be͑ġsay.
Hametər exlətp'ala gala Raxiləl izi sürünəxun sagala hari p'anep'i. Şot'in izi bavay eğelxone běğsay.

Verse: 10

Iaḳoven izi ṭayi Lavani xuyär Raxilä q̇a šoṭin č̣idi ečeri sürünä aḳala ḳinäḳ taci kärizi ćoyel bakala źe͑na taġaybi izi ṭayin sürünä u͑ġesedi.
İak'oven izi t'ayi Lavani xuyər Raxilə q'a şot'in c'idi eçeri sürünə ak'ala k'inək' taśi kərizi ç̌oyel bakala ǰěna tağaybi izi t'ayin sürünə ǔğesedi.

Verse: 11

Oša taci Raxilä mučṗi, mu͑qexun o͑neḳal
Oşa taśi Raxilə muçp'i, mǔqexun ǒnek'al

Verse: 12

izi šu baksunane pi. Raxilän šoṭay izi bavay q̇oomxoxun baksuna q̇a Rebeḳay ġar baksuna avabakala ḳinäḳ ṭiṭeri moṭo izi bava pine.
izi şu baksunane pi. Raxilən şot'ay izi bavay q'oomxoxun baksuna q'a Rebek'ay ğar baksuna avabakala k'inək' t'it'eri mot'o izi bava pine.

Verse: 13

Lavanen izi xunčey ġar Iaḳovi eysuna ibakala ḳinäḳ hayzeri šoṭay be͑śe č̣eri, šoṭo q̇užbi-mučṗi izi ḳoyane ečeri. Iaḳoven izi bel hariṭoġoval bitova exlätṗiṭuxun oša
Lavanen izi xunçey ğar İak'ovi eysuna ibakala k'inək' hayzeri şot'ay běše c'eri, şot'o q'ujbi-muçp'i izi k'oyane eçeri. İak'oven izi bel harit'oğoval bitova exlətp'it'uxun oşa

Verse: 14

Lavanen pine: "Bezi ṗiyaxune bu vasṭa, ə͑śa q̇oomyan yan!" Metär piyal Iaḳova izi ḳoya enefi.
Lavanen pine: «Bezi p'iyaxune bu vast'a, ı̌ša q'oomyan yan!» Metər piyal İak'ova izi k'oya enefi.

Iaḳovi Lea q̇a Raxilä haq̇sun
İak'ovi Lea q'a Raxilə haq'sun

Hari sa xaš č̣ovakiṭuxun oša
Hari sa xaş c'ovakit'uxun oşa

Verse: 15

Lavanen Iaḳova pine: "Düze, yan q̇oomyan, ama mo šo upsun tene ki, hun bez loxol nisyä äšṗalanu. Za upa, ḳän čuresa vi bezi loxol äšpsuni gala tadaz?"
Lavanen İak'ova pine: «Düze, yan q'oomyan, ama mo şo upsun tene ki, hun bez loxol nisyə əşp'alanu. Za upa, k'ən çuresa vi bezi loxol əşpsuni gala tadaz?»

Verse: 16

Lavani isä ṗä͑ xuyäre buy: kalo Leaney, mic̣iḳoval Raxilä.
Lavani isə p'ə̌ xuyəre buy: kalo Leaney, mis'ik'oval Raxilə.

Verse: 17

Lea amdara läčäq̇tenesay, Raxiläy isä ham ćo gözäley, ham bädän.
Lea amdara ləçəq'tenesay, Raxiləy isə ham ç̌o gözəley, ham bədən.

Verse: 18

Iaḳovenal Raxilä izi üḳe basḳeney pi qaybaki Lavana pine: "Vi mic̣iḳ xuyär Raxiläz čuresa. Tandon za? Vi ke xuyärä haq̇es bakseynaḳ vi loxol vu͑ġ usen äšṗoz".
İak'ovenal Raxilə izi ük'e bask'eney pi qaybaki Lavana pine: «Vi mis'ik' xuyər Raxiləz çuresa. Tandon za? Vi ke xuyərə haq'es bakseynak' vi loxol vǔğ usen əşp'oz».

