TITUS
Biblia Udica, Versio Nizhensis: Vetus Testamentum
Part No. 26
Previous part

Chapter: 26 


Isaaḳen Rebeḳa izi xunči pi čalxesṭun
İsaak'en Rebek'a izi xunçi pi çalxest'un


Verse: 1  Link to rar   Oša ṭetäre baki ki, Avrahami dööräsṭä baki ḳinäḳ, ṭe oćala ṗurum busaluġe hari, Isaaḳal hayzeri Gerara, filisṭluġoy padčaġ Avimeleḳi ṭo͑ġo͑le taci.
   Oşa t'etəre baki ki, Avrahami döörəst'ə baki k'inək', t'e oç̌ala p'urum busaluğe hari, İsaak'al hayzeri Gerara, filist'luğoy padçağ Avimelek'i t'ǒğǒle taśi.

Verse: 2  Link to rar   Miya hariṭuxun oša Q̣ONƷ́UX Isaaḳa aḳeci pine: "Me oćalxoxun č̣eri Misirä ma taki, Bezi va uḳala ölkinä manda.
   Miya harit'uxun oşa Q'ONČUX İsaak'a ak'eśi pine: «Me oç̌alxoxun c'eri Misirə ma taki, Bezi va uk'ala ölkinə manda.

Verse: 3  Link to rar   Miya čurpa, Zuval vaxun bakoz, va xeyir-bäräkät tadoz. Vi bava Avrahama tadi äyiti loxol čurḳoz Zu, me oćalxoval bito vi bakale, vaxun töräyinšakiṭoġo mandale vi häysä čurpi ganxo bito!
   Miya çurpa, Zuval vaxun bakoz, va xeyir-bərəkət tadoz. Vi bava Avrahama tadi əyiti loxol çurk'oz Zu, me oç̌alxoval bito vi bakale, vaxun törəyinşakit'oğo mandale vi həysə çurpi ganxo bito!

Verse: 4  Link to rar   Vaxun ämälä eġala näsili saya göynul bakala muć̣uliġoy hama gele booz, me oćalxoy bitova šoṭoġo tadoz. Vaxun bakiṭoġoxun haq̇ale xeyir-bäräkätä oćali ćoyel bakala azuḳxon bitoṭin. *
   Vaxun əmələ eğala nəsili saya göynul bakala muč'uliğoy hama gele booz, me oç̌alxoy bitova şot'oğo tadoz. Vaxun bakit'oğoxun haq'ale xeyir-bərəkətə oç̌ali ç̌oyel bakala azuk'xon bitot'in. *

Verse: 5  Link to rar   Šoṭo görä ki, Bezi äyitäxun tene č̣eysay Avraham, Bezi iču bürüšalṭoġoy q̇a tapšurbalṭoġoy bitova bex ṗaṗesepsay, Bezi iču uḳalṭoġoy q̇a zombalṭoġoy bitova u͑mu͑xelaxsay".
   Şot'o görə ki, Bezi əyitəxun tene c'eysay Avraham, Bezi içu bürüşalt'oğoy q'a tapşurbalt'oğoy bitova bex p'ap'esepsay, Bezi içu uk'alt'oğoy q'a zombalt'oğoy bitova ǔmǔxelaxsay».

Verse: 6  Link to rar   Isaaḳenal Buxaʒ́uġon iču pi ḳinäḳ bi Gerara čurepi.
   İsaak'enal Buxačuğon içu pi k'inək' bi Gerara çurepi.

