TITUS
Biblia Udica, Versio Nizhensis: Vetus Testamentum
Part No. 28
Previous part

Chapter: 28 


Isaaḳen Iaḳova Lavani ṭo͑ġo͑l yaq̇absun
İsaak'en İak'ova Lavani t'ǒğǒl yaq'absun


Verse: 1  Link to rar   Hametär, Isaaḳen Iaḳova iz ṭo͑ġo͑l ḳalpi šoṭay taġala yaq̇a xeyir-bäräkät tadiṭuxun oša, šoṭo me äyitmoġo pi tapšurebi: "Känanluġoxun xuyär ma haq̇a.
   Hametər, İsaak'en İak'ova iz t'ǒğǒl k'alpi şot'ay tağala yaq'a xeyir-bərəkət tadit'uxun oşa, şot'o me əyitmoğo pi tapşurebi: «Kənanluğoxun xuyər ma haq'a.

Verse: 2  Link to rar   Hayzeri P̣addan-Arama, vi nanay bava Beṭueli ḳoyan taysa. Ṭiya vi nanay viči Lavani xuyärmoġoxun sunṭu haq̇a.
   Hayzeri P'addan-Arama, vi nanay bava Bet'ueli k'oyan taysa. T'iya vi nanay viçi Lavani xuyərmoğoxun sunt'u haq'a.

Verse: 3  Link to rar   Barta Bitova Bašarbala Buxaʒ́uġon va xeyir-bäräkätq̇an tadi, barta vaxun bakala äyloġoy saya ṭeq̇ädärq̇an bi ki, vaxun azuḳxoq̇an töräyinšaki.
   Barta Bitova Başarbala Buxačuğon va xeyir-bərəkətq'an tadi, barta vaxun bakala əyloğoy saya t'eq'ədərq'an bi ki, vaxun azuk'xoq'an törəyinşaki.

Verse: 4  Link to rar   Barta Buxaʒ́uġon Avrahama tadi xeyir-bäräkät va q̇a vaxun bakiṭoġoval č̣ovakeq̇an, hunal Buxaʒ́uġon Avrahama tadi oćali, vi häysä q̇ärib ḳinäḳ yäšäyinšala me oćali q̇onʒ́ux bakavax". *
   Barta Buxačuğon Avrahama tadi xeyir-bərəkət va q'a vaxun bakit'oğoval c'ovakeq'an, hunal Buxačuğon Avrahama tadi oç̌ali, vi həysə q'ərib k'inək' yəşəyinşala me oç̌ali q'ončux bakavax». *

Verse: 5  Link to rar   Metär piyal Isaaḳen Iaḳova yaq̇anebadi, Iaḳoval hayzeri P̣addan-Arama, izi nana Rebeḳay č̣eri oćalane taci. Rebeḳay bava aramlu Beṭuel q̇a izi ġar Lavan ṭiyaṭun baksay.
   Metər piyal İsaak'en İak'ova yaq'anebadi, İak'oval hayzeri P'addan-Arama, izi nana Rebek'ay c'eri oç̌alane taśi. Rebek'ay bava aramlu Bet'uel q'a izi ğar Lavan t'iyat'un baksay.


Esaven Ismaili xuyärä haq̇sun
Esaven İsmaili xuyərə haq'sun


Verse: 6  Link to rar   Esaven Iaḳovi P̣addan-Arama taysunal avanebaki, šoṭo xeyir-bäräkät tadi yaq̇abadaṭan tapšurbiṭoġoval. Isaaḳen Iaḳova "känanluġoxun xuyär ma haq̇a, taki ṭeṭiin xuyär haq̇a" upsun,
   Esaven İak'ovi P'addan-Arama taysunal avanebaki, şot'o xeyir-bərəkət tadi yaq'abadat'an tapşurbit'oğoval. İsaak'en İak'ova "kənanluğoxun xuyər ma haq'a, taki t'et'iin xuyər haq'a" upsun,

Verse: 7  Link to rar   Iaḳovenal izi nana-bavay äyitä be͑ġi hayzeri P̣addan-Arama taysun -- morox bito hari Esava ṗaneṗi.
   İak'ovenal izi nana-bavay əyitə běği hayzeri P'addan-Arama taysun -- morox bito hari Esava p'anep'i.