Verse: 19

Lavanenal "ḳäz nex ki, exṭi nu čalxala sa amdara tasṭunaxunsa va tadayiz šaaṭe bakon, čurpa äšṗa bez ṭo͑ǧo͑l" pine.
Lavanenal "k'əz nex ki, ext'i nu çalxala sa amdara tast'unaxunsa va tadayiz şaat'e bakon, çurpa əşp'a bez t'ǒǧǒl" pine.

Verse: 20

Hametär, Iaḳoven Raxilä haq̇es bakseynaḳ vu͑ġ usen Lavani loxol äšebi. Ama xuyär iz üḳe ṭemane basḳey ki, me vu͑ġ usen ičeynaḳ sa hema ġi ḳinäḳe hari č̣ovaki.
Hametər, İak'oven Raxilə haq'es bakseynak' vǔğ usen Lavani loxol əşebi. Ama xuyər iz ük'e t'emane bask'ey ki, me vǔğ usen içeynak' sa hema ği k'inək'e hari c'ovaki.

Verse: 21

Vädä hari ṗaṗaṭanal Iaḳoven Lavana pine: "Mone, beši laxi vaxṭ hari č̣ovaneki, isä bezi čuġo za tada tašoz".
Vədə hari p'ap'at'anal İak'oven Lavana pine: «Mone, beşi laxi vaxt' hari c'ovaneki, isə bezi çuğo za tada taşoz».

Verse: 22

Lavanenal ečeri ṭe pervare bakalṭoġo bitova ḳalpi kala sa laśḳoye č̣ovakesṭi.
Lavanenal eçeri t'e pervare bakalt'oğo bitova k'alpi kala sa lašk'oye c'ovakest'i.

Verse: 23

Biyäbakaṭan isä Iaḳovi ṭo͑ġo͑l Raxilä tää, exṭi Leane yaq̇abi. Iaḳoval šoṭoxun baseḳi.
Biyəbakat'an isə İak'ovi t'ǒğǒl Raxilə təə, ext'i Leane yaq'abi. İak'oval şot'oxun basek'i.

Verse: 24

Leay ṭo͑ġo͑l baki šoṭo q̇ulluġbseynaḳ isä izi čuux-nökär Zilṗane tadi.
Leay t'ǒğǒl baki şot'o q'ulluğbseynak' isə izi çuux-nökər Zilp'ane tadi.

Verse: 25

Hari käyebaki, Iaḳovenal be͑neġi ki, mone, ičuxun basḳiyo Raxilä tää, Leane! Šoṭin hayzeri Lavani ṭo͑ġo͑l taci pine: "Mo he äše bez bel enčeri? Hetäryan äyitṗey yan? Teyan pi ki, vi loxol vu͑ġ usen äšṗoz, hunal za moṭay gala Raxilä tadalnu? P̣oy isä heṭu görän za fereṭṭi?"
Hari kəyebaki, İak'ovenal běneği ki, mone, içuxun bask'iyo Raxilə təə, Leane! Şot'in hayzeri Lavani t'ǒğǒl taśi pine: «Mo he əşe bez bel ençeri? Hetəryan əyitp'ey yan? Teyan pi ki, vi loxol vǔğ usen əşp'oz, hunal za mot'ay gala Raxilə tadalnu? P'oy isə het'u görən za feret't'i?»

Verse: 26

Lavanen qaybaki metäre pi: "Beši miya kala xuyäräxun be͑ś mic̣iḳṭu tasṭun ädät tene.
Lavanen qaybaki metəre pi: «Beşi miya kala xuyərəxun běš mis'ik't'u tast'un ədət tene.

Verse: 27

Yan bito hälä me sa šamaṭal laśḳoyi loxol bakalyan, barta me sa šamaṭ č̣ovakeq̇an, oša eki bezi mic̣iḳ xuyäräl tadoz va. Ama Raxilä haq̇suni toya ǯöy hesabboz, meyin oša sa vu͑ġ usenal äšṗin buq̇on bez loxol".
Yan bito hələ me sa şamat'al lašk'oyi loxol bakalyan, barta me sa şamat' c'ovakeq'an, oşa eki bezi mis'ik' xuyərəl tadoz va. Ama Raxilə haq'suni toya cöy hesabboz, meyin oşa sa vǔğ usenal əşp'in buq'on bez loxol».