Verse: 7  Link to rar   Gerara bakalṭoġon Isaaḳi ṭo͑ġo͑l Rebeḳa aḳi šoṭay šu baksuna xavar haq̇aṭan Isaaḳen šoṭo iz xunči pine čalxesṭi. Šoṭin q̇ə͑nebsay ki, "bezi čuuxe" uḳayin, Rebeḳa išq̇arsuz efseynaḳ iču besṗaṭun, axəri Rebeḳa gele gözäley. *
   Gerara bakalt'oğon İsaak'i t'ǒğǒl Rebek'a ak'i şot'ay şu baksuna xavar haq'at'an İsaak'en şot'o iz xunçi pine çalxest'i. Şot'in q'ı̌nebsay ki, "bezi çuuxe" uk'ayin, Rebek'a işq'arsuz efseynak' içu besp'at'un, axıri Rebek'a gele gözəley. *

Verse: 8  Link to rar   Hametär, sa heq̇ädär vädä hari č̣ovaneki, sa ġiyal filisṭluġoy padčaġ Avimeleḳen ayninaxun be͑ġi aneḳi ki, mone, Isaaḳen Rebeḳane q̇už-q̇užbsa.
   Hametər, sa heq'ədər vədə hari c'ovaneki, sa ğiyal filist'luğoy padçağ Avimelek'en ayninaxun běği anek'i ki, mone, İsaak'en Rebek'ane q'uj-q'ujbsa.

Verse: 9  Link to rar   Ṭe vädä Avimeleḳen Isaaḳa iz ṭo͑ġo͑l ečesṭi pine: "Zu bezi aḳalṭu azḳi! Šo vi čuux baksunen heṭu görän nex ki "bezi xunčine"?" Isaaḳenal qaybaki pine: "Q̣ə͑zbi ki, bezi čuux baksuna avabakayṭun šo išq̇arsuzq̇an mandi pi za besṗaṭun".
   T'e vədə Avimelek'en İsaak'a iz t'ǒğǒl eçest'i pine: «Zu bezi ak'alt'u azk'i! Şo vi çuux baksunen het'u görən nex ki "bezi xunçine"?» İsaak'enal qaybaki pine: «Q'ı̌zbi ki, bezi çuux baksuna avabakayt'un şo işq'arsuzq'an mandi pi za besp'at'un».

Verse: 10  Link to rar   Avimeleḳen isä pine: "Vi xavar bune sal beš bel ḳä eyese bakoy? P̣oy soġo "šoṭay išq̇ar tene bu" pi vi čuġoxun basḳiyniy, ṭe vädä ḳä balyaniy? Moṭay hetär sa günax baksuna avanu hun?!"
   Avimelek'en isə pine: «Vi xavar bune sal beş bel k'ə eyese bakoy? P'oy soğo "şot'ay işq'ar tene bu" pi vi çuğoxun bask'iyniy, t'e vədə k'ə balyaniy? Mot'ay hetər sa günax baksuna avanu hun?!»

Verse: 11  Link to rar   Oša Avimeleḳen ǯamaata ämir tadi pine: "Me amdara q̇a izi čuġo äyit uḳal bakayin iz elmoġo haq̇anan!"
   Oşa Avimelek'en camaata əmir tadi pine: «Me amdara q'a izi çuğo əyit uk'al bakayin iz elmoğo haq'anan!»


Isaaḳi ǯöybaki taysun q̇a Avimeleḳäxun iräziluġ ġaćesun
İsaak'i cöybaki taysun q'a Avimelek'əxun irəziluğ ğaç̌esun


Verse: 12  Link to rar   Hametär, Isaaḳ ṭe oćala čurpi taxəl bisṭane burqi. Q̣ONƷ́UĠON šoṭo xeyir-bäräkäte tadi, šoṭinal ṭe usen sabać q̇at gele bare exṭi.
   Hametər, İsaak' t'e oç̌ala çurpi taxıl bist'ane burqi. Q'ONČUĞON şot'o xeyir-bərəkəte tadi, şot'inal t'e usen sabaç̌ q'at gele bare ext'i.

Verse: 13  Link to rar   Šo taysun varlayinšebaksay, hariyal gele varlu, c̣ila sa amdare baki.
   Şo taysun varlayinşebaksay, hariyal gele varlu, s'ila sa amdare baki.