Verse: 8  Link to rar   Ṭe vädä Esaven q̇amišebaki ki, izi taci känanlu xuyärmoġoxun čuux haq̇i ešṭun izi bava Isaaḳi üḳe sa därde.
   T'e vədə Esaven q'amişebaki ki, izi taśi kənanlu xuyərmoğoxun çuux haq'i eşt'un izi bava İsaak'i ük'e sa dərde.

Verse: 9  Link to rar   Hayzeriyal Avrahami ġar Ismaili ćomo taci sa xuyäräl šoṭoġoxune haq̇i. Mo Ismaili xuyär Maxalaṭey, Nevayoti xunči. Hametär, Esavi čupuxxoy ṗo͑ġo͑ känanluġoxun, soġoval Ismaili ḳoyaxune baki.
   Hayzeriyal Avrahami ğar İsmaili ç̌omo taśi sa xuyərəl şot'oğoxune haq'i. Mo İsmaili xuyər Maxalat'ey, Nevayoti xunçi. Hametər, Esavi çupuxxoy p'ǒğǒ kənanluğoxun, soğoval İsmaili k'oyaxune baki.


Q̣onʒ́uġoy Iaḳova Beṭela aḳeci šoṭo äyit tasṭun
Q'ončuğoy İak'ova Bet'ela ak'eśi şot'o əyit tast'un


Verse: 10  Link to rar   Metärluġen, Iaḳov Beer-Ševinaxun č̣eri Xarrana yaq̇anebafṭi.
   Metərluğen, İak'ov Beer-Şevinaxun c'eri Xarrana yaq'anebaft'i.

Verse: 11  Link to rar   Sa heq̇ädär yaq̇ taciṭuxun oša be͑ġ bureqi batksa, hariyal lap biyäbakaṭan Iaḳoven sa ga bä͑ġä͑bi čurepi ki, miya basḳi käybale. Sa źe͑ exṭi izi biin oq̇a laxiyal basḳi neṗaxeci.
   Sa heq'ədər yaq' taśit'uxun oşa běğ bureqi batksa, hariyal lap biyəbakat'an İak'oven sa ga bə̌ğə̌bi çurepi ki, miya bask'i kəybale. Sa ǰě ext'i izi biin oq'a laxiyal bask'i nep'axeśi.

Verse: 12  Link to rar   Šoṭin neṗe aksa burqi, be͑neġi ki, sa piläkäne bu, iz bul taci göynule ṗaṗsa, Buxaʒ́uġoy angelxoval ṭe piläkäni loxolxun laci ciṭunsa. *
   Şot'in nep'e aksa burqi, běneği ki, sa piləkəne bu, iz bul taśi göynule p'ap'sa, Buxačuğoy angelxoval t'e piləkəni loxolxun laśi śit'unsa. *

Verse: 13  Link to rar   Q̣ONƷ́UĠON isä me piläkäni lap alin muxe loxol čurpi iču metäre nex: "Zu vi bavoġoy, Avrahami q̇a Isaaḳi Buxaʒ́ux bakala Q̣ONƷ́UXZU, Va q̇a vaxun bakiṭoġo tadoz Zu vi häysä bul laxi basḳi oćala. *
   Q'ONČUĞON isə me piləkəni lap alin muxe loxol çurpi içu metəre nex: «Zu vi bavoğoy, Avrahami q'a İsaak'i Buxačux bakala Q'ONČUXZU, Va q'a vaxun bakit'oğo tadoz Zu vi həysə bul laxi bask'i oç̌ala. *

Verse: 14  Link to rar   Oćali ćoyel bakala q̇ume dänoġoy hama gele bakale vaxun töräyinšakiṭoġoy say, dünyäni biṗ ṭo͑ġo͑lxunal šoṭoġoy säs č̣eġale. Vaxun q̇a vaxun töräyinšaki näsiläxun haq̇alṭun xeyir-bäräkätä oćali ćoyel bakala azuḳxoy bitoṭin. *
   Oç̌ali ç̌oyel bakala q'ume dənoğoy hama gele bakale vaxun törəyinşakit'oğoy say, dünyəni bip' t'ǒğǒlxunal şot'oğoy səs c'eğale. Vaxun q'a vaxun törəyinşaki nəsiləxun haq'alt'un xeyir-bərəkətə oç̌ali ç̌oyel bakala azuk'xoy bitot'in. *

Verse: 15  Link to rar   Zu dim vaxun bakoz, va Bezi q̇änädi oq̇a exṭi q̇orišoz. Hun maya taġalnu taki, Bezi sa kul vi loxol bakale, ama va ṗurumal qaydi me oćala ečoz. Va äyitez tasṭa, me piyorox hari bex ṗaṗaminal Bezi äyiti loxol čurḳoz".
   Zu dim vaxun bakoz, va Bezi q'ənədi oq'a ext'i q'orişoz. Hun maya tağalnu taki, Bezi sa kul vi loxol bakale, ama va p'urumal qaydi me oç̌ala eçoz. Va əyitez tast'a, me piyorox hari bex p'ap'aminal Bezi əyiti loxol çurk'oz».