Verse: 28

   Iaḳoval iräzinebaki.
   İak'oval irəzinebaki.
   Laśḳoyi vu͑ġu͑mǯi ġi č̣ovakiṭuxun oša Iaḳoven hari Raxiläl tanešeri.
   Lašk'oyi vǔğǔmci ği c'ovakit'uxun oşa İak'oven hari Raxiləl taneşeri.

Verse: 29

Lavanen Raxiläy bać̣anexun isä izi Bilha uḳala čuux-nökäräne tadi.
Lavanen Raxiləy bač'anexun isə izi Bilha uk'ala çuux-nökərəne tadi.

Verse: 30

Hametär, Iaḳoven Raxiläl haq̇i ičeynaḳ čuuxe bi, moṭay galal vu͑ġ usen Lavani loxol äšebi. Šoṭin Raxilä Leaxun gelene čuresay.
Hametər, İak'oven Raxiləl haq'i içeynak' çuuxe bi, mot'ay galal vǔğ usen Lavani loxol əşebi. Şot'in Raxilə Leaxun gelene çuresay.

Iaḳovi Leaxun baki äylux
İak'ovi Leaxun baki əylux

Verse: 31

Q̣ONƷ́UĠON aḳaṭan ki, Lea Iaḳovi üḳe ṗä͑mǯi galane, šoṭo usum äyläne mandesṭi, Raxiläy isä äyel tene baksay.
Q'ONČUĞON ak'at'an ki, Lea İak'ovi ük'e p'ə̌mci galane, şot'o usum əyləne mandest'i, Raxiləy isə əyel tene baksay.

Verse: 32

Lea bə͑hi baki sa ġare ečeri, iz c̣iya Ruven ^* laxiyal pine: "Q̣ONƷ́UĠON bez därdä aneḳi, isä bez išq̇aren za čureġale".
Lea bı̌hi baki sa ğare eçeri, iz s'iya Ruven ^* laxiyal pine: «Q'ONČUĞON bez dərdə anek'i, isə bez işq'aren za çureğale».

Verse: 33

Oša Lea ṗurum äyläne mandi, hariyal ṗurum ġare baki. Šoṭin pine: "Q̣ONƷ́UĠON inebaki bezi išq̇aren za nu čuresuna, šoṭo görä za sa ġaral tanedi!" Ečeriyal äylin c̣iya Simeone ^* laxi.
Oşa Lea p'urum əyləne mandi, hariyal p'urum ğare baki. Şot'in pine: «Q'ONČUĞON inebaki bezi işq'aren za nu çuresuna, şot'o görə za sa ğaral tanedi!» Eçeriyal əylin s'iya Simeone ^* laxi.

Verse: 34

Samal vädä č̣ovakiṭuxun oša Lea saal bə͑hine baki, sa ġar ečeriyal pine: "Isä ene bez išq̇ar za ġaćeġale, šoṭo görä ki, xib ġarez ečeri zu šoṭaynaḳ". Metär piyal äylin c̣iya Levine ^* laxi.
Samal vədə c'ovakit'uxun oşa Lea saal bı̌hine baki, sa ğar eçeriyal pine: «İsə ene bez işq'ar za ğaç̌eğale, şot'o görə ki, xib ğarez eçeri zu şot'aynak'». Metər piyal əylin s'iya Levine ^* laxi.

Verse: 35

   Me äyläxun oša Lea saal bə͑hine baki, hariyal ṗurum ġare baki. Šoṭin "isä ene Q̣ONƷ́UĠO alxəšṗoz" pi äylin c̣iya Iudane ^* laxi.
   Me əyləxun oşa Lea saal bı̌hine baki, hariyal p'urum ğare baki. Şot'in "isə ene Q'ONČUĞO alxışp'oz" pi əylin s'iya İudane ^* laxi.
   Šo oša ene äylä tene mandi.
   Şo oşa ene əylə tene mandi.

This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.