Verse: 14  Link to rar   Filisṭluġon šoṭay sürüġo bakala eġel-kečiġoy q̇a beliġoy saya, šoṭay nökärxoy heq̇ädär baksuna aḳaṭan ičoġoy paxəlluġene biq̇i.
   Filist'luğon şot'ay sürüğo bakala eğel-keçiğoy q'a beliğoy saya, şot'ay nökərxoy heq'ədər baksuna ak'at'an içoğoy paxılluğene biq'i.

Verse: 15  Link to rar   Burṭunqi hälä iz bava Avrahami dööräxun mandi, šoṭay nökärxon kaśṗi č̣evḳi kärizxo bitova ḳul bapi buypsa.
   Burt'unqi hələ iz bava Avrahami döörəxun mandi, şot'ay nökərxon kašp'i c'evk'i kərizxo bitova k'ul bapi buypsa.

Verse: 16  Link to rar   Avimeleḳen ičin isä Isaaḳa metäre pi: "Memiin č̣eri taġayvax šaaṭe bakon, šoṭo görä ki, metär sa var-dövläti q̇onʒ́uġo beši ṭo͑ġo͑l efsun, yaxun zorbaṭu ečeri beš boš basṭun upsune".
   Avimelek'en için isə İsaak'a metəre pi: «Memiin c'eri tağayvax şaat'e bakon, şot'o görə ki, metər sa var-dövləti q'ončuğo beşi t'ǒğǒl efsun, yaxun zorbat'u eçeri beş boş bast'un upsune».

Verse: 17  Link to rar   Isaaḳal ṭeṭiin č̣eri, tašeri izi čadərxo Gerari däränene laxi čurḳala baki.
   İsaak'al t'et'iin c'eri, taşeri izi çadırxo Gerari dərənene laxi çurk'ala baki.

Verse: 18  Link to rar   Šo miya hariṭuxun oša bureqi izi bava Avrahamen kaśṗesṭi kärizxo ṗurum kaśṗi tämizbsa, šoṭo görä ki, Avraham ṗuriṭuxun oša filisṭluġon ṭe kärizxo bitova ḳul bapi buybeṭuniy. Šoṭin me kärizxoy loxol hälä izi bavan kaśṗesṭaṭan laxi c̣iyurxone laxsay.
   Şo miya harit'uxun oşa bureqi izi bava Avrahamen kašp'est'i kərizxo p'urum kašp'i təmizbsa, şot'o görə ki, Avraham p'urit'uxun oşa filist'luğon t'e kərizxo bitova k'ul bapi buybet'uniy. Şot'in me kərizxoy loxol hələ izi bavan kašp'est'at'an laxi s'iyurxone laxsay.

Verse: 19  Link to rar   Sa ġiyal Isaaḳi ḳulurxon ičoġoy bakala ṭe ganu täzä sa käriz kaśṗi u͑ġä͑lä xeṭun č̣evḳi,
   Sa ğiyal İsaak'i k'ulurxon içoğoy bakala t'e ganu təzə sa kəriz kašp'i ǔğə̌lə xet'un c'evk'i,

Verse: 20  Link to rar   ama gerarlu čobanxon "mo beši xene" pi, burṭunqi Isaaḳi čobanxoxun davabsa. Isaaḳenal iz loxol dava biti ṭe kärizi c̣iya "Eseḳe" * laxi.
   ama gerarlu çobanxon "mo beşi xene" pi, burt'unqi İsaak'i çobanxoxun davabsa. İsaak'enal iz loxol dava biti t'e kərizi s'iya "Esek'e" * laxi.

Verse: 21  Link to rar   Oša q̇eräz sa kärizṭun kaśṗi č̣evḳi, ama šoṭay loxolal davane biti, Isaaḳenal kärizi c̣iya "Siṭnane" * laxi.
   Oşa q'erəz sa kərizt'un kašp'i c'evk'i, ama şot'ay loxolal davane biti, İsaak'enal kərizi s'iya "Sit'nane" * laxi.

