Isaaḳ ene q̇ožabakeney, izi pulmoġonal tene aksay. Sa ġi šoṭin izi kala ǧar Esava izi ṭo͑ġo͑l ḳalpi pine: "Bezi ġar". Esavenal qaybaki "izbaksa, bez bava" pine.
Oša Isaaḳen äyitpsa burqi pine: "Zu ene q̇ožabakezu, ġeyin äyč̣inäl avabakala šey tene.
Hayza o͑xä͑lbseynaḳ lazəm bakalṭoġo exṭa čöle taki, ġe bez c̣iyen o͑xä͑lä č̣eġalnu.
O͑xälbi ečeri heyvana bezi čureġalṭullariḳ häzirba zaynaḳ eča, zuval häläki bezi elmux bez boše, ṭe ṭadlu ukuna käyi va xeyir-bäräkät tadoz".
Me exlätä bitova Rebeḳan inebaki. Esaval hayzeri o͑xä͑lbseynaḳ čöle taġala ḳinäḳ
izi ġar Iaḳova ḳalpi metäre pi: "Vi bavan vi vičä piṭoġoz ibaki, Esava pine ki,
taci ičeynaḳ heyvanq̇an o͑xä͑lbi ečeri. Šoṭo boxi vi bavaynaḳ tašale, šoṭinal izi čureġala ṭe ṭadlu ukuna käyi vi vičä xeyir-bäräkät tadale. Häläki izi elmux izi boše, Q̣ONƷ́UĠOXUN eġala xeyir-bäräkätä tasṭune čuresa šoṭo.
Isä ibaka va ḳäz nex, bez ġar.
Taki sürünäxun ṗä͑ dänä än šaaṭ q̇uzi manunesa č̣äḳṗa eča miya, šoṭoġo vi bavan čureġala ḳinäḳ boxi häzirboz.
Tašeri lanxon iz be͑ś, šoṭinal häläki izi elmux iz boše, šoṭoġoxun käyi vane izi xeyir-bäräkätä tadon".
Iaḳoven isä qaybaki izi nana metäre pi: "Bez viči Esavi bädän dirisṭ poplane, bez loxol isä pop tene bu.
Iz kula za duġayin ḳäz bon? Bavan avabakayin ki, iču äfčiz duġsa, xeyir-bäräkäti tää, q̇arġiši q̇onʒ́ux bakoz".
Iz nanan isä šoṭo pine: "Vi c̣iya duġi uḳala q̇arġišxo hari bezi o͑yneq̇an bari, bezi ġar! Hun bez uḳalṭu ba: taki bezi piṭoġo eča".
Hametär, Iaḳoven taci q̇uziġo enečeri, izi nananal šoṭoġo bavan čureġalṭullariḳ boxi häzirebi.
Oša Rebeḳan taci ḳoyaxun izi kala ġar Esavi än šaaṭ paltarxoxun ečeri šoṭoġo izi mic̣iḳ ġar Iaḳovane lapesṭi.
Šoṭay kulmoġo q̇a ozana isä q̇uzin ṭolene bäč̣ürpi.
Axərda izi häzirbi ukuna q̇a śumal Iaḳovi kiyel biq̇esṭi yaq̇anebi Isaaḳi ṭo͑ġo͑l.
Iaḳoven izi bavay ṭo͑ġo͑l hari "ay bava" pi ḳalepi, bavanal qaybaki "miyazu, bezi ġar!" pine. Oša šoṭoxun "hun bezi mani ġaren baki?" pi xavar haq̇aṭan
Iaḳoven pine: "Vi kala ġarzu -- Esav. Vi za piṭoġo bizu, isä hayza arca me bezi o͑xä͑lbi heyvani yeq̇axun uka ki, oša za xeyir-bäräkät tadavax".
Isaaḳen izi ġara pine: "He usumen o͑xä͑lbi qaybaki, bez ġar?" Iaḳovenal "vi Buxaʒ́ux bakala Q̣ONƷ́UĠON Ičine heyvana bez be͑ś č̣evḳi" pine.
Ṭe vädä Isaaḳen pine: "ω͑śa eki, bez ġar, va bez kula duġi avabakoz vi Esav baki nu baksuna".
Iaḳov izi bava Isaaḳa ə͑śalayinšebaki, šoṭinal izi kula duġi pine: "Me säs Iaḳovi säse, ama kulmux Esavi kulmuxe".
Isaaḳen Iaḳova Esavaxun č̣äḳṗes tene baksay, axəri moṭay kulmuxal Esavi kulmoġollariḳ poplaney. Šoṭo göräl Iaḳova xeyir-bäräkät tadi
saal xavare haq̇i: "Hun hägigiyal bezi ġar Esavnu?" Iaḳovenal qaybaki "hoo" pine.