Verse: 16  Link to rar   Iaḳoven neṗe bošṭan muġurbaki pine: "Mo hetär äše? Hamiyane Q̣ONƷ́UX, bezi bula laxi basḳi hame gala! Sal bezi xavaral tene buy!"
   İak'oven nep'e boşt'an muğurbaki pine: «Mo hetər əşe? Hamiyane Q'ONČUX, bezi bula laxi bask'i hame gala! Sal bezi xavaral tene buy!»

Verse: 17  Link to rar   Metär fikirbiyal iču q̇ə͑yene haq̇i, šoṭin pine: "Haṭetär sa ga tene me ga! Buxaʒ́uġon Ičeynaḳ ḳožbi, göynuxun hari ciġala gane mo!"
   Metər fikirbiyal içu q'ı̌yene haq'i, şot'in pine: «Hat'etər sa ga tene me ga! Buxačuğon İçeynak' k'ojbi, göynuxun hari śiğala gane mo!»

Verse: 18  Link to rar   Käykäymoġo isä Iaḳoven hayzeri izi biin oq̇a laxi źe͑na exṭi tikebi ki, Buxaʒ́uġon Ičeynaḳ ḳožbi me ga č̣äḳeceq̇an. Źe͑ne Buxaʒ́uġoy c̣iyen laxesuna aḳesṭeynaḳal ečeri šoṭay loxol zeytuni č̣äyine cipi.
   Kəykəymoğo isə İak'oven hayzeri izi biin oq'a laxi ǰěna ext'i tikebi ki, Buxačuğon İçeynak' k'ojbi me ga c'ək'eśeq'an. J̌ěne Buxačuğoy s'iyen laxesuna ak'est'eynak'al eçeri şot'ay loxol zeytuni c'əyine śipi.

Verse: 19  Link to rar   Iaḳoven ṭe gane c̣iya Beṭele * laxi, manu ki, oša dirisṭ ṭe šähäri c̣iyal haṭetär manedi. Be͑śaxun isä šähäri c̣i Luzey.
   İak'oven t'e gane s'iya Bet'ele * laxi, manu ki, oşa dirist' t'e şəhəri s'iyal hat'etər manedi. Běšaxun isə şəhəri s'i Luzey.

Verse: 20  Link to rar   Oša Iaḳoven elasṗi pine: "Ägär Buxaʒ́ux zaxun baki bezi taġala me yaq̇a za q̇orišayin, bezi sa tapan śuma q̇a bezi loxol laḳala paltara ṗaṗesṗayin,
   Oşa İak'oven elasp'i pine: «Əgər Buxačux zaxun baki bezi tağala me yaq'a za q'orişayin, bezi sa tapan šuma q'a bezi loxol lak'ala paltara p'ap'esp'ayin,

Verse: 21  Link to rar   zuval bezi elmux bez boš qaybaki bezi č̣eri gala eyes bakayiz, bezi bavay ḳoya bez bul dinǯ yäšäyinšes bakayiz, Q̣ONƷ́UX bez Buxaʒ́ux bakale!
   zuval bezi elmux bez boş qaybaki bezi c'eri gala eyes bakayiz, bezi bavay k'oya bez bul dinc yəşəyinşes bakayiz, Q'ONČUX bez Buxačux bakale!

Verse: 22  Link to rar   Bezi tikṗi laxi me źe͑ čurpi ga isä Buxaʒ́uġo bul ḳoc̣pala ga bakale! Buxaʒ́uġon za tadalṭoġoy vic̣ payaxun sunṭuval qaydi Iču tadoz!"
   Bezi tikp'i laxi me ǰě çurpi ga isə Buxačuğo bul k'os'pala ga bakale! Buxačuğon za tadalt'oğoy vis' payaxun sunt'uval qaydi İçu tadoz!»

Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.