Verse: 22  Link to rar   Isaaḳen ṭeṭiin č̣eri taci q̇eräz ganune käriz kaśṗi. Me kärizi loxol dava tene biti, Isaaḳenal kärizi c̣iya "Rexovoṭ" * laxi pine: "Mone, č̣eveḳi Q̣ONƷ́UĠON yax iräät ganu, isä avuzbaki tum sakalyan me oćala".
   İsaak'en t'et'iin c'eri taśi q'erəz ganune kəriz kašp'i. Me kərizi loxol dava tene biti, İsaak'enal kərizi s'iya "Rexovot'" * laxi pine: «Mone, c'evek'i Q'ONČUĞON yax irəət ganu, isə avuzbaki tum sakalyan me oç̌ala».

Verse: 23  Link to rar   Oša Isaaḳ ṭeṭiin č̣eri Beer-Ševinane taci.
   Oşa İsaak' t'et'iin c'eri Beer-Şevinane taśi.

Verse: 24  Link to rar   Ṭiya ṗaṗi šü Q̣ONƷ́UĠON Isaaḳa aḳeci pine: "Zu vi bava Avrahami Buxaʒ́uxzu. Q̣ə͑maba, Zu vaxunzu, Bezi ḳul Avrahama görä va xeyir-bäräkät tadi vaxun bakiṭoġoy saya avuzboz Zu".
   T'iya p'ap'i şü Q'ONČUĞON İsaak'a ak'eśi pine: «Zu vi bava Avrahami Buxačuxzu. Q'ı̌maba, Zu vaxunzu, Bezi k'ul Avrahama görə va xeyir-bərəkət tadi vaxun bakit'oğoy saya avuzboz Zu».

Verse: 25  Link to rar   Isaaḳenal ṭeṭiya q̇urban ečala ga düzbi Q̣ONƷ́UĠOY c̣iya duġi šükürebi. Šoṭin ečeri izi čadərxoval miya laxiṭuxun oša ḳulurxon sa kärizal kaśṗi č̣evṭunḳi.
   İsaak'enal t'et'iya q'urban eçala ga düzbi Q'ONČUĞOY s'iya duği şükürebi. Şot'in eçeri izi çadırxoval miya laxit'uxun oşa k'ulurxon sa kərizal kašp'i c'evt'unk'i.

Verse: 26  Link to rar   Hame vädine Avimeleḳen izi yön kul bakala Axuzzaṭa q̇a izi q̇ošuni kalo bakala P̣iḳola exṭi hayzeri Geraraxun Isaaḳi ṭo͑ġo͑le hari.
   Hame vədine Avimelek'en izi yön kul bakala Axuzzat'a q'a izi q'oşuni kalo bakala P'ik'ola ext'i hayzeri Geraraxun İsaak'i t'ǒğǒle hari.

Verse: 27  Link to rar   Isaaḳen šoṭoġo aḳi pine: "Ḳä pinan hare bezi ṭo͑ġo͑l? P̣oy za aḳala pul tevä͑x buy, ef eyexun č̣erene unḳon za efi ṭo͑ġo͑lxun šäṗesun?"
   İsaak'en şot'oğo ak'i pine: «K'ə pinan hare bezi t'ǒğǒl? P'oy za ak'ala pul tevə̌x buy, ef eyexun c'erene unk'on za efi t'ǒğǒlxun şəp'esun?»