Ṭe vädä Isaaḳen pine: "Vi o͑xä͑lbi ečeri yeq̇axun bezi be͑ś laxa, bezi ġar. Käyiṭuxun oša va xeyir-bäräkät tadoz". Iaḳovenal izi ečeri ukuna q̇a fina bavay be͑ś lanexi, šoṭinal käyi-u͑ġiṭuxun oša
pine: "Isä ə͑śabaka za mučṗa, bez ġar".
Iaḳovenal ə͑śalayinšaki šoṭo mučḳaṭan Esavi paltari ade lafṭi izi bavay bo͑xmo͑ġo.
Barta Buxaʒ́uġon göynuxun hari arcala xoya q̇a oćalen tadala bara vaxun kammaq̇anbi,
Barta millätxonq̇an va q̇ulluġbi,
Iaḳoven xeyir-bäräkätä haq̇i izi bavay ṭo͑ġo͑lxun č̣eġala vädine Esave o͑xä͑läxun qaybaki.
Ečeriyal izi häzirbala ukunxoy än šaaṭṭu häzirbiṭuxun oša šoṭo izi bavaynaḳ tašeri pine: "Hayza arca, bez bava, vi ġaren o͑xä͑lbi harene. Mone, vaynaḳ häzirbi ukunaxun uka za xeyir-bäräkät tada".
Ṭe vädä Isaaḳen "hun šunu?" pi xavare haq̇i, Esavenal qaybaki "zuzu, vi kala ġar Esavzu" pine.
Moṭo ibakaṭan Isaaḳa ṭuṭultinene haq̇i, šoṭin pine: "P̣oy ṭevär hariyo šuvay? Zaynaḳ izi o͑xä͑lbi heyvani yeq̇axun häzirbi ukune ečeri šoṭin, zuval ṭe ukunaxun käyi šoṭoz tadi bezi xeyir-bäräkätä. Xeyir-bäräkätä šuz tadesa, šoṭayal bakale!"
Izi bavay uḳalṭoġo ibakaṭan Esaven iču efes nu baki osṭaar harayepi, šoṭin o͑neḳa pine: "P̣oy zu, ay bava? Zaal tada vi xeyir-bäräkätä, za xeyir-bäräkätsuz ma efa!"
Isaaḳen isä qaybaki "vi vičen hari vaynaḳ häzirbaki xeyir-bäräkätä bič̣luġ äšṗesṭi zaxun haneq̇i" pine.
Ṭe vädä Esaven pine: "Šoṭay c̣iya Iaḳov haṭetär teṭun laxe! * Moṭoxun ṗä͑mǯi käräme ki, za fereṭesṭa: süfṭä ḳožin kala ġar baksuni exṭiyäräne haq̇i bezi kiyexun, isääl zaynaḳ häzirbaki xeyir-bäräkätä!" Oša saal äyitpsa burqi pine: "Bakes tene bakon ki, vi zaynaḳ efi xeyir-bäräkät nu bakane".
Isaaḳen Esava metäre ǯoġab tadi: "Šoṭo vi kaloz laxi zu, beši näsiläxun
Esaven izi bava pine: "Yäni vi tadala q̇eräz sa xeyir-bäräkät tevax bu, bezi bava? Zaxun vi xeyir-bäräkätä kammaba, bava!" Metär piyal hönkür-hönkür o͑nenepi. *
Ṭe vädä Isaaḳen izi ġara metäre pi:
Ä͑me zoren, q̇ələnǯ fä͑ldi vi śuma q̇azayinšalnu hun,
Padč. 8:20
Ama bavan Iaḳova tadi xeyir-bäräkätä görä Esaven izi vičä nifrätpsane burqi. Šoṭin iz boš metäre nexey: "Male mande, yas efalyan samal oša bavaynaḳ. Besṗoz ṭe vädä koṭo!"
Izi kala ġar Esavi pi me äyitmux hari Rebeḳay u͑mu͑ġo ṗaneṗi, šoṭinal izi mic̣iḳ ġar Iaḳova izi ṭo͑ġo͑l ḳalpesṭi pine: "Avanu ki, vi vičen va bespsune čuresa? Vaxun izi äǯuġo haq̇suni yaq̇a moṭosṭane aksa.
Isä ibaka ḳäz nex, bez ġar: č̣eki taki memiin! Bezi viči Lavani ṭo͑ġo͑l, Xarrana ṭiṭa.
Vi vičey hirs basḳamin ṭiya baka.
Hevaxṭ izi äǯuġ č̣ovanekon, vi biṭoġo izi eyexun č̣eveḳon -- va ḳalpi ečesṭoz. Tene šoṭin va besṗale, ošal izi bula ukale".
Isaaḳa isä, šoṭinal Iaḳovi taysuna ä͑m zapeq̇an pi Rebeḳan metäre pi: "Boševṭunki za Esaven haq̇i me xeṭlu xuyärmoġon. Iaḳovenal taci šoṭoġoxun xuyär haq̇ayin bezi ġi mä͑yine".