Verse: 28  Link to rar   Šoṭoġon qaybaki metärṭun pi: "Q̣ONƷ́UĠOY vi bać̣ane čurpsun piin be͑śe. Šoṭo göräl, eki suna elasṗi äyit taden, barta yan beš arane sa iräziluġ ġaćeġen. Elasṗa ki,
   Şot'oğon qaybaki metərt'un pi: «Q'ONČUĞOY vi bač'ane çurpsun piin běše. Şot'o görəl, eki suna elasp'i əyit taden, barta yan beş arane sa irəziluğ ğaç̌eğen. Elasp'a ki,

Verse: 29  Link to rar   yax vaxun pisluġ tene lafṭal, axəri yanal va pisluġ teyan be. Vaynaḳ hämišä beši piin loxol gane bake, ǯöybaki taġaṭanal yaxun pis äyit ten ibake. Isä mone, Q̣ONƷ́UĠOY xeyir-bäräkätä haq̇i sa amdarnu hun".
   yax vaxun pisluğ tene laft'al, axıri yanal va pisluğ teyan be. Vaynak' həmişə beşi piin loxol gane bake, cöybaki tağat'anal yaxun pis əyit ten ibake. İsə mone, Q'ONČUĞOY xeyir-bərəkətə haq'i sa amdarnu hun».

Verse: 30  Link to rar   Me äyitmoġo ibakaṭan Isaaḳen ečeri šoṭoġo q̇onaġebi, arciyal bito sagala käyi-u͑ṭunġi.
   Me əyitmoğo ibakat'an İsaak'en eçeri şot'oğo q'onağebi, arśiyal bito sagala kəyi-ǔt'unği.

Verse: 31  Link to rar   Äyč̣indäri savaxṭan isä suna elasṗi äyit tadiṭuxun oša Isaaḳen šoṭoġo iz xeyir-bäräkätä tadi yaq̇anebadi, šoroxal ičoġoy üḳ arxayin hayzeri taṭunci.
   Əyc'indəri savaxt'an isə suna elasp'i əyit tadit'uxun oşa İsaak'en şot'oğo iz xeyir-bərəkətə tadi yaq'anebadi, şoroxal içoğoy ük' arxayin hayzeri tat'unśi.

Verse: 32  Link to rar   Haṭe ġi Isaaḳi ḳulurxon hari iču piṭun ki, kärizṭun kaśṗi č̣evḳe, šoṭo pulxašluġ tadi piṭun: "Xeyan bä͑ġä͑be!"
   Hat'e ği İsaak'i k'ulurxon hari içu pit'un ki, kərizt'un kašp'i c'evk'e, şot'o pulxaşluğ tadi pit'un: «Xeyan bə̌ğə̌be!»

Verse: 33  Link to rar   Isaaḳenal ečeri ṭe kärizi c̣iya "Ševane" * laxi, šoṭo görä häysääl ṭe käriz bakala šähäri c̣iya "Beer-Ševaṭun" nex. *
   İsaak'enal eçeri t'e kərizi s'iya "Şevane" * laxi, şot'o görə həysəəl t'e kəriz bakala şəhəri s'iya "Beer-Şevat'un" nex. *
   Esavi xeṭluġoxun čuux haq̇sun
   Esavi xet'luğoxun çuux haq'sun

Verse: 34  Link to rar   Esavi q̇ərx yäš bakaṭan šoṭin taci xeṭluġoy xuyärmoġoxune ičeynaḳ čuux ečeri: soġo Beeri xuyär Yehudiṭaney, ṭe soġoval Eloni xuyär Basemaṭ.
   Esavi q'ırx yəş bakat'an şot'in taśi xet'luğoy xuyərmoğoxune içeynak' çuux eçeri: soğo Beeri xuyər Yehudit'aney, t'e soğoval Eloni xuyər Basemat'.

Verse: 35  Link to rar   Šorox ṗo͑ġä͑l hari Isaaḳeynaḳ q̇a Rebeḳaynaḳ biin q̇ać̣ṭun baki.
   Şorox p'ǒğə̌l hari İsaak'eynak' q'a Rebek'aynak' biin q'ač't'un baki.
Next part


This text is part of the TITUS edition of Biblia Udica, Versio Nizhensis: Vetus Testamentum.

Copyright TITUS Project, Frankfurt a/M, 2.9.2025. No parts of this document may be republished in any form without prior permission by the copyright holder.